ʼE Ke Lava Fakaovi Feafeaʼi Ki Te ʼAtua?

1. ʼE fakalogo koa e te ʼAtua ia te ʼu faikole fuli?

ʼE fakaafe e te ʼAtua ia te hahaʼi fuli ke natou fakaovi kiā te ia ’i te faikole. (Pesalemo 65:3) Kae ʼe mole ina fakalogo pea mo ina tali te ʼu faikole fuli. Ohagē lā, ko te faikole ʼa he tagata ʼe ina gaohi koviʼi ia tona ʼohoana, ʼe mole ina fia fakalogo anai. (1 Petelo 3:7) ʼO toe fēia pē mo te kau Iselaele ʼaē neʼe natou haga fai ia te ʼu meʼa ʼaē ʼe kovi, neʼe fakafisi te ʼAtua ki ʼanatou faikole. ʼE mahino ia, ko te faikole ʼe ko he fealagia makehe ia. Kae ʼe feala pē ki te ʼAtua ke ina tali ia te ʼu faikole ʼa he tagata neʼe agahala mamafa mo kapau ʼe fakahemala.​—Lau ia Esaia 1:15; 55:7.

Vakaʼi Te ʼAta ʼE Fakalogo Koa e Te ʼAtua Te ʼu Faikole Fuli?

2. ʼE tonu ke feafeaʼi ʼatatou faikole?

ʼE kau tatatou faikole ki tatatou tauhi ʼaē ki te ʼAtua. Koia lā ʼaē ʼe tonu ai ke tou faikole ʼāteaina pē ki totatou Tupuʼaga, ʼaē ko Sehova. (Mateo 4:10; 6:9) Kae mai tona ʼaluʼaga ʼaē ʼe tou heʼe haohaoa, ʼe tonu ke tou faikole ʼi te huafa ʼo Sesu, koteʼuhi neʼe mate ʼuhi ko ʼatatou agahala. (Soane 14:6) ʼE mole loto ia Sehova ke tou lau he ʼu kole peʼe ke lau fakaʼatamai. Kae ʼe loto ia ke tou fakahā age ʼi ʼatatou faikole te ʼu meʼa ʼaē ʼe ʼi totatou loto.​—Lau ia Mateo 6:7; Filipe 4:6, 7.

ʼE feala ki totatou Tupuʼaga ke ina logoʼi te ʼu faikole ʼaē ʼe fai fakalogologo. (1 Samuele 1:12, 13) ʼE ina fakaafe tātou ke tou faikole ʼi te ʼu ʼaluʼaga fuli, ohagē lā ko te ʼuhu peʼe ko te afiafi, ʼi te temi kai, peʼe mokā ʼe tou felāveʼi mo he ʼu fihifihia.​—Lau ia Pesalemo 55:23; Mateo 15:36.

3. He koʼē ʼe fono ia te kau Kilisitiano?

ʼE mole faigafua tatatou fakaovi ʼaē ki te ʼAtua, koteʼuhi ʼe tou māʼuʼuli mo te ʼu hahaʼi ʼe mole natou tui ki te ʼAtua pea ʼe natou manukinukiʼi tana fakapapau ʼaē ʼo ʼuhiga mo te tokalelei ʼi te kele. (2 Timoteo 3:1, 4; 2 Petelo 3:3, 13) Koia ʼe ʼaoga ai ke tou fakatahi mo nātou ʼaē ʼe tui tahi mo tātou ke tou fefakalotomālohiʼaki.​—Lau ia Hepeleo 10:24, 25.

Ko te fakatahi mo nātou ʼaē ʼe natou ʼoʼofa ki te ʼAtua ʼe tokoni kiā tātou ke tou fakaovi ki te ʼAtua. Ko te ʼu fono ʼa te kau Fakamoʼoni ʼa Sehova ʼe ko te ʼu faigamālie lelei ʼaia ke fakalotomālohiʼi ia tātou e te tui ʼa ʼihi.​—Lau ia Loma 1:11, 12.

4. ʼE feala feafeaʼi hau fakaovi ki te ʼAtua?

ʼE feala ke ke fakaovi kiā Sehova ʼaki tau metitāsio ki te ʼu meʼa ʼaē ʼe ke ako ʼi tana Folafola. Fakakaukauʼi ʼana gāue, ʼana tokoni, pea mo ʼana fakapapau. Ko te metitāsio pea mo te faikole ʼe nā fakatuputupu iā tātou te loto fakafetaʼi ʼo ʼuhiga mo te ʼofa ʼo te ʼAtua pea mo tona poto.​—Lau ia Sosue 1:8; Pesalemo 1:1-3.

ʼE feala pē ke ke fakaovi ki te ʼAtua mo kapau ʼe ke falala pea mo tui kiā te ia. Ko te tui ʼe hagē ko he meʼa maʼuli ʼe maʼua ke fafaga. Koia ʼe tonu ai ke ke fafaga tuʼumaʼu tau tui ʼaki tau metitāsio ki te ʼu meʼa ʼaē ʼe fakatafito kiai tau tui.​—Lau ia Mateo 4:4; Hepeleo 11:1, 6.

5. Koteā te ʼu lelei ʼe feala ke ke maʼu ʼi tau fakaovi ʼaē ki te ʼAtua?

ʼE tokaga ia Sehova kiā nātou ʼaē ʼe ʼoʼofa kiā te ia. ʼE feala ke ina puipui ia nātou mai te ʼu meʼa fuli ʼaē ʼe feala ke vaivai ai tanatou tui pea mo tanatou ʼamanaki ʼaē ki te maʼuli heʼegata. (Pesalemo 91:1, 2, 7-10) ʼE ina fakatokagaʼi tātou ʼo ʼuhiga mo te ʼu faʼahiga maʼuli ʼaē ʼe feala ke tuʼutāmaki ai totatou mālōlō fakasino pea mo totatou fiafia. ʼE akoʼi mai e Sehova ia te faʼahiga maʼuli ʼaē ʼe lelei tokotahi.​—Lau ia Pesalemo 73:27, 28; Sakopo 4:4, 8.