Kapite 94

Te ʼAoga ʼAē ʼo Te Faikole Pea Mo Te Agavaivai

KI MUʼA atu, ʼi tana kei nofo ʼaē ʼi Sutea, neʼe fai e Sesu te lea fakatātā ki te maʼuhiga ʼaē ʼo te haga faikole. ʼI tana ʼalu fakamuli leva ʼaenī ki Selusalemi, neʼe ina toe fakatokagaʼi te ʼaoga ʼaē ʼo te faikole tuʼumaʼu pea ʼaua naʼa kita fiu. ʼE mahino ia, ʼe kei nofo pe ʼi Samalia peʼe ʼi Kalilea ʼi tana fai age ki tana ʼu tisipulo te lea fakatātā ʼaenī:

“ ʼI he kolo neʼe ʼi ai he tuʼi fakamāu neʼe mole manavahe ia ki te ʼAtua pea neʼe mole fakaʼapaʼapa ki te tagata. Pea, ʼi te kolo ʼaia neʼe ʼi ai te fafine vitua neʼe ʼalu tuʼumaʼu ki ai, ʼo ʼui maʼana: ‘Fai ke ʼau maʼu he fakamāu ʼe totonu ki toku fili.’ Pea, ʼi he kiʼi temi neʼe mole loto ia kiai; kae ki muli age, neʼe ina ʼui fēnei: ‘Logope la taku mole manavahe ki te ʼAtua pea mo taku mole fakaʼapaʼapa ki te tagata, kae, ʼuhi ko te fakakinakina tuʼumaʼu ʼa te fafine vitua ʼaenī kia te ʼau, ʼe ʼau fai nei ke ina maʼu he fakamāu ʼe totonu, ke ʼaua naʼa haʼu tuʼumaʼu ia ʼo tukipalaʼi ʼau, ʼo aʼu ki tana fakamālohiʼi ʼau ke ʼau fai te meʼa ʼaē ʼe loto ia kiai.’ ”

Pea ʼe fakamahino mai leva e Sesu te ako ʼaē ʼe toʼo mai tana hisitolia: “Koutou fagono ki te meʼa ʼaē neʼe ʼui e te tuʼi fakamāu ʼaia, — ka neʼe ko te tagata heʼe faitotonu foki la ia! ʼE mole ʼapē fai anai koa ia e te ʼAtua te fakamāu ʼaē ʼe totonu ki tana kau fakanofo ʼaē ʼe kalaga ake kia te ia ʼi te ʼaho mo te po, tatau aipe peʼe ina faʼa kātakiʼi ia nātou?”

ʼAki te ʼu palalau ʼaia, neʼe mole ʼui ai ia e Sesu ʼe tatau ia Sehova ʼAtua mo te tuʼi fakamāu heʼe faitotonu ʼaia. Ka neʼe ina fakahā kapau ʼe tali e he tuʼi fakamāu heʼe faitotonu he ʼu kole fakamālohi, pea ʼe mole ʼi ai he mahalo ia ki te ʼAtua, ʼaē ʼe faitotonu pea mo agalelei, ʼe ina tali anai te ʼu faikole ʼa tana kau kaugana mokā ʼe nātou faikole tuʼumaʼu ʼo mole nātou fiu. Koia neʼe ina toe ʼui age ai: “ ʼE ʼau tala atu kia koutou: [ko te ʼAtua] ʼe ina fai anai he fakamāu ʼe totonu kia nātou ʼi te temi pe ʼaia.”

Ko te kau māsisiva pea mo te hahaʼi ʼaē ʼe liliki ʼe mole nātou maʼu tuʼumaʼu he fakamāu ʼe totonu, kae ʼe tautau fakakeheʼi pe te hahaʼi maʼu koloā pea mo maʼuhiga. Kae ki te ʼAtua, ʼe mole gata pe anai tana tokaga ʼaē ke maʼu e te kau agakovi he tautea ʼe totonu kae ʼe toe tokaga anai ʼo fai ki tana kau kaugana te meʼa ʼaē ʼe totonu, ʼo foaki kia nātou te maʼuli heʼegata. Kae ko te tokofia koa ʼaē ʼe nātou ʼiloʼi papau ko te ʼAtua ʼe ina fai age anai kia nātou he fakamāu ʼe totonu ʼi te temi pe ʼaia?

ʼI tana talanoa ki te tui ʼaē ki te mālohi ʼo te faikole, neʼe lagaʼi e Sesu te fehuʼi ʼaenī: “Ka haʼu anai te Foha ʼo te tagata, ʼe ina maʼu moʼoni anai koa te tui ʼi te kele?” Logope te tuku feiā ʼo te fehuʼi ʼo mole fai hona tali, ʼe feala pe ke tupu ai he manatu ʼe tokosiʼi te hahaʼi ʼaē ka nātou maʼu te taʼi tui ʼaia mokā haʼu anai ia Sesu ʼi te mālohi ʼo te Puleʼaga.

ʼI te hahaʼi ʼaē neʼe fagono kia Sesu, neʼe ʼi ai te hahaʼi neʼe lahi ʼaupito tonatou fia hā ʼuhi ko tanatou tui. Neʼe ʼui ia e nātou, ʼe nātou faitotonu pea mo nātou vaʼiganoaʼi niʼihi. E lagi neʼe kau ai ʼapē niʼihi ʼi te ʼu tisipulo ʼa Sesu. Koia neʼe fai ai e Sesu te lea fakatātā ʼaenī kia nātou fuli ʼaia:

“Ko tagata e lua neʼe hake ki te fale lotu ʼo faikole; ko te tahi neʼe ko te Faliseo, pea ko te tahi neʼe ko te tagata tānaki tukuhau. Neʼe tuʼu te Faliseo ʼi ʼoluga pea neʼe faikole ia ʼo fēnei ʼi tona loto: ‘Ê ʼAtua, ʼe ʼau fakafetaʼi kia te koe ʼi taku mole tatau mo te tahi ʼu tagata, ʼaē ʼe kaihaʼa, heʼe faitotonu, tono, peʼe ohage ko te tagata tānaki tukuhau ʼaenī. ʼE ʼau ʼaukai tuʼa lua ʼi te vāhaʼa, ʼe ʼau foaki te vaega hogofulu ʼo meʼa fuli ʼe ʼau maʼu.’ ”

Neʼe logona te kau Faliseo ʼuhi ko tanatou ʼu aga fakahāhā ʼaē ke fakatokagaʼi tanatou faitotonu. Ko tanatou agamāhani, ʼi te mōnite pea mo te felianima, ko te fai ʼo te ʼu ʼaukai ʼe nātou fakamaʼua pe kia nātou totonu pe. Pea, ʼe nātou totogi fakaleleiʼi te vaega hogofulu ʼo te ʼu kiʼi vao ʼo te ʼu gāueʼaga. ʼI he ʼu māhina ki muʼa atu, ʼi te lafeti ʼo te ʼu Tapenakulo, neʼe nātou fakahā fakalelei ai tanatou vaʼiganoaʼi te hahaʼi fakalogo, ʼo ʼui maʼa nātou: “Ko te hahaʼi ʼaenī ʼe mole nātou ʼiloʼi te Lao [te fakamahino ʼaē ʼe fai kiai e te kau Faliseo], ko te kau malaʼia.”

ʼI te hoko atu ʼo tana lea fakatātā, neʼe palalau ia Sesu ki he tahi ʼi te kau “malaʼia” ʼaia: “Ko te tagata tānaki tukuhau, ʼi tana tuʼu mamaʼo, neʼe mole fia hiki ake ʼona mata ki te lagi, ka neʼe tuki fatafata ia, ʼo ʼui maʼana: ‘Ê ʼAtua, ke ke manavaʼofa mai kia te ʼau, ʼaē ko he tagata agahala!’ ” Ko te tagata tānaki tukuhau ʼaia neʼe ina ʼiloʼi tana ʼu hala ʼaki te agavaivai. Koia neʼe ʼui ai e Sesu: “ ʼE ʼau tala atu kia koutou: Ko ia nei neʼe toe hifo ia ki tona ʼapi ʼo hā mai ia ʼe faitotonu age ia ʼi ʼaē; heʼe ko te tagata fuli pe ʼe ina hiki ia ia ki ʼoluga ʼe fakamālaloʼi anai ia, kae ko ʼaē ʼe ina fakamālaloʼi ia ia ʼe hiki anai ia ki ʼoluga.”

Koia, neʼe toe fakamahino e Sesu te ʼaoga ʼaē ʼo te agavaivai. ʼE mole tou punamaʼuli ʼi te toe fakakau ʼo te kau tisipulo ʼa Sesu ʼi te hahaʼi ʼaē ʼe fai kiai te ʼu palalau mokā ʼe tou ʼiloʼi te agaaga ʼo te ʼu faʼahiga meʼa ʼaē neʼe nātou lahilahi ake ai: ko te kau Faliseo, ʼaē ʼe nātou ʼui pe ʼe nātou faitotonu, neʼe mālohi ʼaupito ʼonatou tonu; pea ko te sosiete ʼo te temi ʼaia, ʼe ina faka maʼuhigaʼi tuʼumaʼu pe te maʼu koloā pea mo te tuʼulaga. Kae ʼi ʼu ako matamatalelei leva ʼo te agavaivai ʼaenī ʼe tuku mai e Sesu ʼi henī! Luka 18:1-14; Soane 7:49.

▪ He koʼe neʼe tali e te tuʼi fakamāu heʼe faitotonu te kole ʼa te fafine vitua, pea koteā te ako ʼe tou maʼu mai ʼi te lea fakatātā ʼa Sesu?

▪ Ka haʼu anai ia, ko te tui feafeaʼi ʼaē ka kumi anai e Sesu?

▪ Ko ai ʼaē neʼe fai ki ai e Sesu te lea fakatātā ʼaē ʼo te Faliseo pea mo te tagata tānaki tukuhau?

▪ Ko te faʼahiga fakakaukau fea ʼa te kau Faliseo ʼaē ʼe mole tonu ke tou maʼu?