ʼE Feafeaʼi Tatatou Fakalogo ʼAē Ki Te ʼAtua?

ʼE palalau mai te ʼAtua ʼaki te Tohi-Tapu. 2 Timoteo 3:16

Neʼe takitaki e te ʼAtua moʼoni ia te ʼu tagata ke natou tohi tana ʼu manatu ʼi he tohi ʼe taputapu. Ko te tohi ʼaia ʼe ko te Tohi-Tapu. ʼE maʼu ʼi te tohi ʼaia te ʼu logo maʼuhiga pea ʼe loto e te ʼAtua ke kotou ʼiloʼi.

ʼE ʼiloʼi e te ʼAtua te meʼa ʼaē ʼe lelei kiā koutou pea ko Ia ko te Matapuna ʼo te poto. Kā kotou fakalogo kiā te ia, pea ʼe kotou maʼu moʼoni ai anai te poto.—Tāʼaga Lea 1:5.

ʼE loto e te ʼAtua ke lau e te hahaʼi fuli ʼo te kele ia te Tohi-Tapu. ʼI te temi nei, kua fakaliliu ia te Tohi-Tapu kiā lea kehekehe.

Kapau ʼe kotou fia fakalogo ki te ʼAtua, ʼe tonu ke kotou lau pea mo mahino ki te Tohi-Tapu.

ʼI te potu fuli pē ko te hahaʼi ʼe natou fakalogo ki te ʼAtua. Mateo 28:19

ʼE feala ki te kau Fakamoʼoni ʼa Sehova ke natou tokoni atu ke kotou mahino ki te Tohi-Tapu.

ʼE natou ako te moʼoni ʼo ʼuhiga mo te ʼAtua ʼi te kele kātoa.

ʼE mole totogi te ako ʼaia. ʼE toe feala pē foki ke kotou ako ʼo ʼuhiga mo te ʼAtua ʼi he Fale ʼo Te Puleʼaga ʼa te kau Fakamoʼoni ʼa Sehova ʼe tuʼu ovi atu kiō koutou.