Te Lautohi ʼAe ʼe Totonu

1 Timoteo 4:13

TE MANATU ʼAE KE TAʼOFI: Lau leʼo lahi pea mo lau fakalelei te ʼu meʼa ʼae ʼe tohi.

TONA FAʼAHIGA FAI:

• Teuteuʼi lelei. Fakakaukauʼi te ʼu tupuʼaga ʼae neʼe tohi ai te koga tohi ʼaia. ʼAua naʼa ke lau pe te ʼu kupu takitahi, kae ke ke akoako te lau fakatahi ʼo te ʼu kupu. Tokaga naʼa ke hilifaki he tahi age ʼu kupu, peʼe ke galoʼi, peʼe ke fetogi te ʼu kupu. Ke ke tokagaʼi te ʼu fakailoga fuli ʼae ʼe tonu ke ke tuʼu ai, peʼe ke manava ai, peʼe moka ko he fehuʼi, peʼe ko ʼihi atu fakailoga.

• Puʼaki fakalelei te ʼu kupu fuli. Kapau ʼe mole ke iloʼi te faʼahiga puʼaki ʼo he kupu, ke ke fakalogo te lau ʼo te tohi ʼae neʼe puke, peʼe ke kole ki he tahi ʼe lautohi lelei. Pea ke ke lau liuliuga leva mo leʼo lahi te ʼu kupu ʼo kaku ki tau hoki puʼaki lelei.

• Palalau ke matala lelei. Ke ke avahi lelei tou gutu pea ʼaua naʼa ke palalau punou. Tokaga ʼo puʼaki lelei te ʼu kupu.