Ke Ke Aga Fakapotopoto ʼo Ke Fai Fakatomuʼa He ʼu Fakatuʼutuʼu

Neʼe hoki ʼosi age pe te fakamatala e Sesu te lea fakatata ʼo te foha ʼae neʼe puli ki te kau tanaki tukuhau, mo te kau sekelipa pea mo te kau Faliseo. ʼAki te lea fakatata ʼaia, neʼe tonu ke natou mahino ki te lotolelei ʼa te ʼAtua ke fakamolemole kia natou ʼae neʼe agahala kaʼe kua fakahemala. (Luka 15:1-7, 11) Neʼe palalau leva ia Sesu ki ʼana tisipulo. Neʼe ina fai te tahi age lea fakatata ʼo ʼuhiga mo he tagata maʼu koloa neʼe logo neʼe agakaka tana tagata tauhi ʼapi.

Neʼe fakamatala e Sesu neʼe tukugakoviʼi ia te tagata tauhi ʼapi he neʼe mole tokaga lelei ki te ʼu koloa ʼo tona pule. Koia neʼe ui e te pule ʼe fakamavae anai te tagata tauhi ʼapi. Neʼe feuiʼaki fenei e te tagata tauhi ʼapi: “Kotea ʼae ka au fai anai, koteʼuhi ʼe fakamavae au e toku pule ʼi taku gaue? ʼE mole feʼauga toku malohi ke au gaue kele pea ʼe au ufiufi ʼi te kolekole.” Koia, moʼo tauʼi te ʼu fihifihia ʼae ka tau mo ia, neʼe fakakaukau fenei: “ ʼE au iloʼi te meʼa ʼae ka au fai, ke tali au e te hahaʼi ʼi ʼonatou ʼapi moka fakamavae au ʼi taku gaue tauhi ʼapi.” Pea neʼe ina pauʼi atu aipe ia natou takitahi ʼae neʼe tuʼu maʼua ki tona pule, ʼo ina fehuʼi fenei age: “ ʼE fia tou maʼua ki toku pule?”—Luka 16:3-5.

Neʼe tali fenei age e te ʼuluaki: “Ko fua lolo oliveto ʼe 100.” Ko tona fakaʼuhiga, ko lite lolo ʼe 2 200. Ko te tagata ʼaia ʼae neʼe tuʼu maʼua neʼe lagi ʼi ai hana gaueʼaga oliveto pe neʼe ina fakatau te lolo. Neʼe ui fenei e te tagata tauhi ʼapi kia ia: “Toʼo tau pepa maʼua pea ke heka ʼo tohi fakavilivili 50 [peʼe ko lite lolo ʼe 1 100].”—Luka 16:6.

Neʼe fehuʼi fenei e te tagata tauhi ʼapi ki te tahi age: “Kaʼe kia koe ʼe fia tou maʼua?” Neʼe ina tali fenei age: “Ko fua fulumeto ʼe 100.” Ko tona fakaʼuhiga, ko lite ʼe 22 000. Neʼe ui fenei e te tagata tauhi ʼapi ki te tagata ʼae neʼe tuʼu maʼua: “Toʼo tau pepa maʼua ʼo tohi 80.” Neʼe ina fakahifo lahi ai tona maʼua.—Luka 16:7.

Neʼe kei tokaga te tagata tauhi ʼapi ki te ʼu koloa ʼo tona pule, koia neʼe kei gafua pe ke ina fakahifo te ʼu maʼua ʼae neʼe tonu ke huʼi e te ʼu tagata ʼaia ki tona pule. ʼI te fakahifo e te tagata tauhi ʼapi te ʼu maʼua, neʼe ina maʼu ai hona ʼu kaumeʼa neʼe feala ke natou tokoni kia ia ʼi tona ʼosi fakamavae ʼi tana gaue.

Pea neʼe iloʼi leva e te pule te meʼa ʼae neʼe hoko. Logo la neʼe puli tana falā, kaʼe neʼe punamaʼuli ʼi te meʼa ʼae neʼe fai e te tagata tauhi ʼapi, pea neʼe ina vikiʼi ia ia he ʼe “logope la tona heʼe faitotonu,” kaʼe “neʼe aga fakapotopoto.” Neʼe hoko atu fenei e Sesu: “Ko te ʼu foha ʼo te tuʼu ʼo te ʼu faʼahiga meʼa ʼaeni ʼe natou aga fakapotopoto age natou mo tonatou taʼiake totonu ia natou ʼae ʼe fakamalamaʼi e te ʼAtua.”—Luka 16:8.

Neʼe mole tali e Sesu te ʼu faʼahiga fai ʼa te tagata tauhi ʼapi, pea neʼe mole ina fakalotomalohiʼi te aga fakakaka ʼi te gaue. Kaʼe kotea te manatu ʼae neʼe fia fakaha e Sesu? Neʼe ina uga fenei te ʼu tisipulo: “Kotou maʼu hokotou ʼu kaumeʼa ʼaki te ʼu koloa heʼe faitotonu, feia la ka puli, pea ʼe tali anai koutou e te ʼu kaumeʼa ʼaia ʼi te ʼu nofoʼaga heʼe gata.” (Luka 16:9) ʼEi, neʼe fakaha e Sesu te ʼaoga ʼae ke fai e ʼana tisipulo he ʼu fakatuʼutuʼu fakatomuʼa pea mo natou aga fakapotopoto. Ko te ʼu kaugana ʼa te ʼAtua, “natou ʼae ʼe fakamalamaʼi e te ʼAtua,” ʼe tonu ke natou fakaʼaogaʼi fakapotopoto ʼonatou koloa, ʼo natou manatuʼi te maʼuli heʼe gata ʼae ka natou maʼu anai.

ʼE gata pe kia Sehova ʼAtua pea mo tona ʼAlo ʼe feala ke nā tali he tahi ʼi te Puleʼaga ʼae ʼi selo peʼe ʼi te Palatiso ʼi te kele ʼae ka puleʼi e te Puleʼaga ʼaia. Koia, ʼe tonu ke tou faiga malohi ke tou liliu ko he ʼu kaumeʼa ʼo Sehova pea mo Sesu, ʼo tou fakaʼaogaʼi ʼotatou koloa moʼo lagolago ki te ʼu gaue ʼo te Puleʼaga. Tatau aipe pe ʼe puli te aulo, mo te siliva pea mo te tahi age ʼu koloa, ʼe tou falala ʼe tou maʼu anai te maʼuli heʼe gata.

Neʼe toe ui e Sesu ko natou ʼae ʼe agatonu pea natou tokakaga mo fakaʼaogaʼi he falā peʼe ko he ʼu koloa, ʼe natou agatonu anai moka natou tokakaga ki he ʼu meʼa ʼe maʼuhiga age. Neʼe ui fenei e Sesu: “Koia, kapau ʼe mole kotou fakaʼaogaʼi te ʼu koloa heʼe faitotonu ʼaki he agatonu, ko ai koa ʼae ka ina tuku atu anai te ʼu koloa moʼoni [ohage la ko te ʼu gaue ʼo te Puleʼaga]?”—Luka 16:11.

Koia neʼe fakaha e Sesu ke tali ʼana tisipulo “ ʼi te ʼu nofoʼaga heʼe gata,” ʼe tonu ke natou agatonu. ʼE mole feala ke kaugana he tahi ki te ʼAtua pea toe kaugana ki te ʼu koloa heʼe faitotonu. Neʼe fakaʼosi fenei e Sesu: “ ʼE mole feala ke kaugana he tahi ki he ʼu pule ʼe toko lua. Koteʼuhi ʼe fehiʼa anai ki te tahi kaʼe ʼofa ia ki te tahi, peʼe pipiki anai ki te tahi kaʼe ina meʼa noaʼi te tahi. ʼE mole feala ke kotou kaugana ki te ʼAtua pea mo te Paʼaga.”—Luka 16:9, 13.