Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 1-7 ʼO SULIO
TE ʼU KOLOA ʼO TE TOHI-TAPU | KOLOSE 1-4
“Kotou Liʼaki Ia Te ʼUluagaaga ʼAfeā Kae Kotou Kofuʼi ʼAe ʼe Foʼou”
(Kolose 3:5-9) Koia kotou tamateʼi ʼokotou koga sino ʼae ʼe tupu ai te ʼu holi ki te ʼu felaveʼi fakasino heʼe ʼaoga, mo te ʼu aga heʼe maʼa, mo te ʼu holi fakavalevale ki te ʼu felaveʼi fakasino, mo te ʼu holi kovi, pea mo te manumanū, ʼae ʼe ko te tauhi taula ʼatua. 6 ʼE hoko mai la te hauhau ʼo te ʼAtua, ʼuhi ko te ʼu meʼa ʼaia. 7 Mo koutou foki neʼe kotou fai te ʼu aga ʼaia ʼi ʼokotou maʼuli ʼae ʼi te temi muʼa. 8 Kaʼe ʼi te temi nei, ʼe tonu ke kotou fakamamaʼo mai ia koutou ia te hauhau, mo te ita, mo te agakovi, mo te ʼu laukovi, pea mo te ʼu palalau heʼe ʼaoga ʼae ʼe haʼu mai ʼokotou gutu. 9 ʼAua naʼa kotou feloiʼaki. Kaʼe kotou liakī ia te ʼulugaaga ʼafeā pea mo te ʼu meʼa ʼae neʼe kotou fai ʼi te temi muʼa.
Tou Tuku Te Laumālie ʼo Te ʼAtua Ke Ina Taki Tātou, Kae Mole Ko Te Laumālie ʼo Te Mālamanei
12 ʼO ʼai te laumālie ʼaē ʼe hā ʼi toku ʼuluagaaga? (Lau ia Kolose 3:8-10, 13.) Ko te laumālie ʼo te mālamanei ʼe ina uga te hahaʼi ke natou fai te ʼu gāue ʼo te kakano. (Kal. 5:19-21) ʼI te temi ʼaē ʼe lelei ai totatou maʼuli, ʼe mole tou ʼiloʼi lelei peʼe ko te laumālie ʼo ʼai ʼaē ʼe ina takitaki tātou, kae ʼe hoki tou ʼiloʼi te faʼahi ʼaia mokā hoko he ʼu fihifihia, ohagē lā mo kapau ʼe mole tokagaʼi tātou e he tehina peʼe ko he tuagaʼane, peʼe agakovi mai ia kiā tātou, peʼe kapau ʼe agahala mai kiā tātou. Tahi ʼaē meʼa, ʼe feala ʼi totatou loto fale ke hā lelei ai peʼe ko te laumālie fea ʼaē ʼe ina takitaki tātou. ʼE lagi lelei ki te faʼahi ʼaia ke tou vakavakaʼi muʼa ia tātou takitokotahi. Tou fai kiā tātou ia te fehuʼi ʼaenī: ‘ ʼI te ʼu māhina ʼaenī e ono kua hili, kua lahilahi age koa te ʼu kalitātē Fakakilisitiano ʼaē neʼe au fakatuputupu ʼi toku maʼuli, peʼe kua au toe fai pē au taku ʼu faʼahiga palalau pea mo taku ʼu aga māhani ʼaē ʼe kovi?’
13 Ko te laumālie ʼo te ʼAtua ʼe lava tokoni mai ke tou “toʼo kehe . . . [te] ʼuluagaaga ʼāfea mo ʼana gāue” pea ke tou kofuʼi “te ʼuluagaaga foʼou.” ʼE ko he faʼahi ʼe tokoni mai anai ke tou fakatuputupu iā tātou ia totatou ʼofa pea mo tatatou agalelei. ʼE faigafua anai kiā tātou ia tatatou fefakamolemoleʼaki, tatau aipē peʼe lagi matatonu te ʼu ʼaluʼaga ʼaē ʼe tou meo kiai. ʼE mole tou toe tali anai ki te ʼu aga heʼe faitotonu ʼaē ʼe feala ke fai mai, ʼaki ‘te lotokovi, mo te hauhau, mo te kalaga, pea mo te lea kovi.’ Kae ʼe tou faiga anai ke tou liliu “ ʼo fonu ʼi te manavaʼofa.”—Efe. 4:31, 32.
(Kolose 3:10-14) Pea kotou kofuʼi ia te ʼulugaaga foʼou, ʼae ʼe fakafoʼou ʼaki te ʼatamai malama totonu, ʼo mulimuli kia Ia ʼae neʼe ina fakatupu. 11 ʼAki te ʼulugaaga foʼou ʼaia, ʼe mole ʼi ai he Keleka peʼe ko he Sutea, he tagata silikosisio peʼe ko he tagata heʼe silikosisio, he matapule peʼe ko he Site, he tagata kaugana peʼe ko he tagata ʼe ʼateaina, kaʼe ʼe liliu ia Kilisito ko meʼa fuli pea ko tatou ʼe tou fakatahi fuli mo ia. 12 ʼUhi ʼae neʼe filifili koutou e te ʼAtua, pea ko koutou ko ʼana fanau maʼoniʼoni pea mo ʼofaina, kotou kofuʼi te ʼofa mamahi, mo te manavaʼofa, mo te agaʼofa, mo te agavaivai, mo te agamalū pea mo te kataki fualoa. 13 Kotou haga fekatakiʼaki, pea mo fefakamolemoleʼaki ʼaki he lotolelei, tatau aipe pe ʼe ʼi ai hokotou fihifihia mo he tahi. Ohage pe ko te lotolelei ʼa Sehova ke fakamolemole kia koutou, ʼe tonu ke kotou toe fai feia mo koutou. 14 Kaʼe ʼo hilifaki ki te ʼu meʼa fuli ʼaia, kotou kofuʼi te ʼofa, he ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.
Kua Kotou Fetogi Koa?
18 Kapau ʼe tou loto ke fetogi tatou e te Folafola ʼa te ʼAtua, pea ʼe mole gata pe ʼi tona lau pea mo tona ako. Tokolahi te hahaʼi ʼe natou lau te Tohi-Tapu pea mo natou iloʼi te atu manatu ʼe tuʼu ai. Lagi kua kotou felaveʼi mo ni hahaʼi feia ʼi te minisitelio. Ko ʼihi pe la ʼe feala ke natou lau fakaʼatamai ni vaega Fakatohi-tapu. Kaʼe ʼi te agamahani ʼe mole fetogi ai tanatou faʼahiga manatu pea mo tonatou maʼuli. Kotea tona tupuʼaga? Koteʼuhi ʼe fetogi e te Folafola ʼa te ʼAtua te hahaʼi mo kapau pe ʼe natou tuku ke hu te ʼu manatu ʼae ʼe tuʼu ai ki tonatou loto. ʼE ʼaoga ke tou metitasio ki te ʼu meʼa ʼae ʼe tou ako mai te Tohi-Tapu. Koia ʼe tonu ai ke tou fai te ʼu fehuʼi ʼaeni kia tatou totonu: “ ʼE au tui papau koa ko te manatu ʼaeni ʼe mole ko he akonaki fakalotu pe? Kua au sio koa ki ni fakamoʼoni ʼi toku maʼuli ko te faʼahi ʼaeni ʼe ko te moʼoni? ʼO mole gata ʼaki pe taku akoʼi ʼae ki ʼihi, kaʼe ʼe au maʼuliʼi koa ʼi toku maʼuli te ʼu meʼa neʼe au ako? ʼE au tui koa ko te ʼu meʼa ʼae ʼe au ako ʼe haʼu mai ia Sehova, ohage pe ʼe palalau totonu mai?” Kapau ʼe tou metitasio ki ni faʼahiga fehuʼi feia, pea ʼe tou fakaovi anai kia Sehova. ʼI te temi ʼae ʼe malave ai ki totatou loto te ʼu meʼa ʼae ʼe tou ako, pea ʼe uga ai anai tatou ke tou fai ni fetogi ʼi totatou maʼuli ke fiafia ai te ʼAtua.—Taag. 4:23; Luka 6:45.
19 Kapau ʼe tou lau tuʼumaʼu te Tohi-Tapu pea mo metitasio ki ai, pea ʼe tokoni mai anai ke tou haga fai te faʼahi ʼaeni neʼe ui e Paulo: “Kotou siaki te tagata afea mo ana gaue, pea kua kotou kofu te tagata foou ae e fakafoou i te poto.” (Kol. 3:9, 10) Kapau ʼe tou mahino moʼoni pe kotea ʼae ʼe akoʼi mai ʼi te Tohi-Tapu pea mo maʼuliʼi te ʼu faʼahi ʼae ʼe tou ako, pea ʼe uga ai anai tatou ke tou kofuʼi te ʼuluagaaga foʼou Fakakilisitiano ʼae ʼe lava puipui tatou mai te ʼu hele ʼa Satana.
Kumi Te ʼu Koloa ʼi Te Tohi-Tapu
(Kolose 1:13, 14) Neʼe ina haofaki tatou mai te pule ʼo te fakapoʼuli pea mo ina ʼave tatou ki te puleʼaga ʼo tona ʼAlo ʼofaina, 14 ʼae neʼe ina fakaʼateainaʼi tatou ʼaki te totogi, ʼo fakamolemole ai ʼatatou agahala.
it-2-F 833 ¶4-6
Puleʼaga ʼo te ʼAtua
“Te Puleʼaga ʼo Tona ʼAlo ʼOfaina.” ʼI te Penikosite ʼo te taʼu 33 H.T.S. kae kua hili ki ai ʼaho ʼe hogofulu ʼi te hake ʼa Sesu ki selo, neʼe maʼu e ʼana ʼu tisipulo te fakamoʼoni neʼe ‘hiki ake ia ia ki te toʼomataʼu ʼo te ʼAtua,’ ʼi tana foaki age kia natou te laumalie maʼoniʼoni. (Gau 1:8, 9; 2:1-4, 29-33) Koia, neʼe kamata ai te “fuakava foʼou mo natou,” ʼo natou liliu ai ko te koga tafito ʼo he “puleʼaga maʼoniʼoni” foʼou, te Iselaele fakalaumalie.—Hep 12:22-24; 1Pe 2:9, 10; Kal 6:16.
Neʼe kua ʼafio nei ia Kilisito ʼi te toʼomataʼu ʼo tana Tamai pea neʼe ko ia te Pule ʼo te kokelekasio. (Efe 5:23; Hep 1:3; Flp 2:9-11) ʼE ha ʼi te Tohi-Tapu, neʼe kamata fakatuʼu he puleʼaga fakalaumalie ki ʼana tisipulo ʼi te Penikosite 33 H.T.S. ʼI tana faitohi ʼae ki te kau Kilisitiano ʼo Kolose ʼi te ʼuluaki sekulo, neʼe ui e te apositolo ko Paulo neʼe kua ʼosi maʼu e Sesu Kilisito he puleʼaga, ʼo ina ui fenei: “Neʼe [. . .] haofaki tatou [e te ʼAtua] mai te pule ʼo te fakapoʼuli pea mo ina ʼave tatou ki te puleʼaga ʼo tona ʼAlo ʼofaina.”—Kol 1:13; vakaʼi ia Gau 17:6, 7.
ʼI te kamata mai ʼo te Penikosite 33 H.T.S., ko te puleʼaga ʼo Kilisito neʼe ko he puleʼaga fakalaumalie neʼe pule ki te Iselaele fakalaumalie, ʼae ko te kau Kilisitiano ʼae neʼe fakanofo ʼaki te laumalie ʼa te ʼAtua, ke natou liliu ko te ʼu fanau fakalaumalie ʼa te ʼAtua. (Soa 3:3, 5, 6) ’I te temi ʼae ka natou maʼu anai tanatou fakapale ʼi selo, ʼe mole kei natou maʼuʼuli anai ʼi te kele, kae ʼe natou kaugā hau anai mo Kilisito ʼi selo ʼi tona puleʼaga fakalaumalie.—Fkh 5:9, 10.
(Kolose 2:8) Kotou tokakaga, ke ʼaua naʼa fakapopulaʼi koutou e he tahi ʼaki te filosofia pea mo he ʼu manatu kaka mo vaʼiganoa. Ko te ʼu meʼa ʼaia, ʼe fakatafito ki te talatisio ʼa te tagata, mo te ʼu manatu ʼa te malamanei, kaʼe ʼe mole fakatafito ia ki te ʼu akonaki ʼa Kilisito.
Ko He ʼu Puani ʼAoga ʼo Te ʼu Tohi Ki Te Kau Kalate, Mo Te Kau Efeso, Mo Te Kau Filipe, Pea Mo Te Kau Kolose
2:8—Koteā ia “te ʼu meʼa tāfito ʼo te mālamanei” ʼaē ʼe kole mai e Paulo ke tou nofo tokaga kiai? Ko te ʼu meʼa ʼaia, ʼe ko te ʼu tafitoʼaga ʼo te mālama ʼa Satana—te ʼu manatu peʼe ko te ʼu pelesepeto tāfito ʼaē ʼe faʼufaʼu ʼaki te mālamanei, ʼo fakaʼaogaʼi moʼona takitaki, peʼe ko te faʼahiga manatu ʼaē ʼe ina uga te mālamanei. (1 Soa. 2:16) ʼE kau ki te ʼu faʼahi ʼaia ia te filosofia, te mānumānu koloa pea mo te ʼu lotu hala ʼo te mālamanei.
VAHAʼA ʼO TE ʼAHO 8-14 ʼO SULIO
TE ʼU KOLOA ʼO TE TOHI-TAPU | 1 TESALONIKA 1-5
“Kotou Haga Fefakalotomalohiʼaki Pea Mo Fetokoniʼaki”
(1 Tesalonika 5:11-13) Koia, kotou haga fefakalotomalohiʼaki pea mo fetokoniʼaki, ohage pe ko takotou fai. 12 ʼU tehina, ʼe matou kole atu leva ke kotou fakaʼapaʼapa kia natou ʼae ʼe gaue kinakina ia koutou, mo natou takitaki koutou ʼi te ʼAliki pea mo faitokoni atu kia koutou. 13 Kotou ʼoʼofa lahi kia natou pea mo fakamaʼuhigaʼi natou ʼuhi ko tanatou gaue, pea ke kotou fetokaleleiʼaki.
“Kotou Aga Fakaʼapaʼapa Kiā Nātou ʼAē ʼe Gāue Kinakina Iā Koutou”
12 ʼE mole gata pē tanatou “takitaki” ʼaē ia te kōkelekāsio ʼi tanatou ʼu faiakonaki. ʼE toe fakaʼaogaʼi te kupu pē ʼaia iā 1 Timoteo 3:4. ʼE ʼui e Paulo ʼi te vaega Tohi-Tapu ʼaia, ʼe tonu ki he tagata taupau ke “ina takitaki fakalelei tona loto fale, mo ina maʼu he ʼu fānau ʼe natou fakalogo lelei.” ʼE hā lelei mai, ko te kupu “takitaki” ʼe mole gata pē tona fakaʼuhiga ki tana akoʼi ʼaē ʼo tana fānau kae ʼe toe kau kiai ia tana takitaki ʼaē ʼo tona fāmili pea mo tana “maʼu he ʼu fānau ʼe natou fakalogo lelei.” ʼEī, ko te ʼu tagata ʼāfea ʼe natou tuku he faʼifaʼitaki lelei ki te kōkelekāsio ʼo ʼuhiga mo te ʼu gāue ʼaē ʼe tonu ke fai pea ʼe natou takitaki te kōkelekāsio, ʼo natou tokoni ki te kōkelekāsio kātoa ke natou fakalogo kiā Sehova.—1 Tim. 3:5.
“Kotou Aga Fakaʼapaʼapa Kiā Nātou ʼAē ʼe Gāue Kinakina Iā Koutou”
19 Koteā anai ʼaē kā kotou logoʼi ʼi tokotou loto mokā ʼe foaki atu he meʼa ʼofa neʼe fai pē maʼa koutou? ʼE kotou fakahā anai koa tokotou loto fakafetaʼi ʼi takotou haga ʼo fakaʼaogaʼi ia te meʼa ʼofa ʼaia? Ko Sehova ʼaki ia Sesu Kilisito, neʼe ina foaki atu ia te “ ʼu meʼa ʼofa ko he ʼu tagata.” Ko te tahi faʼahi ʼaē ʼe feala ai ke kotou fakahā tokotou loto fakafetaʼi ki te ʼu meʼa ʼofa ʼaia, ʼe ko takotou fakalogo fakalelei ki te ʼu akonaki ʼaē ʼe fai e te ʼu tagata ʼāfea pea mo takotou faigaʼi ʼaē ke kotou maʼuliʼi te ʼu tokoni ʼaē ʼe natou foaki atu. ʼE feala hakotou toe fakahā tokotou loto fakafetaʼi ʼi takotou fai hakotou ʼu tali ʼe ʼaoga ki te nofoʼaki, ʼi te ʼu fono. Kotou lagolago ki te ʼu gāue fuli ʼaē ʼe fakahoko e te ʼu tagata ʼāfea, ohagē lā ko te gāue fai fakamafola. Kapau neʼe fua lelei kiā koutou he tokoni neʼe foaki atu e he tagata ʼāfea, he koʼē koa ʼe mole kotou fakahā age ki ai? Tahi ʼaē, ʼe lagi lelei ke kotou fakahā tokotou loto fakafetaʼi ki te ʼu fāmili ʼo te ʼu tagata ʼāfea. Kotou manatuʼi, kapau ʼe lava lelei ia te ʼu gāue fuli ʼaē ʼe fai e te tagata ʼāfea ʼi te kōkelekāsio, he neʼe tali lelei e tona fāmili ke ina fakaʼaogaʼi maʼa koutou te temi ʼaē neʼe tonu ke ina fakaʼaogaʼi maʼa nātou.
(1 Tesalonika 5:14) Tahi ʼae meʼa, ʼe matou fakalotomalohiʼi koutou, ʼu tehina, ke kotou fakatokaga natou ʼae ʼe maʼuli maveuveu, mo kotou fai he ʼu palalau fakalotofimalie kia natou ʼae ʼe lotomamahi, mo kotou tokoni ki te kau vaivai, pea mo kataki fualoa ki te hahaʼi fuli.
“Tou Fakaha Totatou ʼOfa ʼAki . . . He ʼu Gaue Pea Mo Te Moʼoni”
13 Tou tokoni kia natou ʼae ʼe vaivai. ʼAki te fakatotonu Fakatohi-tapu ʼae ke tou “tokoni ki te kau vaivai, pea mo [tou] kataki fualoa ki te hahaʼi fuli,” ʼe feala ai ke tou iloʼi pe ʼe moʼoni totatou ʼofa. (1 Tesalonika 5:14) Tokolahi te ʼu tehina neʼe natou vaivai, kaʼe ki muli age neʼe natou liliu ʼo malolohi ʼi te tui. Kaʼe ko ʼihi ʼe kei ʼaoga ke tou tokoni age kia natou ʼaki te ʼofa pea ke toe lahi age tatatou faʼa kataki kia natou. ʼE feafeaʼi hatatou tokoni kia natou ʼaia? ʼE tou fakaʼaogaʼi anai te Tohi-Tapu moʼo fakalotomalohiʼi ia natou. ʼE tou fakaafe anai natou ke tou faifakamafola fakatahi. Peʼe feala pe ke tou toʼo he temi ke tou fakalogo kia natou. Pea tahi, ʼe mole tonu pe ke tou manatu ko ʼotatou tehina mo tuagaʼane ʼe natou malolohi peʼe natou vaivai. Kaʼe ʼe tonu ke mahino kia tatou, ʼe tou maʼu fuli ʼotatou kalitate pea mo ʼotatou vaivaiʼaga. Maʼia pe la mo te apositolo ko Paulo, neʼe mahino ki ʼona vaivaiʼaga. (2 Kolonito 12:9, 10) Koia ʼe ʼaoga kia tatou fuli ke tou fetokoniʼaki pea mo tou fefakalotomalohiʼaki.
Tou Faʼifaʼitakiʼi Ia Te Agavaivai Mo Te Agalelei ʼa Sesu
16 Tatatou agalelei ʼi ʼatatou palalau. Ko tatatou agalelei, ʼe ina uga anai tatou ke tou “fakalotomalohii natou e mamahi.” (1 Tesalonika 5:14) Kotea he ʼu palalau ʼe feala ke tou fai moʼo fakalotomalohiʼi ia natou? ʼE feala ke tou fakaha age kia natou ʼe tou hoha ʼo ʼuhiga mo natou? ʼE tou lava fakavikiviki pea mo tokoni kia natou ke natou mahino ʼe ʼi ai ʼonatou kalitate pea mo ʼonatou fealagia. ʼE feala hatatou fakamanatuʼi age kia natou neʼe tokoni ia Sehova ke natou maʼu te moʼoni, koia ʼae ʼe natou maʼuhiga kia te ia. (Soane 6:44) ʼE toe feala foki ke tou fakalotofimalieʼi natou, ko Sehova ʼe tokaga ki ʼana kaugana ʼae ʼe lotomamahi peʼe “mafasia tonatou ʼatamai.” (Pesalemo 34:18, MN) ʼE feala ki ʼatatou palalau ke ina fakalotomalohiʼi moʼoni ia natou ʼae ʼe ʼaoga ki ai he fakalotofimalie.—Taaga Lea 16:24.
Kumi Te ʼu Koloa ʼi Te Tohi-Tapu
(1 Tesalonika 4:3-6) He ʼe koʼeni te finegalo ʼo te ʼAtua: Ke kotou maʼoniʼoni pea ke kotou fakamamaʼo mai te ʼu felaveʼi fakasino heʼe ʼaoga. 4 Ke kotou tahi popoto ʼi te puleʼi ʼo tona sino, ke kotou maʼoniʼoni ai pea ke fakaʼapaʼapaʼi ai koutou, 5 pea ke ʼaua naʼa kotou hage ko te hahaʼi ʼae ʼe mole natou iloʼi te ʼAtua pea mo natou holi fakavalevale ki te ʼu felaveʼi fakasino. 6 Ke ʼaua naʼa fai e he tahi he aga ʼe mole tuha ke mole ina fakamamahiʼi ai hona tehina, koteʼuhi ʼe tauteaʼi anai e Sehova ia natou ʼae ʼe natou fai te ʼu meʼa fuli ʼaia, ohage pe ko tamatou kua fakaha atu pea mo fakatokaga malohi atu.
it-1-F 921
Te ʼu felaveʼi fakasino heʼe ʼaoga
Ko te ʼu felaveʼi fakasino heʼe ʼaoga ʼe ko he agahala mamafa ʼe feala ai ke fakamavae ai he tahi mai te kokelekasio Fakakilisitiano. (1 Ko 5:9-13; Hep 12:15, 16) Neʼe fakamahino e te apositolo ko te Kilisitiano ʼae ʼe ina fai he ʼu felaveʼi fakasino heʼe ʼaoga, ʼe agahala ia ki tona sino totonu. Koteʼuhi, ʼe ina fakaʼaogaʼi tona ʼu koga tapu moʼo fai te meʼa ʼae ʼe kovi. ʼE fakatupu tuʼutamaki kia ia ʼi te faʼahi fakalaumalie, ʼe ina ʼulihi te kokelekasio ʼa te ʼAtua. Pea ʼe feala ai ke pikisia ʼi te ʼu mahaki ʼae ʼe tupu mai te ʼu felaveʼi fakasino ʼo feala ai ke mate. (1Ko 6:18, 19) Pea tahi, ʼe ina fakamamahi ʼona tehina Kilisitiano (1Te 4:3-7) 1) ʼi tana fakahu ʼi te kokelekasio te aga he’e ma’a mo fakaufiufi pea mo te valoki. (Hep 12:15, 16) 2) ʼI tana ʼulihi ia ia ʼae neʼe moe mo ia. Pea kapau neʼe ko he selipatea, ʼe ina ʼulihi ia ia ʼi muʼa ʼo tona faiʼohoana; 3) ʼi tana ʼulihi te matagafua ʼo tona famili pea 4) ʼi tana fakamamahiʼi te ʼu matuʼā mo te ʼohoana ʼo ia ʼae neʼe agahala mo ia. ʼE fakagafua pe te ʼu lao fakatagata ia te ʼu felaveʼi fakasino heʼe ʼaoga. Koia, ko ia ʼae neʼe ina fai te ʼu felaveʼi fakasino ʼe mole ina meʼa noaʼi te tagata, kae ko te ʼAtua, ʼae ʼe ina tauteaʼi anai ia ia ʼuhi ko tana agahala.—1Te 4:8.
(1 Tesalonika 4:15-17) ʼO mulimuli ki te folafola ʼa Sehova, koʼeni te meʼa ʼae ʼe matou tala atu: Ko natou ʼae ia tatou ʼe kei maʼuʼuli anai lolotoga te ʼi heni ʼa te ʼAliki, ʼe mole natou muʼamuʼa anai ia natou ʼae kua mamate. 16 ʼE hifo mai anai ia te ʼAliki mai te lagi. ʼE ina foaki anai he ʼu fakatotonu ʼaki te leʼo ʼo he alekaselo pea mo ina puke te fakatagi pupuhi ʼa te ʼAtua. Pea ʼe ʼuluaki fakatuʼuake anai ʼana tisipulo ʼae kua mamate. 17 Hili ʼaia, ko tatou ʼae ʼe kei maʼuʼuli anai, ʼe ʼave anai tatou ʼi te ʼu ʼao ke tou fakatahi mo natou pea ke tou felaveʼi mo te ʼAliki ʼi te lagi, pea ʼe tou nonofo tuʼumaʼu anai mo te ʼAliki.
“Kua Ovi Mai Tokotou Haofaki”
14 Kotea ʼae ka hoko anai ʼi te hili ʼo te kamata ʼohofi e Koke ʼo Makoke ia te hahaʼi ʼa te ʼAtua? ʼE ui ʼi te Tohi-Tapu ko te Foha ʼo te tagata “e ina fekaui anai te kau aselo, pea e ina tanaki fakatahi anai te kau filifiliia mai te u potu matagi e fa, mai te gataaga o te kele ki te gataaga o te lagi.” (Maleko 13:27; Mateo 24:31) ʼE mole fakaʼuhiga ia te fakatahitahi ʼaia ki te temi ʼae neʼe ʼuluaki fili ai te kau Kilisitiano fakanofo. Pea ʼe mole fakaʼuhiga ki te fakaʼiloga fakaʼosi ʼo te kau fakanofo ʼae kei ʼi te kele. (Mateo 13:37, 38) ʼE hoko anai te fakaʼiloga ʼaia ʼi muʼa ʼo te kamata ʼo te mamahi lahi. (Apokalipisi 7:1-4) Kaʼe kotea ia te tanaki ʼaia? ʼE ko te temi ʼaia ʼe maʼu anai e te kau fakanofo ʼae kei ʼi te kele tonatou fakapale pea mo tanatou hahake ki te lagi. (1 Tesalonika 4:15-17; Apokalipisi 14:1) ʼE hoko anai te aluʼaga ʼaia hili pe te kamata ʼohofi ʼae e Koke ʼo Makoke ia te hahaʼi ʼa te ʼAtua. (Esekiele 38:11) Pea ohage pe ko tona ui fenei e Sesu: “E gigila anai te kau agatonu o hage ko te laa i te puleaga o tanatou Tamai.”—Mateo 13:43. (Vakaʼi te kiʼi nota.)
15 Ko tona fakaʼuhiga koa ʼe “hiki ake” anai ia te kau fakanofo? Tokolahi te kau Kilisitiano loi, ʼe natou tui ʼe ʼave anai te kau Kilisitiano ki te lagi ʼaki te sinoʼi tagata. Neʼe natou toe manatu ʼe natou sisio anai ki te toe liliu fakahaha mai ʼa Sesu ʼo pule ʼi te kele. Kaʼe, ʼe fakaha lelei mai ʼi te Tohi-Tapu ʼe toe liliu fakapulipuli mai ia Sesu, ʼi tana ui fenei: “E ha mai anai te fakailoga o te Foha o te tagata i te lagi” pea ʼe haʼu anai ia Sesu “i te u ao o te lagi.” (Mateo 24:30) ʼE toe ui ʼi te Tohi-Tapu ‘ko te kakano pea mo te toto ʼe mole feala ka nā maʼu te Puleʼaga ʼo te ʼAtua.’ Koia ko natou ʼae ka olo anai ki te lagi ʼe tonu muʼa ke natou “fetogi fuli . . . , i he temi e tahi, i te kemo o te mata, i te pupuhi o te fakatagi fakamuli.” (Vakaʼi te kiʼi nota.) (Lau ia 1 Kolinito 15:50-53.) ʼE mole tonu ke tou fakaʼaogaʼi heni ia te kupu “hiki ake” moʼo fakamatala ia te aluʼaga ʼaia, koteʼuhi ʼe feala ke ʼi ai hona pikipikiga mo te akonaki hala ʼa te kau Kilisitiano loi. Kaʼe ʼe fakatahiʼi anai ia te kau fakanofo agatonu ʼae kei ʼi te kele ʼi he moʼi temi pe ʼe tahi.
VAHAʼA ʼO TE ʼAHO 15-21 ʼO SULIO
TE ʼU KOLOA ʼO TE TOHI-TAPU | 2 TESALONIKA 1-3
“Te Fakaha ʼo Te Tagata ʼAe ʼe Ina Maumauʼi Te Lao”
(2 Tesalonika 2:6-8) Pea ʼi te temi nei, kua kotou iloʼi te meʼa ʼae ʼe ina taʼofi te tagata ʼae ʼe ina maumauʼi te lao, ke hoki fakaha ia ia ʼi tona temi totonu. 7 ʼE moʼoni, kua lolotoga gaue ia pea ʼe fai fakafufu te gaue ʼaia, ʼo kaku ki te puli ʼo ia ʼae ʼe ina taʼofi ia ia ʼi te temi nei. 8 Pea ʼe ha anai te tagata ʼae ʼe ina maumauʼi te lao, ʼae ka pulihi e te ʼAliki ko Sesu ʼaki te malohi ʼae ʼe haʼu mai tona gutu pea ʼe ina molehi anai ʼi te temi ʼae ka ha lelei ai tana ʼi heni.
it-1-F 221 ¶5
Te Pipiki ʼAe Ki Te ʼAtua
ʼE ʼi ai te tahi age misitelio ʼe fakafeagai ki te “meʼa fakalilo tapu” ʼa Sehova, ʼe ko te maumauʼi fakafufu ʼo te lao. Neʼe ko he misitelio ki te kau Kilisitiano mai tona aluʼaga ʼae, ʼi te temi ʼo te apositolo ko Paulo, neʼe heʼeki ha lelei “te tagata ʼae ʼe ina maumauʼi te lao” ʼi tona ʼuhiga kutuga. Maʼia pe la ʼi te kua ha te “tagata” ʼaia, neʼe fufu tona ʼuhiga totonu ia mata ʼo te hahaʼi. Koteʼuhi neʼe ina fai te ʼu meʼa ʼae ʼe kovi ʼaki hana fakaha he aga fakalotu pea mo hana faʼahiga pipiki ki te ʼAtua. ʼI tona fakahagatonu, neʼe ko te apositasia ʼo ʼuhiga mo te pipiki moʼoni ʼae ki te ʼAtua. Neʼe ui e Paulo ko te apositasia ʼaia, neʼe kua lolotoga gaue ʼi tona temi, he ʼe neʼe logoʼi ʼi te kokelekasio Fakakilisitiano” te fakaneke ʼo te apositasia ʼaia, ʼae neʼe iku ki te laga ʼo he kutuga. Ki muli age, ʼe pulihi anai e Sesu Kilisito te apositasia ʼaia ʼi tana ʼi heni. Ko te “tagata” ʼaia ʼae ʼe fakaʼaogaʼi e Satana, ʼe ina “fakamaʼuhigaʼi ia ia totonu ia natou ʼae ʼe ui ko he ʼu ʼatua peʼe ko he ʼu meʼa ʼe tauhi ki ai te hahaʼi.” (Fakakeleka: sébasma) Koia, ko te fili lahi ʼaia ʼo te ʼAtua, ʼe malohi tana fakahala, ʼo ina ʼaumai ai te fakaʼauha kia natou ʼae mulimuli ki ʼana gaue. ʼE malohi ʼaupito “te tagata ʼae ʼe ina maumauʼi te lao” ʼuhi ko tona fufu te ʼu meʼa kovi ʼae ʼe ina fai, ʼaki tana pipiki loi ki te ʼAtua.—2Te 2:3-12; vakaʼi ia Mat 7:15, 21-23.
(2 Tesalonika 2:9-12) Moka ha anai te tagata ʼae ʼe ina maumauʼi te lao, ʼe hoko anai te faʼahi ʼaia ʼaki te malohi ʼo Satana, pea ʼe ina fai anai he ʼu tuʼuga milakulo, mo he ʼu fakailoga loi, mo he ʼu meʼa fakaofoofo, 10 pea mo he ʼu kaka ʼe tupu mai te heʼe faitotonu. Ko te ʼu meʼa fuli ʼaia ʼe hoko anai kia natou ʼae ka pulihi, he ʼe tauteaʼi anai natou koteʼuhi neʼe mole natou tali pea mo ʼoʼofa ki te moʼoni ke tupu ai honatou haofaki. 11 Ko te tupuʼaga la ʼaia ʼo te tuku e te ʼAtua ke kakaʼi natou ʼo natou tui ai ki te loi, 12 ke fakamauʼi ai natou fuli koteʼuhi neʼe mole natou tui ki te moʼoni kaʼe neʼe natou fakafiafia ʼi te heʼe faitotonu.
it-2-F 255 ¶7
Loi
ʼE tuku e Sehova ke kakaʼi te hahaʼi ʼae ʼe natou leleiʼia te ʼu loi ke natou tui ki te loi, kae mole ki te logo lelei ʼo ʼuhiga mo Sesu Kilisito. (2Te 2:9-12) ʼE ha te pelesepeto ʼaia ʼi te aluʼaga ʼae neʼe hoko ki te hau ko Akapo ʼi ni sekulo ki muʼa atu. Neʼe ui e te ʼu polofeta loi kia Akapo ʼe malo anai ia ia ʼi te tau ʼae kia Lamote-kalaate. Kae, neʼe fakakikite ia e Mikaia te polofeta ʼa Sehova te malaʼia. ʼO mulimuli pe ki te meʼa ʼae neʼe ha kia Mikaia, neʼe fakagafua e Sehova ke liliu he ʼaselo ko “he laumalie loi” ʼi te ʼu gutu ʼo te kau polofeta ʼo Akapo. ʼI tona fakahagatonu, ko te laumalie ʼaia neʼe ina fakaneke natou ke mole natou tala te moʼoni, kae ke natou tala te meʼa ʼae neʼe natou fia tala pea mo ʼae neʼe fia logo ki ai ia Akapo mai ia natou. Logo pe la tona fakatokaga, neʼe fia fakalogo pe ia Akapo ki ʼanatou loi ʼo iku ai ki tona mate.—1Ha 22:1-38; 2Kk18.
Kumi Te ʼu Koloa ʼi Te Tohi-Tapu
(2 Tesalonika 1:7, 8) Kaʼe ko koutou ʼae ʼe mamahi, ʼe fakafimalieʼi anai koutou moka ha te ʼAliki ko Sesu mai te lagi mo tana kau ʼaselo malolohi 8 ʼi he afi kakaha. ʼI te temi ʼaia, ʼe lagavaka anai kia natou ʼae ʼe mole natou iloʼi te ʼAtua, pea mo natou ʼae ʼe mole fakalogo ki te logo lelei ʼo ʼuhiga mo totatou ʼAliki ko Sesu.
it-1-F 890 ¶6
Afi
Neʼe tohi e Petelo ko “te lagi pea mo te kele ʼae ʼe tuʼu ʼi te temi nei, ʼe taʼofi ki te afi.” ʼO mulimuli pe ki te ʼu vaega pea mo ʼihi ʼatu vaega ʼi te Tohi-Tapu, ʼe ha ai ʼe mole ko he afi moʼoni, kae ʼe fakaʼuhiga ki he fakaʼauha heʼe gata. Neʼe mole maumauʼi e te tulivio ia te lagi mo te kele moʼoni, kae gata pe ki te hahaʼi aga heʼe lotu. ʼO toe feia pe, ʼe iku anai ia te ha ʼa Sesu Kilisito mo tana kau ʼaselo malolohi ʼi he afi kakaha, ki te fakaʼauha heʼe gata ʼo te hahaʼi aga heʼe lotu mo te tu’u agakovi ’o te ’u faʼahiga meʼa ʼae ʼe natou kau ai.—2Pe 3:5-7, 10-13; 2Te 1:6-10; vakaʼi ia Esa 66:15, 16, 22, 24.
(2 Tesalonika 2:2) ʼAua naʼa kotou tuku he tahi ke ina haga ʼo fetogi takotou manatu ʼae ʼe totonu, peʼe kotou hoha moka ina ui atu kua hoko mai te ʼaho ʼo Sehova. ʼAua naʼa kotou hoha, tatau aipe pe ʼe natou ui atu ko te logo ʼaia ʼe haʼu mai te ʼAtua, peʼe kotou logo ki ai mai he tahi kehe, peʼe kotou lau ʼi he tohi neʼe ui e ʼihi hahaʼi neʼe matou tohi.
it-1-F 1188 ¶2
Folafola
ʼE ui fakalelei e Paulo, ʼe ʼi ai te ʼu folafola moʼoni pea mo te ʼu folafola kaka. ʼE talanoa ki ai ia 1 Timoteo 4:1: “ ʼE ui fakalelei e te folafola ʼae ʼe haʼu mai te ʼAtua, ʼi te temi ka haʼu, ʼe liakī anai e ʼihi te tui, ʼo natou fagono ki te ʼu folafola kaka mo te ʼu akonaki ʼa te kau temonio.” Koia, ʼe tou iloʼi lelei ai te haʼuʼaga ʼo te ʼu folafola kaka: ko te kau temonio. ʼE lagolago ki te manatu ʼaia ia te meʼa ʼae neʼe ha ki te apositolo ko Soane ʼae neʼe sio ki “ni folafola ʼuli ʼe tolu”, ’e natou hage ko ni kelenui ʼe haʼu mai te gutu ʼo te talakone, mo te gutu ʼo te manu fekai pea mo te gutu ʼo te polofeta loi. Kae ʼe fakamahino lelei mai e Soane ko te ʼu folafola ʼaia, “ ʼe haʼu mai te ʼu temonio” moʼo fakatahitahiʼi te ʼu hau ʼo te kele katoa ki te tau ʼo Alamaketone.—Fkh 16:13-16.
VAHAʼA ʼO TE ʼAHO 22-28 ʼO SULIO
TE ʼU KOLOA ʼO TE TOHI-TAPU | 1 TIMOTEO 1-3
“Kotou Faiga Ki He Gaue ʼe Lelei”
(1 Timoteo 3:1) ʼE tuha mo te falala ia te folafola ʼaeni: Kapau ʼe faiga he tagata ke liliu ko he taupau, pea ʼe faiga ia ki he gaue ʼe lelei.
ʼE Ke Mahino Koa ʼe Maʼuhiga Ke Ke Tuputupu ʼi Te Faʼahi Fakalaumalie?
3 Lau ia 1 Timoteo 3:1. Neʼe fakalotomalohiʼi e te apositolo ko Paulo te ʼu tehina ʼae ʼe natou fakaʼamu ke natou liliu ko he ʼu tagata taupau. Tou toʼo he kiʼi faʼifaʼitaki: Ko he tahi ʼe fakaʼamu ke ina puke he meʼa ʼe vaha mamaʼo mo ia, ʼe ina faoʼi anai tona nima pea mo faiga malohi ke ina puke te meʼa ʼaia. ʼO toe feia pe, ko he tehina ʼe fakaʼamu ke liliu ko he faifekau fakaminisitelio, ʼe maʼua ke faiga malohi ke ina hikihiki ʼona kalitate Fakakilisitiano. Pea ka liliu leva ko he faifekau fakaminisitelio, ʼe hoko atu pe anai ʼana faiga ke liliu ko he tagata ʼafeā.
(1 Timoteo 3:13) Koteʼuhi ko te ʼu tagata ʼae ʼe natou fakahoko lelei tanatou gaue, ʼe natou maʼu ai he matagafua ʼe lelei pea ʼe mole natou matataku ʼi te palalau ʼo ʼuhiga mo te tui kia Kilisito Sesu.
km-F 9/78 4 ¶7
Natou ʼAe ʼe ‘Natou Maʼu He Matagafua ʼe Lelei’
7 Koia ʼae neʼe ui ai e Paulo ʼe maʼu e te kau faifekau fakaminisitelio ʼaia “he matagafua ʼe lelei.” Kae ʼe mole feala leva ke tou ui kua natou maʼu tuʼulaga ʼi te kokelekasio, kailoa. ʼE iloʼi e te ʼu tagata ʼaia “ ʼae ʼe natou fakahoko lelei tanatou gaue” ʼe tapuakinaʼi natou e Sehova mo Sesu, pea ʼe toe fakaʼapaʼapa mo lagolago ia te kokelekasio kia natou. Pea “ ʼe mole natou matataku ʼi te palalau ʼo ʼuhiga mo te tui kia Kilisito Sesu.” ʼE natou faiga fakamalotoloto ki tanatou gaue, pea ʼe leleiʼia e te tokolahi ʼanatou gaue. ʼE mole natou tuʼania ʼi te fakaha ʼo tanatou tui, koia ʼae ʼe natou malolohi ai ʼi te faʼahi fakalaumalie.
Kumi Te ʼu Koloa ʼi Te Tohi-Tapu
(1 Timoteo 1:4) pea ke ʼaua naʼa natou tokagaʼi te ʼu fakamatala loi pea mo te ʼu fekumi ʼo ʼuhiga mo te ʼu hologa. ʼE mole he ʼaoga ʼo te ʼu meʼa ʼaia, kaʼe ʼe fakatupu palalau pe ia. Pea ʼe mole kau ia ki te ʼu meʼa ʼae ʼe foaki mai e te ʼAtua moʼo fakamalohiʼi te tui.
it-1-F 980
Hologa
Neʼe mole he ʼuhiga ʼo te ʼu fekumi ʼaia ki te ʼu hologa, tafito pe foki ʼi te temi ʼae neʼe faitohi ai ia Paulo kia Timoteo. Pea neʼe kua meʼa noaʼi leva te ʼu hologa koteʼuhi neʼe mole kei fakakehekeheʼi e te ʼAtua he Senitile mai he Sutea ʼi te kokelekasio. (Kal 3:28) Pea neʼe kua iloʼi pe ʼe hifo anai ia Kilisito mai te hologa ʼo Tavite. Pea neʼe mole pe la fualoa te faitohi ʼa Paulo mo te fakaʼauha ʼo Selusalemi, ʼo kau ai mo te ʼu tohi Sutea. Neʼe mole puipui e te ʼAtua te ʼu tohi ʼaia. Koia ʼae neʼe tuʼania ai ia Paulo naʼa tokakaga fau leva ia Timoteo mo te ʼu kokelekasio ki te ʼu fekumi noa ʼaia kae natou situʼa ki te ʼu meʼa ʼae ʼe maʼuhiga. Ko te koga pe ʼae ʼe maʼuhiga ki te kau Kilisitiano ʼe ko te ʼu hologa ʼi te Tohi-Tapu ʼae ʼe fakamoʼoni ai ʼe ko Sesu te Mesia. ʼE tokoni mai leva te tahi ʼu hologa ke tou mahino ʼe moʼoni ia te Tohi-Tapu.
(1 Timoteo 1:17) Pea ke fakaʼapaʼapaʼi pea mo fakakololiaʼi ʼo talu ai te Hau ʼae ʼe heʼe gata, mo maʼuli tuputupua pea mo fakapulipuli, te ʼAtua pe ʼe tahi. Ameni.
cl-F 12 ¶15
“Koeni, ko tomatou Atua”
15 Ko te tahi higoa fakatuʼulaga ʼo Sehova ʼe ko te “Hau ʼae ʼe heʼe gata.” (1 Timoteo 1:17; Fakaha 15:3) Kotea la tona fakaʼuhiga? ʼE heʼe gata ia Sehova, ko te manatu ʼaia ʼe lagi mata faigataʼa ki te mahino fakatagata. Kae ʼe ui fenei ʼi te Pesalemo 90:2: “Mai te heegata ki te heegata, e ke Atua.” Ko tona ʼuhiga, neʼe mole he kamataʼaga ia ʼo te ʼAtua; neʼe talu mai pe ia. Koia ʼae ʼe tuha ai ke fakahigoaʼi ko te “Matua o te u aho.” Neʼe muʼa ia ʼi te ʼu meʼa maʼuli fuli ʼi te lalo kele mo te lagi pea mo te ʼatulaulau. (Taniela 7:9, 13, 22) Koia ʼe feala koa ke toʼo e he tahi tona tuʼulaga Maʼoluga ʼaia?
VAHAʼA ʼO TE ʼAHO 29 ʼO SULIO– 4 ʼO AUKUSITO
TE ʼU KOLOA ʼO TE TOHI-TAPU | 1 TIMOTEO 4-6
“Te Pipiki ʼAe Ki Te ʼAtua Mo Te Fia Maʼu Koloa”
(1 Timoteo 6:6-8) ʼE moʼoni ʼe lahi te ʼu lelei ʼe tou maʼu mai ai, mo kapau foki ʼe tou maʼuli fakafeʼauga. 7 Koteʼuhi neʼe mole tou ʼaumai he meʼa ki te malamanei, pea ʼe mole feala ke tou ʼave he meʼa. 8 Koia, kapau ʼe tou maʼu he meʼa kai pea mo ni mutuʼi meʼa, ʼe tou feʼauga anai ʼi te ʼu meʼa ʼaia.
Te Kalavi ʼo Te Maʼuli Fakafeauga
Ko te meʼa tāfito ʼaē neʼe kau ki te fiafia ʼa Paulo neʼe ko tana maʼuli fakafeauga. Kae koteā te faka ʼuhiga ʼo te maʼuli fakafeauga? ʼI tona fakanounou, ʼe faka ʼuhiga pe ke tou fakafeauga ki te ʼu meʼa ʼaē ʼe maʼuhiga tāfito ki tokita maʼuli. ʼO ʼuhiga mo te faʼahi ʼaia, neʼe ʼui fēnei e Paulo kia Timoteo, tona kaugā fagona ʼi te minisitelio: “ ʼE moʼoni, ʼe fakatupu maʼu meʼa te pipiki ki te ʼAtua pea mo te maʼuli fakafeauga. He neʼe mole tou ʼaumai he meʼa ki te malamanei, pea ʼe mole feala foki ke tou ʼave he meʼa. Koia, kapau ʼe tou maʼu te meʼa kai pea mo te meʼa kofu, ʼe tou feʼauga pe anai ʼi te ʼu meʼa ʼaia.”—1 Timoteo 6:6-8, MN.
Koutou fakatokagaʼi neʼe fakapipiki e Paulo te maʼuli fakafeauga ki te pipiki ki te ʼAtua. Neʼe mahino kia ia ko te fiafia moʼoni ʼe haʼu mai te pipiki ki te ʼAtua, mai tatatou fakamuʼamuʼa tatatou tauhi ki te ʼAtua ʼi totatou maʼuli, kae mole haʼu mai tatatou fakamuʼamuʼa te ʼu lelei fakasino peʼe ko ni ʼu koloā. Ko te “meʼa kai pea mo te [ʼu] meʼa kofu” ʼe ko he ʼu meʼa ʼe nātou faka fealagia ke tou hoko atu ia tatatou pipiki ki te ʼAtua. Koia maʼa Paulo ko te kalavi ʼo te maʼuli fakafeauga neʼe ko te falala kia Sehova, logope he ʼu faʼahiga ʼaluʼaga ʼe feala ke hoko.
(1 Timoteo 6:9) Kaʼe ko natou ʼae ʼe fia maʼu koloa, ʼe natou higa ki te fakahala, mo te hele pea mo te ʼatu ʼu holi ʼe mole fakapotopoto pea mo fua kovi kia natou, pea ko te ʼu holi ʼaia ʼe ina taki natou ki te malaʼia pea mo te mate.
g-F 6/07 6
Te ʼu Fua ʼo Te Fia Maʼu Koloa
ʼE moʼoni ʼe mole mate pe he tahi ʼuhi ko tona fia maʼu koloa. Kae ʼe mole feala ke ina maʼu ai te fiafia moʼoni. ʼE hoha fau ki tana gaue mo te ʼu fihifihia fakapaʼaga. Pea ʼe tupu mai ai he ʼu tuʼuga mahaki, ʼo pelepelegesi ai tona maʼuli. Pea kapau ʼe ina tokagaʼi kua lahi fau pe tana hoha ki te paʼaga, kua lagi tauhala ia. ʼE lagi kua mahaki kovi peʼe mole kei falala tona hoa ki ai peʼe lotomamahi ʼana fanau. ʼE mahalo ia, ʼe kei ʼi ai pe he ʼu aluʼaga ʼe kei ina lava faitoʼo, kae ʼe ko he toe gaue faigataʼa ʼaupito. Ohage pe ko tona ui ʼi te Tohi-Tapu, neʼe “fakamamahiʼi lahi” pe e te kilisitiano ʼaia ia ia totonu.—1 Timoteo 6:10.
(1 Timoteo 6:10) Koteʼuhi ko te manako ki te paʼaga ʼe ko te aka ʼaia ʼo te ʼu faʼahiga meʼa kovi fuli pe, pea ko ʼihi, ʼi tanatou taupau te manako ʼaia, neʼe natou fakamamaʼo mai te tui pea mo natou fakamamahiʼi lahi natou.
g-F 11/08 6 ¶4-6
Ko Tokoni ʼe Ono Ki He Maʼuli Fiafia
Neʼe tou vakaʼi ʼi te alatike ʼae ki muʼa atu, ʼe vaʼiganoa fuli te ʼu faiga ʼa ʼihi ke natou maʼu hanatou koloa. ʼE natou felaveʼi pe mo ni mamahi. ʼE ʼi ai ʼihi ʼe mole kei natou tokakaga ki ʼonatou famili mo ʼonatou kaumeʼa. Pea ʼe ʼi ai te tahi faʼahiga ʼe mole kei natou mamoe ʼuhi ko te lahi fau pe ʼo tanatou gaue peʼe ko te tuʼania. ʼE ui fenei ʼi te tohi ʼo Ekelesiasi 5:11: “E fimalie te moe a te tagata faa gaue, pe e siisii pee lahi tana meakai; kae ko te lahi o te u koloa o te tagata mau koloa e mole ina tuku ia ke moe.”
ʼE feala ke pule te paʼaga ki ʼotatou maʼuli. Koia ʼae neʼe talanoa ai ia Sesu Kilisito ki “te malohi fakahala ʼo te ʼu koloa.” (Maleko 4:19) Ko tona ʼuhiga ʼe tou manatu pe ʼe tou maʼu anai ʼi te ʼu koloa ia te fiafia moʼoni kae ʼe ko he toe faihala. ʼE ʼasili aipe totatou manumanū. ʼE ui ia Ekelesiasi 5:9: “Ko ae e manako ki te paaga e mole makona i te paaga.”
Koia, kapau ʼe manako he tahi ki te paʼaga ʼe hoha mo mamahi aipe. Pea ʼe toe feala pe foki ke tupu ai hana fia faifakapo. (Taaga Lea 28:20) Kae ʼe hoki fiafia pe anai he tahi moka ʼe agaʼofa, ʼe lotofakamolemole, ʼe maʼa mo fakalaumalie tana faʼahiga manatu.
Kumi Te ʼu Koloa ʼi Te Tohi-Tapu
(1 Timoteo 4:2) pea mo te ʼu loi ʼa te kau malualoi, ʼae ʼe mole gaue ʼonatou leʼo ʼo loto he ʼe hage kua fakailoga ʼaki he ukamea vela.
ʼE Kotou Lava Taupau Feafeaʼi He Leʼo ʼo Loto ʼe Lelei?
17 Neʼe tohi fēnei e te ʼapositolo ko Petelo: “Ke kotou taupau he leʼo ʼo loto ʼe lelei.” (1 Petelo 3:16) Ko he leʼo ʼo loto ʼe maʼa kiā mata ʼo Sehova ʼAtua ʼe ko he toe tapuakina lahi ia. ʼE mole tatau ia mo te leʼo ʼo loto ʼo te tokolahi iā ʼaho nei. Neʼe talanoa ia Paulo ʼo ʼuhiga mo nātou ʼaē kua “fakaʼiloga ʼonatou leʼo ʼo loto ʼaki te ukamea kakaha.” (1 Timoteo 4:2) Ko te ukamea kakaha ʼe ina tutu ia te kili, ʼo fakatupu ai he kili patupatu mokā kua mole ia te mataʼi lavea pea kua mate ia te kakano. Tokolahi kua hagē tonatou leʼo ʼo loto kua mate noa—kua mole te mataʼi lavea pea ʼe mole kei ina logoʼi he meʼa, ʼo mole kei ina fai he ʼu fakatokaga, peʼe fakafeagai, peʼe hoha, peʼe ufiufi peʼe ina tukugākoviʼi ki he agahala neʼe fai. Tokolahi iā ʼaho nei ʼe natou fiafia ʼi te mole tukugākoviʼi ʼo nātou ʼe tonatou leʼo ʼo loto ʼo ʼuhiga mo he meʼa kovi neʼe natou fai.
(1 Timoteo 4:13) ʼO aʼu ki taku alu atu, ke ke haga fai fakamalotoloto tau lautohi ia muʼa ʼo te kaugā malie, mo tau faitokoni pea mo tau faiakonaki.
it-2-F 122
Lautohi Ki Te Kaugā Malie
ʼI Te Kokelekasio Fakakilisitiano. ʼI te ʼuluaki sekulo, neʼe tahitahiga ia natou ʼae neʼe natou maʼu hanatou takaiga tohi ʼo te Tohi-Tapu, koia ʼae neʼe maʼuhiga ai ia te lautohi ki te kaugā malie. Neʼe fakatotonu e te apositolo ko Paulo ke lau ʼana tohi ki te ʼu kokelekasio ʼi ʼanatou fono, pea ke feʼaveʼaki e te ʼu kokelekasio ʼaia te ʼu tohi kehekehe neʼe ina fai. (Kol 4:16; 1Te 5:27) Neʼe faitokoni fenei ia Paulo ki te taupau tupulaga ko Timoteo: “Ke ke haga fai fakamalotoloto tau lautohi ia muʼa ʼo te kaugā malie, mo tau faitokoni pea mo tau faiakonaki.”—1Ti 4:13.
Neʼe tonu ke matala te lautohi. (Hap 2:2) Neʼe ʼaoga foki ki te akoʼi ʼo ni ʼihi, pea neʼe tonu kia ia ʼae ʼe ina lau te tohi ke mahino lelei ki ai mo ina iloʼi te manatu ʼo te kilisitiano ʼae neʼe ina fai te tohi. Neʼe tokaga ki tona lautohi naʼa mahino hala te nofoʼaki. ʼE ui ia Fakaha 1:3, ʼe fiafia anai ia natou ʼae ʼe natou lau te lea fakapolofeta ʼaia mo natou ʼae ʼe natou logo mo mulimuli ki ai.