Neʼe Lahilahi Ake ʼi Nasaleti

Neʼe lahilahi ake ia Sesu ʼi Nasaleti, ko he kiʼi kolo veliveli pea neʼe mole faʼa maʼuhiga. Neʼe tuʼu ʼi Kalilea, ʼi te ʼu moʼuga, pea ʼi te potu uesite ʼo te vai ʼae neʼe higoa ko te Tai ʼo Kalilea.

ʼI tona lagi taʼu lua, neʼe mavae ia Sosefo, mo Malia pea mo Sesu mai Esipito, ʼo natou ʼomai leva ki te kolo ʼaia. ʼI te temi ʼaia, neʼe lagi ko tanā tamasiʼi pe ʼaia ʼe tahi. Kaʼe ki muli age, neʼe tupu leva te ʼu tehina ʼo Sesu, ko Sakopo, mo Sosefo, mo Simone, pea mo Sutasi. Neʼe toe maʼu foki e Sosefo mo Malia ʼanā taʼahine, ko te ʼu tokolua ʼo Sesu. Koia, neʼe lagi toko ono te ʼu tehina mo tokolua ʼo Sesu.

Neʼe toe ʼi ai foki mo te ʼu kaiga ʼo Sesu. Kua tou iloʼi ia Elisapeta pea mo tana tama ko Soane, ʼae neʼe nonofo mamaʼo, ʼi Sutea. Neʼe ʼi ai mo Salome, ʼae neʼe toe nofo mo ia ʼi Kalilea, neʼe lagi ko te tehina ʼo Malia ʼe fakafaʼe ki ai ia Sesu. Neʼe higoa te ʼohoana ʼo Salome ko Sepeteo. Ko ʼanā toe tagata ʼe lua, ko Sakopo mo Soane, neʼe ko te ʼu tehina mataʼi tama ʼo Sesu. ʼE mole tou iloʼi pe neʼe fakatahi ia Sesu mo te ʼu tama ʼaia ʼi tanatou lahilahi ake, kaʼe ki muli age, neʼe nā liliu ko he ʼu kaumeʼa lelei ʼo Sesu, he neʼe nā kau ki tana kau apositolo.

Neʼe tonu ke gaue kinakina ia Sosefo moʼo taupau tona kiʼi famili ʼae kua hahaʼi. Neʼe ko te tagata tufuga ʼakau. Neʼe tokaga ia Sosefo kia Sesu ohage pe ko hona foha totonu, koia neʼe fakahigoaʼi ai ia Sesu ko “te foha ʼo te tagata tufuga ʼakau.” (Mateo 13:55) Neʼe akoʼi e Sosefo ia Sesu ke toe liliu mo ia ko he tagata tufuga ʼakau, pea neʼe fakalogo lelei. ʼO tupu ai tona ui fenei e te hahaʼi: “ ʼE mole koa la ko te tufuga ʼakau ʼaeni?”—Maleko 6:3.

Neʼe fakahagahaga tafito te maʼuli ʼo te kiʼi famili ʼo Sosefo ki te tauhi ʼae kia Sehova. Neʼe mulimuli ia Sosefo mo Malia ki te Lao ʼa te ʼAtua, ʼo nā akoʼi ʼanā fanau ʼi te faʼahi fakalaumalie ‘moka natou nonofo ʼi tonatou ʼapi peʼe moka natou olo ʼi te ala peʼe moka natou momoe peʼe moka natou ʼaʼala ake.’ (Tetelonome 6:6-9) Neʼe ʼi ai te sinakoka ʼi Nasaleti. ʼE mahino ia, neʼe tau olo ia Sosefo mo tona kiʼi famili ʼo tauhi ʼi ai. Ki muli age, neʼe ui ʼo ʼuhiga mo Sesu, neʼe alu ki te sinakoka “ ʼo mulimuli pe ki tana agamahani ʼi te ʼaho ʼo te Sapato.” (Luka 4:16) Neʼe toe fiafia lahi foki te kiʼi famili moka natou faifagona ki te fale lotu ʼa Sehova, ʼi Selusalemi.