Kapite 49

Ko Te Tahi Foli Fai Faka Mafola ʼi Kalilea

ʼI TE kua ʼosi ʼo taʼu e lua ki tana fai faka mafola mālohi, ʼe mole anai koa faka ʼalu mamalie muʼa te gāue ʼa Sesu ʼo ai hana kiʼi mānava? Kailoa, ʼe toe ʼāsili ake tona mālohi ʼo ina fai tana tahi foli, ko te tuʼa tolu leva ʼaia ʼo tana ʼalu ki Kalilea. Neʼe ʼalu ia ʼi te ʼu kolo lalahi fuli pea mo te ʼu kolo liliki fuli ʼo te telituale, ʼo akonaki ʼi te ʼu sinakoka pea mo faka mafola te logo lelei ʼo te Puleʼaga. Ko te meʼa ʼaē neʼe sio kiai ʼi tana foli ʼaia, neʼe sio ai ki te ʼaoga ʼaē ʼo te toe fakamālohi ake ʼo te fai faka mafola.

ʼI te potu fuli pe ʼe fakalaka ai, neʼe sio ia Sesu ʼe ʼaoga ki te hahaʼi he fakamālōlō pea mo he fakaloto fīmālie fakalaumālie. ʼE nātou hage ko he faga ōvi ʼe mole honatou tagata tauhi, ʼe nātou ʼāhua pea mo mavetevete, pea koia ʼe ʼofa mamahi ai kia nātou. Neʼe ina ʼui ai ki tana kau tisipulo: “ ʼIo, ko te taʼukai ʼe lahi, kae tokosiʼi te kaugāue. Koutou faikole ki te ʼAliki ʼo te taʼukai ke ina fekauʼi mai he kaugāue ki tana taʼukai.”

Neʼe ʼi ai te fakatuʼutuʼu gāue ʼa Sesu. Neʼe ina fakatahiʼi te ʼu ʼapositolo ʼaia e toko 12, ʼaē neʼe ina fili kua ʼosi kiai te taʼu katoa. Neʼe ina vae ono ia nātou ʼo taki toko lua ki te fai faka mafola, pea neʼe ina tuku age kia nātou te ʼu fakatotonu ʼaenī: “ ʼAua naʼa koutou ʼolo ʼi te ala ʼo te ʼu puleʼaga pea ʼaua naʼa koutou hū ki he kolo samalitana; kae ke koutou ʼolo ki te faga ōvi ʼaē kua hēhē ʼo te ʼapi ʼo Iselaele, tuʼumaʼu. ʼI takotou ʼalu ʼi ala, koutou faka mafola ʼo ʼui maʼa koutou: ‘Kua fakaōvi mai te puleʼaga ʼo selo.’ ”

Ko te Puleʼaga ʼaia ʼaē ʼe tonu ke nātou faka mafola ʼe ko ia ia ʼaia ʼaē neʼe ako ia nātou ke nātou faikole kiai, ohage ko te faʼifaʼitakiʼaga ʼo te faikole ʼaē neʼe tuku age e Sesu kia nātou. Ko te Puleʼaga kua fakaōvi mai ko tona faka ʼuhiga ʼaē ko Sesu Kilisito, te Hau ʼaē neʼe fili e te ʼAtua, kua ia nātou. Ke feala te fakamoʼoni e tana kau tisipulo ko nātou ko te kau fakafofoga ʼo te puleʼaga ʼaia ʼi selo, neʼe foaki age e Sesu kia nātou te mālohi moʼo fakamālōlō ʼo te ʼu mahaki pea mo toe fakatuʼuake mo te ʼu mate. Neʼe ina fakatotonu age ke nātou fai noa te meʼa ʼaia mole totogi.

Pea neʼe ina ʼui age ki tana kau tisipulo ke ʼaua naʼa nātou teuteuʼi he ʼu koloā ki tanatou foli ʼo fai faka mafola. “ ʼAua naʼa koutou toʼo maʼa koutou he aulo, pe ko he siliva, pe ko he paʼaga kapa ki te taga ʼo tokotou ʼu noʼo, pe ko he kato fafaʼo meʼa kai ki te ala, pe ko he ʼu kofu ʼo loto e lua, pe ko he ʼu tapugā vaʼe, pe ko he tokotoko; heʼe tau mo te tagata gāue ke ina maʼu tana meʼa kai.” Ko nātou ʼaē ʼe fia fagono ki te logo ʼaē ʼe nātou faka mafola ʼe nātou fia foaki age anai hanatou meʼa kai pea mo he faʼahi ke nātou momoe ai. Ko te meʼa ʼaia neʼe fakahā age e Sesu: “ ʼI he kolo lahi pe ko he kolo veliveli ʼe koutou hū kiai, koutou kumi pe ko ai ʼe tau mo ia pea ke koutou nonofo ai ʼo aʼu ki takotou mavae.”

ʼOsi ʼaia, pea fai age e Sesu ki tana kau tisipulo te ʼu fakatotonu ʼo ʼuhiga mo te faʼahiga fai ʼo te faka mafola ʼo te logo ʼo te Puleʼaga ki ni hahaʼi ʼo he loto fale. “ ʼI takotou hū ki te loto fale, koutou fakaʼalofa ki ʼona hahaʼi; pea kapau ʼe tau mo te ʼapi, pea ke haʼu kia te ia te tokalelei ʼaē ʼe koutou fakaʼamu ke ina maʼu; kaʼe kapau leva ʼe mole tau mo ia, pea ke toe liliu mai takotou tokalelei kia koutou! Kapau ʼe mole fakatalitali koutou e he tahi peʼe mole fagono ki ʼakotou palalau, — ka koutou mavae mai te loto fale ʼaia pe ko te kolo ʼaia, koutou tū te efu ʼo tokotou ʼu vaʼe.”

Kae ko te kolo fuli pe ʼe fakafisi ki te logo ʼaia, ʼe fakahā e Sesu ko te fakamāu ka fai anai kiai ʼe mamafa anai ia. Koʼeni tana fakamahino age: “ ʼE ʼau tala moʼoni atu kia koutou: ʼe maʼamaʼa age anai, ʼi te ʼAho ʼo te Fakamāu, ki te fenua ʼo Sotoma pea mo Komola ʼi te kolo ʼaia.” Mateo 9:35 ki te 10:15; Maleko 6:6-12; Luka 9:1-5.

▪ Neʼe kamata ʼi te temi fea te tuʼa tolu ʼo te foli fai faka mafola ʼa Sesu ʼi Kalilea, pea koteā te meʼa ʼaē neʼe sio ia kiai ʼe ʼaoga ke fai?

▪ Koteā te ʼu fakatotonu ʼaē neʼe ina fai age ki tana kau ʼapositolo ʼaē e toko 12 ʼi muʼa ʼo tana fekauʼi nātou ke ʼolo ʼo fai faka mafola?

▪ He koʼe ʼe totonu te faka mafola e te kau tisipulo ko te Puleʼaga kua fakaōvi mai?