Mai Te ʼUluaki Hau ʼo Iselaele ʼo Aʼu Ki Te Nofo Popūla ʼi Papiloni

Ko Saulo neʼe ko te ʼuluaki hau ʼo Iselaele. Kae neʼe līaki ia ia e Sehova, pea neʼe fili ia Tavite ke ina fetogi ia ia ʼi te tuʼulaga hau. ʼE lahi te ʼu meʼa ʼaē ka tou ako anai ʼo ʼuhiga mo Tavite. ʼI tona temi tūpulaga, neʼe ina tauʼi te tagata lahi ʼaupito ko Koliate. Ki muli age neʼe hola mai te Hau maheka ʼaē ko Saulo. Pea ko te fafine finemui ʼaē ko Apikaela neʼe ina tāʼofi ia ia ke ʼaua naʼa ina fai he aga ʼe kovi.

Pea ʼe lahi anai te ʼu meʼa ʼaē ka tou ako ʼo ʼuhiga mo Salomone te foha ʼo Tavite, ʼaē neʼe hoa atu kia Tavite ʼi te tuʼulaga hau ʼi Iselaele. Ko te ʼu ʼuluaki hau e tolu ʼo Iselaele, neʼe nātou takitahi nofo hau ia taʼu e 40. ʼI te ʼosi mate ʼo Salomone, neʼe vaelua ia Iselaele ko puleʼaga e lua, ko te puleʼaga ʼo te potu tokelau pea mo te puleʼaga ʼo te potu toga.

Ko te ʼu telepi e hogofulu ʼo te puleʼaga ʼo te potu tokelau neʼe tuʼu ia taʼu e 257 ʼi muʼa ʼo tona fakaʼauha e te kau Asilia. Pea hili kiai taʼu e 133, pea toe fakaʼauha foki mo te ʼu telepi e lua ʼo te puleʼaga ʼo te potu toga. ʼI te temi ʼaia neʼe ʼave ai te kau Iselaelite ke nātou ʼolo ʼo nofo popūla ʼi Papiloni. Koia ko te Faʼahi FĀ, ʼe talanoa ki te hisitolia ʼaē neʼe hoko ia taʼu e 510, ʼi te lolotoga ʼo te temi ʼaia neʼe hoko ai te ʼu meʼa ʼe tau mo feʼauga ke tokagaʼi.