La Bible : une force dans votre vie

Neʼe tokoni ia te Tohi-Tapu ki te toko lauʼi miliona hahaʼi ke natou fetogi tonatou maʼuli ke lelei age. Koteā lā ʼihi pelesepeto Fakatohi-tapu, mokā tou maʼuliʼi, ʼe tokoni mai anai ke tou tauʼi te ʼu fihifihia ʼe tau mo tātou ʼi te temi nei? ʼE mahino ia,ʼe kotou maʼu anai te tali ki te fehuʼi ʼaia mokā kotou sioʼi anai te foʼi ʼata La Bible : une force dans votre vie (Te Tohi-Tapu: Ko He Mālohi ʼi Tokotou Maʼuli), te lua koga ʼo te ʼu koga e tolu ʼe maʼu ʼi te foʼi ʼata La Bible : un livre historique et prophétique. ʼI takotou ʼosi sioʼi ia te foʼi ʼata ʼaia, ʼe kotou lava tali anai koa ki te ʼu fehuʼi ʼaenī:

(1) He koʼē ko te Tohi-Tapu ʼe ko he tohi ʼe lelei ʼaupitō tona faʼahiga tohi? (Hep. 4:12) (2) Kapau ʼe lava tokoni te Tohi-Tapu ki te hahaʼi ke natou fetogi tonatou maʼuli ke lelei age, he koʼē koa ʼe lahi ʼaupitō ia te ʼu fihifihia ʼi te mālamanei? (3) Koteā te kupu taki ʼo te Tohi-Tapu? (4) Koteā ia te ʼu vaega ʼaē neʼe talanoa kiai te foʼi ʼata, ʼe lava tokoni ki te hahaʼi ʼohoana (a) ke natou hikihiki tonatou ʼu felōgoi pea (b) ke natou loto lolomi? (5) Koteā te fetogi lelei ʼaē ʼe hoko mokā maʼu e he taumātuʼa te manatu Fakakilisitiano ʼo ʼuhiga mo te maʼuli fakafāmili? (Efe. 5:28, 29) (6) Koteā te faʼifaʼitaki lelei ʼaē neʼe tuku e Sehova ki te ʼu mātuʼa? (Mko. 1:9-11) (7) Koteā ʼaē ʼe lava fai e te ʼu mātuʼa ke lelei te ako fakafāmili? (8) ʼO hilifaki ki te ako Fakatohi-tapu, koteā te tahi faʼahi ʼaē ʼe fakalotomālohiʼi e te Folafola ʼa te ʼAtua ke foaki e te ʼu mātuʼa ki tanatou fānau? (9) ʼAki te ʼu tokoni Fakatohi-tapu, ʼe lava feafeaʼi ki te ʼu fāmili ke natou māui mālie ʼi te faʼahi fakapaʼaga? (10) Koteā te ʼu pelesepeto Fakatohi-tapu ʼo ʼuhiga mo te aga maʼa, mo te fakaʼaogaʼi ʼo te toloke pea mo te ʼinu kava fakavale, pea mo te maʼuli hoha ʼe natou tokoni anai ki te fakasiʼisiʼi ʼo te ʼu mahaki fakasino? (11) Ko te ʼu fakapapau fea ʼa te Tohi-Tapu ʼe lava tokoni mai kiā tātou? (Sopo 33:25; Pes. 145:16) (12) Koteā ʼaē kua fetogi ai tokotou maʼuli ʼi takotou mahino ki te ʼu akonaki ʼi te Folafola ʼa te ʼAtua? (13) ʼE feafeaʼi hakotou fakaʼaogaʼi te foʼi ʼata moʼo tokoni ki te hahaʼi?