“Ke Pipiki Tou Loto” Ki Te Fale Lotu ʼa Te ʼAtua!

“Foha ʼo te tagata, . . . ke pipiki tou loto kia meʼa fuli pe ʼaē ʼe ʼau fakahā atu . . . Tala ki te ʼapi ʼo Iselaele te ʼu meʼa fuli ʼaē ʼe ke sio kiai.”​—Esekiele 40:4.

1. ʼI te taʼu 593 ʼi muʼa ʼo totatou temi, neʼe feafeaʼi te ʼaluʼaga ʼo te hahaʼi ʼaē neʼe fili e te ʼAtua?

NEʼE ko te taʼu 593 ʼi muʼa ʼo totatou temi, pea kua taʼu 14 te ʼaunofo ʼo Iselaele. Ki te kau Sutea ʼaē neʼe maʼuʼuli ʼi Papiloni, neʼe hage kua mamaʼo ʼaupito tanatou kele ʼofaina. Tokolahi ia nātou ʼaia neʼe nātou sio fakamuli ki Selusalemi, ki tona tutu, mo te maumauʼi ʼo tona ʼu kaupā mātolu ʼo feiā mo tona ʼu foʼi fale lalahi. Neʼe kua laliki te fale lotu ʼa Sehova​—te meʼa matalelei ʼo te kolo, te potu pe ʼaia ʼo te tauhi maʼa ʼi te kele katoa. ʼI te temi ʼaia, neʼe ʼamanaki fakamavae te toe hahaʼi tokolahi ʼo Iselaele. Kei toe anai taʼu e 56 ʼi muʼa ʼo te fakahoko ʼo te faka ʼāteaina ʼaē neʼe fakapapauʼi age kia nātou.​—Selemia 29:10.

2. He koʼe neʼe lotomamahi ia Esekiele ʼi tana manatuʼi te fale lotu ʼa te ʼAtua?

² Neʼe lagi lotomamahi te polofeta agatonu ko Esekiele, ʼi tana manatu ki te tuku maumau feiā ʼo te fale lotu ʼa te ʼAtua ʼi tona fenua, kua līʼakina pea mo nofoʼi e te ʼu manu fekai. (Selemia 9:​11) Ko tana tāmai, ia Pusi, neʼe tauhi faka pelepitelo ʼi te fale lotu ʼaia. (Esekiele 1:3) Neʼe fakaʼamu ia Esekiele ki te pilivilesio ʼaia, kae ʼi tana kei tūpulaga, ʼi te taʼu 617 ʼi muʼa ʼo totatou temi, neʼe ʼave popūla fakatahi mo te hahaʼi ʼaliki ʼo Selusalemi. ʼI tona kua teitei taʼu 50, neʼe lagi ʼiloʼi e Esekiele ʼe mole toe sio anai ki Selusalemi pea ʼe mole kau anai ki te toe laga ʼo tona fale lotu. Koia, neʼe maʼuhiga ʼaupito kia Esekiele te hā kia ia ʼo te fale lotu faka kolōlia!

3. (a) He koʼe neʼe hā kia Esekiele te fale lotu? (b) Koteā tona ʼu koga tāfito e fā ʼaē neʼe hā?

³ Ko te meʼa lahi ʼaia neʼe hā, ʼaē ʼe fakamatala katoa ʼi te ʼu kapite ʼe hiva ʼo te tohi ʼo Esekiele, neʼe ina foaki ai ki te kau Sutea ʼaē neʼe ʼaunofo he fakapapau neʼe ina fakaloto mālohiʼi tanatou tui. ʼE toe fakatuʼu anai te tauhi maʼa! Talu mai ni ʼu sēkulō ʼo aʼu mai ki totatou temi, ko te meʼa ʼaē neʼe hā, neʼe ina fakaloto mālohiʼi ia nātou ʼaē ʼe ʼoʼofa kia Sehova. ʼO feafeaʼi? Tou vakaʼi te lea faka polofeta ʼaia neʼe hā kia Esekiele, tona faka ʼuhiga ki te kau Iselaelite ʼaē neʼe ʼaunofo. Ko tona ʼu koga tāfito ʼe fā: te fale lotu, mo te kau pelepitelo, mo te pule, pea mo te fenua.

ʼE Toe Laga Te Fale Lotu

4. ʼI te meʼa ʼaē neʼe hā kia Esekiele, ko te potu fea ʼaē neʼe ʼuluaki ʼave ki ai, koteā ʼaē ʼe sio kiai, pea ko ai ʼaē ʼe ina fakamamata kia ia te koga meʼa ʼaia?

⁴ ʼUluaki, neʼe ʼave ia Esekiele ki “he moʼuga māʼoluga ʼaupito.” ʼI te potu toga ʼo te moʼuga ʼaia, neʼe tuʼu ai te fale lotu lahi, ʼe hage ko he foʼi kolo neʼe ʼatakai e he ʼu kaupā. Ko te ʼaselo, ʼaē “ ʼe hage tona fofoga ko he kapa,” neʼe ina ʼave te polofeta ke mamata ki te koga meʼa. (Esekiele 40:​2, 3) ʼI te hoko atu ʼo te meʼa ʼaē neʼe hā, neʼe sio Esekiele ki te ʼaselo ʼe ina fakafuafua lelei te ʼu matapā e ono mo tanatou ʼu kogafale leʼo, mo te malaʼe ʼaē ʼe tuʼu ʼi tuʼa, mo te malaʼe ʼaē ʼe tuʼu ʼi loto, mo te ʼu fale kai, mo te ʼaletale, pea mo te fale lotu ʼaki tana Potu Tapu pea mo tana Potu Taputapu ʼAupito.

5. (a) Koteā ʼaē neʼe fakapapau e Sehova kia Esekiele? (b) Koteā koa te ʼu “sino ʼo tanatou ʼu hau” ʼaē neʼe tonu ke toʼo mai te fale lotu, pea he koʼe neʼe maʼuhiga te faʼahi ʼaia?

⁵ Pea hā totonu mai ia Sehova. ʼE hū ki te fale lotu pea neʼe ina fakapapau kia Esekiele ʼe nofo ai anai. Kae neʼe ina kole ke fakamaʼa Tona ʼapi, ʼo ina ʼui fēnei: “Ke nātou fakamamaʼo ia te ʼau tanatou fai folonikasio pea mo te ʼu sino mate ʼo tanatou ʼu hau, pea ʼe ʼau nofo moʼoni anai ʼi te lotolotoiga ʼo nātou ʼo aʼu ki he ʼu temi ʼe heʼegata.” (Esekiele 43:​2-4, 7, 9) ʼE ʼi ai te ʼu fakamoʼoni ʼe nātou fakahā mai ko “te ʼu sino mate [ʼaia] ʼo tanatou ʼu hau” ʼe faka ʼuhiga ki te ʼu tamapua. Ko te ʼu hau pea mo te ʼu hahaʼi agatuʼu ʼo Selusalemi neʼe nātou ʼulihi te fale lotu ʼa te ʼAtua ʼaki te ʼu tamapua, pea neʼe liliu te ʼu tamapua ʼaia ko tanatou ʼu hau. (Vakaʼi ia Amosi 5:26.) Neʼe mole ko he ʼu ʼatua peʼe ko he ʼu hau maʼuli, kae neʼe ko he ʼu meʼa mate pea mo ʼuli ia mata ʼo Sehova. Neʼe tonu ke nātou toʼo te ʼu meʼa ʼaia ʼi te fale lotu.​—Levitike 26:30; Selemia 16:18.

6. Neʼe koteā te faka ʼuhiga ʼo te fakafuafua ʼo te fale lotu?

⁶ Koteā te puani ʼaē ʼe tou mahino kiai ʼi te meʼa ʼaē neʼe hā? Ko te meʼa ʼaia neʼe ko he fakapapau kia nātou ʼaē neʼe ʼaunofo, ʼe toe fakatuʼu katoa anai te tauhi moʼoni ʼi te fale lotu ʼa te ʼAtua. Tahi ʼaē meʼa, ko te fakafuafua ʼo te fale lotu neʼe ko he fakamoʼoni, ʼe hoko moʼoni anai te meʼa ʼaia neʼe hā. (Vakaʼi ia Selemia 31:39, 40; Sakalia 2:​2-8.) ʼE pulihi anai te faʼahiga tauhi tamapua fuli pe. ʼE toe tapuakina anai e Sehova tona ʼapi.

Te Kau Pelepitelo Pea Mo Te Pule

7. Koteā ʼaē neʼe fakatotonu ki te kau Levite pea mo te kau pelepitelo?

⁷ Neʼe toe maʼua foki ke fai he fakamaʼa ʼa te kau pelepitelo. Neʼe tonu ke fakatonutonuʼi te kau Levite he neʼe nātou tauhi tamapua, kae neʼe tonu ke vikiʼi te ʼu foha pelepitelo ʼo Satoke pea mo fakapale nātou he neʼe nātou nonofo maʼa.a Kae neʼe tauhi te ʼu kūtuga ʼaia e lua ʼi te fale ʼa te ʼAtua ʼaē neʼe kua toe laga​—kae ʼe mahino papau ia neʼe fakalogo te faʼahi ʼaia ki tanatou nofo agatonu takitokotahi. Tahi ʼaē meʼa, neʼe fakatotonu fēnei e Sehova: “Pea ʼe tonu anai ke nātou akoʼi ki taku hahaʼi te kehekehe ʼo te meʼa ʼaē ʼe taputapu pea mo te meʼa ʼaē ʼe ʼuli; pea ʼe tonu anai ke nātou fakahā kia ia te kehekehe ʼo te meʼa ʼaē ʼe heʼemaʼa pea mo te meʼa ʼaē ʼe maʼa.” (Esekiele 44:10-​16, 23) Koia, neʼe tonu ke toe fakatuʼu te kalasi ʼa te kau pelepitelo, pea neʼe fakapale tanatou kātaki agatonu ʼaia.

8. (a) Neʼe ko ai te ʼu pule ʼo te Iselaele ʼāfea? (b) ʼI te meʼa ʼaē neʼe hā kia Esekiele, neʼe koteā te gāue ʼaē neʼe fai e te pule?

⁸ ʼI te meʼa ʼaē neʼe hā, neʼe toe talanoa foki ki te tagata pule. Talu mai te temi ʼo Moisese, neʼe ʼi ai te ʼu pule ʼo te puleʼaga. Ko te kupu faka Hepeleo na·siʼʹ ʼaē neʼe fakaliliu ʼaki te kupu pule, ʼe faka ʼuhiga ki he pule ʼo he loto fale, ʼo he telepi, peʼe ʼo he puleʼaga. ʼI te meʼa ʼaē neʼe sio kiai ia Esekiele, neʼe fakatonutonuʼi te kalasi ʼo te kau pule ʼo Iselaele ʼuhi ko te fefeka ʼo tanatou puleʼi te hahaʼi, pea neʼe fakatotonu age ke ʼaua naʼa nātou fakapalatahi kae ke nātou aga faitotonu. Logope la neʼe mole kau ʼi te kalasi ʼo te kau pelepitelo, kae neʼe maʼuhiga te gāue ʼa te pule ʼi te tauhi maʼa. Neʼe hū pea mo mavae mai te malaʼe ʼo tuʼa mo te hahaʼi ʼaē neʼe mole kau ki te ʼu telepi faka pelepitelo, pea neʼe heka ʼi te hūʼaga ʼo te Matapā ʼo te Potu Hahake, pea mo ina foaki he ʼu manu ke sakilifisioʼi maʼa te hahaʼi. (Esekiele 44:2, 3; 45:​8-​12, 17) Ko te meʼa ʼaia neʼe hā, neʼe ina fakamoʼoni ai ki te hahaʼi ʼo Esekiele ʼe tapuakiʼi anai te puleʼaga ʼaē ka toe fakatuʼu, ʼaki he ʼu hahaʼi takitaki ʼe nātou foaki he faʼifaʼitaki lelei, ko he ʼu tagata ʼe nātou lagolago anai ki te gāue ʼa te kau pelepitelo, ʼo nātou fai he ʼu fakatuʼutuʼu maʼa te hahaʼi ʼa te ʼAtua pea mo tuku he faʼifaʼitaki lelei ʼi te faʼahi fakalaumālie.

Te Fenua

9. (a) Neʼe tonu ke vaevae feafeaʼi te fenua, kae ko ai ʼaē neʼe mole foaki ki ai he koga ʼo te fenua ʼaia? (b) Neʼe koteā te meʼa ʼofa taputapu ʼaē neʼe foaki, pea koteā ʼaē neʼe tuʼu ai?

⁹ Moʼo fakaʼosi, neʼe sio Esekiele ki te fenua ʼo Iselaele. Neʼe tonu ke vaevae te fenua ʼaia, pea ke foaki ki te ʼu telepi takitahi hanatou ʼu kele. Neʼe toe foaki foki ki te pule tona moʼi kele. Kae neʼe mole foaki ki te kau pelepitelo he neʼe ʼui fēnei e Sehova, “Ko ʼau tonatou tofiʼa.” (Esekiele 44:10, 28; Faka au 18:20) ʼI te meʼa ʼaia neʼe hā, ko te moʼi kele ʼo te pule neʼe tuʼu ʼi te ʼu tafaʼaki ʼo te koga meʼa makehe, neʼe higoa ko te meʼa ʼofa taputapu ʼaē neʼe foaki. Ko te moʼi kele ʼo te fenua neʼe tapa fā pea mo vahe tolu​—ko ʼaluga neʼe foaki ki te kau Levite ʼaē neʼe fakahemala, ko lotomalie neʼe foaki ki te kau pelepitelo, pea ko lalo neʼe foaki maʼa te kolo pea mo tona ʼu kele lelei. Neʼe tuʼu te fale lotu ʼa Sehova ʼi te potu fenua ʼo te kau pelepitelo, ʼi te lotomalie ʼo te moʼi kele tapa fā ʼaē neʼe foaki.​—Esekiele 45:​1-7.

10. Ko te fakakikite ʼo te vaevae ʼo te fenua neʼe koteā tona faka ʼuhiga ki te kau Sutea ʼaunofo pea mo agatonu?

¹⁰ Neʼe lagi fakaloto mālohiʼi e te ʼu meʼa fuli ʼaia te loto ʼo nātou ʼaē neʼe ʼaunofo! Neʼe ko te fakamoʼoni ʼaia, ʼe tahi maʼu anai e te ʼu famili tanatou tofiʼa ʼi te fenua. (Vakaʼi ia Mikea 4:4.) Neʼe faka maʼuhigaʼi ʼi te fenua te tauhi maʼa pea mo fakahoko tāfito ai te tauhi. Pea koutou fakatokagaʼi ʼi te meʼa ʼaē neʼe hā kia Esekiele, ko te pule, ohage ko te kau pelepitelo, ʼe nofo ʼi te kele ʼaē neʼe foaki age e te hahaʼi. (Esekiele 45:16) Koia ʼi te fenua ʼaē neʼe toe laga, neʼe tonu ke tokoni te hahaʼi ki te gāue ʼo te kau takitaki ʼaē neʼe fakanofo e Sehova, pea mo lagolago kia nātou ʼo fakalogo ki tanatou takitaki. Ko meʼa fuli ʼi te fenua ʼaia, neʼe hā ʼaki mai ʼe fakaʼaluʼalu lelei anai te fenua, ʼe felagolagoʼaki anai te hahaʼi pea ʼe maʼu ai anai te fīmālie.

11, 12. (a) ʼAki te ʼu lea faka polofeta, ʼe fakapapau feafeaʼi e Sehova ki tana hahaʼi ʼe ina tapuakina anai te toe nofoʼi ʼo tonatou fenua? (b) Koteā ʼaē neʼe fakatātā e te ʼu fuʼu ʼakau ʼaē neʼe tutuʼu ʼi te ʼu tafaʼaki ʼo te vaitafe?

¹¹ Neʼe tapuakina koa e Sehova tonatou fenua? ʼE tali kiai te lea faka polofeta ʼaki te fakamatala fakaloto māfana. Neʼe tatafe te vai mai te fale lotu, ʼo fakaʼaluʼalu ʼo loloto, pea neʼe liliu ko he foʼi vaitafe ʼi tana aʼu ki te Tai Mate. Ko te vaitafe ʼaia ʼe ina toe fakamaʼuli te ʼu vai mate, pea neʼe lahi ai te kau gelu ʼi tona ʼu kauvai. ʼI te ʼu tafaʼaki ʼo te vaitafe, neʼe lahi ʼaupito ai te ʼu fuʼu ʼakau ʼe fua ʼi te taʼu katoa, ʼo feala ai ki te hahaʼi ke nātou kai pea mo nātou maʼuli mālōlō.​—Esekiele 47:​1-​12.

¹² Neʼe toe fakahā te fakapapau ʼaia ki te kau ʼaunofo pea neʼe fakamoʼoni kiai te ʼu lea faka polofeta ʼaē neʼe fai ʼi muʼa atu, ʼe toe nofoʼi anai te fenua, ʼaē neʼe maʼuhiga ʼaupito kia nātou. ʼE lahi te ʼu lakaga, neʼe fakamatala ai e te kau polofeta ʼa Sehova, ʼaki he ʼu palalau fakatuketuke, te toe laga pea mo te toe nofoʼi ʼo Iselaele. Neʼe talanoa tāfito te ʼu lea faka polofeta ki te toe maʼuli ʼo te ʼu koga meʼa ʼaē neʼe līʼakina. (Isaia 35:​1, 6, 7; 51:3; Esekiele 36:35; 37:​1-​14) Koia, neʼe feala ai ki te kau Sutea ke nātou ʼamanaki ko te ʼu tapuakina ʼa Sehova ʼaē ʼe nātou foaki te maʼuli, ʼe nātou hage anai ko te vaitafe ʼaē neʼe tatafe mai te fale lotu ʼaē neʼe toe laga. Ko te puleʼaga ʼaē neʼe mate ʼi te faʼahi fakalaumālie, ʼe toe maʼuli anai. ʼE tapuakina anai te hahaʼi ʼaki te ʼu tagata makehe ʼi te faʼahi fakalaumālie​—ko he ʼu tagata ʼe faitotonu pea mālohi ohage ko te ʼu fuʼu ʼakau ʼaē ʼe tuʼu ʼi te ʼu tafaʼaki ʼo te vaitafe, ko he ʼu tagata ʼe nātou takitaki anai te toe laga ʼo te fenua ʼaē neʼe maumau. ʼO feiā mo Isaia, neʼe talanoa ʼo ʼuhiga mo te ʼu “fuʼu ʼakau lalahi ʼo te faitotonu” ʼe nātou “toe lagaʼi anai te ʼu potu ʼaē neʼe kua maumau talu mai fualoa.”​—Isaia 61:​3, 4.

Ko Te Temi Fea ʼAē Neʼe Hoko Ai Te Meʼa ʼAē Neʼe Hā?

13. (a) Neʼe tapuakina feafeaʼi e Sehova tana hahaʼi ʼaki “te ʼu fuʼu ʼakau ʼo te faitotonu”? (b) Neʼe hoko feafeaʼi te lea faka polofeta ʼo ʼuhiga mo te Tai Mate?

¹³ Neʼe lotomamahi koa te kau Sutea ʼaunofo ʼi tanatou toe liliu mai ki tonatou fenua? Kailoa ia! Ko te toe ʼo te kau Sutea neʼe nātou toe liliu ki tanatou fenua ʼofaina ʼi te taʼu 537 ʼi muʼa ʼo totatou temi. ʼAki te temi, ʼi te takitaki ʼo te ʼu “fuʼu ʼakau lalahi ʼo te faitotonu”​—ohage la ko te sekelipa ko Esitalasi, te ʼu polofeta ko Osea mo Sakalia, pea mo te Pelepitelo Lahi ko Sosue​—neʼe toe laga te ʼu koga meʼa ʼaē neʼe kua maumau talu mai fualoa. Ko te ʼu pule, ohage ko Nehemia pea mo Solopapele, neʼe nātou puleʼi te fenua ʼaki te agatonu pea mo te faitotonu. Neʼe toe laga te fale lotu ʼa Sehova, pea neʼe toe mahu ai te ʼu fakatuʼutuʼu ʼaē neʼe ina fai ʼo ʼuhiga mo te maʼuli​—te ʼu tapuakina ʼaē neʼe maʼu e te kau Iselaelite ʼi tanatou mulimuli ki tana fuakava. (Teutalonome 30:19; Isaia 48:17-​20) ʼI te ʼu tapuakina ʼaia neʼe kau ai te ʼatamai mālama. Neʼe toe fai e te kau pelepitelo tanatou gāue, pea neʼe nātou akoʼi te Lao ki te hahaʼi. (Malakia 2:7) ʼO tupu ai te toe maʼuli ʼa te hahaʼi ʼi te faʼahi fakalaumālie pea mo nātou toe liliu ko he ʼu kaugana ʼa Sehova neʼe fua tanatou gāue, ohage ko tona fakatātā e te toe maʼuli ʼo te Tai Mate pea mo te mahu ai ʼo te gelu.

14. He koʼe neʼe tonu ke ʼi ai he tahi fakahoko ʼo te lea faka polofeta ʼo Esekiele ʼi te kua toe liliu mai ʼa te kau Sutea ʼaē neʼe ʼaunofo ʼi Papiloni?

¹⁴ Neʼe ko te ʼu meʼa pe koa ʼaia ʼaē neʼe tonu ke hoko ʼi te meʼa ʼaē neʼe hā kia Esekiele? Kailoa; ʼe fakahā ai te meʼa ʼe lahi age. Koutou fakatokagaʼi: Ko te fale lotu ʼaē neʼe sio kiai Esekiele neʼe mole feala ke laga moʼoni ʼo mulimuli ki te meʼa ʼaē neʼe sio kiai. ʼE moʼoni, neʼe tui papau te kau Sutea ki te meʼa ʼaia neʼe hā, pea neʼe nātou fakahoko moʼoni ʼihi faʼahi ʼo te meʼa ʼaia.b Kae ko te fale lotu katoa ʼaē neʼe hā kia Esekiele, neʼe lahi fau ke feala hona laga ʼi te Moʼuga ʼo Molia, te potu ʼaē neʼe tuʼu ai te fale lotu ʼāfea. Tahi ʼaē meʼa, ko te fale lotu ʼaē neʼe sio kiai Esekiele, neʼe mole tuʼu ʼi te kolo, kae neʼe tuʼu mamaʼo atu ia ʼi te tahi potu ʼo te fenua, kae ko te lua fale lotu neʼe laga ia ʼi te potu ʼāfea ʼaē neʼe tuʼu ai te ʼuluaki, ʼi te kolo ʼo Selusalemi. (Esitalasi 1:​1, 2) Pea neʼe mole he vaitafe moʼoni neʼe tatafe mai te fale lotu ʼo Selusalemi. Koia neʼe hoko fakakoga pe te lea faka polofeta ʼo Esekiele ki te Iselaele ʼāfea. Ko tona faka ʼuhiga ko te meʼa ʼaia neʼe hā, ʼe tonu ke ʼi ai hona fakahoko ʼe lahi age ʼi te faʼahi fakalaumālie.

15. (a) Ko te temi fea ʼaē neʼe kamata gāue ai te fale lotu fakalaumālie ʼa Sehova? (b) Koteā ʼaē ʼe hā ʼaki mai neʼe mole hoko te meʼa ʼaē neʼe hā kia Esekiele ʼi te temi ʼaē neʼe maʼuli ai Kilisito ʼi te kele?

¹⁵ ʼE mahino papau ia ʼe tonu ke tou kumi te temi tāfito ʼaē neʼe hoko ai te meʼa ʼaē neʼe hā kia Esekiele, ʼo ʼuhiga mo te fale lotu lahi fakalaumālie ʼa Sehova, ʼaē ʼe lahi te talanoa kiai ʼa te ʼapositolo ko Paulo ʼi tana tohi ki te kau Hepeleo. Neʼe kamata gāue te fale lotu ʼaia ʼi te temi ʼaē neʼe fakanofo ai Sesu Kilisito ko tona Pelepitelo Lahi ʼi te taʼu 29 ʼo totatou temi. Kae neʼe hoko koa te meʼa ʼaē neʼe hā kia Esekiele ʼi te temi ʼo Sesu? Kailoa ia. ʼI tona ʼuhiga Pelepitelo Lahi, neʼe fakahoko e Sesu te meʼa ʼaē neʼe fakatātā e te ʼAho ʼo te ʼu Faifakalelei, ʼaki tana papitema, mo tana mate faka sakilifisio, pea mo tana hū ʼaē ki te Potu Taputapu ʼAupito, ʼaē ʼi selo. (Hepeleo 9:​24) Kae ʼe lelei tatatou fakatokagaʼi, ʼi te meʼa ʼaē neʼe hā kia Esekiele neʼe mole talanoa ia ki te pelepitelo lahi peʼe ki te ʼAho ʼo te ʼu Faifakalelei. Koia neʼe mole hoko te meʼa ʼaia neʼe hā ʼi te ʼuluaki sēkulō ʼo totatou temi. Kae ʼe hoko koa ʼi te temi fea?

16. Koteā te tahi lea faka polofeta ʼaē ʼe fakamanatuʼi mai e te meʼa ʼaē neʼe hā kia Esekiele, pea ʼe tokoni feafeaʼi mai te faʼahi ʼaia ke tou ʼiloʼi ai te temi ʼaē ʼe hoko tāfito ai te meʼa ʼaē neʼe hā kia Esekiele?

¹⁶ Moʼo tali kiai, tou toe vakaʼi te meʼa ʼaia neʼe hā. Neʼe tohi fēnei e Esekiele: “ ʼI te ʼu hā ʼo te ʼAtua neʼe ina ʼave ʼau ki te fenua ʼo Iselaele pea neʼe ina tuku ʼau ʼi te tumutumu ʼo te moʼuga māʼoluga ʼaupito, pea neʼe ʼi ai te meʼa ʼe hage ko te agaaga ʼo he kolo ʼi te potu toga.” (Esekiele 40:2) ʼI te meʼa ʼaē neʼe hā, ko te “moʼuga māʼoluga ʼaupito,” ʼe ina fakamanatuʼi mai kia tatou te vaega ʼo Mikea 4:1: “ ʼE mahino papau ia, ʼi te ʼu ʼaho fakaʼosi, ko te moʼuga ʼo te fale ʼo Sehova ʼe tuʼu mālohi anai ʼi te fuga tumutumu ʼo te ʼu moʼuga, pea ʼe māʼoluga anai ʼi te ʼu kiʼi moʼuga liliki; pea ʼe tonu anai ke ʼolo kiai te ʼu puleʼaga fuli pe.” Ko te temi fea ʼaē ʼe hoko ai te lea faka polofeta ʼaia? ʼE fakahā mai ia Mikea 4:5 ʼe kamata te faʼahi ʼaia ʼi te temi ʼaē ʼe kei tauhi ai te ʼu puleʼaga ki te ʼu ʼatua hala. ʼI tona fakahagatonu, neʼe hoko te faʼahi ʼaia ʼi totatou temi, ʼi “te ʼu ʼaho fakaʼosi,” ʼaē kua māʼoluga ai te tauhi maʼa, pea mo te toe fakatuʼu ʼo te tauhi maʼa ʼaia ʼi tona tuʼulaga totonu ʼi te maʼuli ʼo te ʼu kaugana ʼa te ʼAtua.

17. ʼE tokoni feafeaʼi mai kia tatou te lea faka polofeta ʼo Malakia 3:​1-5, ke tou ʼiloʼi ai te temi ʼaē neʼe fakamaʼa ai te fale lotu ʼaē neʼe hā kia Esekiele?

¹⁷ Koteā ʼaē ʼe ina faka fealagia te toe fakatuʼu ʼaia ʼo te tauhi maʼa? Koutou manatuʼi, ko te meʼa maʼuhiga tāfito ʼaē neʼe sio kiai Esekiele, ʼe ko te hū ʼa Sehova ki te fale lotu pea mo tana fakamaʼua ʼaē ke fakamaʼa tona fale mai te tauhi tamapua. Neʼe fakamaʼa ʼanafea te fale lotu fakalaumālie ʼa te ʼAtua? Ia Malakia 3:​1-5, neʼe fakakikite e Sehova te temi ʼaē ka “haʼele mai [anai] ki Tona fale lotu” ʼaki tana “faifekau ʼo te fuakava,” ia Sesu Kilisito. Koteā ʼaē ka ina fai? “ ʼE hage anai ko te afi ʼo te tagata fakamaʼa ukamea pea ohage ko te sota ʼo te ʼu tagata fai fō.” Ko te fakamaʼa ʼaia neʼe kamata lolotoga te temi ʼo te ʼuluaki tau faka malamanei. Koteā ʼaē neʼe hoko ai? Neʼe nofo Sehova ʼi tona fale pea neʼe ina tapuakina te fenua fakalaumālie ʼo tana hahaʼi ʼo kamata talu mai te taʼu 1919. (Isaia 66:8) Kua tou mahino ai ko te lea faka polofeta ʼo ʼuhiga mo te fale lotu ʼaē neʼe hā kia Esekiele, ʼe hoko tāfito ʼi te ʼu ʼaho fakamuli.

18. Ko te temi fea ʼaē ʼe hoko fakamuli ai te ʼu meʼa ʼo te fale lotu ʼaē neʼe hā kia Esekiele?

¹⁸ Ohage ko te tahi ʼu lea faka polofeta ʼo ʼuhiga mo te toe laga ʼo te fenua, ko te meʼa ʼaē neʼe hā kia Esekiele ʼe ʼi ai tona tahi fakahoko, tona fakahoko fakamuli, ʼi te Palatiso. ʼE hoki feala anai ʼi te temi ʼaia ke maʼu ai e te hahaʼi faitotonu te ʼu tapuakina lahi ʼo te ʼu fakatuʼutuʼu ʼo te fale lotu ʼa te ʼAtua. ʼE fakaʼaogaʼi anai e Kilisito te maʼuhiga ʼo tona sakilifisio, ʼo fakatahi mo te toko 144 000 kau pelepitelo ʼi selo. Ko te hahaʼi fuli ʼaē ʼe fakalogo ki te pule ʼo Kilisito ʼe nātou fakaaʼu anai ki te maʼuli haohaoa. (Apokalipesi 20:​5, 6) Kae ko te Palatiso ʼe mole ko te temi tāfito ʼaia ʼaē ka hoko ai te meʼa ʼaē neʼe hā kia Esekiele. Koteā tona tupuʼaga?

ʼE Faka ʼUhiga Te Meʼa ʼAē Neʼe Hā Ki Totatou Temi

19, 20. He koʼe ʼe tonu ke hoko tāfito te meʼa ʼaē neʼe hā ia ʼaho nei ka mole ʼi te Palatiso?

¹⁹ Neʼe sio Esekiele ki he fale lotu neʼe tonu ke fakamaʼa mai te tauhi tamapua pea mo te folonikasio fakalaumālie. (Esekiele 43:​7-9) ʼE mahino papau ia ʼe mole faka ʼuhiga te faʼahi ʼaia ki te tauhi kia Sehova ʼi te Palatiso. Pea tahi ʼaē meʼa, ʼi te meʼa ʼaē neʼe hā, ko te kau pelepitelo ʼe nātou fakatātā te kalasi ʼo te kau pelepitelo fakanofo ʼaē kei maʼuʼuli ʼi te kele, kae mole faka ʼuhiga ki tanatou kua fakatuʼuake ki selo peʼe lolotoga te ʼu Taʼu e Afe. Koteā tona tupuʼaga? Koutou fakatokagaʼi ʼe ʼui ai ko te kau pelepitelo ʼe nātou tauhi ʼi te malaʼe ʼaē neʼe tuʼu ʼi loto. Ko te ʼu alatike ʼo te ʼu Tule Leʼo ʼi muʼa atu neʼe nātou fakahā ko te malaʼe ʼaia ʼe ina fakatātā te tuʼulaga fakalaumālie ʼaē ʼe maʼu tokotahi pe e te kau lagolago pelepitelo ʼa Kilisito lolotoga tanatou kei maʼuʼuli ʼi te kele.c Tahi ʼaē meʼa, koutou fakatokagaʼi, ʼe fakahā lelei mai e te meʼa ʼaia neʼe hā te ʼaluʼaga heʼe haohaoa ʼo te kau pelepitelo. ʼE fakatotonu age kia nātou ke nātou momoli he ʼu sakilifisio maʼa tanatou ʼu agahala. ʼE fakatokaga age kia nātou ke ʼaua naʼa nātou liliu ʼo heʼemaʼa​—ʼi te faʼahi fakalaumālie pea ʼi tanatou ʼu aga. Koia ʼe mole nātou fakatātā te kau fakanofo ʼaē kua fakatuʼuake, ʼaē neʼe tohi fēnei e te ʼapositolo ko Paulo ʼo ʼuhiga mo nātou: “Ka tagi anai te fakatagi pea e tuuake anai te kau mate [ʼo heʼepopo].” (1 Kolonito 15:52; Esekiele 44:21, 22, 25, 27) ʼI te meʼa ʼaē neʼe hā, ʼe tauhi fakatahi te kau pelepitelo pea mo te hahaʼi. ʼE mole feiā anai ʼi te Palatiso, heʼe maʼuli anai te kalasi ʼo te kau fakanofo ʼi selo. Koia ʼe fakahā lelei mai e te meʼa ʼaē neʼe hā, te felogoi lelei ʼo te kau fakanofo pea mo te “toe hahaʼi tokolahi” ʼi tanatou gāue ʼi te kele ia ʼaho nei.​—Apokalipesi 7:9; Esekiele 42:14.

²⁰ Koia, ko te meʼa ʼaē neʼe hā kia Esekiele, neʼe ina fakahā fakatomuʼa te ʼu fua lelei ʼo te fakamaʼa ʼi te faʼahi fakalaumālie ʼaē ʼe lolotoga fakahoko ia ʼaho nei. Kae koteā tona faka ʼuhiga kia koutou? ʼE mole ʼui pe, ʼe ko he manatu faka teolosia ʼe faigataʼa hatatou mahino kiai. Ko te meʼa ʼaia neʼe hā ʼe ʼi ai tona pikipikiga mo takotou tauhi ʼaē ʼe koutou fai ʼi te ʼaho fuli kia Sehova, te ʼAtua moʼoni. ʼI te alatike ʼaē ka hoa mai, ʼe tou vakaʼi anai peʼe hoko feafeaʼi te faʼahi ʼaia.

[Nota ʼi te lalo pasina]

◻ Neʼe koteā te ʼuluaki fakahoko ʼo te fale lotu pea mo tana kau pelepitelo ʼaē neʼe hā kia Esekiele?

◻ Neʼe hoko feafeaʼi ʼi te temi muʼa, te vaevae ʼo te fenua ʼaē neʼe hā kia Esekiele?

◻ ʼI te toe nofoʼi ʼo te Iselaele ʼāfea, neʼe ko ai koa te ʼu pule agatonu pea ko ai ʼaē neʼe hage ko “he ʼu fuʼu ʼakau lalahi ʼo te faitotonu”?

◻ He koʼe ko te fale lotu ʼaē neʼe hā kia Esekiele, ʼe tonu ke hoko tāfito ʼi te ʼu ʼaho fakamuli?

[ʼU Fehuʼi ʼo te ako]