Te ʼe Lekula ʼo Te Puleʼaga​—Kotou Kumi Te Faitotonu ʼa Te ʼAtua

ʼE KE lolotoga haʼele pea ʼe ke hiki nima ki tou vahaʼa fale. ʼI muʼa atu, neʼe ke tokagaʼi tana sioʼi koe pea mo tou kiʼi famili. ʼE hiki nima atu pea mo fakaovi atu. ʼE ina ui atu fenei: “ ʼE ʼi ai pe te kiʼi faʼahi ʼe au fia fakalavelave atu. He ko ʼe ʼe mole kotou hage ko te hahaʼi fuli? ʼE au iloʼi ko koutou ko he ʼu Fakamoʼoni ʼa Sehova. ʼE kotou kehe ʼosi koutou mo te tahi ʼu lotu, koteʼuhi ʼe mole kotou fai te ʼu ʼaho lalahi, ʼe mole kotou faipolitike pea mo kau ki te ʼu tau. Pea ʼe mole kotou suluka. Kaʼe au sio ʼe maʼu e tou kiʼi famili ia te aga fakaʼapaʼapa. Kotea la tona tupuʼaga?”

ʼE ke iloʼi lelei tona tali: Koteʼuhi ʼe tou fakalogo ki te Puleʼaga ʼo te ʼAtua. Ko Sesu, ʼae ko tona Hau, ʼe ina fakamaʼa tatou. ʼE tokoni mai ke tou mulimuli ki tana faʼifaʼitaki, ke mole tou hage ai ko te hahaʼi ʼo te malama agakovi ʼaeni. Koia, ʼi te faʼahi 3 ʼaeni, ʼe tou vakaʼi anai te haga ʼae ʼo te Puleʼaga Fakamesia ʼo fakamaʼa ia te hahaʼi ʼa te ʼAtua ʼi te faʼahi fakalaumalie, mo te aga pea mo fetogi te faʼahiga fakatuʼutuʼu ʼo te kautahi. ʼE fai ia te ʼu meʼa fuli ʼaia ki te kololia ʼo Sehova.