Te ʼu Faʼahi ʼe Lua ʼe ʼAoga: Te Faikole Mo Te Agavaivai

Neʼe kua ʼosi fai e Sesu ki ʼana tisipulo he lea fakatata ʼo ʼuhiga mo te haga faikole. (Luka 11:5-13) ʼE lagi nofo nei ʼi Samalia peʼe ʼi Kalilea, pea neʼe ina toe fakamaʼuhigaʼi te ʼaoga ʼae ke ʼaua naʼa natou lotovaivai ʼi te faikole. Neʼe ina fakaha te faʼahi ʼaia ʼaki te lea fakatata ʼaeni:

“ ʼI te tahi kolo, neʼe ʼi ai te tuʼi fakamau neʼe mole manavasiʼi ia ki te ʼAtua pea neʼe mole fakaʼapaʼapa ia ki te tagata. ʼI te kolo ʼaia, neʼe toe ʼi ai foki mo te fafine vitua neʼe tatuʼu age kia ia pea mo ina ui fenei age: ‘Haofaki au mai toku fili ʼi te fakamau.’ ʼI he temi loaloaga neʼe mole loto ia ki ai. Kaʼe ki muli age, neʼe fakakaukau fenei: ‘Logo la ʼe mole au manavasiʼi ki te ʼAtua pea mo fakaʼapaʼapa ki te tagata, kaʼe ʼuhi ko te haga fakakinakinaʼi au e te fafine vitua ʼaeni, ʼe au haofaki anai ia ia ʼi te fakamau. Pea ʼe tuku ai anai tana tatuʼu mai ʼo fakakinakinaʼi au mo tana kole.’ ”—Luka 18:2-5.

Neʼe fakaha e Sesu te ako mai ai, ʼo ina ui fenei: “Kotou tokagaʼi te ʼu palalau ʼae neʼe fai e te tuʼi fakamau, logo la ʼe ko he tagata heʼe faitotonu! Pea ʼe mahino papau ia, ʼe fakahoko anai e te ʼAtua ia tana faitotonu kia natou ʼae neʼe ina filifili pea ʼe natou kalaga kia te ia ʼi te ʼaho mo te po, ʼi te temi ʼae ʼe faʼa kataki ai kia natou.” (Luka 18:6, 7) Kotea ʼae neʼe fakaha ai e Sesu ʼo ʼuhiga mo tana Tamai?

ʼE mahino ia, neʼe mole fia ui e Sesu ko Sehova ʼAtua ʼe hage ko te tuʼi fakamau heʼe faitotonu. Kaʼe ʼi tana talanoa ki te tagata ʼaia, neʼe ina fia fakaha te manatu ʼaeni: Kapau neʼe tali e he tuʼi fakamau heʼe faitotonu ki te haga kole ʼa te fafine vitua, ʼe tonu ke tou tui papau ʼe toe fai feia anai te ʼAtua. ʼE faitotonu pea mo agalelei, pea ʼe tali anai ki tana hahaʼi mo kapau ʼe mole natou lotovaivai ʼi te faikole. ʼE tou tokagaʼi te manatu ʼaia ʼi te hoko atu fenei e Sesu: “ ʼE au tala atu kia koutou, ʼe ina [te ʼAtua] fakahoko atu aipe anai kia natou ia te faitotonu.”—Luka 18:8.

ʼI te agamahani, ʼe mole fakahoko te faitotonu ki te hahaʼi malalo pea mo te kau masisiva, kaʼe ʼe fakahoko pe ia ki te kau takitaki pea mo natou ʼae ʼe maʼu koloa. Kaʼe ʼe mole feia te ʼAtua. ʼI tona temi totonu, ʼe tokaga anai ke tauteaʼi te kau agakovi pea ke foaki ki ʼana kaugana te maʼuli heʼe gata.

Ko ai ʼae ʼe tui ohage ko te fafine vitua? Ko te tokofia ʼae ʼe tui moʼoni ʼe “fakahoko atu aipe anai kia natou [e te ʼAtua] ia te faitotonu”? Neʼe hoki fai age pe e Sesu te lea fakatata ʼo ʼuhiga mo te ʼaoga ʼae ke haga faikole. Pea ʼo ʼuhiga leva mo he tahi ʼe tui ʼe tali anai e te ʼAtua ki ʼana faikole, neʼe ina fai ia te fehuʼi ʼaeni: “Ka haʼu ia te Foha ʼo te tagata, ʼe ina maʼu moʼoni anai koa ia te faʼahiga tui [ʼaia] ʼi te kele?” (Luka 18:8) Neʼe ina fakaha ai ʼe tokosiʼi anai te hahaʼi ʼae ka natou maʼu te faʼahiga tui ʼaia ʼi te temi ʼae ʼe haʼu ai ia Kilisito.

Ko ʼihi ʼae neʼe fagono kia Sesu, neʼe natou fiameʼameʼa fau ʼo ʼuhiga mo tanatou tui. Neʼe falala pe natou ki tanatou faitotonu pea neʼe natou meʼa noaʼi ʼihi. Neʼe fai e Sesu kia natou te lea fakatata ʼaeni:

“Neʼe olo te ʼu tagata ʼe toko lua ki te fale lotu ʼo faikole, neʼe ko te Faliseo pea mo te tagata tanaki tukuhau. Neʼe tuʼu ia te Faliseo pea mo faikole fenei: ‘E ʼAtua, ʼe au fakamalō atu ʼi taku mole hage ko te hahaʼi ʼae, ia te kau kaihaʼa, mo te kau heʼe faitotonu, mo te kau tono, ʼo feia mo te tagata tanaki tukuhau ʼaeni. Kaʼe ʼe au sesunio tuʼa lua ʼi te vahaʼa, mo foaki te vahe hogofulu ʼo te ʼu meʼa fuli ʼae ʼe au maʼu.’ ”—Luka 18:10-12.

Neʼe iloʼi lelei te fia fakahaha e te kau Faliseo ki te hahaʼi ʼe natou faitotonu. Neʼe natou fai te faʼahi ʼaia, he neʼe natou loto ke vikiʼi natou. Koia, ko te ʼu sesunio ʼae neʼe natou fakamaʼua ke fai e natou totonu, neʼe natou fai mahani ʼi te ʼu Monite mo te ʼu Felianima, he neʼe hahaʼi ai te ʼu fakatauʼaga meʼa, pea neʼe feala ke sioʼi natou e te hahaʼi kaugā malie. Pea neʼe natou tokakaga fakalelei ke natou totogi te vahe hogofulu ʼo te ʼu kiʼi ʼakau. (Luka 11:42) ʼI he ʼu mahina ki muʼa atu, neʼe natou fakaha tanatou fehihiʼa ki te hahaʼi malalo, ʼi tanatou ui fenei: “Ko te hahaʼi ʼaena, ʼae ʼe mole natou iloʼi te Lao [ʼo mulimuli ki te manatu ʼa te kau Faliseo], ʼe ko te kau malaʼia.”—Soane 7:49.

Neʼe hoko atu fenei e Sesu ia tana lea fakatata: “Kaʼe ko te tagata tanaki tukuhau neʼe tuʼu ia mai mamaʼo, pea neʼe mole ina fia hiki ake pe la ʼona mata ki te lagi. Neʼe tuki fatafata ʼo ina ui fenei: ‘E ʼAtua, ko au ko he tagata agahala, ke ke manavaʼofa mai kia au.’ ” ’Ei, ʼaki he agavaivai neʼe mahino te tagata tanaki tukuhau neʼe ʼi ai ʼona vaivaiʼaga. Neʼe fakaʼosi fenei e Sesu: “ ʼE au tala atu kia koutou, neʼe hifo te tagata ʼaeni ki tona ʼapi kua faitotonu age ia ʼi te Faliseo. Koteʼuhi ko ʼae ʼe ina hikihiki ia ia ʼe fakamalaloʼi anai ia, pea ko ʼae ʼe fia malalo ʼe hikihiki anai ia.”—Luka 18:13, 14.

Neʼe fakaha lelei ai e Sesu te ʼaoga ʼae ke agavaivai. Neʼe ʼaoga te tokoni ʼaia ki ʼana tisipulo, koteʼuhi talu mai tanatou kei liliki, neʼe fakamaʼuhigaʼi te maʼu tuʼulaga e te kau Faliseo ʼae neʼe natou manatu ʼe natou faitotonu. Pea ʼe ko he tokoni maʼuhiga ki te kau tisipulo fuli ʼa Sesu.