Tou Lagolago Ki Te Puleʼaga​—Te Laga ʼo Te ʼu Fale Ki Te Tauhi Pea Mo Te ʼu Tokoni Moka Hoko He Tuʼutamaki

ʼE KE ulu ki te Fale Fono pea ʼe kua lahi te ʼu fetogi. ʼE ke fiameʼameʼa ʼi tau sio ki te fale ʼaia. Pea ʼe lagi ke manatuʼi neʼe ke tokoni ki tona laga kua hili ki ai ni taʼu. Kaʼe ʼe toe lahi age tau fiameʼameʼa ʼi tau sio ʼae kua fakaʼaogaʼi ia te Fale Fono moʼo tokoni ki te hahaʼi. Koteʼuhi, mole heʼeki faʼa fualoa, neʼe to ia te afā pea mo ni ʼua lalahi. Neʼe hoko ai te ʼu maumau ʼi tou kolo. Neʼe fai atu pe e te Komite ʼo Te Filiale he fakatuʼutuʼu ke feala ke maʼu e te hahaʼi he meʼa kai, mo ni mutu ʼi meʼa, mo ni hina vai pea mo te tahi atu ʼu tokoni. Neʼe fakatuʼutuʼu lelei ia te ʼu tokoni ʼae neʼe foaki. ʼE fonu te Fale Fono ko te ʼu tehina mo tuagaʼane. Pea ʼe natou toʼo te ʼu meʼa ʼae ʼe ʼaoga kia natou pea mo natou fetagihi ʼi te lahi ʼo tonatou fiafia.

Neʼe ui e Sesu ʼe iloʼi lelei anai ʼana tisipulo ʼuhi ko tanatou feʼofaʼaki. (Soa. 13:34, 35) ʼI te faʼahi 6 ʼaeni, ʼe tou vakaʼi anai pe ʼe ha feafeaʼi ia te ʼofa Fakakilisitiano ʼaia ʼi te ʼu fakatuʼutuʼu laga fale ʼa te kau Fakamoʼoni ʼa Sehova pea mo tanatou tokoni moka hoko he tuʼutamaki. Ko te ʼofa lahi ʼaia ʼe ko he fakamoʼoni malohi ʼo te puleʼi ʼo tatou e te Puleʼaga ʼo Sesu.