Kapite 9

Ko Sesu ʼi Tana Kei Veliveli

KO NASALETI, ʼi te temi ʼaē neʼe kei veliveli ai Sesu, neʼe ko te kolo veliveli pea neʼe mole maʼuhiga ia. ʼE tuʼu ia ʼi Kalilea, ʼi te koga fenua e moʼugaʼia, pea ʼe mole mamaʼo ia mo te mafa matalelei ʼo Siseleele.

Ko te lagi taʼu lua ʼaia ʼo Sesu, ʼi tanatou tau mai Esipito mo Sosefo pea mo Malia, pea ʼi te temi ʼaia neʼe ko ia pe tokotahi te tamasiʼi ʼa Malia, kae neʼe mole nofo tokotahi ia ʼo fualoa. He neʼe tupu leva ia Sake, Sosefo, Simeone pea mo Suta, pea mo te ʼu taʼahine. Neʼe lagi feala pe ke toko ono te ʼu tēhina pea mo te ʼu tokolua ʼo Sesu e mumuli ia ia.

Ka neʼe ʼi ai foki te tahi ʼu kāiga ʼo Sesu. Kua tou ʼiloʼi tona tēhina mataʼi tama ko Soane, ʼaē ʼe muʼa atu ia ia, ʼe nofo ʼi Sutea. ʼO ōvi ki Kalilea, ʼe nofo ai ia Salome, ʼaē ʼe ko te tēhina ʼo Malia. Neʼe ʼohoana ia mo Sepeteo; koia ko tanā ʼu tama ʼaē e lua, ko Sake pea mo Soane, ko te ʼu tēhina mataʼi tama ia ʼo Sesu. ʼE mole tou ʼiloʼi pe neʼe fakatahi ia Sesu ʼo loaloaga ʼi tana kei veliveli pea mo te ʼu tama ʼaia, kae ki muli mai neʼe nā liliu ʼo kau fagona tahi mo ia.

Neʼe maʼua ke gāue kinakina ia Sosefo moʼo taupau ʼo tona famili. Ko tana gāue ko te tufuga ʼakau. Neʼe ina taupau ia Sesu ohage pe ko hona foha totonu; koia neʼe higoaʼi ai Sesu ko te “foha ʼo te tagata tufuga ʼakau”. Neʼe ako e Sosefo tana gāue kia Sesu ʼo poto lelei ai ʼi te gāue. Koia ki muli mai, neʼe ʼui fēnei ai e te hahaʼi ʼo ʼuhiga mo Sesu: ‘Ko te tagata tufuga ʼakau.’

Ko te maʼuli ʼo te famili ʼo Sosefo neʼe fakahaga aipe ki te tauhi ʼaē kia Sehova ʼAtua. ʼI tanā mulimuli ki te Lao ʼa te ʼAtua, neʼe foaki e Sosefo pea mo Malia ki tanā fānau te akonaki fakalaumālie ‘ ʼi te temi ʼe nātou nonofo ai ʼi tonatou loto fale, ʼi te temi ʼe nātou ʼolo ai ʼi te ala, ʼi te temi ʼe nātou momoe ai, pea mo te temi ʼe nātou ʼaʼala ake ai’. ʼI Nasaleti ʼe ʼi ai te sinakoka, ʼe tou ʼiloʼi papau neʼe ʼave tuʼumaʼu e Sosefo tona famili kiai. Kae ko tonatou fiafia lahi, ʼe hoki nātou ʼiloʼi mokā hoko tanatou ʼolo ki te fale lotu ʼo Sehova ʼaē ʼe ʼi Selusalemi. Mateo 13:55, 56; 27:56; Maleko 15:40; 6:3; Teutalonome 6:6-9.

▪ Neʼe feala koa ke tokofia te ʼu tēhina pea mo te ʼu tokolua ʼo Sesu neʼe mumuli ia ia, pea ʼe koutou ʼiloʼi koa he higoa ʼo niʼihi ia nātou?

▪ Laulau mai te ʼu tēhina mataʼi tama e tolu ʼo Sesu kua tou ʼiloʼi lelei?

▪ Koteā te gāue ʼaē neʼe fakamulimuli ʼo fai e Sesu pea koteā tona tupuʼaga?

▪ Ko te faʼahiga akonaki maʼuhiga feafeaʼi ʼaē neʼe foaki e Sosefo ki tona famili?