Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 7-13 ʼO OKETOPELI
LUA ʼAʼAHI
Esaia 63: 9, MN: Lolotoga tonatou ’u mamahi, neʼe toe mamahi ai mo ia. Pea ko tana tagata ʼave logo, neʼe ina haofaki natou. ’I tona ʼofa pea mo manavaʼofa, neʼe ina totogi natou, ’o ina fakatuʼuake natou pea mo ʼamo natou ’i te ’u ʼaho fuli ’i mu’a atu.
TE ʼU KOLOA ʼO TE TOHI-TAPU | SAKOPO 3-5
“Tou Fakaha Te Poto ʼo Te ʼAtua”
cl-F 221-222 ¶9-10
“ ʼE Gaue Koa Ia Koutou Te Poto ʼAe Mai ʼOluga?”
9 “ ʼUluaki ʼe maʼa.” Ko he tahi ʼe maʼa, ʼe fakaʼuhiga ʼe maʼa ʼi tuʼa pea mo tona loto. ʼI te Tohi-Tapu ʼe tauhoa te poto mo te loto, kae ko te poto ʼae mai ʼoluga ʼe mole feala ke hu ki he loto kua ʼulihi ʼaki he ʼu manatu mo he ʼu holi ʼe kovi. (Taaga Lea 2:10; Mateo 15:19, 20) Logo la ʼe tou agahala, kae kapau ʼe maʼa totatou loto ʼe tou ‘maliu mai te kovi ʼo fai te meʼa ʼae ʼe lelei.’ (Pesalemo 37:27; Taaga Lea 3:7) ʼE mole tou punamaʼuli ki te palalau ʼa Sakopo ʼo ʼuhiga mo te maʼa he ko te ʼuluaki kalitate ʼaia ʼo te poto. Koia, ʼe feafeaʼi hatatou fakaha ʼihi atu kalitate ʼo te poto mo kapau ʼe mole tou maʼa ʼi tatatou aga ʼo toe feia ʼi te faʼahi fakalaumalie?
Taaga Lea 2:10 Koteuhi e hau anai te poto ki tou loto, pea e fai anai e te iloilo ni mealelei ki tou laumalie
Pesalemo 37:27 Ke ke maliu kehe mai te kovi, fai te lelei, pea ke ke mau tou nofoaga o heegata.
Taaga Lea 3:7 ʼAua naʼa ke lau kua ke poto. Manavasiʼi kia Sehova pea mo lituʼa mai te kovi.
10 “Pea tokalelei.” Ko te poto mai ʼoluga ʼe ina uga tatou ke tou fakaha fakamalotoloto te tokalelei ʼae ko he fua ʼo te laumalie ʼo te ʼAtua. (Kalate 5:22) Tou faiga ke tou “maʼuʼuli ʼi te tokalelei” ʼae ʼe ha ʼi te hahaʼi ʼa Sehova. (Efeso 4:3) Pea ʼe tou toe faiga anai ke fakatokatoka he fihifihia. He koʼe ʼe maʼuhiga? ʼE ui fenei ʼi te Tohi-Tapu: “Ke hoko atu takotou . . . maʼuʼuli ʼi te tokalelei. Pea ʼe nofo anai mo koutou te ʼAtua ʼo te ʼofa pea mo te tokalelei.” (2 Kolonito 13:11) Kapau ʼe tou maʼuʼuli tuʼumaʼu ʼi te tokalelei, ʼe nofo anai te ʼAtua ʼo te tokalelei mo tatou. Koia, kapau ʼe tou fai feia ki ʼotatou tehina mo tuagaʼane ʼe tou felogoi lelei anai mo Sehova. ʼE feafeaʼi hatatou fakaha ʼe tou kumi te tokalelei mo te hahaʼi? Tou vakaʼi te aluʼaga ʼae ʼe hoa mai.
cl-F 223-224 ¶12
“ ʼE Gaue Koa Ia Koutou Te Poto ʼAe Mai ʼOluga?”
12 “Aga fakapotopoto.” Kotea tona fakaʼuhiga? ʼE ui e te ʼu tagata sivi Tohi-Tapu ko te kupu Fakakeleka ʼae ʼe tuʼu ia Sakopo 3:17, ʼe faigataʼa tona fakaliliu. Neʼe fakaliliu ʼaki te ʼu kupu “agamalū,” mo “faʼa kataki” pea mo “lototokaga.” ʼE tou fakaha feafeaʼi ʼe gaue te kalitate ʼaia ia tatou?
cl-F 224-225 ¶14-15
“ ʼE Gaue Koa Ia Koutou Te Poto ʼAe Mai ʼOluga?”
14 “Fakalogo ʼaki he lotolelei.” Ko te kupusiga palalau Fakakeleka ʼaeni ʼe ʼasi tuʼa tahi pe ʼi te Koga Tohi-Tapu Fakakeleka Fakakilisitiano. ʼE ui e te tagata sivi Tohi-Tapu, ʼe “tau fakaʼaogaʼi ki te ako ʼi te fale solia.” ʼE fakaʼuhiga ʼe “fakalogo gafua.” Ko ia ʼae ʼe taki e te poto mai ʼoluga ʼe fakalogo ʼaki he lotolelei ki te ʼu meʼa ʼae ʼe ui ʼi te Tohi-Tapu. ʼE mole ko he tahi ʼe ina loto ke tuʼu tana tonu maʼia pe la ʼe faihala. Kae ko he tahi ʼe ina foimo fetogi tana manatu moka ʼe fakaha age ʼaki te Tohi-Tapu ʼe faihala. ʼE kotou feia koa mo te hahaʼi?
“Fonu ʼi Te Manavaʼofa Pea Mo Te ʼu Fua Lelei”
15 “Fonu ʼi te manavaʼofa pea mo te ʼu fua lelei.” Ko te manavaʼofa ʼe ko he kalitate maʼuhiga ʼo te poto mai ʼoluga ʼae ʼe ui ʼe “fonu ʼi te manavaʼofa”. Neʼe fakatahiʼi e Sakopo ia te “manavaʼofa” mo te ʼu “fua lelei,” he ʼe fakaʼuhiga ʼi te Tohi-Tapu ki te tokaga moʼoni ʼa he tahi ki ʼihi ʼaki he ʼu gaue ʼofa. ʼE ui ʼi he tohi, ko te manavaʼofa ʼe hage ko “te lotomamahi ʼa he tahi ki ʼae ʼe tau mo he faigataʼaʼia pea mo faiga ke ina fakatokatoka.” Ko te poto ʼo te ʼAtua ʼe mafana, ʼe mole ko he ʼu palalau pe, kae ʼe fakamalotoloto mo lotomahino. ʼE feafeaʼi hatatou fakaha ʼe tou fonu ʼi te manavaʼofa?
cl-F 226-227 ¶18-19
“ ʼE Gaue Koa Ia Koutou Te Poto ʼAe Mai ʼOluga?”
18 “ ʼE mole fakapalatahi.” ʼE maʼoluga age te poto fakaʼatua ʼi te ʼu fakapalatahi ki te lanu peʼe ko te fenua. Ko he tahi ʼe mulimuli ki te poto fakaʼatua, ʼe ina taʼaki ʼi tona loto te ʼu fakapalatahi fuli. (Sakopo 2:9) Koia ʼe mole tou fakapalatahi anai ki he tahi ʼuhi ʼae neʼe ako maʼoluga, mo maʼu koloa pea mo maʼu pilivilesio ʼi te kokelekasio. ʼE mole tou fakalainoaʼi anai ʼotatou tehina mo tuagaʼane ʼae maʼuʼuli faifaigataʼaʼia. Kapau ʼe foaki e Sehova tona ʼofa ki te hahaʼi ʼaia, ʼe toe tuha mo natou ke natou maʼu totatou ʼofa.
19 “ ʼE mole malualoi.” Ko te kupusiga palalau Fakakeleka ʼae neʼe fakaliliu ko “malualoi” ʼe fakaʼaogaʼi ki “he tahi ʼe gaoʼi ʼata.” ʼI te temi muʼa, ko te ʼu hahaʼi gaoʼi ʼata Keleka mo Loma neʼe natou fufu ʼonatou mata ʼaki ni fofoga loi. Neʼe fakaʼuhiga ai te kupu ʼaia ko he tahi ʼe loi mo agakaka. Koia ʼe tonu ai ke ha ʼi ʼatatou aga mo ʼatatou manatu ʼe mole tou malualoi ki ʼotatou tehina mo tuagaʼane.
Kumi Te ʼu Koloa ʼi Te Tohi-Tapu
Ko He ʼu Puani ʼAoga ʼo Te ʼu Tohi ʼa Sake Pea Mo Petelo
4:5—Ko te koga tohi fea ʼaē ʼe talanoa kiai ia Sake ʼi henī? Neʼe mole talanoa fakahagatonu ia Sake ki he vaega. Kae ko te ʼu folafola fakaʼatua ʼaia ʼe lagi fakatafito ki te manatu ʼo te ʼu koga tohi ʼo Senesi 6:5; 8:21; Tāʼaga Lea 21:10; pea mo Kalate 5:17.
Senesi 6:5 Nee sio leva te Eteleno kua lahi te agakovi a te tagata i te kele, pea kua alu pe te manatu fuli o tona loto i te aho fuli ki te mea ae e kovi.
Senesi 8:21 Nee mamanu leva te Eteleno ki te magoni o te sakilifisio, pea nee ina ui leva i tona loto: E mole au toe fakamalaia anai te kele o tupu ko te tagata, koteuhi e kovi te u manatu o te loto o te tagata mai tona kei veliveli; pea e mole au toe tauteai anai te u mea fuli ae e mauli, o hage ko te mea aeni kua au fai.
Taaga Lea 21:10 Ko te laumalie o te tagata agakovi e holi ki te kovi; ko tona kaumea totonu e mole ina mau he kalasia i ona mata.
ʼAki Te Tui ʼe Tou Loto Faa Kātaki Pea Mo Faikole
8 ʼE tou agahala mo kapau ʼe tou laukovi ki totatou ʼu tēhina pea mo tuagaʼane ʼi te tui. (Sake 4:11, 12) Kae ʼe fatufatuʼi e ʼihi tonatou ʼu tēhina, heʼe lagi nātou manatu ʼe nātou faitotonu, peʼe lagi nātou loto ke hikihiki nātou kae nātou fakamālaloʼi ʼihi. (Pesalemo 50:20; Tāʼaga Lea 3:29) Ko te kupu faka Keleka ʼaē ʼe fakaliliu ʼaki te kupu ‘laukovi,’ ʼe faka ʼuhiga ki te fehiʼa pea ʼe fakapipiki kiai te fai ʼo he tukugakovi loi. ʼE ko he fakamāuʼi kovi ʼaia ʼo totatou tēhina. He koʼe ko te faʼahi ʼaia ʼe hage ko he ‘laukovi ki te lao pea mo he fakamāuʼi ʼo te lao ʼa te ʼAtua?’ Ko te kau Sekelipa pea mo te kau Faliseo, neʼe nātou ‘faiva ʼi te fakanoaʼi ʼo te fakatotonu ʼa te ʼAtua’ pea mo nātou faifakamāu ʼo mulimuli ki tanatou ʼu pelesepeto ʼa nātou totonu. (Maleko 7:1-13) ʼO toe feiā pe, kapau ʼe tou fakamāuʼi te tēhina ʼaē ʼe mole fakamāuʼi e Sehova, ʼe mole tou ‘fakamāuʼi koa la te lao ʼa te ʼAtua,’ pea mo tou agahala kapau ʼe tou ʼui ʼe mole hona ʼaoga? Pea kapau ʼe tou fatufatuʼi totatou ʼu tēhina, pea ʼe mole tou fakahoko te lao ʼo te ʼofa.—Loma 13:8-10.
Pesalemo 50:20 E ke lala, pea e ke palalau kovi ki tou tehina, e ke laukovi ki te foha o tau fae.
Taaga Lea 3:29 Aua naa ke fakakaukaui te kovi ki tou oloi, kae nofo ia ia i ou tafa o falala kia koe.
VAHAʼA ʼO TE ʼAHO 14-20 ʼO OKETOPELI
TE ʼU KOLOA ʼO TE TOHI-TAPU | 1 PETELO 1-2
“ ʼE Tonu Ke Kotou Maʼoniʼoni”
Ko Te Totogi ʼE Ko He Meʼa ʼOfa Haohaoa Mai Te Tamai
5 ʼE feafeaʼi hatatou fakaha ʼe tou ʼoʼofa ki te huafa ʼo Sehova? ʼAki tatatou aga. ʼE fakamaʼua mai e Sehova kia tatou ke tou maʼoniʼoni. (Lau ia 1 Petelo 1:15, 16.) Ko tona fakaʼuhiga, ke tou tauhi ʼateaina pe pea mo tou fakalogo kia te ia ʼaki totatou loto katoa. Tatau aipe pe ʼe fakatagaʼi tatou, kaʼe tou faiga malohi ke tou maʼuʼuli ohage ko tona akoʼi mai e Sehova kia tatou. Tou fakaalu tahi totatou maʼuli mo te ʼu pelesepeto ʼa Sehova, pea ʼe tou fakakololiaʼi ai tona huafa. (Mateo 5:14-16) Pea ʼe tou fakamoʼoni ai ko te ʼu lao ʼa Sehova ʼe fua lelei kia tatou pea ko Satana ʼe gutu loi. ʼE mole tou haohaoa, koia ʼae ʼe tou fai pe anai he ʼu lakahala. Kaʼe ka tou fai he ʼu lakahala, tou fakahemala mo tou faiga ke tou fakagata te fai ʼo te ʼu meʼa ʼae ʼe fakalainoaʼi ai te huafa ʼo Sehova.—Pesalemo 79:9.
Pesalemo 79:9 Oi Atua, ko tomatou fakamauli, tokoni mai kia matou, o tupu ko te kololia o tou huafa! Haofaki matou, pea fakamolemole ki amatou agahala, o tupu ko tou huafa!
ʼE Feafeaʼi Hatatou Filifili He ʼu Fakafiafia ʼe Lelei?
6 Neʼe fakatotonu fēnei e Paulo ki te kau Kilisitiano ʼo Loma: “ ʼAua naʼa kotou tuku te ʼu koga ʼo tokotou sino ki te agahala.” Neʼe toe ʼui age e Paulo ke natou “tāmateʼi te ʼu gāue ʼo te sino.” (Loma 6:12-14; 8:13) ʼI te kamata ʼo tana tohi, neʼe ina fai he ʼu faʼifaʼitaki ʼo ʼuhiga mo “te ʼu gāue ʼo te sino.” ʼO ʼuhiga mo te mālama agahala ʼaenī, ʼe tou lau fēnei: “ ʼE fonu tonatou gutu ʼi te faitutuku.” “ ʼE fakavilivili pē tonatou ʼu vaʼe ki te ligitoto.” “ ʼE mole he manavasiʼi ki te ʼAtua iā muʼa ʼo ʼonatou mata.” (Loma 3:13-18) ʼE ʼulihi anai e he Kilisitiano tona sino mo kapau ʼe ina fakaʼaogaʼi “te ʼu koga” ʼo tona sino moʼo fai ia te ʼu agahala ʼaia. Kapau lā iā ʼaho nei, ʼe sioʼi e he Kilisitiano he ʼu meʼa heʼe ʼaoga ohagē ko te ʼu pāki ʼaē ʼe hā ai te ʼu felāveʼi fakasino fakalialia peʼe ko he ʼu ʼata ʼe ʼasi ai te toe agamālohi fakalialia heʼeʼaoga, pea ʼe ina lolotoga “tuku [tona ʼu mata] ki te agahala,” ʼo ina ʼulihi ai tona sino kātoa. Ko tana tauhi ʼe liliu anai ko he sākilifisio ʼe mole kei māʼoniʼoni pea ʼe mole tali e te ʼAtua. (Tetelonome 15:21; 1 Petelo 1:14-16; 2 Petelo 3:11) ʼI toe meʼa fakaʼofaʼofa leva ʼo tupu pē ko tatatou filifili ia he ʼu fakafiafia ʼe kovi!
Tetelonome 15:21 Kapau e ina mau anai he mele, kapau e ketu ia ia pee kivi, kapau e ina mau he lavea kovi, e mole ke momoli anai ia ia i he sakilifisio ki te Eteleno, tou Atua.
Kumi Te ʼu Koloa ʼi Te Tohi-Tapu
Ko He ʼu Puani ʼAoga ʼo Te ʼu Tohi ʼa Sake Pea Mo Petelo
1:10-12. Neʼe loto e te kau ʼāselo ke natou vakavakaʼi pea mo mahino ki te ʼu moʼoni loloto ʼaē neʼe tohi e te kau polofetā ʼa te ʼAtua ʼo te temi muʼa ʼo ʼuhiga mo te kōkelekāsio ʼo te kau Kilisitiano fakanofo. Kae neʼe hoki tāsilo lelei pē ia te ʼu meʼa ʼaia ʼi te temi ʼaē neʼe kamata felōgoi ai ia Sehova pea mo te kōkelekāsio. (Efe. 3:10) ʼE mole tonu koa lā ke tou faʼifaʼitakiʼi ia te kau ʼāselo pea mo tou faiga ke tou kumi ia “te ʼu meʼa loloto ʼa te ʼAtua”?—1 Ko. 2:10.
it-2-F 1021 ¶4
Taupau
Te Taupau Maʼoluga. Ia 1 Petelo 2:25, neʼe toe ui e Petelo te ʼu palalau ʼa Esaia 53:6 ʼae ʼe talanoa kia natou ʼae ʼe hage ko he ʼu ovi neʼe hehe. Kae ina toe ui fenei: “Kae ʼi te temi nei kua kotou toe liliu ki te tagata tauhi ovi ʼae ʼe ina taupau ʼokotou maʼuli.” Neʼe ina fakaʼuhiga kia Sehova ʼAtua, he neʼe faitohi e Petelo kia natou ʼae neʼe mole faʼa mamaʼo mai ia Kilisito Sesu, kae neʼe toe taki mai natou e Sesu kia Sehova ʼAtua te Tauhi Ovi Lahi. (Pes 23:1; 80:1; Sel 23:3; Esk 34:12) Ko Sehova ʼe ko he taupau, ʼe ko he tahi ʼe ina ʼaʼahi. (Pes 17:3) ʼE feala ke fakaalu tahi te ʼaho ʼae ʼe haʼu anai te ʼAtua ʼo ʼaʼahi (Fakakeleka: épiskopê) mo te fakamau tautea, ohage ko te aluʼaga ʼae neʼe hoko ʼi te ʼuluaki sekulo ʼi Selusalemi ʼae neʼe mole mahino ki te temi ʼae neʼe “ ʼaʼahi ai [Fakakeleka: épiskopês].” (Luk 19:44) Peʼe ʼe feala ke ʼi ai he ʼu fua lelei ohage ko natou ʼae neʼe natou fakakololiaʼi te ʼAtua ʼi te ʼaho ʼae ʼe ina ‘ ʼaʼahi ai [Fakakeleka: épiskopês].’—1Pe 2:12.
Esaia 53:6 Nee tou hehe fuli o hage ko ni ovi, nee tou tahi muli i tona ala totonu; pea nee fakato e te Eteleno kia ia te agatuu a tatou fuli.
Pesalemo 23:1 Ko te Eteleno ko toku tagata tauhi ovi: E mole au toe masiva anai i he mea.
Pesalemo 80:1 Fakalogo mai tou taliga, tagata tauhi ovi o Iselaele, Ia koe ae e ke taki ia Sosefo o hage ko he faga manu! Ke ke ha mai i tou matalelei, ia koe ae e heka i te vaha o te u selupino!
Selemia 23:3 Kae e au fakatahii anai te toega o taku faga ovi mai te u fenua fuli ae nee au kapu natou ki ai. E au aumai anai natou ki tonatou lotoa; e natou fanaunau anai pea mo liuliuga anai.
Esekiele 34:12 E au tokaga anai o tanaki taku faga ovi o hage ko te fai a he tagata tauhi manu moka sio ia ia kua mavete katoa tana faga manu. E au alu anai o kumi mai aku ovi, i te u kogamea fuli ae nee natou mavetevete ki ai, i te aho kovi mo fakapouli.
Pesalemo 17:3 Kapau e ke fakaaata toku loto, kapau e ke ahiahi ki ai i te pouli, kapau e ke ahiahii au, e mole ke mau anai he mea: E mole kehe taku manatu i te mea ae e hifo mai toku gutu.
VAHAʼA ʼO TE ʼAHO 21-27 ʼO OKETOPELI
TE ʼU KOLOA ʼO TE TOHI-TAPU | 1 PETELO 3-5
“Kua Ovi Mai Te Fakaʼosi ʼo Te ʼu Meʼa Fuli”
Kotou “Alaala, o Tokaga Ki Te Faikole”
NEʼE ui fenei e te tagata neʼe gaue poʼuli: “Ko te temi ʼae ʼe faigataʼa ʼaupito ai te nofo ʼalaʼala, ʼe ko te temi ʼi muʼa pe ʼo te hopo ake ʼo te laʼa.” ʼE lagi manatu tahi anai mo ia te hahaʼi ʼae ʼe fakamaʼua ke natou nonofo ʼalaʼala ʼi he po katoa. ʼE feala ke fakatatau te moʼi temi ʼaia ki te temi fakaʼosi ʼo te malama ʼa Satana ʼae ʼe tou maʼuʼuli ai. ʼE faigataʼa ʼaupito te temi ʼaia, koia la ʼae ʼe tonu ai ke faiga malohi te kau Kilisitiano ʼo te temi nei ke natou nonofo ʼalaʼala. (Loma 13:12) ʼE fakatupu kovi anai kia tatou moka tou maʼumoea ʼi te faʼahi fakalaumalie. ʼE tonu ke tou “popoto” pea mo tou haga “alaala, o tokaga ki te faikole.”—1 Pet. 4:7.
Tou ʼIloʼi Pea Mo Tou Tauʼi Totatou ʼu Vaivaiʼaga ʼi Te Faʼahi Fakalaumālie
Koia, tou manatuʼi te tokoni ʼofa ʼa te ʼapositolo ko Petelo: “E fakaōvi mai te fakaʼosi o te meafuape, koia, koutou atamai malama pea mo koutou [“aga fakapotopoto,” MN], ke feala tautou faikole. I te meafuape, e mua aki tautou mau he feʼofaʼofani e tuumau, koteuhi e uufi e te ofa ia he lukuga agahala lahi aupito.” (1 Petelo 4:7, 8) ʼE feala pe ki te ʼuhiga agahala—ʼo te hahaʼi peʼe ʼo tatou totonu—ke liliu ko he meʼa fakatupu tūkia ki totatou ʼatamai pea mo totatou loto. ʼE ʼiloʼi lelei e Satana te vaivaiʼaga ʼaia ʼo te tagata. Ke feala hana puleʼi te hahaʼi, ʼe ina fakamaveuveu nātou. Koia, ʼe tonu ai ke tou ʼofa ʼo foimo fakamolemole ki totatou ʼu tēhina mo tuagaʼane, ke ʼaua naʼa tou “tuku he faigamalie ki te temonio.”—Efeso 4:25-27.
ʼE Fakafiafia Te Tali Kaiga Pea ʼe Maʼuhiga ʼAupito
2 Neʼe fakalotomalohiʼi fenei e Petelo ʼona tehina mo tuagaʼane: “Ke kotou fakaha te tali kaiga ia koutou.” (1 Petelo 4:9) Ko te kupusiga palalau Fakakeleka ʼae ko “tali kaiga,” ʼe fakaʼuhiga ki “te agaʼofa peʼe ko te agalelei ki te kau matapule.” Kae neʼe fakalotomalohiʼi e Petelo ʼona tehina mo tuagaʼane ke natou tali kaiga ia natou, tatau aipe pe ʼe kua natou feiloʼiʼaki pea mo gaue fakatahi. ʼE tokoni feafeaʼi age anai te tali kaiga kia natou?
3 ʼE natou fefakaoviʼaki anai ʼi te tali kaiga. ʼE feafeaʼi kia koe? Kei ke manatuʼi koa te fiafia ʼae neʼe ke maʼu moka fakaafe koe e he tahi ki tona ʼapi? Pea ka ke fakaafe he tahi ki tou ʼapi ʼe kolua fefakaoviʼaki ai. Ko he aluʼaga lelei ʼaia ke ke feiloʼiʼaki ai mo ʼou tehina mo tuagaʼane ko hau tali kaiga kia natou. Ko te kau Kilisitiano ʼae neʼe maʼuʼuli ʼi te temi ʼo Petelo neʼe ʼaoga ke natou fefakaoviʼaki he ʼe kua ʼaʼasili malohi te ʼu faigataʼaʼia. Pea ʼe tonu ke toe feia mo tatou ʼi “te ʼu ʼaho fakamuli” ʼaeni.—2 Timoteo 3:1.
Kumi Te ʼu Koloa ʼi Te Tohi-Tapu
Te ʼu Fehuʼi ʼa Te Kau Lautohi
ʼE ui ʼi te Tohi-Tapu neʼe alu ia Sesu “o akonaki ki te u laumalie i te fale pilisoni.” (1 Pet. 3:19) Kotea tona fakaʼuhiga?
▪ ʼE fakaha e te apositolo ko Petelo ko te ʼu laumalie ʼaia neʼe ko natou ʼae “nee [talagataʼa] i mua, i te talitali mo te kataki fualoa a te Atua i te u aho o Noe.” (1 Pet. 3:20) ʼO ha lelei mai ai neʼe talanoa Petelo ki te ʼu ʼaselo ʼae neʼe natou filifili ke natou kau ki te agatuʼu ʼa Satana. ʼE palalau ia Suta ʼo ʼuhiga mo te ʼu ʼaselo ʼae “nee mole natou taupau onatou tuulaga, kae nee natou siaki tonatou nofoaga totonu,” ʼo ina ui ko te ʼAtua “nee ina taupau [ia natou] ki te aho lahi o te fakamaau, o hai o heegata e te u fakapouli.”—Suta 6.
Neʼe feafeaʼi te talagataʼa ʼa te ʼu ʼaselo ʼi te temi ʼo Noe? ʼI muʼa ʼo te Tulivio, neʼe kofuʼi e te ʼu ʼaselo agakovi ʼaia ni sino ʼi tagata, kaʼe neʼe mole ko he faʼahi ia neʼe fakatotonu e te ʼAtua ke natou fai. (Sen. 6:2, 4) Tahi ʼae, ko te ʼu ʼaselo ʼaia neʼe natou fai ni felaveʼi fakasino mo ni fafine, neʼe ko he aga ia ʼe fakafeagai ki te natula. Koteʼuhi neʼe mole fakatupu e te ʼAtua te ʼu ʼaselo ke natou fai ni felaveʼi fakasino mo ni fafine. (Sen. 5:2) Ko te ʼu ʼaselo agakovi mo talagataʼa ʼaia, ʼe fakaʼauha anai natou e te ʼAtua ʼi tona temi totonu. Kaʼe ʼi te temi nei, ohage ko tona ui e Suta, ʼe natou nonofo ʼi “te u fakapouli,” ʼae ʼe feala ke fakata ki he fale pilisoni fakalaumalie.
Senesi 6:2, 4 Pea nee sisio leva te u foha o te Atua nee matalelei osi te u ofafine o te u tagata, pea nee natou filifili leva ni ihi o natou ko onatou ohoana. 4 I te temi aia, nee tagata lalahi osi te kele. Pea nee toe feia i te osi o te olo o te u foha o te Atua ki te u ofafine o te tagata, pea nee tupu leva mai ai ni fanau: ko natou aia nee logologona i te temi mua.
Senesi 5:2 Nee ina fakatupu leva te tagata mo te fafine, nee tapuaki leva ia ia kia naua, pea nee ina fakahigoa leva ia naua ki te higoa o te tagata, i tana fakatupu naua.
Neʼe ko ʼanafea pea neʼe feafeaʼi te akonaki ʼa Sesu ki “te u laumalie [ʼaia] i te fale pilisoni”? ʼE tohi e Petelo neʼe hoko te faʼahi ʼaia hili te fakatuʼuake ʼo Sesu. (1 Pet. 3:18, 19) Kotou toe tokagaʼi ʼe ui e Petelo “nee alu ai ia [Sesu] o akonaki,” ʼo ha ai neʼe hoko ʼi muʼa ʼo te tohi e Petelo tana ʼuluaki tohi. Koia hili he ʼu kiʼi temi ki tona fakatuʼuake, neʼe tala e Sesu ki te kau ʼaselo agakovi te fakatuʼā ʼae ʼe tonu ke fai kia natou. Neʼe mole foaki e Sesu kia natou ia he ʼamanaki kaʼe neʼe ko he akonaki faifakamau ia. (Son. 1:1, 2) Neʼe feala kia Sesu ke ina fai te fakamau ʼaia, he neʼe kua ina fakaha tana tui mo tana nofo agatonu ʼo kaku ki te mate pea mo kua ʼosi fakatuʼuake, ʼo fakamoʼoni ai neʼe mole malo te Tevolo ia ia.—Soa. 14:30; 16:8-11.
ʼI te ka haʼu, ʼe haʼi anai e Sesu mo ina li anai ia Satana pea mo te ʼu ʼaselo ʼaia ki te vanu. (Luka 8:30, 31; Apk. 20:1-3) Kaʼe ʼo fakatalitali ki te temi ʼaia, ko te ʼu ʼaselo talagataʼa ʼaia, ʼe nonofo ʼi te fakapoʼuli gaogao ʼi te faʼahi fakalaumalie pea ko tonatou fakaʼauha fakaʼosi ʼe hoko moʼoni anai.—Apk. 20:7-10.
Ko He ʼu Puani ʼAoga ʼo Te ʼu Tohi ʼa Sake Pea Mo Petelo
4:6—Ko ai ia “te kau mate” ʼaē neʼe ‘fakahā ki ai ia te logo lelei’? ʼE ko nātou ʼaē neʼe ‘mamate ʼi tanatou ʼu hala pea mo tanatou ʼu agahala,’ peʼe ko nātou ʼaē neʼe mamate kae neʼe heʼeki natou ʼiloʼi ia te logo lelei. (Efe. 2:1) Kae ʼi tanatou kua tui ki te logo lelei, neʼe natou kamata “māʼuʼuli” leva ʼi te faʼahi fakalaumālie.
VAHAʼA ʼO TE ʼAHO 28 ʼO OKETOPELI-3 ʼO NOVEPELI
TE ʼU KOLOA ʼO TE TOHI-TAPU | 2 PETELO 1-3
“Kotou Fakaatalitali Pea Mo Manatuʼi Tuʼumaʼu Ia Te Hoko Mai ʼo Te ʼAho ʼo Sehova”
Ko Sehova ʼe Ina ‘Fai Anai Ia Te Fakamāu ʼAē ʼe Totonu’
11 ʼE tonu ke tou mahino feafeaʼi ki te fakapapau ʼaē ʼa Sesu, ko Sehova ʼe ina fai anai he fakamāu ʼe totonu ʼi te “moʼi temi pē ʼaia”? ʼE fakahā ʼi te Folafola ʼa te ʼAtua “tatau aipē peʼe [ko Sehova ʼe] . . . faʼa kātakiʼi fualoa,” kae kā kua hoko mai te temi pea ʼe ina foimo fakahoko anai he tautea ʼe totonu. (Luka 18:7, 8, MN; 2 Petelo 3:9, 10) ʼI te temi ʼo Noe, ʼi te hoko mai ʼo te Tulivio, neʼe mole toe tuai te fakaʼauha ʼo te kau agakovi. ʼO toe feiā mo te temi ʼo Lote, ʼi te tō ifo mai te lagi ʼo te afi, neʼe mamate ai te kau agakovi. Neʼe ʼui fēnei e Sesu: “ ʼE toe feiā pē anai ʼi te ʼaho ʼaē ʼe tonu ke fakahā ai te Foha ʼo te tagata.” (Luka 17:27-30, MN) ʼE tau anai mo te kau agakovi ia ‘te fakaʼauha fakafokifā.’ (1 Tesalonika 5:2, 3) ʼIo, ʼe tou lava falala kātoa ko Sehova ʼe mole ina tuku anai te mālama ʼa Satana ke tuʼu ʼo fualoa, ʼo mulimuli pē ki tona faitotonu.
“Ko Te ʼAho Lahi ʼo Sehova Kua Ōvi Mai”
18 ʼE mole tou punamaʼuli ki te tokoni ʼa te ʼapositolo ko Petelo ke tou manatuʼi “te hoko mai ʼo te ʼaho ʼo Sehova”! ʼE tou lava fai feafeaʼi te faʼahi ʼaia? ʼE tonu ke tou maʼu he ʼu “aga faka māʼoniʼoni pea mo te ʼu gāue ʼaē ʼe fakaʼiloga ʼaki [tatatou] pipiki ki te ʼAtua.” (2 Petelo 3:11, 12, MN) Kā tou maʼumaʼua ki te ʼu gāue ʼaia, ʼe feala ai anai ke tou fakatalitali fakafiafia ki te hoko mai ʼo “te ʼaho ʼo Sehova.” Ko te kupu faka Keleka ʼaē neʼe fakaliliu ʼaki te “taupau lelei ʼi te ʼatamai” ko tona faka ʼuhiga “fakaviliviliʼi.” ʼE mole feala hatatou fakaviliviliʼi moʼoni ia te temi ʼaē kei toe ʼo aʼu ki te hoko mai ʼo te ʼaho ʼo Sehova. Kae ʼi tatatou lolotoga fakatalitali ki te ʼaho ʼaia, ʼe hagē anai kiā tātou te temi ʼe fakalaka fakavilivili mo kapau ʼe lahi tatatou gāue ʼi te tauhi ki te ʼAtua.—1 Kolonito 15:58.
Kumi Te ʼu Koloa ʼi Te Tohi-Tapu
Ko He ʼu Puani ʼAoga ʼo Te ʼu Tohi ʼa Sake Pea Mo Petelo
1:19—Ko ai ia “te fetuʼu ʼaho,” ko te temi fea ʼaē kā tuʼuake ai anai, pea ʼe tou ʼiloʼi feafeaʼi ia te meʼa ʼaē neʼe hoko? Ko “te fetuʼu ʼaho” ʼe ko Sesu Kilisito ʼi te hili ʼo tana kua liliu ko te Hau ʼo te Puleʼaga ʼo te ʼAtua. (Fakh. 22:16) ʼI te taʼu 1914, neʼe fakanofo ia Sesu ko te Hau Fakamēsia ʼi muʼa ʼo te ʼu fakatupu fuli, ʼo fakahā ai ia te ʼamanaki hoko mai ʼo he maʼuli foʼou. Ko te fetogi fakamilakulo neʼe ina fakahā fakatomuʼa ia te kolōlia ʼo Sesu pea mo te mālohi ʼo te Puleʼaga, ʼo fakahā ia te hoko moʼoni anai ʼo te folafola fakapolofetā ʼa te ʼAtua. Ko tatatou tokagaʼi ia te folafola ʼaia ʼe ina fakafiafiaʼi ʼotatou loto, pea ʼe tou ʼiloʼi ai kua fakatuʼuake ia te Fetuʼu ʼAho.
Ko He ʼu Puani ʼAoga ʼo Te ʼu Tohi ʼa Sake Pea Mo Petelo
2:4—Koteā ia te “Taletale,” pea ko te temi fea ʼaē kā lī ai anai kiai ia te kau ʼāselo fakafeagai? Ko te Taletale ʼe ko he ʼaluʼaga ʼe hagē pē ko he pilisoni, pea ʼe ko te ʼu laumālie fakapulipuli pē ʼaē ʼe hoko ki ai te ʼaluʼaga ʼaia kae mole ko te hahaʼi fakakelekele. Ko tona fakaʼuhiga, ʼe ko he fakapōʼuli gaogao ki te kau ʼāselo ʼaia ʼo ʼuhiga mo te ʼu fakatuʼutuʼu ʼa te ʼAtua. Ko nātou ʼaē ʼe nonofo ʼi te Taletale ʼe mole natou maʼu ia te ʼamanaki ki te kā haʼu. Neʼe tuku e te ʼAtua ia te kau ʼāselo talagataʼa ki te Taletale ʼi te temi ʼo Noe, pea ʼe natou nonofo ai anai ʼi te ʼaluʼaga mālalo ʼaia ʼo kaku ki te temi ʼaē kā fakaʼauha ai nātou.
“ ʼE Maʼuhiga Feafeaʼi Kia Koe Ia Te Tohi-Tapu?”
Pesalemo 86:15 Kae ko koe, Aliki, ko he Atua manavaofa ia koe mo agalelei, Ae e ke taofi fualoa tou hauhau, e ke mau koloa i te agalelei mo te agatonu.
Pesalemo 119:97 E au ofa osi ki tau lao! E au metitasio ki ai i te aho katoa.
HE FEHUʼI KE TOU METITASIO KI AI:
Pesalemo 119:105 Ko tau folafola ko he malama taki i oku vae, pea ko he malama i toku ala.