Kapite 7

Ko Sesu Pea Mo Te Kau Masi

KOʼENI te ʼu tagata ʼe ʼōmai mai te potu Hahake. Ko te kau masi, te ʼu tagata ʼe nātou ʼui ʼe nātou ʼiloʼi tomuʼa te meʼa ka hoko ʼaki te ʼu tuʼulaga ʼo te ʼu fetuʼu. ʼI tonatou fenua ʼi te potu Hahake, neʼe nātou sio ki te fetuʼu foʼou, pea nātou muliʼi te fetuʼu ia kilometa ʼe lauʼi teau ʼo kaku ai ki Selusalemi.

ʼI tanatou hū ki te kolo, neʼe fehuʼi age e te kau masi ki te hahaʼi: “ ʼE ʼifea ia ia ʼaē kua tupu ko te tuʼi ʼo te kau Sutea? He neʼe kua mātou mamata ki tona fetuʼu ʼi tamatou kei nonofo ʼi te potu hahake, pea kua mātou ʼōmai ko te hu kia te ia.”

Neʼe mole lelei te loto ʼo te hau ko Helote ʼaē ʼe nofo ʼi Selusalemi ʼi tana ʼiloʼi te meʼa ʼaia, koia neʼe ina tānaki ai te kau pelepitelo pule pea ina fehuʼi age kia nātou pe ko te potu fea koa ʼaē ʼe tonu ke tupu ai ia Kilisito. ʼAki tanatou ʼiloʼi te Tohi-Tapu, neʼe nātou tali age: “ ʼI Petelehemi.” Neʼe fekauʼi ai e Helote te kau masi ke ʼolo age pea ina ʼui age kia nātou: “Koutou ʼolo ʼo kumikumi lelei te kiʼi tamasiʼi, pea ka koutou maʼu, pea ke koutou toe liliu mai ʼo fakahā mai kia te ʼau, kau ʼalu atu ai mo ʼau ʼo hu kia te ia.” Kae, ko te meʼa ia ʼaē neʼe loto moʼoni ki ai, ke ina ʼiloʼi, peʼe ʼifea te tamasiʼi ke matehi!

ʼI te mavae ʼa te kau masi, neʼe hoko te meʼa faikehe. Ko te fetuʼu ʼaē neʼe nātou sio kiai ʼi te potu Hahake koʼeni ʼe ʼalu ʼi muʼa ia nātou. ʼE mole hage ia ko te ʼu fetuʼu māhani; neʼe hā ia moʼo taki ʼonatou. Neʼe nātou muliʼi te fetuʼu ʼo aʼu ki tana tuʼu, ʼi te fuga ʼapi tonu ʼaē ʼe nonofo ai Sosefo pea mo Malia.

ʼI tanatou hū atu ki fale, neʼe nātou maʼu ia Malia mo tana tamasiʼi, ko Sesu. Neʼe nātou tulolo fuli atu aipe ʼi ʼona muʼa. ʼOsi ʼaia, pea nātou foaki ki ai tonatou ʼu meʼa ʼofa: ko te aulo, te olipano pea mo te mila. Pea ki muli age, ʼi te temi neʼe tonu ke nātou liliu ai kia Helote ʼo fakahā ki ai te potu ʼe nofo ai te tamasiʼi, neʼe fakaʼiloʼilo e Sehova kia nātou ʼaki he moemisi ke ʼaua naʼa nātou fai te meʼa ʼaia. Pea nātou toe liliu ai ki tonatou fenua ʼi te tahi ala.

ʼI takotou tonu, ko ai ʼaē neʼe ina fakaʼasi te fetuʼu ʼi te lagi pea mo faigaʼi ke feʼaluʼaki moʼo taki ʼo te kau masi? Koutou manatuʼi, ko te fetuʼu ʼaia neʼe mole ina ʼuluaki taki te kau masi kia Sesu ʼi Petelehemi. Ka neʼe ina taki muʼa ia nātou ki Selusalemi, ʼonatou felāveʼi ai mo te hau ko Helote, ʼaē neʼe ina fia matehi ia Sesu. Pea neʼe feala pe ke hoko te meʼa ʼaia mo ka na pau neʼe mole fakaʼiloʼilo e te ʼAtua ki te kau masi ke ʼaua naʼa nātou fakahā te potu ʼaē ʼe nofo ai ia Sesu. Ko Satana te Tevolo, te fili ʼo te ʼAtua, koia ʼaē neʼe loto ke matehi ia Sesu, pea neʼe ina fakaʼaogaʼi te fetuʼu ʼaia ke fakahoko te meʼa ʼaē ʼe loto ki ai. Mateo 2:1-12; Mikea 5:2.

▪ Koteā ʼaē ʼe hā mai ai ko te fetuʼu ʼaē neʼe sio kiai te kau masi ʼe mole tatau ia mo te ʼu fetuʼu māhani?

▪ Neʼe nofo koa Sesu ʼifea ʼi te temi ʼaē neʼe maʼu atu ai e te kau masi?

▪ He koʼe ʼe tou ʼiloʼi ko Satana ʼaē neʼe ina fakaʼasi te fetuʼu ʼaia moʼo taki ʼo te kau masi?