Koutou Tutuʼu Maʼu Pea Ke Koutou Mamata Ki Te Fakamaʼuli ʼa Sehova!
“Koutou tutuʼu ki ʼokotou tuʼulaga, koutou tutuʼu maʼu, pea ke koutou mamata ki te fakamaʼuli ʼa Sehova maʼa koutou.”—2 Fakamatala 20:17.
1, 2. He koʼe koa ko te ʼohofi ka ʼamanaki fakahoko e “Koke ʼo te fenua ʼo Makoke” ʼe kovi age ʼi te ʼu fai fakapō ʼaē ʼe fai ʼi te malamanei katoa?
KO TE terrorisme ʼe ʼui e ʼihi ʼe ko he ʼohofiʼi ʼo he hahaʼi ʼo te malamanei peʼe ko he sivilisasio. ʼE mahino ia ko te taʼi aga ʼaia ʼe mole tonu ke meʼa noaʼi. Kae ʼi te tahi faʼahi, ʼe ʼi ai te tahi ʼohofi ʼe kovi age kae ʼe mole faʼa tokagaʼi peʼe mole tokagaʼi pe la e te hahaʼi ʼo te malamanei. Ko te ʼohofi fea ʼaia?
2 ʼE ko te ʼohofi ka fakahoko e “Koke ʼo te fenua ʼo Makoke,” ʼaē ʼe palalau kiai te Tohi-Tapu ia Esekiele kapite 38. ʼE ko he fakalalahi koa te ʼui ʼaē ko te ʼohofi ʼaia ʼe kovi age ia ʼi te ʼu fai fakapō ʼaē ʼe fai ʼi te malamanei katoa? Kailoa ia, koteʼuhi ko te ʼohofi ʼa Koke ʼe mole fai ia ki he ʼu puleʼaga fakatagata. ʼE ina ʼohofi te puleʼaga ʼo te ʼAtua ʼaē ʼe ʼi selo! Kae ʼe mole hage ia ko te tagata, ʼaē ʼe tuʼakoi tana ʼu mālo ʼi te ʼu fai fakapō ʼa te tagata, koteʼuhi ko te Tupuʼaga ʼe ina lavaʼi katoa te tauʼi ʼo te ʼohofi ʼa Koke ʼaē ʼe kovi age.
Ko He ʼOhofi ʼo Te Puleʼaga ʼo Te ʼAtua
3. Koteā te fakaafe ʼaē neʼe fai ki te kau takitaki ʼo te malamanei ke nātou fai talu mai te taʼu 1914, pea ʼe nātou tali feafeaʼi ki te faʼahi ʼaia?
3 Ko te fefihiʼaki ʼo te Hau ʼa te ʼAtua ʼaē ʼe lolotoga ʼafio nei mo te tuʼu agakovi ʼa Satana, neʼe kamata mai te fakatuʼu ʼo te Puleʼaga ʼo te ʼAtua ʼi selo ʼi te taʼu 1914. ʼI te temi ʼaia neʼe fakatokaga age ki te ʼu pule fakatagata ke nātou fakalogo ki te Pule ʼaē neʼe fili e te ʼAtua. Kae neʼe nātou fakafisi kiai, ohage ko tona fakakikite ʼaenī: “Ko te ʼu hau ʼo te kele kua nātou teuteu ki te tau pea ko te kau ʼaliki kua nātou fakatahitahi ohage ko he tokotahi ʼo fakafeagai kia Sehova pea mo ia ʼaē kua ina fakanofo, ʼo ʼui maʼa nātou: ‘Tou motumotuhi tanā ʼu lalava pea tou laku ke mamaʼo tanā ʼu maea!’ ” (Pesalemo 2:1-3) Ko te fakafifihi ki te pule ʼo te Puleʼaga ʼe ʼiloga lelei anai lolotoga te ʼohofi ka fai e Koke ʼo Makoke.
4, 5. ʼE lava tauʼi feafeaʼi e te tagata ia te puleʼaga fakapulipuli ʼo te ʼAtua ʼaē ʼe ʼi selo?
4 ʼE lagi tou feʼekeʼaki peʼe lava tauʼi feafeaʼi e te tagata ia he puleʼaga fakapulipuli ʼi selo. ʼE fakahā mai e te Tohi-Tapu, ko te puleʼaga ʼaia ʼe faʼufaʼu e “te toko teau-fāgofulu-ma-fā afe ʼaē neʼe totogi mai te kele,” pea mo “te Akeno,” ia Kilisito Sesu. (Apokalipesi 14:1, 3, MN; Soane 1:29) Mai te ʼaluʼaga ʼaē ko te puleʼaga foʼou ʼe tuʼu ʼi selo, koia ʼe ʼui ai ʼe ko “te ʼu lagi foʼou,” pea ko tana ʼu hahaʼi fakalogo ʼaē ʼe ʼi te kele, ʼe fakahigoaʼi ko “te kele foʼou.” (Isaia 65:17; 2 Petelo 3:13) Ko te kaugamālie ʼo te toko 144 000 kaugā pule mo Kilisito kua nātou mamate agatonu. Kua nātou fakahā ai ʼe nātou tau mo feʼauga ke nātou fai tanatou ʼu gāue foʼou ʼi selo.
5 Kae ko te toe ʼo te toko 144 000 ʼe kei nātou nonofo ʼi te kele. ʼI te toko 15 000 000 tupu hahaʼi ʼaē neʼe nātou kau ki te Ōmoe ʼa te ʼAliki ʼi te taʼu 2002, neʼe ko te toko 8 760 ʼaē neʼe nātou fakahā tanatou ʼamanaki neʼe filifili nātou ki te pilivilesio ʼaia ʼi selo. ʼI tona fakahagatonu, ko ʼaē ʼe ina ʼohofi ia te toe ʼo te hahaʼi ʼaē ka kau ʼi te Puleʼaga ʼaia, ʼe fakafeagai ki te Puleʼaga ʼo te ʼAtua.—Apokalipesi 12:17.
ʼE Fakaʼosi e Te Hau Ia Tana Mālo
6. ʼE faka ʼuhiga feafeaʼi e Sehova mo Kilisito ia te fakafeagai ʼaē ʼe fai ki te hahaʼi ʼa te ʼAtua?
6 Neʼe kua fakakikite fēnei te tali ʼa Sehova ki te fakafeagai ʼaē ʼe fai ki tona Puleʼaga ʼaē kua fakatuʼu: “Ko Ia ia ʼaē ʼe heka ʼi te lagi ʼe kata anai ia; ko Sehova totonu ʼe ina manukinukiʼi anai ia nātou. ʼI te temi ʼaia ʼe folafola anai kia nātou ʼi tona hāūhāū, pea ʼi tona hāūhāū lahi ʼaupito ʼe ina fakaloto hoha anai ia nātou, ʼo ʼui maʼana: ‘Ko ʼau, ʼio, kua ʼau fakanofo taku hau ki Sione, toku moʼuga taputapu.’ ” (Pesalemo 2:4-6) ʼAki te takitaki ʼa Sehova, kua hoko mai te temi kia Kilisito ke ina “fakaʼosi tana mālo.” (Apokalipesi 6:2, MN ) Koteā te ʼui ʼa Sehova ʼo ʼuhiga mo te fakafeagai ʼaē ʼe fai ki tana hahaʼi lolotoga te temi ʼo te mālo fakaʼosi? ʼE ina faka ʼuhiga ko te ʼu fakafeagai ʼaia ʼe fai fakahagatonu age kia ia pea mo tana Hau ʼaē ʼe lolotoga ʼafio. ʼE ʼui fēnei e Sehova “ko ʼaē ʼe ala kia koutou ʼe ala ia ki toku kanoʼi mata.” (Sakalia 2:8) Pea neʼe fakahā lelei e Sesu ko te meʼa ʼaē ʼe fai e te hahaʼi peʼe mole nātou fai ki tona ʼu tēhina fakanofo, ʼe hage pe ʼe fai age kia ia peʼe mole fai age kia ia.—Mateo 25:40, 45.
7. Koteā te ʼu tupuʼaga ʼo te tō anai ʼo te ʼita ʼa Koke kia nātou ʼo te “toe hahaʼi tokolahi,” ʼaē ʼe fakamatala ia Apokalipesi 7:9?
7 ʼE mahino ia, ko nātou ʼaē ʼe lagolago mālohi ki te toe ʼo te kau fakanofo ʼe tō anai kia nātou te ʼita ʼa Koke. Ko nātou ʼaia ʼe kau ki “te kele foʼou” ʼo te ʼAtua, ʼe ko “te toe hahaʼi tokolahi” neʼe pāui “mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.” (Apokalipesi 7:9, MN ) ʼE ʼui ʼe nātou “tutuʼu ia muʼa ʼo te hekaʼaga faka hau pea ia muʼa ʼo te Akeno, ʼe nātou kofuʼi te ʼu kofu hina.” ʼE tali ai ia nātou e te ʼAtua pea mo Kilisito Sesu. ʼI tanatou toʼo “te ʼu palema ʼi ʼonatou nima,” ʼe nātou fakavikiviki kia Sehova ko te tuʼi ʼAliki ʼo te ʼatulaulau, ʼaē ʼe fakafofoga tona tuʼulaga pule e te Hau ʼaē neʼe ina fakanofo, ia Sesu Kilisito, “te Akeno a te Atua.”—Soane 1:29, 36.
8. Koteā anai ka fai e Kilisito ʼuhi ko te ʼohofi ʼa Koke, pea koteā anai tona ʼu fua?
8 ʼI te ʼohofi ʼaē ka fai e Koke, ʼe fai puleʼaki anai ia te Hau kua fakanofo pea mo ina fakahoko anai te tau ʼo Halamaketone. (Apokalipesi 16:14, 16) ʼE tauteaʼi anai ia nātou ʼaē ʼe mole nātou fia ʼiloʼi te ʼuhiga tuʼi ʼaliki ʼo Sehova. Kae ko nātou ʼaē ʼe tali mamahi ʼuhi ko tanatou agatonu ki te Puleʼaga ʼo te ʼAtua, ʼe fakafimālieʼi anai ia nātou ʼo talu ai. ʼO ʼuhiga mo te faʼahi ʼaia, neʼe tohi fēnei e te ʼapositolo ko Paulo: “ ʼE ko he fakamoʼoni ʼaia ʼo te fakamāu faitotonu ʼo te ʼAtua, ʼo ina fakaliliu koutou ke koutou tuha mo te puleʼaga ʼo te ʼAtua, ʼaia ʼe tupu ai takotou mamahi moʼoni. Koia, ʼe ko he meʼa ia ʼe totonu mai te ʼAtua ke ina tuku te mamahi kia nātou ʼaē ʼe nātou fakatupu mamahi kia koutou, kae kia koutou ʼaē ʼe koutou tali mamahi, ko te fīmālie mo mātou, ʼi te fakahā ʼo te ʼAliki ko Sesu, mai te lagi, mo tana kau ʼaselo mālohi, ʼi he afi ulo, mokā ina tuku ifo anai te lagavaka kia nātou ʼaē ʼe mole nātou ʼiloʼi te ʼAtua, pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu.”—2 Tesalonika 1:5-8, MN.
9, 10. (a) Neʼe foaki feafeaʼi e Sehova kia Suta ia te mālo mai he fili ʼe fakamatakutaku ʼaupito? (b) Koteā ʼaē ʼe tonu ke haga fai e te kau Kilisitiano ʼi te temi nei?
9 Lolotoga te mamahi lahi, ʼaē ʼe iku anai ki Halamaketone, ʼe tauʼi anai e Kilisito ia te ʼu kovi fuli. Kae ʼe mole ʼaoga anai ki tana kau tisipulo ke nātou tau, ohage pe la ko te mole ʼaoga ʼaē ki te hahaʼi ʼo te puleʼaga ʼo te ʼu telepi e lua ʼo Suta ke nātou tau, kua hili nei kiai te ʼu taʼu e 2 900 tupu. Neʼe ko te tau ʼa Sehova, pea neʼe mālo ai. ʼE fakamatala fēnei: “Neʼe fakanono e Sehova hana ʼu tagata ke nātou fakafeagai ki te ʼu foha ʼo Amone, mo Moape pea mo te ʼu hahaʼi ʼo te ʼu koga meʼa moʼugaʼia ʼo Seile ʼaē neʼe ʼōmai ki Suta, pea neʼe nātou fetauʼaki. Pea ko te ʼu foha ʼo Amone pea mo Moape neʼe nātou tutuʼu ʼo fakafeagai ki te hahaʼi ʼo te potu fenua moʼugaʼia ʼo Seile moʼo fakaʼauha nātou pea mo matehi nātou; ʼi tanatou ʼosi matehi te hahaʼi ʼo Seile, neʼe nātou fetokoniʼaki ke nātou fetāmateʼiʼaki. Kae kia Suta, neʼe aʼu ki te tule leʼo ʼo te toafa. ʼI tanatou maliu mai ki te hahaʼi, koʼeni nātou kua leta mamate, neʼe mole ʼi ai he tahi neʼe hāo.”—2 Fakamatala 20:22-24.
10 Neʼe hoko tonu pe ohage ko tona fakakikite e Sehova: “ ʼE mole ʼaoga anai ke koutou tau.” (2 Fakamatala 20:17) ʼE ko he faʼifaʼitaki ʼaia ke muliʼi e te kau Kilisitiano ʼi te temi ʼaē ka haʼele ai anai ia Sesu Kilisito moʼo “fakaʼosi tana mālo.” Moʼo fakatalitali ki te temi ʼaia, ʼe nātou haga tauʼi te kovi ʼo mole nātou fakaʼaogaʼi he ʼu mahafu fakasino, kae ʼe ko he ʼu mahafu fakalaumālie. Koia ʼe nātou “haga mālo aipe ʼi te agakovi ʼaki te agalelei.”—Loma 6:13; 12:17-21, MN; 13:12; 2 Kolonito 10:3-5.
Ko Ai Ka Ina Takitaki Te ʼOhofi ʼa Koke?
11. (a) Ko ai anai ka fakaʼaogaʼi e Koke moʼo fakahoko tana ʼohofi? (b) Koteā ʼaē ʼe fakapipiki ki te nofo ʼalaʼala ʼi te faʼahi fakalaumālie?
11 Ko Koke ʼo Makoke ʼe ʼui ʼe ko Satana te Tevolo ʼaē kua fakatō ki lalo talu mai te taʼu 1914. ʼI tona ʼuhiga laumālie, ʼe mole ina lava fakahoko fakahagatonu tana ʼohofi, kae ʼe ina fakaʼaogaʼi anai te ʼu hahaʼi moʼo fakahoko tana ʼu gāue. Ko ai anai te ʼu hahaʼi ʼaia? ʼE mole tuku mai e te Tohi-Tapu he ʼu fakamatala ʼo ʼuhiga mo te faʼahi ʼaia, kae ʼe ina fakahā mai te ʼu faʼahi ʼe tokoni mai anai ke tou mahino peʼe ko ai ia nātou ʼaia. ʼAki te fakahoko ʼo te ʼu fakakikite ʼo te Tohi-Tapu, ʼe tou mālama māmālie anai kiai. ʼE mole fia faka tui te hahaʼi ʼa Sehova ki he ʼu fakamatala ʼe mole ʼiloʼi papau, kae ʼe nātou nonofo ʼalaʼala ʼi te faʼahi fakalaumālie, ʼo nātou fakasiosio lelei ki te ʼu ʼaluʼaga faka politike pea mo faka lotu ʼaē ʼe nātou fakahoko te ʼu fakakikite ʼo te Tohi-Tapu.
12, 13. Neʼe fakakikite feafeaʼi e te polofeta ko Taniela ia te ʼohofi fakamuli ʼaē ka fai anai ki te hahaʼi ʼa te ʼAtua?
12 ʼE fakahā e te polofeta ko Taniela te tahi ʼu fakamatala ʼo ʼuhiga mo te ʼohofi fakamuli ka fai anai ki te hahaʼi ʼa te ʼAtua, ʼo ina tohi fēnei: “[Ko te hau ʼo te potu noleto] ʼe hū anai ki tuʼa ʼaki he ʼita lahi, ke feala hana maumauʼi pea mo fakaʼauha te tokolahi. Pea ʼe ina fakatuʼu anai tona ʼu fale fehikitaki faka hau ʼi te vaha ʼo te tai lahi pea mo te moʼuga tapu ʼo te Teuga.”—Taniela 11:44, 45.
13 ʼI te ʼu temi faka Tohi-Tapu, ko “te tai lahi” neʼe ko te tai ʼo Metitelanea, pea ko “te moʼuga tapu” neʼe ko Sione, ʼaē neʼe ʼui fēnei kiai e Sehova: “Ko ʼau, ʼio, kua ʼau fakanofo taku hau ki Sione, toku moʼuga tapu.” (Pesalemo 2:6; Sosue 1:4) Koia, ʼi hona fakaliliu fakalaumālie, ko te fenua ʼaē ʼe tuʼu “ ʼi te vaha ʼo te tai lahi pea mo te moʼuga tapu,” ʼe faka ʼuhiga ki te tuputupu fakalaumālie ʼo te kau Kilisitiano fakanofo. Ko nātou ʼe mole kei nātou pipiki tahi mo te tai, ʼaē ʼe ina fakatātā te malamanei ʼaē ʼe mamaʼo mai te ʼAtua, pea ʼe nātou fakatalitali ke nātou pule mo Kilisito Sesu ʼi te Puleʼaga ʼi selo. ʼE mahino ia, ko te kau kaugana fakanofo ʼa te ʼAtua, ʼo fakatahi kiai mo tonatou ʼu kaugā fagona ʼaē ʼe nātou faʼufaʼu te toe hahaʼi tokolahi, ʼe tauʼi anai ia nātou e te hau ʼo te potu noleto, mokā hoko anai tana ʼohofi fakaʼita ʼo fakahoko ai te fakakikite ʼa Taniela.—Isaia 57:20; Hepeleo 12:22; Apokalipesi 14:1.
ʼE Tali Feafeaʼi Anai e Te Kau Kaugana ʼa Te ʼAtua?
14. Koteā te ʼu meʼa e tolu ʼe fai anai e te hahaʼi ʼa te ʼAtua mokā ʼohofiʼi anai nātou?
14 Koteā anai ʼe tonu ke fai e te kau kaugana ʼa te ʼAtua mokā ʼohofiʼi anai nātou? ʼE toe hage pe anai ko te meʼa ʼaē neʼe fai e te hahaʼi ʼa te ʼAtua ʼi te temi ʼo Sosafate. Koutou tokagaʼi neʼe fakatotonu ki te hahaʼi ke nātou fai te ʼu meʼa e tolu: (1) ke nātou tutuʼu ki ʼonatou tuʼulaga, (2) ke nātou tutuʼu maʼu, pea (3) ke nātou mamata ki te fakamaʼuli ʼa Sehova. ʼE feafeaʼi anai ʼo he mulimuli ʼa te hahaʼi ʼa te ʼAtua ʼo te temi nei ki te ʼu palalau ʼaia?—2 Fakamatala 20:17.
15. Koteā te faka ʼuhiga ki te hahaʼi ʼa Sehova tanatou tutuʼu ʼi ʼonatou tuʼulaga?
15 Ke nātou tutuʼu ki ʼonatou tuʼulaga: ʼE mole lotolotolua anai te hahaʼi ʼa te ʼAtua, kae ʼe nātou taupau maʼu anai tonatou tuʼulaga ʼo nātou lagolago mālohi ki te Puleʼaga ʼo te ʼAtua. ʼE nātou haga taupau maʼu anai tanatou mole pipiki ki te ʼu meʼa ʼo te malamanei. ʼE nātou ‘mālolohi anai, mo tāʼofi maʼu’ ʼi tanatou tauhi agatonu kia Sehova, pea ia muʼa ʼo te hahaʼi, ʼe nātou haga fakavikiviki kia Sehova ʼuhi ko tona lotoʼofa. (1 Kolonito 15:58; Pesalemo 118:28, 29) ʼE mole ʼi ai anai he ʼu ʼahiʼahi ʼi te temi nei peʼe ko te temi ka haʼu, ʼe ina lava fetogi anai tonatou tali leleiʼi e te ʼAtua.
16. ʼE feafeaʼi anai ʼa he tutuʼu maʼu ʼa te kau kaugana ʼa Sehova?
16 Ke nātou tutuʼu maʼu: ʼE mole faigaʼi anai e te kau kaugana ʼa Sehova ke nātou hāofaki ia nātou totonu, kae ʼe nātou falala katoa anai kia Sehova. Ko ia tokotahi pe ʼe ina lava hāofaki ia nātou mai te ʼu maveuveu ʼo te malamanei, pea neʼe ina fakapapau ʼe ina fakahoko anai te faʼahi ʼaia. (Isaia 43:10, 11; 54:15; Tagilāulau 3:26) Ko te falala kia Sehova, ʼe kau anai kiai te falala ki tana fakafofoga fakahāhā ʼo te temi nei, ʼaē kua ina fakaʼaogaʼi lolotoga ni ʼu taʼu moʼo fakahoko ʼo tana ʼu fakatuʼutuʼu. Koia ʼe ʼaoga tāfito anai ki te kau Kilisitiano moʼoni ke nātou falala kia nātou ʼaē ʼe atolasio tahi mo nātou, pea neʼe fakanofo e Sehova mo tana Hau ʼaē kua ʼafio, ke nātou fai te takitaki. ʼE takitaki anai e te ʼu tagata agatonu ʼaia ia te hahaʼi ʼa te ʼAtua. Ko te mole tokagaʼi ʼo tanatou takitaki ʼe fakatupu tuʼutāmaki anai ia.—Mateo 24:45-47; Hepeleo 13:7, 17.
17. He koʼe ʼe sisio anai te kau kaugana agatonu ʼa te ʼAtua ki te fakamaʼuli ʼa Sehova?
17 Ke nātou mamata ki te fakamaʼuli ʼa Sehova: Ko te fakamaʼuli ʼe ko te fakapale anai ʼo nātou fuli ʼaē ʼe nātou taupau tanatou agatonu faka Kilisitiano, pea mo nātou falala kia Sehova ʼo ʼuhiga mo tonatou hāofaki. Lolotoga te temi fakamuli—ʼo mulimuli ki tonatou fealagia—ʼe nātou kalagaʼi anai te hoko mai ʼo te ʼaho ʼo te fakamāu ʼa Sehova. ʼE tonu ke ʼiloʼi e te meʼa fuli neʼe fakatupu ko Sehova ʼe ko te ʼAtua moʼoni pea ʼe ʼi ai tana kau kaugana agatonu ʼi te kele. ʼE mole toe ʼaoga anai ke toe fakafifihiʼi hoholo atu te totonu ʼo te ʼuhiga tuʼi ʼaliki ʼo Sehova.—Esekiele 33:33; 36:23.
18, 19. (a) ʼE fakahā feafeaʼi e te hiva ʼo te mālo ʼaē ʼe tuʼu ʼi te tohi ʼo Ekesote kapite 15 ia te ʼu meʼa ka logoʼi anai e nātou ka hāo ʼi te ʼohofi ʼa Koke? (b) Koteā ʼaē ʼe lelei ke fai e te hahaʼi ʼa te ʼAtua ʼi te temi nei?
18 ʼAki he mālohi kua toe fakafoʼou, ʼe hū anai te hahaʼi ʼa te ʼAtua ki te mālama foʼou, ʼo nātou fia hivaʼi anai te hiva ʼo te mālo ʼa te kau Iselaele ʼo te temi muʼa, ʼi tonatou hāofaki ʼi te Tai Kula. ʼAki he fakafetaʼi heʼegata kia Sehova ki tana puipui, ʼe nātou toe ʼui takitokotahi anai pea mo fakatahi ia te ʼu palalau ʼāfea ʼaia: “Ke ʼau hiva kia Sehova, heʼe kua ina fakaliliu ia ia ʼo māʼoluga ʼaupito. . . . Ko Sehova ʼe ko he tagata tau mālohi. Ko tona huafa ko Sehova. . . . Ê Sehova, ʼe lava laliki e tou toʼomataʼu ia te fili. ʼI te lahi ʼo tou māʼoluga, ʼe ke lava malamalaki ia nātou ʼe agatuʼu atu kia te koe; ʼe ke tuku ifo tou hāūhāū vela, pea ʼe ina kai ia nātou ohage ko te mohuku. . . . ʼI tou lotoʼofa neʼe ke taki te hahaʼi ʼaenī ʼaē neʼe ke toe maʼu. ʼIo, ʼi tou mālohi ʼe ke taki anai ia nātou ki tou nofoʼaga tapu. . . . ʼE ke ʼave anai ia nātou pea ke tō anai ia nātou ʼi te moʼuga ʼo tou tōfiga, te potu kua tukupau ʼaē neʼe ke teuteuʼi ko hou nofoʼaga, Ê Sehova, ia te sagatualio Ê Sehova, ʼaē neʼe fakatuʼu e tou ʼu nima. ʼE nofo hau anai ia Sehova ki he ʼu temi ʼe mole ʼiloʼi honatou gataʼaga, ʼio, ʼo talu ai.”—Ekesote 15:1-19.
19 ʼI te temi ʼaenī ʼaē kua ōvi mai te ʼamanaki ki te maʼuli heʼegata, ʼe ko he temi faigamālie ki te kau kaugana ʼa te ʼAtua hanatou fakahā tanatou pipiki maʼu kia Sehova, pea mo fakafoʼou tanatou lotomālohi ke nātou tauhi kia te ia ohage ko tonatou Hau heʼegata!—1 Fakamatala 29:11-13.
ʼE Feala Koa Hakotou Fakamahino?
• He koʼe koa ʼe ʼohofiʼi anai e Koke ia te kau fakanofo pea mo te tahi ʼu ōvi?
• Koteā anai ka fai e te hahaʼi ʼa te ʼAtua?
• Koteā te faka ʼuhiga ʼo te ʼui ʼaē ke nātou tutuʼu maʼu?
• ʼE sisio feafeaʼi anai te hahaʼi ʼa te ʼAtua ki te fakamaʼuli ʼa Sehova?
[Paki ʼo te pasina 18]
Neʼe foaki e Sehova ia te mālo kia Sosafate mo tana hahaʼi, kae neʼe mole nātou tau
[Paki ʼo te pasina 20]
Ko te kau fakanofo pea mo te tahi ʼu ōvi ʼe nātou lagolago fakatahi ki te ʼuhiga tuʼi ʼaliki ʼo Sehova
[Paki ʼo te pasina 22]
Ohage ko te kau Iselaele ʼo te temi muʼa, kua ʼamanaki hivaʼi e te hahaʼi ʼa te ʼAtua ia he hiva ʼo te mālo