Watchtower TANAKIʼAGA TOHI ʼI TE NETI
Watchtower
TANAKIʼAGA TOHI ʼI TE NETI
Faka'uvea
  • TOHI-TAPU
  • TOHI
  • FONO
  • kr kap. 20 p. 209-219
  • ʼE Kau Ki Tatatou Minisitelio Te ʼu Tokoni Moka Hoko He Tuʼutamaki

Aucune vidéo n'est disponible pour cette sélection.

Il y a eu un problème lors du chargement de la vidéo.

  • ʼE Kau Ki Tatatou Minisitelio Te ʼu Tokoni Moka Hoko He Tuʼutamaki
  • Kua Pule Ia Te Puleʼaga ʼo Te ʼAtua! (kr)
  • Manatu Tafito
  • He Tahi ʼu Alatike
  • Ko Tatatou Tokoni Moka Hoko He Tuʼutamaki ʼe Kau Ki Te Tauhi Taputapu
  • Te ʼu Tupuʼaga ʼo Tatatou Foaki He ʼu Tokoni
  • Te ʼu Fua Lelei
  • ʼE Feala Koa Ke Ke Kau Ki Ai?
  • Kotea ʼe Feala Ke Tou Fai Moka Hoko He Tuʼutamaki Fakanatula
    Te Maʼuli Fakakilisitiano Mo Te Faifakamafola—Kaupepa Ako—2023
  • ’E Kotou Tokoni Koa Moka Hoko He Tu’utamaki Fakanatula?
    Fehuʼi ʼe Fai Tuʼumaʼu
  • Tou Lagolago Ki Te Puleʼaga​—Te Laga ʼo Te ʼu Fale Ki Te Tauhi Pea Mo Te ʼu Tokoni Moka Hoko He Tuʼutamaki
    Kua Pule Ia Te Puleʼaga ʼo Te ʼAtua! (kr)
  • Koteā ʼAē ʼe Tou Lava Fai Moʼo Tokoni?
    Te Minisitelio ʼo Te Puleʼaga—2005
Hoko Atu
Kua Pule Ia Te Puleʼaga ʼo Te ʼAtua! (kr)
kr kap. 20 p. 209-219

KAPITE 20

ʼE Kau Ki Tatatou Minisitelio Te ʼu Tokoni Moka Hoko He Tuʼutamaki

FAKATUʼUTUʼU ʼO TE KAPITE

Te fakaha ʼo te ʼofa Fakakilisitiano moka hoko he ʼu tuʼutamaki

1, 2. (1) Kotea te aluʼaga faigataʼa neʼe tau mo te kau Kilisitiano ʼi Sutea? (2) Kotea te tokoni ʼofa ʼae neʼe fai ki te kau Kilisitiano ʼaia?

ʼI TE taʼu 46 H.T.S., neʼe hoko te toe hoge lahi ʼi Sutea. Neʼe totogi kovi te meʼa kai he neʼe kua tahitahiga. Koia neʼe pakupaku ai te ʼu tisipulo ʼa Kilisito ʼae ʼi Sutea ʼuhi neʼe mole hanatou foʼi falā moʼo totogi hanatou meʼa kai. Kaʼe neʼe natou sisio ki te haofaki ʼo natou e Sehova ʼi hona aluʼaga neʼe heʼeki hoko ki te ʼu tisipulo ʼa Kilisito. Kotea ʼae neʼe hoko?

2 Ko te kau Kilisitiano Sutea pea mo natou ʼae neʼe mole Sutea ʼi te kolo ko Atiokia ʼi Silia, neʼe natou tanaki he falā maʼa ʼonatou tehina ʼae neʼe ʼi Selusalemi pea mo Sutea. Neʼe natou fai ia te fakatuʼutuʼu he neʼe malave kia natou ia te faigataʼaia ʼae neʼe tau mo ʼonatou tehina. Koia, neʼe natou filifili ai te ʼu tehina ʼe toko lua ko Palenapa mo Saulo, ke nā fakatoʼo age te falā ʼaia ki te kau tagata ʼafeā ʼo te kokelekasio ʼo Selusalemi. (Lau ia Gaue 11:27-30; 12:25.) Fakakaukauʼi age muʼa te toe fiafia lahi ʼo te ʼu tehina ʼi Sutea ʼi te fakaha ʼo te ʼofa ʼo ʼonatou tehina ʼo Atiokia.

3. (1) ʼE faʼifaʼitakiʼi feafeaʼi e te hahaʼi ʼa te ʼAtua ʼi totatou temi ia te kau ʼuluaki Kilisitiano ʼo Atiokia? Tuku mai he faʼifaʼitaki. (Vakaʼi mo te fakamatala ʼae ʼi te ʼa takai “Te Tokoni Ki ʼOtatou Tehina Hili Te Lua Tau Fakamalamanei.”) (2) Kotea te ʼu fehuʼi ʼae ka tou vakaʼi anai ʼi te kapite ʼaeni?

3 Neʼe ko te hoki fakamatala ʼaia ʼo he tokoni neʼe foaki ki te kau Kilisitiano ʼo he tahi age koga meʼa. Pea ʼe kei tou faʼifaʼitakiʼi pe ia ʼaho nei ʼotatou tehina ʼaia ʼo Atiokia. Koteʼuhi ka tou logo neʼe hoko he tuʼutamaki ki ʼotatou tehina ʼi he fenua peʼe natou tau mo he faigataʼaia, pea ʼe tou tokoni kia natou.a Ke tou mahino pe ʼe kau tatatou tokoni ʼaia ki tatatou minisitelio, tou vakaʼi te ʼu fehuʼi ʼaeni ʼe tolu: He ko ʼe ko te ʼu tokoni ʼae ʼe tou foaki ki ʼotatou tehina ʼe kau ki tatatou minisitelio? Kotea te ʼu tupuʼaga ʼo tatatou tokoni ʼaia? Kotea te ʼu fua lelei ʼe tou maʼu mai ai?

Ko Tatatou Tokoni Moka Hoko He Tuʼutamaki ʼe Kau Ki Te Tauhi Taputapu

4. Kotea ʼae neʼe ui e Paulo ki te kau Kolinito ʼo ʼuhiga mo te minisitelio Fakakilisitiano?

4 ʼI tana lua tohi ki te kau Kolinito, neʼe fakamahino e Paulo ʼe ko faʼahi ʼe lua ʼe kau ki te minisitelio ʼa te kau Kilisitiano. Logo la neʼe faitohi ia Paulo ki te kau Kilisitiano fakanofo, kaʼe ʼe toe fakaʼuhiga pe foki ki te tahi ʼu ovi ʼa Kilisito ia ʼaho nei. (Soa. 10:16) Ko te ʼuluaki faʼahi ʼo totatou minisitelio ʼe ko “te gaue o te fakatokatoka,” ʼae ʼe ko tatatou gaue faifakamafola pea mo faiako. (2 Ko. 5:18-20; 1 Tim. 2:3-6) Pea lua, ʼe ko tatatou “tokoni” ki ʼotatou tehina, ohage ko tona ui e Paulo. (2 Ko. 8:4) Ko te ʼu kupu “gaue” pea mo “tokoni” ʼe ko te fakaliliu ʼaia ʼo te kupu Fakakeleka diakonia, ʼae ʼe fakaʼuhiga ki te kupu “minisitelio.” Kotea ʼae ʼe feala ke tou mahino ai?

5. He ko ʼe neʼe ui e Paulo ko te tokoni ki ʼotatou tehina moka hoko he tuʼutamaki ʼe kau ki te minisitelio?

5 ʼI te fakaʼaogaʼi e Paulo ia te kupu Fakakeleka ʼe tahi moʼo talanoa ki te ʼu gaue ʼaia ʼe lua, neʼe ina ui ai ko te tokoni ki ʼotatou tehina moka hoko he tuʼutamaki ʼe kau ki te ʼu minisitelio kehekehe ʼae ʼe fakahoko ʼi te kokelekasio. ʼI tana ʼuluaki tohi ki te kau Kolinito, neʼe ina ui fenei: “[ʼE ʼi ai] te u tauhi kehekehe, kae ko te Aliki pe e tahi; mo te u gaue kehekehe . . . [kaʼe] ko te Laumalie e tahi ae e ina fai te u mea fuli aia.” (1 Ko. 12:4-6, 11) Neʼe ui e Paulo ko te ʼu minisitelio kehekehe ʼae ʼe fakahoko ʼi te kokelekasio ʼe kau ki te tauhi taputapu.b (Loma 12:1, 6-8) Koia ʼe mole tou punamaʼuli ai ki tana lotolelei ʼo fakaʼaogaʼi tona temi moʼo “tokoni” ki te kau maʼoniʼoni.—Loma 15:25, 26.

6. (1) Ohage ko tona fakamahino e Paulo, he ko ʼe ko tatatou tokoni ki ʼotatou tehina ʼe kau ki tatatou tauhi kia Sehova? (2) Fakamatala pe kotea te ʼu fakatuʼutuʼu kua fai ʼi te malamanei katoa moka hoko he tuʼutamaki? (Vakaʼi te fakamatala ʼae ʼi te ʼa takai “Ka Hoko He Tuʼutamaki,” ʼi te pasina 214.)

6 Neʼe tokoni ia Paulo ki te kau Kolinito ke natou mahino pe ko ʼe ko te tokoni ki te ʼu tehina moka hoko he tuʼutamaki ʼe kau ki tanatou minisitelio pea mo tanatou tauhi kia Sehova. Neʼe ina ui ʼe foaki e te kau Kilisitiano ia te tokoni he ʼe natou “fakalogo ki . . . te Evaselio a Kilisito.” (2 Ko. 9:13) Koia, ʼe tokoni te kau Kilisitiano ki ʼonatou tehina he ʼe natou fia maʼuliʼi ia te ʼu akonaki ʼa Kilisito. Pea ohage ko tona ui e Paulo, ko tanatou tokoni ʼe ko te fakaha ʼo te ʼofa makehe ʼo te ʼAtua. (2 Ko. 9:14; 1 Pet. 4:10) ʼO ʼuhiga mo te tokoni ʼae ki ʼotatou tehina moka hoko he tuʼutamaki, neʼe ui fenei ʼi Te Tule Leʼo ʼo te ʼaho 1 ʼo Malesio 1976 (Fakafalani): “ʼE tonu ke tou tui papau ʼe maʼuhiga ʼaupito kia Sehova ʼAtua pea mo tona ʼAlo ko Sesu Kilisito te gaue ʼaia.” Koia, ko te tokoni ki ʼotatou tehina moka hoko he tuʼutamaki ʼe ko he faʼahi maʼuhiga ʼo tatatou tauhi taputapu.—Loma 12:1, 7; 2 Ko. 8:7; Hep. 13:16.

Te ʼu Tupuʼaga ʼo Tatatou Foaki He ʼu Tokoni

7, 8. Kotea te ʼuluaki tupuʼaga ʼo tatatou tokoni ki ʼotatou tehina moka hoko he tuʼutamaki? Fakamahino.

7 Kotea te ʼu tupuʼaga ʼo tatatou foaki he ʼu tokoni moka hoko he tuʼutamaki? Neʼe tali e Paulo ki ai ʼi tana lua tohi ki te kau Kolinito. (Lau ia 2 Kolinito 9:11-15.) ʼI te ʼu vaega ʼaia, ʼe fakaha lelei e Paulo te ʼu tupuʼaga ʼe tolu. Tou vakaʼi takitahi te ʼu tupuʼaga ʼaia.

8 ʼUluaki, ka tou tokoni ki ʼotatou tehina moka hoko he tuʼutamaki pea ʼe fakakololiaʼi ai ia Sehova. ʼE feala ke tou tokagaʼi te talanoa tuʼa lahi ʼa Paulo ki ʼona tehina ʼo ʼuhiga mo Sehova ʼAtua ʼi te ʼu vaega ʼaia ʼe nima. ʼE talanoa ki “ni fakafetai ki te Atua” pea mo “ni fakafetai lahi ki te Atua.” (Vaega 11, 12) ʼE ina toe fakaha mo te ‘fakakololia ʼa te kau Kilisitiano ki te ʼAtua’ ʼuhi ko te ʼu tokoni ʼae neʼe fai kia natou pea mo tanatou fakafetaʼi ki “te kalasia mauhiga ae kua fai e te Atua” kia natou. (Vaega 13, 14) Pea ʼe fakaʼosi fenei e Paulo: “Ke fakafetai ki te Atua.”—Vaega 15; 1 Pet. 4:11.

9. ʼE lava fetogi feafeaʼi te mahalohalo ʼa te hahaʼi ʼaki tatatou fetokoniʼaki moka hoko he tuʼutamaki? Tuku mai he faʼifaʼitaki.

9 ʼE tatau te manatu ʼa te ʼu kaugana ʼa te ʼAtua ia ʼaho nei mo te apositolo ko Paulo. Kia natou, ko te foaki ʼo te ʼu tokoni moka hoko he tuʼutamaki ʼe fakakololiaʼi ia Sehova pea mo hikihiki ai ʼana akonaki. (1 Ko. 10:31; Tito 2:10) ʼI tona fakahagatonu, ʼe feala ʼi ʼihi temi ke fetogi ai te mahalohalo ʼa ʼihi ʼo ʼuhiga mo Sehova pea mo ʼana kaugana. Ohage la ko te fafine neʼe maʼuli ʼi te koga meʼa neʼe hoko ai te afā. Neʼe ina tohi fenei ʼi tona muʼa matapa: “ʼE Tapu Ki Te Kau Fakamoʼoni ʼa Sehova.” Pea neʼe sio leva te fafine ʼaia ki te toe faʼu ʼo te ʼapi neʼe fehagaʼaki mo tona ʼapi. Lolotoga ni ʼaho, neʼe mamata ki te kau gaue ʼaia neʼe natou felogoʼi lelei, pea neʼe ina fia iloʼi pe ko ai ia natou. ʼI tana kua iloʼi ʼae neʼe ko te kau Fakamoʼoni ʼa Sehova, neʼe punamaʼuli ai pea neʼe ina ui fenei: “Neʼe au faihala ʼo ʼuhiga mo koutou.” Pea neʼe ina toʼo ai te meʼa ʼae neʼe tohi ʼi tona matapa.

10, 11. (1) Kotea he ʼu fakamatala ʼe fakaha ai te lua tupuʼaga ʼo tatatou tokoni? (2) Kotea te kaupepa ʼae neʼe fai maʼa te ʼu komite tokoni maʼuli? (Vakaʼi te fakamatala ʼae ʼi te ʼa takai “Te Kaupepa ʼe Fakaʼaogaʼi e Te ʼu Komite Tokoni Maʼuli.”)

10 Lua, ʼe tou “foaki . . . te u mea ae e aoga” ki ʼotatou tehina. (2 Ko. 9:12) ʼE tou holi malohi ke foaki ki ʼotatou tehina mo tuagaʼane te ʼu meʼa ʼae ʼe ʼaoga kia natou pea mo fakamaʼamaʼa tonatou lotomamahi. Koteʼuhi ko tatou fuli ʼe ko “te sino pe e tahi.” Pea “kapau e mamahi he kogasino e tahi, e mamahi te u kogasino fuli fakatahi mo ia.” (1 Ko. 12:20, 26) Koia, ʼe ko te ʼofa fakatautehina ʼae ʼe ina uga ai ni tehina mo tuagaʼane ia ʼaho nei ke natou tuku ’anatou fakatuʼutuʼu, mo natou tanaki ʼanatou meʼa gaue pea mo olo ʼo tokoni ki te ʼu tehina ʼae neʼe hoko kia natou he tuʼutamaki. (Sakp. 2:15, 16) Ohage la ko te hake ʼo te galu ʼae neʼe hoko ʼi Saponia ʼi te taʼu 2011. Neʼe fai e te filiale ʼo Amelika ia he tohi ki te ʼu Komite Laga Fale Fakakolo ʼo Amelika. Neʼe natou kole ai “he ʼu tehina ʼe faiva” ke natou tokoni ki te toe laga ʼo te ʼu Fale Fono ʼi Saponia. Hili ni vahaʼa, ko te teitei toko 600 kau gaue neʼe natou fia tokoni pea mo lotolelei ke natou totogi ʼanatou tohi folau ʼae ki Saponia. Neʼe ui fenei e te filiale ʼo Amelika: “Neʼe matou punamaʼuli ki te kaugā malie ʼo te kau gaue.” Neʼe fakalavelave e te tehina ʼi Saponia ki te tehina mai te tahi fenua te tupuʼaga ʼo tana fia tokoni kia natou. Neʼe tali fenei age e te tehina: “Ko tatou fuli mo te ʼu tehina ʼo Saponia ʼe tou faʼu he sino ʼe tahi. ʼE matou logoʼi mo matou ʼonatou mamahi.” ʼI ʼihi temi, neʼe feala ke mamate ʼihi ʼi tanatou fia tokoni ʼae ki ʼonatou tehina, ʼuhi ko tonatou ʼoʼofa lahi kia natou.c—1 Soa. 3:16.

One of Jehovah’s Witnesses organizing relief supplies in Switzerland for her fellow Christian brothers in 1946

Suisi, ʼi te taʼu 1946

TE TOKONI KI ʼOTATOU TEHINA HILI TE LUA TAU FAKAMALAMANEI

ʼI TE mahina ʼo Sepetepeli 1945, hili te Lua Tau Fakamalamanei ʼi Eulopa, neʼe tala e te tehina ko Knorr ʼe kamata anai te fakatuʼutuʼu ke foaki “he tokoni ki te ʼu tehina ʼo Eulopa.”

Hili ni vahaʼa ki te ʼosi fai ʼo te tala ʼaia, ko te kau Fakamoʼoni ʼo Kanata, mo Amelika pea mo ʼihi atu fenua neʼe natou tanaki he ʼu mutu ʼi meʼa pea mo he meʼa kai. ʼO kamata ʼi te mahina ʼo Sanualio 1946, neʼe momoli te ʼu meʼa ʼofa ki te ʼu tehina ʼi Autriche, mo Belgique, mo Bulgarie, mo Danemark, mo Falani, mo Filipine, mo Finlande, mo Holani, mo Hongrie, mo Italia, mo Keleka, mo Norvège, mo Pilitania, mo Pologne, mo Roumanie, mo Siaina, mo Siamani pea mo Tchécoslovaquie.

Neʼe mole ko he tokoni neʼe fai tuʼa tahi pe. Kaʼe neʼe hoko atu te momoli ʼo te ʼu meʼa ʼofa lolotoga te ʼu taʼu ʼe lua vaelua. ʼI te ʼu taʼu ʼaia, ko te ʼu tehina mo tuagaʼane ʼe toko 85000 neʼe natou momoli teitei tane meʼa kai ʼe 300, mo tane mutu ʼi meʼa ʼe 450 tupu, pea mo te ʼu hoa ʼi sulie ʼe 124000 tupu ki ʼonatou tehina mo tuagaʼane ʼi te ʼu fenua ʼae neʼe hoko ai te tau. Pea neʼe fakaʼosi leva te tokoni lahi ʼaia ʼi te mahina ʼo ʼAukusito 1948. Neʼe ui fenei ʼi Te Tule Leʼo ʼo te taʼu 1949: “ʼE mahino neʼe ko te fakaha ʼaia ʼo te feʼofaʼaki. Pea ʼe matou iloʼi neʼe fai e te ʼu tehina te faʼahi ʼaia moʼo fakakololiaʼi te ʼAliki, he ʼe natou tui ʼe tokoni anai ki ʼihi ke hoko atu tanatou tauhi. Koia neʼe ko he pilivilesio lahi ki te ʼu tehina tanatou lava tokoni ki ʼonatou tehina ʼaia.” Ko te tokoni ki ʼotatou tehina neʼe ina fakavikiviki ia Sehova, mo ʼaoga, pea mo fakamalohi te logotahi ʼo te ʼu tehina ʼi te malamanei katoa.

11 ʼE toe fakaha e te hahaʼi ʼae ʼe mole ko he kau Fakamoʼoni tanatou leleiʼia tatatou tokoni. Ohage la ko te tuʼutamaki fakanatula ʼae neʼe hoko ʼi te kolo lahi ko Arkansas, ʼi Amelika ʼi te taʼu 2013. Neʼe fakamatala ʼi te nusipepa ia te olo fakavilivili ʼa te kau Fakamoʼoni ʼo tokoni. Neʼe ui fenei ai: “ʼE fakaofoofo te ʼu fakatuʼutuʼu pea mo te faʼahiga tokoni ʼa te kau Fakamoʼoni ʼa Sehova moka hoko he ʼu tuʼutamaki.” Koia, ohage ko tona ui e te apositolo ko Paulo, ʼe tou “foaki . . . te u mea ae e aoga” ki ʼotatou tehina.

12-14. (1) He ko ʼe ʼe maʼuhiga ʼaupito te tolu tupuʼaga ʼo tatatou tokoni? (2) Kotea te ʼu talamanatu ʼe fakaha ai te maʼuhiga ʼae ke hoko atu te ʼu gaue fakalaumalie?

12 Tolu, ʼe tou tokoni ki ʼotatou tehina lotomamahi ke natou toe fakahoko ʼanatou gaue fakalaumalie. He ko ʼe ʼe maʼuhiga te tokoni ʼaia? ʼE ui e Paulo ko natou ʼae neʼe natou maʼu ia te tokoni ʼe natou “fakafetai lahi ki te Atua.” (2 Ko. 9:12) Pea ʼe mahino ko te meʼa lelei ʼe feala ke natou fai moʼo fakafetaʼi kia Sehova ʼe ko he toe fakahoko ʼo ʼanatou gaue fakalaumalie. (Filp. 1:10) Neʼe ui fenei ʼi Te Tule Leʼo ʼo te taʼu 1945: “Neʼe ʼio . . . Paulo ki te tanaki ʼo te ʼu meʼa ʼofa he neʼe tokoni ai ki te kau Kilisitiano . . . ʼi te faʼahi fakasino. Pea neʼe toe feala ke natou fakahoko te gaue faifakamafola ʼaki he lotomalohi.” ʼE toe tatau pe ia ʼaho nei. Ka toe faifakamafola ʼotatou tehina, ʼe natou fakalotomalohiʼi ʼonatou vahaʼa fale ʼae ʼe lotomamahi pea mo natou totonu.—Lau ia 2 Kolinito 1:3, 4.

13 Tou vakaʼi te ʼu talamanatu ʼo natou ʼae neʼe natou maʼu ia te toe tokoni lahi ʼaia, pea neʼe fakalotomalohiʼi natou ʼi tanatou toe kau ki te faifakamafola. Neʼe ui fenei e te tehina: “Neʼe ko he toe tapuakina lahi ki toku kiʼi famili te toe kau ki te faifakamafola. Koteʼuhi ʼi tamatou fakalotofimalieʼi ia te hahaʼi, neʼe fakasiʼisiʼi ai ʼamatou hoha.” Neʼe ui fenei e te tuagaʼane: “ʼI taku maʼumaʼua ʼi te ʼu gaue fakalaumalie, neʼe mole kei au tokagaʼi ia te ʼu maumau ʼae neʼe hoko. Neʼe au logoʼi ai he fimalie.” Pea neʼe ui fenei leva e te tahi tuagaʼane: “ʼE mole hokita malohi moka hoko ni aluʼaga feia. Kaʼe neʼe fakalotomalohi te faifakamafola ki tomatou kiʼi famili ʼuhi ko tamatou palalau ki te malama foʼou. Neʼe fakamalohi ai tamatou falala ʼae ʼe fakafoʼou anai e Sehova ia meʼa fuli.”

14 Ko te kau ki te ʼu fono ʼe ko te tahi gaue fakalaumalie ʼaia moʼo tokoni ki ʼotatou tehina mo tuagaʼane lotomamahi ke natou toe malolohi. Tou vakaʼi te aluʼaga neʼe hoko ki te tuagaʼane ko Kiyoko, ʼae neʼe taʼu 50 tupu ʼi te temi ʼae neʼe hoko ai te hake ʼo te galu. Neʼe lotovaivai ʼuhi neʼe mole kei ʼi ai hana ʼu meʼa, gata pe ki te ʼu mutu ʼi meʼa mo te ʼu sulie ʼae neʼe ina tui. Pea neʼe ui age e te tagata ʼafeā ʼe fai anai te fono ʼi tana motoka. ʼE ui fenei e Kiyoko: “ʼI te motoka, neʼe ko te tagata ʼafeā mo tona ʼohoana, mo te tahi kiʼi tehina pea mo au. Neʼe matou fai ai te fono pea neʼe hage leva kia au neʼe mole he tuʼutamaki neʼe hoko. Neʼe au logoʼi ʼi toku loto te tokalelei. Neʼe au mahino ai leva ki te malohi ʼo tatatou fakatahitahi mo te kau Kilisitiano.” Neʼe ui fenei e te tahi tuagaʼane ʼo ʼuhiga mo te ʼu fono ʼae neʼe kau ki ai hili te tuʼutamaki: “Neʼe tokoni mai te ʼu fono ke au kataki.”—Loma 1:11, 12; 12:12.

Te ʼu Fua Lelei

15, 16. (1) Kotea te ʼu lelei neʼe maʼu e te kau Kilisitiano ʼo Kolinito pea mo ʼihi atu ʼi tanatou tokoni ki ʼonatou tehina? (2) Ia ʼaho nei, ʼe tou maʼu feafeaʼi mo tatou ia te ʼu lelei ʼaia?

15 ʼI tana talanoa ʼo ʼuhiga mo te tokoni ki te ʼu tehina moka hoko he tuʼutamaki, neʼe toe fakamahino e Paulo ki te kau Kolinito ia te ʼu lelei neʼe maʼu e natou pea mo te tahi ʼu Kilisitiano ʼuhi ko tanatou tokoni ʼaia. Neʼe ina ui fenei ʼo ʼuhiga mo te kau Kilisitiano Sutea ʼi Selusalemi ʼae neʼe natou maʼu te tokoni: “E natou hufaki koutou, koteuhi e natou ofa kia koutou o uhiga mo te kalasia mauhiga ae kua fai e te Atua kia koutou.” (2 Ko. 9:14) ʼE moʼoni, ʼuhi ko te foaki lahi ʼa te kau Kolinito, ʼo kau ai mo natou ʼae neʼe mole Sutea, neʼe uga ai te kau Kilisitiano Sutea ke natou hufakiʼi natou pea neʼe toe lahi ai tonatou ʼoʼofa kia natou.

16 ʼI Te Tule Leʼo ʼo te ʼaho 1 ʼo Tesepeli 1945, neʼe fakaha ai te ʼu fua lelei ʼae neʼe talanoa ki ai Paulo. Neʼe ui fenei ai: “Fakakaukauʼi muʼa ia te logotahi ʼae ʼe hoko moka fetokoniʼaki te ʼu tehina logo la ʼonatou aluʼaga kehekehe.” ʼE ko te aluʼaga ʼaia ʼe hoko ki te kau gaue ʼae ʼe tokoni moka hoko he tuʼutamaki. ʼE ui fenei e te tagata ʼafeā neʼe tokoni ʼi te temi neʼe hoko ai te puvai: “I taku tokoni ʼaia ki ʼoku tehina mo tuagaʼane, neʼe au fakaovi lahi ai kia natou.” Pea neʼe ui fenei e te tuagaʼane neʼe tokoni ki ai te ʼu tehina: “ʼE hage ia kua tou maʼuʼuli ʼi te Palatiso ʼuhi ko totatou ʼofa fakatautehina.”—Lau ia Taaga Lea 17:17.

17. (1) ʼE hoko feafeaʼi ia te vaega ʼo Esaia 41:13 moka hoko he tuʼutamaki? (2) Fakamatala ni aluʼaga neʼe fakakololiaʼi ai ia Sehova pea mo fakamalohi ai tatatou logotahi ʼuhi ko te tokoni ʼo te ʼu tehina. (Vakaʼi mo te fakamatala ʼae ʼi te ʼa takai “Te Tokoni ʼa Te Kau Gaue ʼi Te Malamanei Katoa.”)

17 Ka ʼomai te ʼu tehina mo tuagaʼane ʼo tokoni moka hoko he tuʼutamaki, ʼe sisio ai ʼotatou tehina lotomamahi ki te hoko ʼo te fakapapau ʼaeni ʼa te ʼAtua: “Ko au ko [Sehova], tou Atua, ae e ina fakamalohii tou nima matau, ae e ui atu kia koe: aua naa ke mataku ki he mea, e au hau o tokoni kia koe.” (Esa. 41:13) Neʼe ui fenei e te tuagaʼane neʼe hao ʼi te tuʼutamaki fakanatula: “Neʼe au lotomamahi ʼi taku sio ʼae ki te ʼu maumau, kaʼe neʼe folahi mai pe e Sehova tona nima. ʼE mole au maʼu he kupu ki te ʼu tokoni ʼae neʼe foaki mai e te ʼu tehina.” ʼI te tahi koga meʼa neʼe hoko ai te ʼu maumau, neʼe fakaha e te ʼu tagata ʼafeā ʼe toko lua te manatu ʼa te ʼu tehina mo tuagaʼane. Neʼe nā ui fenei: “Neʼe lahi tamatou lotomamahi ʼi te mafuike ʼae neʼe hoko, kaʼe neʼe matou sisio ki te tokoni ʼa Sehova kia matou ʼaki takotou tokoni mai. Neʼe matou lau te ʼu fakamatala feia, kaʼe ʼi te temi nei neʼe matou sisio mata ki ai.”

Peter Johnson working on a theocratic building project

“TE FAʼAHIGA MAʼULI ʼAE ʼE AU LOTO KI AI”

ʼE FEALA ke malave feafeaʼi ki he tupulaga hana lagolago ki te ʼu tokoni moka hoko he tuʼutamaki? Tou vakaʼi pe kotea ʼae neʼe hoko ki te tehina ko Peter Johnson, ʼae neʼe ʼuluaki lagolago ki te gaue ʼaia ʼi tona taʼu 18. ʼE ina ui fenei: “Neʼe malave ʼaupito kia au taku sio ʼae ki te lotofakafetaʼi ʼa te ʼu tehina pea mo te fiafia ʼae ʼe kita logoʼi ʼi takita foaki. Neʼe toe malohi ai taku fia fakaʼaogaʼi toku maʼuli katoa moʼo tauhi kia Sehova.” Hili ʼaia, neʼe toʼo e Peter te selevisi pionie. Neʼe toe gaue ʼi te Petele pea ki muli age neʼe kau ki te Komite Laga Fale Fakakolo. ʼE ui fenei e Peter: “ʼI taku ʼuluaki lagolago ʼaia ʼi te taʼu 1974 ki te ʼu tokoni moka hoko he tuʼutamaki neʼe au iloʼi ai te faʼahiga maʼuli ʼae ʼe au loto ki ai.” Kapau ʼe kei ke tupulaga, ʼe feala koa hau faʼifaʼitakiʼi ia Peter? ʼE lagi ko te faʼahiga maʼuli ʼaia ʼae ʼe ke loto ki ai moʼo tauhi kia Sehova.

ʼE Feala Koa Ke Ke Kau Ki Ai?

18. Kotea ʼae ʼe feala ke ke fai mo kapau ʼe ke fia kau ki te tokoni moka hoko he tuʼutamaki? (Vakaʼi mo te fakamatala ʼae ʼi te ʼa takai “Te Faʼahiga Maʼuli ʼAe ʼe Au Loto Ki Ai.”)

18 ʼE ke fia logoʼi koa ia te fiafia ʼi te ʼu tokoni ʼae moka hoko he tuʼutamaki? Kapau koia, ʼe lelei ke ke manatuʼi ʼe filifili ʼi te agamahani ia natou ʼae ʼe lagolago ki te laga ʼo te ʼu Fale Fono. Koia, kole ki te ʼu tagata ʼafeā ʼo tau kokelekasio te pepa ʼae ʼe tonu ke ke tohi ke feala hau kau ki te laga ʼo te ʼu Fale Fono. ʼE ui fenei e te tagata ʼafeā kua fualoa tana kau ki te ʼu tokoni moka hoko he tuʼutamaki: “Kapau ʼe ke fia alu ʼo tokoni ʼi he koga meʼa neʼe hoko ai he tuʼutamaki, ʼe tonu muʼa ke fakaafe koe e te Komite Tokoni Maʼuli.” Ka tou mulimuli ki te fakatuʼutuʼu ʼaia, pea ʼe fakahoko ai te gaue ʼi te fakatokatoka.

19. Ko natou ʼae ʼe tokoni ki ʼotatou tehina ʼe natou fakaha feafeaʼi ko tatou ko te kau tisipulo moʼoni ʼa Kilisito?

19 ʼE mahino ia, ka tou tokoni ki ʼotatou tehina moka hoko he tuʼutamaki, pea ʼe tou fakalogo ai ki te fakatotonu ʼa Kilisito ke tou “feofaaki.” ʼI tatatou feʼofaʼaki, ʼe tou fakaha ai ko tatou ko te kau tisipulo moʼoni ʼa Kilisito. (Soa. 13:34, 35) ʼE ko he toe tapuakina lahi ia ʼaho nei tatatou maʼu he kau gaue tokolahi mo lotolelei. Pea ʼe natou fakakololiaʼi Sehova ʼi tanatou tokoni kia natou ʼae ʼe natou lagolago agatonu ki te Puleʼaga ʼo te ʼAtua.

a ʼE vakaʼi ʼi te kapite ʼaeni te ʼu tokoni ʼae neʼe foaki ki ʼotatou tehina. Kaʼe neʼe lahi te ʼu aluʼaga neʼe tou toe tokoni foki kia natou ʼae mole ko he kau Fakamoʼoni.—Kal. 6:10.

b Neʼe fakaʼaogaʼi e Paulo ia te kupu diakonos moʼo talanoa ʼo ʼuhiga ʼo te kau tagata faifekau fakaminisitelio. —1 Tim. 3:12.

c Vakaʼi te alatike “Tou Tokoni Ki ʼOtatou ʼu Kāiga ʼi Te Tui ʼAē ʼi Bosnie,” ʼi Te Tule Leʼo ʼo te ʼaho 1 ʼo Novepeli 1994, ʼi te ʼu pasina 23-27.

ʼE Moʼoni Koa Ia Te Puleʼaga Kia Koe?

  • ʼE tou iloʼi feafeaʼi ko tatatou tokoni moka hoko he tuʼutamaki ʼe kau ki tatatou tauhi taputapu kia Sehova?

  • Kotea te ʼu tupuʼaga ʼe tolu ʼo tatatou foaki te ʼu tokoni ki ʼotatou tehina lotomamahi?

  • Kotea te ʼu fua lelei ʼo te ʼu tokoni ʼae ki ʼotatou tehina lotomamahi?

  • Ko natou ʼae ʼe tokoni ki ʼotatou tehina ʼe natou mulimuli feafeaʼi ki te fakatotonu ʼa Sesu ʼae ia Soane 13:34?

TE TOKONI ʼA TE KAU GAUE ʼI TE MALAMANEI KATOA

AFELIKA

ʼI te taʼu 1994, neʼe tamateʼi te teitei toko 800000 ʼi Rwanda ʼuhi ko tonatou lanu. Neʼe mafola te maveuveu ʼaia ki te tahi age ʼu fenua ʼo Afelika, ʼo feholaki ai te hahaʼi ʼo fakapupu ʼi te ʼu nofoʼaga neʼe fakatuʼu maʼa natou. Moʼo tokoni ki ʼonatou tehina lotomamahi, ko te kau Fakamoʼoni ʼa Sehova mai Belgique, mo Falani pea mo Suisi neʼe natou momoli ia tane ʼe 300 ko te ʼu mutu ʼi meʼa, mo te ʼu faitoʼo, mo te ʼu fale la, mo te meʼa kai pea mo te tahi ʼu meʼa. Hili pe ni vahaʼa pea neʼe maʼu e ʼotatou tehina te ʼu tokoni ʼaia.

Pea ʼi Afelika pe, ko te ʼu toketa mo afilimie Fakamoʼoni ʼa Sehova ʼe toko hogofulu mai Falani ʼe natou tokoni ki ʼotatou tehina ʼae ʼe mamahi ʼuhi ko te ʼu tau, mo te hoge pea mo te mahaki. ʼI te ʼu taʼu pe ʼe lua kua hili, neʼe ko vakaʼi mahaki ʼe 10000 tupu neʼe natou fai. Ko tanatou gaue ʼaia ʼe fakavikiviki ai kia Sehova pea mo tana kautahi. ʼE fakamatala fenei e te tuagaʼane afilimie: “Ka matou tau atu ki he koga meʼa moʼo tokoni ki ʼotatou tehina mo tuagaʼane, pea ʼe ui e te hahaʼi ʼaki he fakaʼapaʼapa ‘Ko natou ko te kau Fakamoʼoni ʼa Sehova. ʼE natou ʼomai ʼo tokoni ki ʼonatou tehina.’” Neʼe ui fenei e te tuagaʼane neʼe faitoʼo ia ia e te tuagaʼane afilimie: “Fakamalō atu kiʼi tehina ki tau tokoni mai. Pea malō foki Sehova ki tou ʼofa.”

ʼI ʼihi temi, ʼe ʼaoga he tokoni moka hoko he ʼu fakaʼi kovi. ʼI te taʼu 2012, neʼe hoko he fakaʼi ʼi Nigéria pea neʼe mamate ai te toko 13 kau Fakamoʼoni, pea neʼe natou kau fuli ki te kiʼi kokelekasio. Neʼe toe lavevea kovi ai mo te toko 54. Neʼe fakatuʼutuʼu ke foaki he tokoni ʼi te ʼaho fuli kia natou takitahi ʼaia, ʼi te ʼaho katoa mo te po katoa. Neʼe tokagaʼi e he fafine neʼe tuku ʼi te lopitali ki te toe tokoni lahi ʼaia neʼe fai ki te ʼu tehina mo tuagaʼane ʼae neʼe lavevea. Pea neʼe telefoni te fafine ʼaia ki te pasitea ʼo tana lotu, ʼo ina ui age fenei: “ʼE mole he tahi ʼi tatatou lotu ʼe haʼu ʼo fakasiosio mai. Ke ke haʼu muʼa ki te lopitali ʼo ke sio ki te fakaha e te kau Fakamoʼoni ʼa Sehova ia tonatou ʼofa.”

Logo la te lotomamahi ʼae neʼe logoʼi e ʼotatou tehina ʼofaina ʼo te kiʼi kokelekasio ʼaia, kaʼe neʼe natou lotofimalie ʼi te fakaha age e tonatou tahi ʼu tehina tonatou ʼofa. Pea tahi, neʼe tokagaʼi e ʼihi ʼi te kokelekasio ʼaia ia te tokaga ʼofa ʼo te ʼu tehina ʼae neʼe ʼomai ʼo tokoni ki ʼonatou tehina lotomamahi. Koia neʼe uga ai natou ke natou faʼafai ʼi te minisitelio. ʼI muʼa ʼo te hoko ʼo te fakaʼi ʼaia, neʼe ko kaugā faifakamafola ʼe toko 35. Hili te taʼu katoa, neʼe tuputupu ʼo natou toko 60.

ʼOSITALALIA

ʼI te taʼu 2013, neʼe hoko te puvai ʼi Queensland, pea ko Fakamoʼoni ʼe toko 70 neʼe mole kei ʼi ai honatou ʼapi. Ohage la ko Mark mo Rhonda pea mo tanā taʼahine neʼe natou feholaki he neʼe lofia tonatou ʼapi. Neʼe natou olo ki he fale kaʼe neʼe kua hahaʼi ʼaupito. ʼE ui fenei e Rhonda: “Neʼe mole he faʼahi ke matou heheka ai.” Pea neʼe ʼasili age tonatou matataku ʼuhi ko te feʼoloʼaki ʼa te ʼu pupū. Neʼe fakalavelave age fenei e Rhonda ki tona ʼohoana: “Kotea anai ka hoko kia tatou?” Neʼe kole mamahi e Mark ke tokoni age ia Sehova. ʼE ui fenei e Rhonda: “Hili teitei minuta ʼe 30, neʼe tau age te motoka. Neʼe ko te ʼu tehina ʼe toko tolu. ʼI tanatou maʼu matou, neʼe natou ui fenei mai: ‘Kotou ʼomai mo matou. ʼE matou ʼave koutou ki te ʼapi ʼo te tehina.’” Pea ʼe hoko atu fenei e Rhonda: “ʼE faigataʼa te maʼu ʼo he ʼu kupu moʼo fakaha tomatou loto ʼi te temi ʼaia, ʼuhi ko te tokaga ʼofa ʼa te kautahi ʼa Sehova kia matou.”

Neʼe ko te toko 250 tupu kau gaue neʼe ʼomai fakavilivili ki te koga meʼa ʼaia moʼo tokoni ki ʼonatou tehina. ʼE ui fenei e te tehina kua matuʼa: “Neʼe au punamaʼuli ki te ʼomai ʼa te kau Fakamoʼoni ʼo fakamaʼa toma ʼapi ʼae neʼe pelapela. ʼE mole ma galoʼi anai tanatou tokoni ʼaia.”

PELESILE

ʼI te taʼu 2008, neʼe hoko ʼi te kolo lahi ko Santa Catarina te ʼu puvai pea neʼe tafe ai mo te pela. Neʼe feholaki ai te toko 80000 tupu mai ʼonatou ʼapi. Neʼe ui e te tagata, neʼe hage ko te tatafe malohi ʼo he vai tafe, kaʼe ko te pela ʼatea mo te ʼu fuʼu ʼakau. Neʼe feholaki ʼihi tehina ki te Fale ʼo Te ʼu Fakatahi. ʼE fakamatala fenei e Márcio, ʼae neʼe taupau ki te fale ʼaia: “Neʼe mole kei ʼi ai hanatou ʼu koloa, gata pe ki te ʼu mutu ʼi meʼa pelapela ʼae neʼe natou tui.” ʼE ui fenei e te tuagaʼane: “Neʼe maumau toku ʼapi. Neʼe au lotomamahi ʼi taku sio ki te meʼa ʼaia, kaʼe ʼe mole au galoʼi anai te fakalotofimalieʼi ʼo matou e ʼotatou tehina mo tuagaʼane. Neʼe lahi tanatou fakaha mai tonatou ʼofa. Neʼe au mahino ai ʼe maʼuhiga age te tanaki ia he ʼu koloa fakalaumalie.”

Jehovah’s Witnesses organizing and distributing donated supplies for disaster relief in Brazil

ʼI te taʼu 2009, ko te Fale ʼo Te ʼu Fakatahi ʼo Santa Catarina, ʼi Pelesile, neʼe tanaki ai te ʼu meʼa ʼofa ʼae neʼe momoli age

Neʼe maumau te ʼu ʼapi ʼae neʼe tuʼu ʼi te ʼu moʼuga ʼe ovi ki te kolo ko Rio de Janeiro he neʼe tafe ai te pela. Neʼe fakatuʼu e te ʼu tehina ia he Komite Tokoni Maʼuli ke feala hanatou fai he ʼu fakatuʼutuʼu ki te ʼu koga meʼa ʼaia ʼae ʼe tau hoko ai te ʼu tuʼutamaki feia. Ka ʼamanaki hoko he aluʼaga feia, pea ko te ʼu tehina ʼae kua nonofo ʼi te ʼu koga meʼa ʼaia, ʼe natou fakafelogoʼi mo te komite. Pea ʼe ʼomai aipe te kau gaue ʼi he ʼu kamio ʼe tohi ai “Tokoni ʼa Te Kau Fakamoʼoni ʼa Sehova.” ʼE katoa fuli ʼanatou meʼa gaue pea ʼe natou tahi iloʼi pe tana gaue ke ina fai. Pea ʼe tui e te kau gaue he kofu ʼe iloʼi ai ko natou ko te kau Fakamoʼoni ʼa Sehova. ʼE natou gaue fakatahi mo te ʼu Komite Fakafelogoʼi Mo Te Lopitali, ke natou tokoni ai ki te ʼu tehina mo tuagaʼane ʼae kua lavevea. ʼE natou toe ʼomai mo te ʼu meʼa kai, te ʼu hina vai, te ʼu faitoʼo, te ʼu mutu ʼi meʼa pea mo te ʼu meʼa fakamaʼa. Pea ʼe ko he toe gaue lahi te fakamaʼa ʼo he ʼapi neʼe fonu pela. Ohage la mole faʼa fualoa ki ai, neʼe hoko te tuʼutamaki feia. Pea neʼe ʼaoga he toko 60 kau gaue moʼo fakamaʼa te ʼapi pe ʼe tahi pea neʼe ko kamio pela ʼe fa.

TE ʼU PULEʼAKI KE FAI ʼI MUʼA ʼO TE HOKO ʼO HE TUʼUTAMAKI

Neʼe fakatotonu e te Kolesi Pule ki te ʼu filiale ʼo te malamanei ke natou fakamahino ki te kau tagata ʼafeā pea mo te ʼu taupau feʼoloʼaki ia te ʼu fakatuʼutuʼu moka hoko he ʼu tuʼutamaki. Ohage la, ʼi muʼa ʼo te hoko ʼo he tuʼutamaki, ʼe tonu ke maʼu e te kau tagata ʼafeā ia te ʼu numelo telefoni mo te ʼu tuʼasila ʼo natou fuli ʼo te kokelekasio.

KA HOKO HE TUʼUTAMAKI

  1. A Christian elder checking on a family of publishers

    ʼE felogoʼi te kau tagata ʼafeā mo te kau faifakamafola fuli

  2. ʼE fakaha e te kau tagata ʼafeā ki te kootinatea ia te aluʼaga ʼo te ʼu tehina

  3. The communication cycle between congregation coordinators, traveling overseers and responsible Christian brothers, and the branch office

    ʼE fakaha leva e te kootinatea te faʼahi ʼaia ki te ʼu taupau feʼoloʼaki pea mo te tahi ʼu tehina ʼe natou felogoʼi mo te filiale

  4. Food and water supplies

    ʼE foimo fai he ʼu fakatuʼutuʼu ke foaki he meʼa kai, mo he ʼu hina vai, mo he nofoʼaga, mo he ʼu faitoʼo, pea mo foaki he fakalotofimalie mo he tokoni fakalaumalie

  5. Report on disaster relief needs being reviewed

    ʼE momoli e te filiale he sivi ki te Komite ʼo Te ʼu Kootinatea ʼo Te Kolesi Pule ʼo ʼuhiga mo te aluʼaga pea mo te ʼu meʼa ʼae ʼe ʼaoga

  6. Distributing disaster relief supplies

    ʼE fakatuʼutuʼu e te Komite Tokoni Maʼuli te ʼu gaue ka fai maʼa te ʼu tehina mo tuagaʼane ke hoko atu tonatou maʼuli

  7. An airplane in flight

    ʼE fakafuafua e te Komite ʼo Te ʼu Kootinatea te ʼu tokoni ʼae ʼe ʼaoga, pea mo fakagafua he kau gaue mai te tahi ʼu fenua ke natou olo ʼo tokoni

TE KAUPEPA ʼE FAKAʼAOGAʼI E TE ʼU KOMITE TOKONI MAʼULI

Cover of the brochure Jehovah’s Witnesses and Disaster Relief

ʼI TE mahina ʼo Sunio 2013, neʼe ta ai te kaupepa Te Kau Fakamoʼoni ʼa Sehova Pea Mo Te ʼu Tokoni Moka Hoko He Tuʼutamaki (Fakapilitania). Neʼe teuteuʼi te kaupepa ʼaia maʼa te kau takitaki ʼo te puleʼaga ʼo Amelika ʼae ʼe tokaga ki te ʼu tokoni ʼe fai moka hoko he tuʼutamaki. ʼE fakamatala ʼi te kaupepa ʼaia te ʼu tokoni ʼae neʼe tou foaki talu mai te ʼu taʼu 1940. ʼE toe tuʼu ai mo te mape ʼae ʼe fakaha ai te ʼu tokoni neʼe tou fai ʼi te malamanei katoa. ʼE ui fenei e te tagata ʼafeā ʼe kau ki te fakatuʼutuʼu ʼo te ʼu gaue moka hoko he tuʼutamaki: “Ko te ʼu tehina ʼae ʼe kau ki te ʼu Komite Tokoni Maʼuli ʼe natou fakaʼaogaʼi te kaupepa ke feala hanatou fakafelogoʼi fakatomuʼa mo te kau takitaki ʼo he koga meʼa ʼe feala ke hoko ai he tuʼutamaki. Ka kua mahino te kau takitaki ki ʼatatou gaue, pea ʼe faigafua ai kia matou hamatou maʼu he fakagafua ke matou olo ki te ʼu koga meʼa ʼae neʼe hoko ai he tuʼutamaki.”

    Te ʼu Tohi Fakaʼuvea (1978-2025)
    Mavae
    Hu Ki Loto
    • Faka'uvea
    • Vaevae
    • Préférences
    • Copyright © 2025 Watch Tower Bible and Tract Society of Pennsylvania
    • Conditions d’utilisation
    • Règles de confidentialité
    • Paramètres de confidentialité
    • JW.ORG
    • Hu Ki Loto
    Vaevae