Ko Sehova ʼe Ina ‘Fai Anai Ia Te Fakamāu ʼAē ʼe Totonu’
“ ʼE mole ʼapē fai anai koa ia e te ʼAtua te fakamāu ʼaē ʼe totonu ki tana hahaʼi ʼaē kua fili, ʼaē ʼe kalaga ake kiā te ia ʼi te ʼaho mo te pō?”—Luka 18:7, MN.
1. Ko ai ʼaē ʼe liliu ko he matapuna fakaloto mālohi kiā koutou, pea koteā tona tupuʼaga?
ʼI TE mālamanei kātoa, ko te kau Fakamoʼoni ʼa Sehova ʼe natou fiafia ʼi te fakatahi mo te ʼu tehina mo tuagaʼane Kilisitiano kua fualoa tanatou tauhi agatonu kiā Sehova. ʼE ʼi ai koa niʼihi iā nātou ʼaia ʼe feʼiloʼiʼaki mo koutou? Lagi ko he tuagaʼane kua finematuʼa, kua fualoa hana papitema pea ʼe tahitahiga tana tō fono ʼi te Fale ʼo Te Puleʼaga. Peʼe lagi ko he tehina kua matuʼa ʼe lagolago agatonu ʼi te vāhaʼa fuli ki te ʼu gāue faka minisitelio ʼo te kōkelekāsio pea kua ina fai te faʼahi ʼaia lolotoga ni ʼu taʼu. ʼIo, tokolahi ʼi te ʼu tehina mo tuagaʼane agatonu ʼaia neʼe natou manatu kua tonu ke hoko mai lā ia Halamaketone. Kae neʼe mole vaivai pē lā tanatou falala ʼaē ki te ʼu fakapapau ʼa Sehova logolā te kei tuʼu ʼo te mālama agakovi ʼaenī, ʼo fēia mo tanatou ‘loto ʼutaki ʼo aʼu ki te fakaʼosi’ neʼe mole vaivai pē lā. (Mateo 24:13) ʼE mālohi te kōkelekāsio kātoa ʼaki te tui ʼa te ʼu kaugana agatonu ʼaia ʼa Sehova.—Pesalemo 147:11.
2. Ko te ʼaluʼaga fea ʼe fakatupu lotomamahi kiā tātou?
2 Kae ʼaki te temi, ʼe lagi tou sio ki te fetogi ʼo tanatou aga. Ko ʼihi kau Fakamoʼoni neʼe kua fualoa tanatou kau ki te minisitelio, ʼaki te temi neʼe kua vaivai tanatou tui ʼaē kiā Sehova, pea mole kei natou fakatahi mo te kōkelekāsio faka Kilisitiano. ʼE ko he meʼa fakatupu lotomamahi kiā tātou mokā situʼa totatou ʼu tehina mai ia Sehova, pea ʼe tou faiga ʼaupitō anai ke tou haga tokoni ki te kau “ōvi kua hehe” ke natou toe liliu mai ki te faga ōvi. (Pesalemo 119:176; Loma 15:1) Kae ʼe malaga te ʼu fehuʼi mokā hoko te ʼu faʼahiga aga ʼaenī—ʼaē ko ʼihi ʼe mālohi pē tanatou ia tui pea mo gāue mālohi ʼi te minisitelio, kae ko ʼihi ʼe puli tanatou ia tui pea mo fakamamaʼo ʼi te kōkelekāsio. Koteā ʼaē neʼe tokoni ki te kau Fakamoʼoni e tokolahi ke natou taupau tanatou tui ki te ʼu fakapapau ʼa Sehova kae ko ʼihi neʼe puli tanatou ia tui? Koteā ʼaē ʼe tou lava fai takitokotahi ke mālohi tuʼumaʼu tatatou tui papau ʼaē ko “te ʼaho lahi ʼo Sehova” kua ōvi mai? (Sofonia 1:14) Tou vakaʼi age muʼa te lea fakatātā ʼi te Evaselio ʼa Luka.
Ko He Fakatokaga Kiā Nātou ʼAē Kā Māʼuʼuli “[Mokā] Haʼu Anai Te Foha ʼo Te Tagata”
3. Ko ai ʼaē ʼe feala ke fua lelei tāfito kiai ia te lea fakatātā ʼo te fafine vītua pea mo te tuʼi fakamāu, pea koteā tona tupuʼaga?
3 ʼI te kāpite 18 ʼo Luka, ʼe tou lau te lea fakatātā ʼa Sesu ʼo te fafine vītua pea mo te tuʼi fakamāu. ʼE tatau mo te lea fakatātā ʼo te tagata tali kāiga fakakinau ʼaē neʼe tou vakaʼi ʼi te ʼalatike kua ʼosi. (Luka 11:5-13) Kae ko te ʼu vaega ki muʼa atu pea ki muli mai ʼo te koga tohi ʼaia ʼo te lea fakatātā ʼo te fafine vītua pea mo te tuʼi fakamāu, ʼe faka ʼuhiga tāfito kiā nātou ʼaē kā māʼuʼuli “[mokā] haʼu anai te Foha ʼo te tagata” ʼi te Puleʼaga, ʼaē neʼe kamata ʼi te taʼu 1914.—Luka 18:8, MN.a
4. Koteā ʼaē neʼe palalau kiai ia Sesu ʼi muʼa ʼo tana fai te lea fakatātā ʼaē ʼe tou lau iā Luka kāpite 18?
4 ʼI muʼa ʼo tana fai te lea fakatātā, neʼe talanoa ia Sesu ki te fakamoʼoni ʼo tana ʼi henī ʼi te Puleʼaga ʼaē ʼe tokagaʼi anai “ohagē pē ko te ʼuhila” ʼe “tapa mai ʼi he tahi potu fenua ʼo te lalo lagi ʼo aʼu ki he tahi atu potu fenua ʼo te lalo lagi.” (Luka 17:24, MN; 21:10, 29-33) Kae ko te tokolahi ʼi te hahaʼi ʼe māʼuʼuli ʼi “te temi fakaʼosi” ʼe mole natou tokagaʼi anai ia te fakamoʼoni maʼuhiga ʼaia. (Taniela 12:4) Koteā tona tupuʼaga? Heʼe natou hagē pē ko te hahaʼi ʼo te temi ʼo Noe pea mo ʼaē ʼo Lote ʼaē neʼe natou meʼa noaʼi te ʼu fakatokaga ʼa Sehova. ʼI te temi ʼaia, ko te hahaʼi ‘neʼe natou kakai, mo ʼiʼinu, mo faifakatau, mo fakatau, mo tō ʼakau, pea mo laga fale ʼo aʼu ki te ʼaho ʼaē neʼe fakaʼauha ai nātou.’ (Luka 17:26-29) Neʼe natou mamate ʼuhi he neʼe natou tōkakaga fau ki te ʼu gāue māhani ʼo te maʼuli, ʼo mole natou tokagaʼi ai te finegalo ʼo te ʼAtua. (Mateo 24:39) Iā ʼaho nei, ʼe feiā pē mo te hahaʼi, ʼe lahi pē tanatou tōkakaga ki tanatou ʼu gāue ʼi te ʼaho fuli, ʼo mole natou mahino ai ki te fakamoʼoni ʼo te kua hoko mai ʼo te fakaʼosi ʼo te mālama heʼe lotu ʼaenī.—Luka 17:30.
5. (a) Ko ai ʼaē neʼe fai kiai e Sesu tana fakatokaga, pea koteā tona tupuʼaga? (b) Koteā ʼaē neʼe tupu ai te puli ʼo te tui ʼa ʼihi?
5 ʼE mahino ia, neʼe tuʼaniaʼi e Sesu naʼa fakaleluʼi foki mo tana kau tisipulo e te mālama ʼa Satana, ʼo feala ai hanatou “toe liliu . . . ki te ʼu meʼa ʼaē kua ʼi muli.” (Luka 17:22, 31, MN ) Pea ko te faʼahi ʼaia neʼe hoko moʼoni ki ʼihi Kilisitiano. Lolotoga ni ʼu taʼu neʼe natou fakaʼamu ki te ʼaho ʼaē kā fakaʼauha ai anai e Sehova te mālama agakovi ʼaenī. Kae ʼi te mole hoko mai ʼo Halamaketone ʼi te temi ʼaē neʼe natou ʼamanaki kiai, neʼe puli ai leva tonatou fiafia. Neʼe vaivai leva tanatou falala ʼaē ki te kua ōvi mai ʼo te ʼaho tautea ʼa Sehova. Neʼe mole kei natou mālolohi ʼi te minisitelio pea māmālie pē neʼe natou toe liliu ʼo maʼumaʼua ʼaupitō ki te ʼu gāue māhani ʼo te maʼuli, ʼo siʼisiʼi ai te temi ʼaē ke natou fakaʼaogaʼi ki te ʼu gāue fakalaumālie. (Luka 8:11, 13, 14) ʼAki te temi, kua natou ‘toe liliu ki te ʼu meʼa ʼaē ʼi muli’—ʼi meʼa fakaʼofaʼofa foki!
Te Maʼuhiga ʼAē Ke “Faikole Tuʼumaʼu”
6-8. (a) Kotou fakamatala te lea fakatātā ʼo te fafine vītua pea mo te tuʼi fakamāu. (b) Neʼe fakamahino feafeaʼi e Sesu ia te lea fakatātā ʼaia?
6 Koteā ʼaē ʼe tou lava fai ke tou ʼiloʼi papau ai ʼe mole heʼeki vaivai tatatou falala mālohi ki te fakahoko ʼo te ʼu fakapapau ʼa Sehova? (Hepeleo 3:14) Neʼe fai e Sesu te fehuʼi ʼaia ʼi tana ʼosi fakatokaga ki te kau tisipulo ke ʼaua naʼa natou toe liliu ki te mālama agakovi ʼa Satana.
7 ʼE ʼui e Luka, ko Sesu “neʼe ina fai age kiā nātou te lea fakatātā ʼo ʼuhiga mo te maʼuhiga ʼaē ke natou faikole tuʼumaʼu pea ke ʼaua naʼa natou fiu.” Neʼe ʼui fēnei e Sesu: “ ʼI he kolo neʼe ʼi ai te tuʼi fakamāu neʼe mole manavasiʼi ia ki te ʼAtua pea neʼe mole fakaʼapaʼapa ki te tagata. Kae ʼi te kolo ʼaia neʼe ʼi ai te fafine vītua neʼe ʼalu tuʼumaʼu ki ai, ʼo ʼui māʼana, ‘Fai ke au maʼu he fakamāu ʼe totonu ki toku fili.’ Pea ʼi he kiʼi temi neʼe mole loto ia ki ai; kae ki muli age, neʼe ina ʼui fēnei, ‘Logopē lā taku mole manavasiʼi ki te ʼAtua pea mo taku mole fakaʼapaʼapa ki te tagata, kae ʼuhi ko te fakakinakina tuʼumaʼu ʼa te fafine vītua ʼaenī kiā te au, ʼe au fai nei ke ina maʼu he fakamāu ʼe totonu, ke ʼaua naʼa haʼu tuʼumaʼu ia ʼo tukipalaʼi au, ʼo aʼu ki tana fakamālohiʼi au ke au fai te meʼa ʼaē ʼe loto ki ai.’ ”
8 ʼI tana ʼosi fai te fakamatala ʼaenī, neʼe fakamahino fēnei e Sesu: “Kotou fagono ki te meʼa ʼaē neʼe ʼui e te tuʼi fakamāu ʼaia, kā neʼe ko te tagata heʼe faitotonu foki lā ia! ʼE mole ʼapē fai anai koa ia e te ʼAtua te fakamāu ʼaē ʼe totonu ki tana hahaʼi ʼaē kua fili, ʼaē ʼe kalaga ake kiā te ia ʼi te ʼaho mo te pō, tatau aipē peʼe ina faʼa kātakiʼi fualoa ia nātou? ʼE au tala atu kiā koutou: ʼE ina fai anai he fakamāu ʼe totonu kiā nātou ʼi te moʼi temi pē ʼaia. Kae kā haʼu anai te Foha ʼo te tagata, ʼe ina maʼu moʼoni anai koa te tui ʼi te kele?”—Luka 18:1-8, MN.
“Fai Ke Au Maʼu He Fakamāu ʼe Totonu”
9. Koteā te puani tāfito ʼaē ʼe hā lelei mai ʼi te lea fakatātā ʼo te fafine vītua pea mo te tuʼi fakamāu?
9 ʼE faigafua hatatou mahino ki te puani tāfito ʼo te lea fakatātā maʼuhiga ʼaenī. Ko te faʼahi ʼaia ʼe palalau kiai ia te fafine vītua mo te tuʼi fakamāu ʼo te lea fakatātā, ʼo feiā mo Sesu. Neʼe fēnei ia te kolekole ʼa te fafine vītua: “Fai ke au maʼu he fakamāu ʼe totonu.” Neʼe ʼui fēnei age e te tuʼi fakamāu: “ ʼE au fai nei ke ina maʼu he fakamāu ʼe totonu.” Neʼe fehuʼi fēnei e Sesu: “ ʼE mole ʼapē fai anai koa ia e te ʼAtua te fakamāu ʼaē ʼe totonu?” Pea ʼo ʼuhiga mo Sehova, neʼe ʼui fēnei e Sesu: “ ʼE ina fai anai he fakamāu ʼe totonu kiā nātou ʼi te moʼi temi pē ʼaia.” (Luka 18:3, 5, 7, 8, MN ) Ko te temi fea ʼaē kā “fai anai [e te ʼAtua ia] he fakamāu ʼe totonu”?
10. (a) Ko te temi fea ʼaē neʼe fai ai te fakatūʼā ʼi te ʼuluaki sēkulō? (b) Ko ʼāfea pea mo feafeaʼi ʼe fakahoko anai te lagavaka faitotonu maʼa te ʼu kaugana ʼa te ʼAtua iā ʼaho nei?
10 ʼI te ʼuluaki sēkulō, ko te “ ʼu ʼaho . . . ʼo te fakatūʼā ʼo mulimuli ki te faitotonu” (peʼe ko te “ ʼu ʼaho ʼo te lagavaka,” Kingdom Interlinear) neʼe hoko ʼi te taʼu 70 ʼo totatou temi, ʼi te temi ʼaē neʼe fakaʼauha ai ia Selusalemi pea mo tona fale lotu. (Luka 21:22, MN ) Ki te ʼu kaugana ʼa te ʼAtua iā ʼaho nei, ʼe fakahoko anai te tautea faitotonu ʼi “te ʼaho lahi ʼo Sehova.” (Sofonia 1:14; Mateo 24:21) ʼI te temi ʼaia, ko Sehova “ ʼe . . . ina fakahoko [anai] ia te mamahi kiā nātou ʼaē ʼe natou fakatupu mamahi” ki tana ʼu kaugana “mokā . . . fakahoko anai [e Sesu Kilisito] te lagavaka kiā nātou ʼaē ʼe mole natou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu.”—2 Tesalonika 1:6-8, MN; Loma 12:19.
11. ʼE feafeaʼi anai te fai ʼo he tautea ʼe totonu ʼi te “moʼi temi pē ʼaia”?
11 ʼE tonu ke tou mahino feafeaʼi ki te fakapapau ʼaē ʼa Sesu, ko Sehova ʼe ina fai anai he fakamāu ʼe totonu ʼi te “moʼi temi pē ʼaia”? ʼE fakahā ʼi te Folafola ʼa te ʼAtua “tatau aipē peʼe [ko Sehova ʼe] . . . faʼa kātakiʼi fualoa,” kae kā kua hoko mai te temi pea ʼe ina foimo fakahoko anai he tautea ʼe totonu. (Luka 18:7, 8, MN; 2 Petelo 3:9, 10) ʼI te temi ʼo Noe, ʼi te hoko mai ʼo te Tulivio, neʼe mole toe tuai te fakaʼauha ʼo te kau agakovi. ʼO toe feiā mo te temi ʼo Lote, ʼi te tō ifo mai te lagi ʼo te afi, neʼe mamate ai te kau agakovi. Neʼe ʼui fēnei e Sesu: “ ʼE toe feiā pē anai ʼi te ʼaho ʼaē ʼe tonu ke fakahā ai te Foha ʼo te tagata.” (Luka 17:27-30, MN ) ʼE tau anai mo te kau agakovi ia ‘te fakaʼauha fakafokifā.’ (1 Tesalonika 5:2, 3) ʼIo, ʼe tou lava falala kātoa ko Sehova ʼe mole ina tuku anai te mālama ʼa Satana ke tuʼu ʼo fualoa, ʼo mulimuli pē ki tona faitotonu.
“ ʼE Ina Fai Anai He Tautea ʼe Totonu”
12, 13. (a) Koteā te ʼu ako ʼe tou maʼu ʼi te lea fakatātā ʼo te fafine vītua pea mo te tuʼi fakamāu? (b) He koʼē ʼe tonu ke tou tui papau ko Sehova ʼe logo anai ki tatatou ʼu faikole pea mo ina fai anai te aga ʼaē ʼe faitotonu?
12 Ko te lea fakatātā ʼa Sesu ʼo ʼuhiga mo te fafine vītua pea mo te tuʼi fakamāu ʼe ina toe fakahā te tahi age ʼu moʼoni maʼuhiga. ʼI te fakamahino ʼo te lea fakatātā, neʼe ʼui fēnei e Sesu: “Kotou fagono ki te meʼa ʼaē neʼe ʼui e te tuʼi fakamāu ʼaia, kā neʼe ko te tagata heʼe faitotonu foki lā ia! ʼE mole ʼapē fai anai koa ia e te ʼAtua te fakamāu ʼaē ʼe totonu ki tana hahaʼi ʼaē kua fili?” ʼE mahino ia, neʼe mole fia fakatatau e Sesu ia Sehova ki te tuʼi fakamāu ke hagē leva neʼe ina fia ʼui ko te ʼAtua ʼe feiā tana aga mokā felōgoi mo tana ʼu kaugana. Kailoa ia, neʼe akoʼi e Sesu ki tana ʼu tisipulo ia te ako ʼo ʼuhiga mo Sehova, ʼo ina fakahā lelei te kehekehe ʼo te tuʼi fakamāu ʼaia pea mo te ʼAtua. Ko te ʼu faʼahi fea ʼaē ʼe nā kehekehe ai?
13 Ko te tuʼi fakamāu ʼo te lea fakatātā ʼa Sesu neʼe “heʼe faitotonu,” kae ko te “ ʼAtua ʼe ko he Tuʼi Fakamāu faitotonu.” (Pesalemo 7:11; 33:5) Ko te tuʼi fakamāu neʼe mole tokaga pē lā ki te ʼu meʼa ʼaē ʼi te loto ʼo te fafine vītua, kae ko Sehova ia ʼe tokaga ki te hahaʼi takitokotahi. (2 Fakamatala 6:29, 30) Neʼe mole fia tokoni te tuʼi fakamāu ki te fafine vītua, kae ko Sehova ʼe lotolelei ia ki te faʼahi ʼaia—ʼeī, ʼe fiafia ʼi te tokoni kiā nātou ʼaē ʼe tauhi age kiā te Ia. (Isaia 30:18, 19) Koteā te ako ʼe tou tāʼofi mai te hisitolia ʼaia? Kapau ko te tuʼi fakamāu heʼe faitotonu neʼe fakalogo ki te ʼu kolekole ʼa te fafine vītua pea mo foaki age te meʼa ʼaē neʼe loto kiai, ʼe feafeaʼi age lā kiā Sehova, ʼe logo anai ia ki te ʼu faikole ʼo tana ʼu kaugana pea ʼe mahino papau ia ʼe faitotonu ʼo foaki te meʼa ʼaē ʼe ʼaoga kiā nātou!—Tāʼaga Lea 15:29.
14. He koʼē ʼe mole tonu ke puli tatatou tui ʼo ʼuhiga mo te hoko mai ʼo te ʼaho ʼo te tautea ʼo te ʼAtua?
14 Tahi ʼaē, ʼe faihala ʼaupitō ia nātou ʼaē ʼe mole tui ki te hoko mai ʼo te ʼaho ʼo te tautea ʼa te ʼAtua. Koteā tona tupuʼaga? ʼI tanatou mole kei tui ko “te ʼaho lahi ʼo Sehova” kua ōvi mai, ʼe natou fakafihiʼi tatatou falala ʼaē kiā Sehova ʼe agatonu ʼo fakahoko tana ʼu fakapapau. Kae ʼe mole he tahi ʼe ina lava fakafihiʼi te agatonu ʼa te ʼAtua. (Sopo 9:12) Ko te fehuʼi tāfito ʼaē ʼe tonu ke tou fai kiā tātou totonu: Peʼe tou nonofo agatonu anai koa? Pea ko te faʼahi tāfito lā ʼaia ʼaē neʼe lagaʼi e Sesu ʼi te fakaʼosi ʼo te lea fakatātā ʼo te fafine vītua pea mo te tuʼi fakamāu.
‘ ʼE Ina Maʼu Moʼoni Anai Koa Te Tui ʼAia ʼi Te Kele?’
15. (a) Ko te fehuʼi fea ʼaē neʼe lagaʼi e Sesu, pea koteā tona tupuʼaga? (b) Koteā te fehuʼi ʼaē ʼe tonu ke tou fai e tātou totonu?
15 Neʼe fai e Sesu te fehuʼi maʼuhiga: “Kā haʼu anai te Foha ʼo te tagata, ʼe ina maʼu moʼoni anai koa te tui [ʼaia] ʼi te kele?” (Luka 18:8, MN nota ʼi te lalo pāsina) ʼE hā ʼi te kupu ‘te tui ʼaia’ neʼe mole fia talanoa ia Sesu ki te tui ʼa te hahaʼi fuli, kae ki te tahi age faʼahiga tui—te tui ohagē ko ʼaē neʼe maʼu e te fafine vītua. Neʼe mole foaki e Sesu ia te tali ki te fehuʼi ʼaē neʼe ina lagaʼi, kae neʼe ina lagaʼi tāfito he neʼe ina loto ke mahino ki tana ʼu tisipulo ʼe tonu ke feiā te lahi ʼo tanatou tui. Neʼe liliu koa tanatou tui ʼo vaivai, ʼo feala ai hanatou tuʼutāmaki ʼo natou toe liliu ai ki te ʼu meʼa ʼaē neʼe kua natou liʼaki? Neʼe tatau koa tanatou tui mo te tui ʼa te fafine vītua? Iā ʼaho nei, ʼe tonu mo tātou totonu ke tou fai te fehuʼi ʼaenī: ‘Ko te faʼahiga tui feafeaʼi ʼi toku loto ʼaē kā maʼu anai e “te Foha ʼo te tagata”?’
16. Ko te faʼahiga tui feafeaʼi ʼaē neʼe maʼu e te fafine vītua?
16 Ke tou kau iā nātou ʼaē ʼe natou maʼu te faitotonu ʼa Sehova, ʼe tonu ke tou faʼifaʼitakiʼi te tui ʼa te fafine vītua. Ko te faʼahiga tui feafeaʼi ʼaē neʼe ina maʼu? Neʼe ina fakahā tana tui ʼaki tana tatuʼu ʼo “ ʼalu ki [te tuʼi fakamāu], ʼo ʼui māʼana, ‘Fai ke au maʼu he fakamāu ʼe totonu.’ ” Ko te fafine vītua ʼaia neʼe ina kole fakakinau ke ina maʼu te faitotonu mai te tagata heʼe faitotonu. ʼO toe feiā pē, ko te ʼu kaugana ʼa te ʼAtua iā ʼaho nei ʼe feala hanatou falala ʼe natou maʼu anai te faitotonu ʼa Sehova—tatau aipē mo kapau ʼe mole tou maʼu ʼi te temi ʼaē ʼe tou fakaʼamu kiai. Tahi ʼaē, ʼe natou fakahā tanatou falala ki te ʼu fakapapau ʼa te ʼAtua ʼaki tanatou ʼu faikole tuʼumaʼu—ʼeī, ʼe natou ‘kalaga kiā Sehova ʼi te ʼaho mo te pō.’ (Luka 18:7) ʼIo, kapau ko he Kilisitiano ʼe mole kei faikole ke hoko mai te faitotonu, ʼe ina fakahā anai ʼe mole kei falala ko Sehova ʼe ina fai anai he meʼa maʼa tana ʼu kaugana.
17. Ko te ʼu tupuʼaga fea ʼaē ʼe tonu ai ke tou haga faikole pea mo tou haga tui ki te hoko moʼoni mai ʼo te ʼaho ʼo te tautea ʼo Sehova?
17 ʼE tonu ke tou tokagaʼi te ʼu faʼahi ʼo te maʼuli ʼo te fafine vītua, ke mahino ai kiā tātou te ʼaoga ʼaē ke tou haga faikole. Tou vakaʼi age muʼa te ʼu faʼahi ʼaē ʼe kehekehe ai tona maʼuli mo ʼaē ʼo tātou. Neʼe tatuʼu te fafine vītua ki te tuʼi fakamāu logolā neʼe mole ʼi ai he tahi neʼe ina fakaloto mālohiʼi ia ia ke ʼalu ki ai, kae ʼe foaki mai ʼi te Folafola ʼa te ʼAtua ia te ʼu tuʼuga fakaloto mālohi ke tupu ʼaki ai hatatou “kātaki tuʼumaʼu ʼi te faikole.” (Loma 12:12, MN ) Neʼe mole maʼu e te fafine vītua ia he fakamoʼoni ʼe tali anai tana ʼu kolekole, kae ko Sehova ʼe ina fakapapau mai ʼe ina fakahoko moʼoni anai te faitotonu. ʼAki tana polofeta, neʼe ʼui fēnei e Sehova: “Tatau aipē peʼe tuai, haga ʼatalitali kiai; heʼe hoko moʼoni anai ia. ʼE mole tauhala anai ia.” (Hapakuke 2:3; Pesalemo 97:10) Neʼe mole ʼi ai he tahi moʼo tokoni ki te fafine vītua ki te tagi ʼaē neʼe ina fai ke mālohi age tana ʼu kolekole, kae ko tātou ʼe tou maʼu te tokoni mālohi, ko Sesu ʼaē “e ko ia ae e afio i te toomatau o te Atua, pea e ko ia ae e ina hufaki tatou.” (Loma 8:34; Hepeleo 7:25) Koia, kapau ko te fafine vītua, logolā tona ʼaluʼaga faigataʼa kae neʼe haga kole aipē ki te tuʼi fakamāu pea mo ʼamanaki ʼe ina foaki age anai te meʼa ʼaē ʼe faitotonu, ʼe feafeaʼi age lā kiā tātou, ʼe tonu foki mo tātou ke tou haga tui ki te hoko moʼoni mai ʼo te ʼaho tautea ʼo Sehova!
18. ʼE fakaloto mālohiʼi feafeaʼi anai e te faikole tatatou tui pea mo tokoni mai ke tou maʼu ia te faitotonu?
18 Ko te lea fakatātā ʼo te fafine vītua ʼe ina akoʼi mai kiā tātou, ʼe ʼi ai te pikipikiga ʼa te faikole pea mo te tui, pea ʼe feala ki tatatou ʼu faikole tuʼumaʼu ke ina faka mālohiʼi tātou mokā hoko mai he ʼu meʼa ʼe natou fakavaivaiʼi tatatou tui. ʼE mole faka ʼuhiga leva, kapau ʼe tou fai he ʼu foʼi tuʼuga faikole, pea ʼe ko he puleʼaki moʼo puipui tatatou tui naʼa puli. (Mateo 6:7, 8) Kapau ʼe tou faikole heʼe tou mahino ʼe fakalogo kātoa totatou maʼuli ki te ʼAtua, pea ʼe tou fakaōvi anai ki te ʼAtua pea ʼe ina faka mālohiʼi tatatou tui. Pea ʼuhi heʼe tonu ke tou maʼu ia te tui ke feala ai hotatou haofaki, ʼe mole tou punamaʼuli ʼi te haga ʼa Sesu ʼo fakaloto mālohiʼi tana kau tisipulo ke natou “faikole tuʼumaʼu pea mo ʼaua naʼa natou fiu”! (Luka 18:1, MN; 2 Tesalonika 3:13) Kapau ʼe hoko mai “te ʼaho lahi ʼo Sehova” ʼe mole hoko ʼuhi ko tatatou ʼu faikole—heʼe hoko pē ia, tatau aipē peʼe tou faikole peʼe kailoa. Kae ko tatatou maʼu anai takitokotahi te faitotonu pea mo hao ʼi te tau ʼa te ʼAtua peʼe kailoa, ʼe fakalogo kātoa ki tatatou tui pea mo totatou faʼahiga maʼuli faitotonu ʼaki ʼatatou faikole.
19. ʼE tou fakahā feafeaʼi ʼe tou tui mālohi ko te ʼAtua ʼe ina ‘fai anai te fakamāu ʼaē ʼe totonu’?
19 ʼE tou manatuʼi, neʼe fehuʼi fēnei e Sesu: “Kā haʼu anai te Foha ʼo te tagata, ʼe ina maʼu moʼoni anai koa te tui [ʼaia] ʼi te kele?” Koteā te tali ki tana fehuʼi maʼuhiga ʼaia? ʼE tou fiafia heʼe ʼi te mālamanei kātoa ko te ʼu toko lauʼi miliona kaugana agatonu ʼa Sehova ʼi te temi nei ʼe natou fakahā ʼaki tanatou ʼu faikole, mo tanatou faʼa kātaki, pea mo tonatou loto ʼutaki, ʼe natou maʼu ia te taʼi tui ʼaia! Koia, ʼe feala ai ke tou tali ki te fehuʼi ʼa Sesu, ʼeī ʼe ina maʼu anai ia te taʼi tui ʼaia ʼi te kele. ʼEī, logolā te ʼu aga heʼe faitotonu ʼo te mālama ʼa Satana ʼaē ʼe tau mo tātou, kae ʼe tou tui mālohi ko te ʼAtua ‘ ʼe ina fai te fakamāu ʼaē ʼe totonu ki tana hahaʼi ʼaē kua [ina] fili.’
[Kiʼi nota]
a Ke tou mahino kātoa ki te maʼuhiga ʼo te lea fakatātā ʼaia, tou lau ia Luka 17:22-33. Kotou fakatokagaʼi te ʼu fakamahino ʼo ʼuhiga mo “te Foha o te tagata” ʼaē iā Luka 17:22, 24, 30 heʼe tou maʼu ai te tali ki te fehuʼi ʼaē neʼe lagaʼi iā Luka 18:8.
ʼE Kei Kotou Manatuʼi Koa?
• Koteā ʼaē neʼe tupu ai te puli ʼo te tui ʼa ʼihi ʼu Kilisitiano?
• He koʼē ʼe tonu ke tou maʼu he tui mālohi ki te hoko mai ʼo te ʼaho ʼo te tautea ʼa Sehova?
• Ko te ʼu tupuʼaga fea ʼaē ʼe tonu ai ke tou haga faikole?
• Kapau ʼe tou faikole tuʼumaʼu, pea ʼe tokoni feafeaʼi mai anai kiā tātou ke ʼaua naʼa puli ia tatatou tui?
[Paki ʼo te pasina 14]
Koteā ʼaē ʼe fakahā lelei ʼi te lea fakatātā ʼo te fafine vītua pea mo te tuʼi fakamāu?
[Paki ʼo te pasina 17]
ʼE tui mālohi te ʼu toko lauʼi miliona hahaʼi ko te ʼAtua ʼe ina ‘fai anai te fakamāu ʼaē ʼe totonu’