Kapite 55

Tokolahi Te Kau Tisipulo Neʼe Mole Kei Nātou Muliʼi Ia Sesu

ʼI KAPENAUME, ʼi te sinakoka, e lolotoga fakamahino e Sesu te tuʼulaga ʼo ia ʼi tona ʼuhiga ʼaē ko te pane moʼoni mai te lagi. ʼE ʼiloga mai ko tana akonaki ko te hoko atu ʼo te fai palalau mo te hahaʼi ʼaē neʼe nātou maʼu ia ia ʼi tana liliu mai te potu hahake ʼo te tai ʼo Kalilea, ʼaē neʼe nātou kai ai te ʼu pane pea mo te ʼu ika ʼaē neʼe foaki faka milakulo.

Neʼe toe hoko atu te fai palalau ʼa Sesu: “Ko te pane ʼaē ka ʼau foaki anai, ko toku kakano moʼo te maʼuli ʼo te malamanei.” ʼI te ʼu taʼu pe e lua ki muʼa atu, ʼi te fasiga taʼu mātala ʼo te taʼu 30, neʼe ina ʼui age kia Nikotemo ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ko he Fakamaʼuli. Ohage ko tana fakamahino mai ʼi te temi leva ʼaē, ko te tagata fuli pe ʼaē, ʼi tana palalau fakatātā, ʼe kai ki tona kakano, pea mo tui ki te sakilifisio ʼaē ka ina fai, ʼe feala ke ina maʼu te maʼuli heʼegata.

Kae ko te ʼu palalau ʼaia ʼe fakatupu tūkia kia nātou ʼaē ʼe nātou fakalogo. “ ʼE faʼa foaki feafeaʼi mai kia tatou e te tagata nei tona kakano ke kai?” ko tanatou fehuʼi ʼaia. Neʼe loto ia Sesu ke nātou mahino ko te faka ʼuhiga ʼo tana palalau ʼaē ko te kai ʼo tona kakano ʼe ko te palalau fakatātā. Moʼo fakaʼāsili ʼo te puani ʼaia, neʼe ina fakahā te manatu ʼe faigataʼa ake anai tona tali mokā ʼe mole kita mahino kiai.

“Kapau ʼe mole koutou kai ki te kakano ʼo te Foha ʼo te tagata pea mo ʼinu ki tona toto, ko tana ʼui age ʼaia, pea ʼe mole ia koutou te maʼuli. Ko ʼaē ʼe ina fafaga ia ia ʼaki toku kakano pea mo ʼinu ki toku toto ʼe ina maʼu te maʼuli heʼegata, pea ʼe ʼau fakatuʼuake anai ia ia ʼi te ʼaho fakamuli; heʼe ko toku kakano ʼe ko he meʼa kai moʼoni pea ko toku toto ʼe ko he meʼa ʼinu moʼoni. Ko ʼaē ʼe ina fafaga ia ia ʼaki toku kakano pea mo ʼinu ki toku toto ʼe nofo ʼo tahi mo ʼau pea ko ʼau ʼe ʼau tahi anai mo ia.”

ʼE mahino, ko te ʼu palalau ʼaia ʼe feala ke kovi ʼaupito mo ka na pau neʼe fia uga e Sesu te hahaʼi ki te kai tagata. Kae, mahino ia, neʼe mole ina fakaloto mālohiʼi te hahaʼi ke nātou kai he kakano pe ko he ʼinu ʼo he toto moʼoni. Neʼe ina fakatokagaʼi age pe ia ko nātou fuli ʼaē ʼe nātou fia maʼu te maʼuli heʼegata ʼe tonu ke nātou tui ki te sakilifisio ʼaē ka ina fai anai ʼo foaki tona sinoʼi tagata haohaoa pea mo liligi tona taʼataʼa. Kae, logope la te meʼa ʼaia, māʼia mo ʼihi ʼi tana kau tisipulo, neʼe tokolahi ia nātou neʼe mole nātou faigaʼi ke nātou mahino ki tana akonaki pea nātou fakafisifisi age ki ai: “Ko te lea ʼaenī ʼe matamatakovi ʼaupito! Ko ai koa ʼaē ʼe faʼa fia logo kiai?”

ʼI tana ʼiloʼi ʼaē ʼe tokolahi ʼi tana kau tisipulo ʼe femumuhuʼaki, neʼe ʼui age e Sesu kia nātou: “ ʼE fakatupu tūkia koa te lea ʼaia kia koutou? Pea e feafeaʼi mo ka pau ʼe koutou sisio ki te Foha ʼo te tagata ʼe hake ki te potu neʼe nofo ai ʼi muʼa atu? (...) Ko te ʼu palalau ʼaē neʼe ʼau ʼui atu ʼe laumālie pea mo maʼuli. Kae ʼe ʼi ai ʼihi ia koutou ʼe mole tui.”

Neʼe toe ʼui age e Sesu: “Koʼena te tupuʼaga ʼo taku ʼui atu: ʼe mole he tahi ʼe feala ke haʼu kia te ʼau, mo kapau ʼe mole foaki age ki ai e te Tāmai.” ʼI tanatou logo ki te ʼu palalau ʼaia, neʼe tokolahi ʼi tana kau tisipulo neʼe ʼolo pea neʼe mole nātou toe mulimuli ia te ia. Neʼe maliu mai ia Sesu ki tana ʼu ʼapositolo ʼaē e 12 pea ina fehuʼi age kia nātou: “ ʼE mole koa la toe fia ʼolo ia mo koutou?”

Neʼe tali age e Petelo: “ ʼAliki, ke mātou ʼolo la kia ai? ʼE ke nofo mo te ʼu folafola ʼo te maʼuli heʼegata; koia neʼe mātou tui ai pea neʼe mātou ʼiloʼi ai ko koe ko te Maʼoniʼoni ʼa te ʼAtua.” ʼI fakahā lelei leva ʼo te agatonu ʼa Petelo pea mo te tahi ʼu ʼapositolo logope neʼe lagi mole heʼeki nātou mahino katoa ki te akonaki ʼa Sesu ʼo ʼuhiga mo te faʼahi ʼaia!

Logope te lave ʼi tona loto ʼo te tali ʼa Petelo, neʼe fai age e Sesu te fakatokaga ʼaenī: “Neʼe mole koa la ko ʼau ʼaē neʼe ʼau fili ia koutou, ia koutou toko hogofulu-ma-lua? Kae ko te tahi ia koutou ʼe ko te tagata fasituʼu.” ʼE palalau ia kia Sutasi Isikaliote. Neʼe lagi ʼi te temi ʼaia kua ina fakatokagaʼi ia Sutasi “he kamataʼaga”, ʼo tana agakovi.

Neʼe fakanoaʼi e Sesu te ʼamanaki ʼa te hahaʼi ʼaki tana fakafisi ʼaē ki tanatou faiga ke fakanofo ia ia ko te hau, pea neʼe lagi fēnei tanatou manatu: ‘ ʼE feala feafeaʼi ke ʼui ko te tagata ʼaenī ko te Mesia heʼe koʼeni ia ʼe fakafisi ki te tuʼulaga ʼaē ʼe tonu ke toʼo e te Mesia?’ ʼE ko te fehuʼi foki ʼaia kei foʼofoʼou kia nātou. Soane 6:51-71; 3:16.

▪ Neʼe foaki e Sesu tona kakano maʼa ai, pea koteā te faka ʼuhiga ʼo te palalau ʼaē ke nātou ‘kai tona kakano’?

▪ Koteā te tahi ʼu palalau ʼa Sesu neʼe matamatakovi ʼaupito ki te hahaʼi, kae koteā ʼaē ʼe hā mai ai?

▪ ʼI te situʼa ʼa te tokolahi kia Sesu, koteā te ʼui age ʼa Petelo?