Ko Te Māhaga Neʼe Kehekehe

ʼE LAHI te kehekehe ʼo te ʼu tama e toko lua ʼaē ʼe tuʼu ʼi te paki. ʼE koutou ʼiloʼi koa tonā ʼu higoa? Ko te tama kapu manu ʼe ko Esau, pea ko te tama tauhi ōvi ʼe ko Sakopo.

Ko Esau pea mo Sakopo neʼe ko te māhaga ʼa Isaake pea mo Lepeka. Ko tanā tāmai ko Isaake, neʼe lahi tona ʼofa kia Esau, koteʼuhi neʼe ko he tama kapu manu faiva pea neʼe ina ʼaumai te meʼa kai ʼa te famili. Kae neʼe lahi te ʼofa ʼo Lepeka kia Sakopo, koteʼuhi neʼe aga fakatokatoka pea mo fakaʼauʼauganoa.

Neʼe kei maʼuli tanā kui tagata ko Apalahamo, pea ʼe feala ke tou fakakaukauʼi pe neʼe feafeaʼi te fakalogo ʼa Sakopo ki tana kui mokā palalau ʼo ʼuhiga mo Sehova. Pea neʼe mate leva ia Apalahamo ʼi tona taʼu 175, ʼi te taʼu 15 ʼo te māhaga.

ʼI te taʼu 40 ʼo Esau, neʼe ʼohoana ia mo te ʼu fafine e lua mai te fenua ʼo Kanaane. Ko te meʼa ʼaia neʼe lotomamahi ʼaupito ai ia Isaake pea mo Lepeka, koteʼuhi neʼe mole tauhi te ʼu fafine ʼaia kia Sehova.

Pea ʼi te tahi ʼaho neʼe hoko leva te meʼa neʼe ʼita ʼaupito ai ia Esau ki tona tēhina ko Sakopo. Kua hoko mai te temi ʼaē ʼe tonu ai ke foaki e Isaake te tapuakina ki tona ʼuluaki foha. Mai tona ʼaluʼaga ʼaē ʼe muʼa ia Esau ia Sakopo, neʼe fakatalitali ia Esau ke ina maʼu te tapuakina ʼaia. Kae neʼe kua ʼosi fakatau e Esau te tapuakina ʼaia kia Sakopo. Tahi ʼaē meʼa, ʼi te tupu ake ʼo te ʼu tama ʼaia e lua neʼe ʼui e te ʼAtua, ʼe foaki anai te tapuakina kia Sakopo. Pea neʼe ko te meʼa ʼaia ʼaē neʼe hoko. Neʼe foaki e Isaake te tapuakina ki tona foha ko Sakopo.

Ki muli age, ʼi te ʼiloʼi e Esau ia te faʼahi ʼaia, neʼe ʼita ia kia Sakopo. Neʼe lahi ʼaupito tona ʼita ʼo ina ʼui ai ʼe ina matehi anai ia Sakopo. ʼI te logo ʼa Lepeka ki te faʼahi ʼaia, neʼe lotomamahi ʼaupito ia. Pea neʼe ina ʼui fēnei ki tona ʼohoana ko Isaake: ‘ ʼE ko he meʼa fakamataku anai mo kapau ʼe toe ʼohoana ia Sakopo mo he fafine ʼi te ʼu fafine ʼo Kanaane.’

Neʼe pāuiʼi ai e Isaake tona foha ko Sakopo pea ina ʼui age ki ai: ‘ ʼAua naʼa ke ʼohoana mo he fafine Kanaane. ʼAlu ki te ʼapi ʼo tau kui ʼaē ko Petuele ʼi Halane. Pea ke ʼohoana mo he taʼahine ʼi te ʼu ʼofafine ʼo tona foha ʼaē ko Lapane.’

Neʼe fakalogo ia Sakopo ki tana tāmai, pea neʼe ʼalu ai ki te koga meʼa ʼaē neʼe nonofo ai tona ʼu kāiga ʼi Halane.