Tou Ako Ke Tou ʼIloʼi Te ʼu Ala ʼa Sehova
“Fakahā mai tou ʼu ala, . . . ke feala ai haku ʼiloʼi koe.”—Ekesote 33:13.
1, 2. (a) He koʼe neʼe malave kiā Moisese tana sio ʼaē ki te gaohi koviʼi e te tagata Esipito ia te tagata Hepeleo? (b) Koteā ʼaē neʼe maʼua ke ako e Moisese ke feala hana fakahoko fakalelei tana tauhi kiā Sehova?
NEʼE lahilahi ake ia Moisese ʼi te ʼapi ʼo Falaone pea neʼe akoʼi age kiā ia te poto ʼaē neʼe maʼuhiga ki te kau ʼaliki ʼo Esipito. Kae neʼe iloʼi e Moisese ʼe ko ia ʼe mole ko he tagata Esipito. Ko tana ʼu mātuʼa neʼe ko te ʼu Hepeleo. ʼI tona taʼu 40, neʼe ʼalu ʼo fakasiosio tona ʼu tēhina, te ʼu foha ʼo Iselaele. ʼI tana sio ki te gaohi koviʼi e te tagata Esipito te tahi Hepeleo, neʼe malave kiā Moisese, pea neʼe ina matehi te tagata Esipito. Neʼe fili e Moisese ke kau mo te hahaʼi ʼa Sehova pea neʼe manatu ia neʼe fakaʼaogaʼi ia ia e te ʼAtua moʼo faka ʼāteaina tona ʼu tēhina. (Gaue 7:21-25; Hepeleo 11:24, 25) ʼI te ʼiloʼi ʼo te meʼa ʼaē neʼe hoko, neʼe liliu ia Moisese kiā mata ʼo te kau ʼaliki ko he tahi neʼe fakafeagai, pea neʼe tonu ke hola moʼo hāofaki tona maʼuli. (Ekesote 2:11-15) Kapau neʼe tonu ke fakaʼaogaʼi e te ʼAtua ia Moisese, pea neʼe tonu ke ina toe ʼiloʼi lelei age te ʼu ala ʼa Sehova. Neʼe tali koa e Moisese ke akoʼi ia ia?—Pesalemo 25:9.
2 ʼI te ʼu taʼu e 40 ki muli age, neʼe maʼuli ia Moisese ʼi te tahi fenua pea neʼe liliu ko he tagata tauhi ōvi. Neʼe mole ina taupau he lotomamahi, ʼi te hage ʼaē neʼe mole faka maʼuhigaʼi ia ia e tona ʼu tēhina Hepeleo. Kae neʼe fakalogo pe ki te meʼa ʼaē neʼe tuku e te ʼAtua ke hoko kiā ia. Logola neʼe fakalaka ni ʼu taʼu pea mo tona mole faka maʼuhigaʼi, kae neʼe tuku e Moisese ke akoʼi ia ia e Sehova. ʼAki te takitaki ʼo te laumālie ʼa te ʼAtua, kae mole ko tana manatu tokotahi, neʼe ina tohi fēnei ki muli age: “Ko te tagata ko Moisese neʼe lahi tokotahi tana agavaivai ʼi te ʼu tagata fuli ʼaē neʼe māʼuʼuli ʼi te fuga kele.” (Faka au 12:3) Neʼe fakaʼaogaʼi e Sehova ia Moisese ke ina fakahoko he ʼu gāue lahi. Kapau ʼe tou kumi mo tatou te agavaivai, pea ʼe tapuakina anai tatou e Sehova.—Sofonia 2:3.
Neʼe Foaki Age Tana Gāue
3, 4. (a) Koteā te gāue neʼe foaki e Sehova kiā Moisese? (b) Ko ai ʼaē neʼe tokoni kiā Moisese?
3 ʼI te tahi ʼaho, ko te ʼāselo ʼaē neʼe ina fakafofoga ia Sehova, neʼe palalau kiā Moisese ʼi te Fenua ʼo Sinai, ʼaē ʼe ōvi age ki te Moʼuga ʼo Holepe. Neʼe ina ʼui fēnei kiā Moisese: “Neʼe au sio moʼoni ki te mamahi ʼo taku hahaʼi ʼi Esipito, pea neʼe au logo ki tanatou ʼu tagi mamahi ʼuhi ko nātou ʼaē ʼe nātou fakagāueʼi kinakina nātou, heʼe au ʼiloʼi lelei te ʼu mamahi ʼaē ʼe fai kiā nātou. ʼE au hifo moʼo hāofaki ʼo nātou mai te kau Esipito pea mo fakahake ia nātou ki he fenua lelei pea mo lahi, ki he fenua ʼe tafe ai te huʼa pipi pea mo te meli.” (Ekesote 3:2, 7, 8) ʼO ʼuhiga mo te faʼahi ʼaia, neʼe foaki e te ʼAtua te gāue kiā Moisese, kae neʼe tonu ke ina fakahoko ʼo mulimuli ki te ala ʼa Sehova.
4 Neʼe hoko atu fēnei e te ʼāselo ʼa Sehova: “ ʼI te temi nei, haʼu, ke au fekauʼi koe kiā Falaone pea mo ke fakamavae mai Esipito taku hahaʼi, ia te ʼu foha ʼo Iselaele.” Neʼe mole faʼa tali e Moisese, heʼe ʼi tana manatu ʼe mole feala hana fakahoko te gāue ʼaia, pea neʼe mole feala ke ina fakahoko tokotahi. Kae neʼe fakapapau fēnei e Sehova kiā Moisese: “ ʼE au nofo anai mo koe.” (Ekesote 3:10-12) Neʼe foaki e Sehova kiā Moisese te mālohi ke ina fakahoko he ʼu milakulo moʼo fakamoʼoni neʼe ko te ʼAtua ʼaē neʼe ina fekauʼi moʼoni ia ia. Ko te tēhina ʼo Moisese, ko Alone, neʼe tonu ke nā kaugā ʼolo moʼo fakahoko lea. Neʼe akoʼi age e Sehova kiā nāua te ʼu palalau pea mo te ʼu gāue ʼaē neʼe tonu ke nā fai. (Ekesote 4:1-17) Neʼe agatonu koa Moisese ʼi tana fakahoko te gāue ʼaia?
5. He koʼe ko te aga ʼa te kau Iselaele neʼe ko he meʼa faigataʼa kiā Moisese?
5 ʼI te kamata, ko te ʼu mātuʼa ʼo Iselaele neʼe nātou tui kiā Moisese pea mo Alone. (Ekesote 4:29-31) Kae mole fualoa, pea ko “te ʼu pule ʼo te ʼu foha ʼo Iselaele” neʼe nātou ʼui ʼe tupu ko Moisese pea mo tona tēhina ʼaē kua nātou liliu ai ko he “ ʼaele fakalialia” kiā Falaone pea mo tona ʼu kaugana. (Ekesote 5:19-21; 6:9) ʼI te temi ʼaē neʼe mavae ai te kau Iselaele mai Esipito, neʼe nātou mātataku ʼi tanatou sisio ʼaē ki te tuli nātou e te ʼu saliote ʼo Esipito. Neʼe manatu e te kau Iselaele neʼe nātou tō ki te hele, he neʼe tuʼu te Tai Kula ʼi ʼonatou muʼa pea mai muli neʼe ko te ʼu saliote tau, pea nātou meo ai kiā Moisese. E feafeaʼi ʼapē mo kanapaula neʼe fai te meo ʼaia kiā koutou? Logola neʼe mole he ʼu vaka ʼa te kau Iselaele, kae ʼi te fakatotonu age ʼa Sehova, neʼe fakatotonu e Moisese ki te hahaʼi ke nātou teuteu ke nātou mavae. Neʼe ʼavahi e te ʼAtua te Tai Kula, ʼo feala ai ki te kau Iselaele ke nātou fakalaka ʼi te kele moamoa.—Ekesote 14:1-22.
He Faʼahi ʼe Maʼuhiga Age ʼi Te Faka ʼĀteaina
6. Koteā ʼaē neʼe faka maʼuhigaʼi e Sehova ʼi tana fekauʼi ʼaē ia Moisese?
6 ʼI te fekauʼi ʼaē e Sehova ia Moisese, neʼe ina faka maʼuhigaʼi tona huafa fakaʼatua. Neʼe maʼuhiga ʼaupito ke fakaʼapaʼapaʼi ia Sehova pea mo tona huafa. Neʼe fai e Moisese tana fehuʼi ʼo ʼuhiga mo tona huafa, pea neʼe tali fēnei age e Sehova: “ ʼE au fakahā anai pe ko ai ia au.” Pea neʼe tonu ke toe ʼui fēnei e Moisese ki te ʼu foha ʼo Iselaele: “Ko Sehova, te ʼAtua ʼo takotou ʼu kui, te ʼAtua ʼo Apalahamo, te ʼAtua ʼo Isaake pea mo te ʼAtua ʼo Sakopo, neʼe ina fekauʼi mai au kiā koutou.” Pea neʼe toe ʼui fēnei e Sehova: “Koʼena toku huafa ʼo aʼu ki he ʼu temi ʼe mole ʼiloʼi hona gataʼaga, pea koʼena te fakamanatu kiā te au ʼi he taʼiake ki te tahi taʼiake.” (Ekesote 3:13-15) Ko te ʼAtua neʼe ina fakahā ki tana kau kaugana ʼi te kele kātoa ʼe ko tona huafa pe ʼaia ko Sehova.—Isaia 12:4, 5; 43:10-12.
7. Koteā ʼaē neʼe fakatotonu e te ʼAtua ke fai e Moisese, logola te fiatuʼu ʼa Falaone?
7 ʼI tanā hā iā muʼa ʼo Falaone, neʼe fakahā age e Moisese pea mo Alone tanā logo ʼaki te huafa ʼo Sehova. Kae neʼe fiatuʼu ia Falaone ʼo ina ʼui fēnei: “Ko ai ia Sehova ke au fakalogo ki tona leʼo ʼo fakamavae ia Iselaele? ʼE mole au ʼiloʼi ia Sehova pea tahi ʼaē meʼa, ʼe mole au fakamavae anai ia Iselaele.” (Ekesote 5:1, 2) Neʼe fakahā e Falaone tana loto fefeka pea mo tana agakākā, kae neʼe fakatotonu e Sehova kiā Moisese ke ʼalu putuputu kiā Falaone ʼo tala age te ʼu logo. (Ekesote 7:14-16, 20-23; 8:1, 2, 20) Neʼe sio ia Moisese ki te ʼita ʼa Falaone. ʼE fua lelei anai koa tana ʼalu putuputu ʼaia kiā Falaone? Neʼe loto ʼaupito e Iselaele ke faka ʼāteaina nātou mai Esipito, kae neʼe fakafisi mālohi ki ai ia Falaone. Kapau la neʼe ko koutou ia Moisese, koteā ʼanai te meʼa ʼaē ka koutou fai?
8. Koteā te lelei ʼaē neʼe maʼu mai te tautea ʼaē neʼe fai e Sehova kiā Falaone, pea ʼe tonu ke malave feafeaʼi kiā tatou?
8 Neʼe toe tala e Moisese te tahi logo, ʼo ina ʼui fēnei: “Koʼeni te meʼa ʼaē neʼe ʼui e Sehova te ʼAtua ʼo te kau Hepeleo: ‘Fakamavae taku hahaʼi ke nātou tauhi kiā te au.’ ” Neʼe toe ʼui fēnei e te ʼAtua: “Neʼe kua feala pe haku fakaōvi atu toku nima moʼo fakatūʼā ia koe pea mo tau hahaʼi ʼaki te papala, ke ke puli ai ʼi te kele. Kae neʼe au tuku koe ke ke maʼuli ʼuhi ko te faʼahi ʼaenī: ke ke sio ki toku mālohi pea ke kalagaʼi toku huafa ʼi te kele kātoa.” (Ekesote 9:13-16) ʼI tana tauteaʼi ia Falaone ʼaē neʼe loto fefeka, neʼe fakatuʼutuʼu e Sehova ke ina fakahā tona mālohi moʼo fakatokaga kiā nātou fuli ʼaē ʼe fia fakafeagai kiā te ia. ʼE kau ia nātou ʼaia ia Satana te Tevolo, ʼaē neʼe fakahigoaʼi ki muli age e Sesu Kilisito ko “te pule o te malama-nei.” (Soane 14:30; Loma 9:17-24) Ohage ko tona fakakikite, neʼe tala te huafa ʼo Sehova ʼi te kele kātoa. ʼI tana kātakiʼi fualoa, neʼe feala ai ke hāofaki te kau Iselaele pea mo te hahaʼi kaugamālie kehekehe ʼaē neʼe fakatahi kiā nātou moʼo tauhi kiā Sehova. (Ekesote 9:20, 21; 12:37, 38) Talu mai ai, ko te tala ʼo te huafa ʼo Sehova neʼe fua lelei ki te tahi ʼu lauʼi miliona hahaʼi ʼaē neʼe nātou tali te tauhi moʼoni.
Te Aga ʼAē Neʼe Tonu Ke Fai Ki Te Hahaʼi ʼUigataʼa
9. Neʼe fakahā feafeaʼi e te hahaʼi ʼa Moisese tanatou mole fakaʼapaʼapa kiā Sehova?
9 Neʼe ʼiloʼi e te kau Hepeleo te huafa ʼo te ʼAtua. Neʼe fakaʼaogaʼi e Moisese te huafa ʼaia ʼi tana palalau kiā nātou, kae neʼe mole nātou fakahā tuʼumaʼu he fakaʼapaʼapa kiā Sehova. Mole fualoa ʼi te ʼosi faka ʼāteainaʼi faka milakulo e Sehova te kau Iselaele mai Esipito, koteā ʼaē neʼe hoko ʼi te mole foaki fakavilivili age kiā nātou hanatou moʼi vai? Neʼe nātou muhumuhu kiā Moisese. Ki muli age, neʼe nātou meo ʼo ʼuhiga mo te meʼa kai. Neʼe fakatokagaʼi age kiā nātou e Moisese ʼe mole nātou muhumuhu pe kiā ia pea mo Alone, kae ʼe nātou toe muhumuhu foki kiā Sehova. (Ekesote 15:22-24; 16:2-12) ʼI te Moʼuga ʼo Sinai, neʼe foaki e Sehova ki te kau Iselaele te Lao pea neʼe hoko ai mo te ʼu meʼa fakaofoofo. Kae neʼe faʼu e te kau Iselaele he pipi aulo ke nātou tauhi kiai, ʼo nātou ʼui ʼe ko “he ʼaho fakafiafia kiā Sehova.”—Ekesote 32:1-9.
10. He koʼe ko te kole ʼaē neʼe fai e Moisese iā Ekesote 33:13 ʼe maʼuhiga ki te kau tagata taupau ia ʼaho nei?
10 Koteā ʼaē neʼe tonu ke fai e Moisese ʼo ʼuhiga mo te hahaʼi ʼaia ʼaē neʼe ʼui e Sehova ʼe fefeka tonatou kia? Neʼe kole fēnei e Moisese kiā Sehova: “Fakalelei siʼi ou loto, kapau ʼe ke ʼofa kiā au, fakahā mai tou ʼu ala, fakalelei siʼi ou loto, ke feala ai haku ʼiloʼi koe, koteʼuhi ke ke ʼofa kiā au.” (Ekesote 33:13) ʼI tanatou leʼoleʼo ia te kau Fakamoʼoni ʼa Sehova ʼi totatou temi, ko te kau tagata taupau Kilisitiano ʼe nātou tauhi te ʼu ōvi ʼe nātou agavaivai age ʼi te kau Iselaele. Kae ʼe nātou toe faikole fēnei: “Fakahā mai kiā te au tou ʼu ala, Ê Sehova! Akoʼi mai kiā te au tou ʼu haʼeleʼaga.” (Pesalemo 25:4) Ko te ʼiloʼi e te kau tagata taupau te ʼu ala ʼa Sehova ʼe feala ai hanatou fakatokatoka he ʼu ʼaluʼaga ʼe feala ke hoko, ʼo nātou mulimuli ki te Folafola ʼa te ʼAtua pea mo tona ʼulugaaga.
Te ʼu Fakamaʼua ʼa Sehova Ki Tana Hahaʼi
11. Koteā te ʼu fakatotonu neʼe foaki e Sehova kiā Moisese, pea he koʼe ʼe tou fia ʼiloʼi te ʼu fakatotonu ʼaia?
11 Ko te ʼu meʼa ʼaē ʼe fakamaʼua e Sehova ki tana hahaʼi neʼe ina fakahā ʼi te temi ʼaē neʼe palalau ai kiā nātou ʼi te Moʼuga ʼo Sinai. Ki muli age, neʼe foaki age e Sehova kiā Moisese te ʼu maka e lua neʼe tohi ai te ʼu Folafola e Hogofulu. ʼI tana hifo ifo mai te moʼuga, neʼe sio ia Moisese ko te kau Iselaele ʼe nātou atolasio ki te pipi aulo pea ʼi tona ʼita neʼe ina peheʼi te ʼu maka, ʼo maumau ai. Neʼe toe tohi e Sehova te ʼu Folafola e Hogofulu, ʼi te ʼu maka neʼe taʼaga e Moisese. (Ekesote 32:19; 34:1) Neʼe mole kehe te ʼu folafola ʼaia mo te ʼu ʼuluaki folafola ʼaē neʼe foaki. Neʼe tonu ke mulimuli ia Moisese kiā meʼa fuli ʼaē neʼe tohi ai. Neʼe toe fakahā lelei e te ʼAtua kiā Moisese Tona ʼuhiga moʼoni, ʼo ina fakahā ai kiā Moisese peʼe koteā ʼaē ʼe tonu ke ina fai ʼi tona ʼuhiga tagata fakafofoga ʼo Sehova. ʼE mole kei fakalogo te kau Kilisitiano ki te Lao ʼa Moisese, kae ko te ʼu meʼa ʼaē neʼe ʼui e Sehova kiā Moisese, ʼe maʼu ai te ʼu pelesepeto tāfito, pea ʼe kei ʼaoga kiā nātou fuli ʼaē ʼe nātou tauhi kiā Sehova. (Loma 6:14; 13:8-10) Tou vakaʼi ʼihi ʼi te ʼu pelesepeto ʼaia.
12. Neʼe tonu ke hā feafeaʼi ʼi te kau Iselaele te fakamaʼua e Sehova he tauhi ʼāteaina pe kiā te ia?
12 Ke tou tauhi kiā Sehova tokotahi pe. Neʼe logo te puleʼaga ʼo Iselaele ki te ʼui ʼaē e Sehova ʼe ina fakamaʼua he tauhi kiā te ia tokotahi pe. (Ekesote 20:2-5) Neʼe lahi te ʼu fakamoʼoni neʼe sio ai te kau Iselaele ʼe ko Sehova te ʼAtua moʼoni. (Teutalonome 4:33-35) Neʼe fakahā lelei e Sehova ʼe mole ina tali anai he tauhi tamapua peʼe ko he faifakalauʼakau ʼi tana hahaʼi. Ko tanatou tauhi kiā te ia neʼe mole tonu ke hage pe ko he toʼotoʼoga ʼe nātou mulimuli kiai. Neʼe tonu ke nātou ʼoʼofa fuli kiā Sehova ʼaki tonatou loto kātoa, mo tonatou nefesi kātoa, pea mo tonatou mālohi kātoa. (Teutalonome 6:5, 6) Neʼe tonu ke ʼiloga te faʼahi ʼaia ʼi te ʼu faʼahi fuli ʼo tonatou maʼuli, ʼi tanatou ʼu palalau, pea mo tanatou aga. (Levitike 20:27; 24:15, 16; 26:1) Neʼe toe fakahā lelei e Sesu Kilisito ʼe fakamaʼua mai e Sehova ke tou tauhi kiā te ia tokotahi pe.—Maleko 12:28-30; Luka 4:8.
13. He koʼe neʼe tonu ki Iselaele ke fakalogo kātoa ki te ʼAtua, pea koteā ʼaē ʼe tonu ke ina ʼuga tatou ke tou fakalogo kiā te ia? (Tagata Tānaki 12:13)
13 Ke tou fakalogo kātoa ki te ʼu fakatotonu ʼa Sehova. Neʼe ʼaoga ke toe fakamanatuʼi age ki te hahaʼi ʼo Iselaele, neʼe nātou fakapapau ke nātou fakalogo kātoa kiā Sehova ʼi te temi ʼaē neʼe nātou fai ai te fuakava mo ia. Neʼe lahi tonatou ʼāteaina, kae ʼo ʼuhiga mo te ʼu faʼahi ʼaē neʼe foaki age e Sehova he ʼu fakatotonu kiā nātou, neʼe tonu ke nātou fakalogo kātoa kiai. Neʼe ko he fakamoʼoni ʼaia ʼo tonatou ʼofa ki te ʼAtua pea ʼe fua lelei pe anai kiā nātou pea mo tonatou hōloga heʼe ko te ʼu fakamaʼua fuli ʼa Sehova neʼe fai ke fua lelei kiā nātou.—Ekesote 19:5-8; Teutalonome 5:27-33; 11:22, 23.
14. Neʼe fakahā lelei feafeaʼi e te ʼAtua ki Iselaele te maʼuhiga ʼaē ke nātou fakamuʼamuʼa te ʼu gāue fakalaumālie?
14 Ke tou fakamuʼamuʼa te ʼu meʼa fakalaumālie. Neʼe mole tonu ki te puleʼaga ʼo Iselaele ke nātou tōkakaga tāfito ki te ʼu gāue fakasino kae nātou meʼa noaʼi te ʼu gāue fakalaumālie. Neʼe mole tonu pe ke kumi e te kau Iselaele te ʼu koloā. Neʼe fakatuʼutuʼu e Sehova ʼi te vāhaʼa fuli he temi taputapu, neʼe fakaʼaogaʼi tāfito moʼo fakahoko ia te ʼu gāue ʼo ʼuhiga mo te tauhi ki te ʼAtua moʼoni. (Ekesote 35:1-3; Faka au 15:32-36) ʼI te taʼu fuli, neʼe fakatuʼutuʼu te tahi temi ki te ʼu fakatahi taputapu. (Levitike 23:4-44) ʼI te ʼu lakaga ʼaia neʼe feala ke fakamatala ai te ʼu gāue mālohi ʼa Sehova, mo fakamanatuʼi tona ʼu ala, pea mo fakafetaʼi kiā te ia ʼo ʼuhiga mo tana agalelei. ʼI te temi ʼaē neʼe fakahā ai e te kau Iselaele tanatou fia tauhi kiā Sehova, neʼe tuputupu ai tanatou manavasiʼi pea mo tonatou ʼofa kiā te ia, pea neʼe tokoni ai te ʼu faʼahi ʼaia kiā nātou ke nātou haʼele ʼi tona ʼu ala. (Teutalonome 10:12, 13) Ko te ʼu pelesepeto lelei ʼaē ʼe maʼu ʼi te ʼu fakatotonu ʼaia, ʼe ʼaoga lelei ki te ʼu kaugana ʼa Sehova ia ʼaho nei.—Hepeleo 10:24, 25.
Tou Leleiʼia Te ʼu Kalitātē ʼo Sehova
15. (a) He koe neʼe fua lelei kiā Moisese tana leleiʼia te ʼu kalitātē ʼo Sehova? (b) Koteā te ʼu fehuʼi ʼaē ʼe feala ke tokoni mai kiā tatou ke tou metitāsio ki te ʼu kalitātē takitokotahi ʼo Sehova?
15 Ko te leleiʼia e Moisese te ʼu kalitātē ʼo Sehova neʼe toe tokoni kiā ia ʼi tana ʼu felogoi mo te hahaʼi. ʼE ʼui iā Ekesote 34:5-7, ko te ʼAtua neʼe fakalaka iā muʼa ʼo te fofoga ʼo Moisese pea neʼe ina ʼui fēnei: “Sehova, Sehova, ʼAtua manavaʼofa pea mo lotoʼofa, tuai ʼi te ʼita pea mo mohu ʼi te agaʼofa pea mo te moʼoni, ʼe ina taupau tona agaʼofa ki te ʼu lauʼi afe hahaʼi, ʼe ina fakamolemole te hala pea mo te talagataʼa pea mo te agahala, kae ʼe mole ina fakahāo anai mai te tūʼā, ʼo ina fakahoko te tūʼā ʼo te hala ʼo te ʼu tāmai ki te ʼu foha, mo te ʼu mokopuna, ki te tolu taʼiake pea ki te fā taʼiake.” Koutou toʼo hokotou temi ke koutou metitāsio ki te ʼu palalau ʼaia. Koutou fai kiā koutou te fehuʼi ʼaenī: ‘Koteā te faka ʼuhiga ʼo te ʼu kalitātē takitahi ʼaia? Neʼe fakahā feafeaʼi e Sehova te ʼu kalitātē ʼaia? ʼE lava hā feafeaʼi te ʼu kalitātē ʼaia ʼi te kau tagata taupau? ʼE tonu ke malave feafeaʼi te ʼu kalitātē ʼaia ki tatatou ʼu gāue?’ Tou vakaʼi he ʼu faʼifaʼitaki.
16. ʼE lava feafeaʼi hatatou mahino loloto age ki te manavaʼofa ʼo te ʼAtua, pea he koʼe ʼe maʼuhiga te fai ʼo te faʼahi ʼaia?
16 Ko Sehova ʼe ko te “ ʼAtua manavaʼofa pea mo lotoʼofa.” Ko te manavaʼofa ʼa Sehova ʼi ʼihi temi ʼe ina fakagafua ke fakamaʼamaʼa te fakatūʼa, pea ʼe toe pipiki foki kiai ia te agaʼofa. ʼE ina uga te ʼAtua ke ina fai he meʼa moʼo fakafimālieʼi tana hahaʼi. Moʼo fakamoʼoni kiai, neʼe tokaga te ʼAtua ki te kau Iselaele ʼi te faʼahi fakasino pea mo te faʼahi fakalaumālie lolotoga tanatou fagona ki te Fenua ʼo Te Fakapapau. (Teutalonome 1:30-33; 8:4) Neʼe manavaʼofa Sehova ʼo fakamolemole ki he tahi mo kapau neʼe ina fai hana hala. Neʼe manavaʼofa ki tana hahaʼi ʼo te temi muʼa. Koia, ʼe toe maʼua ke fefakahāʼaki e tana kau kaugana ʼo te temi nei te lotoʼofa.—Mateo 9:13; 18:21-35.
17. ʼE lava lagolago feafeaʼi ki te tauhi moʼoni, tatatou mahino ki te lotoʼofa ʼa Sehova?
17 Ko Sehova ʼe manavaʼofa pea mo lotoʼofa. Kiā koutou, koteā te faka ʼuhiga ʼo te “lotoʼofa”? Koutou fakatatau mo te ʼu vaega ʼaē ʼe ʼui ai ko Sehova ʼe lotoʼofa. ʼE fakahā ʼi te Tohi-Tapu ko Sehova ʼe lotoʼofa, ko tona faka ʼuhiga ʼe tokaga kiā nātou ʼaē ʼe faigataʼaʼia ʼi tana hahaʼi. (Ekesote 22:26, 27) ʼI he fenua, ko te kau matāpule pea mo ʼihi atu, ʼe lagi faigataʼa tonatou ʼaluʼaga. ʼI tana akoʼi ki tana hahaʼi ke mole nātou fakapalatahi pea ke nātou agalelei ki te hahaʼi ʼaia, neʼe fakamanatuʼi age e Sehova kiā nātou neʼe toe māʼuʼuli mo nātou ohage ko he kau matāpule ʼi Esipito. (Teutalonome 24:17-22) E feafeaʼi ʼo ʼuhiga mo tatou, te hahaʼi ʼa te ʼAtua ia ʼaho nei? Ko totatou lotoʼofa ʼe lagolago ki tatatou logo tahi pea ʼe ina taki mai te tahi ʼu hahaʼi ke nātou tauhi kiā Sehova.—Gaue 10:34, 35; Apokalipesi 7:9, 10.
18. Koteā te ako ʼe tou tāʼofi mai te ʼu faʼahi ʼaē neʼe faka tuʼakoi e Sehova ki Iselaele ʼo ʼuhiga mo tanatou ʼu felogoi mo te hahaʼi ʼo te tahi ʼu puleʼaga?
18 Kae ko te lotomahino ʼa Iselaele ki te hahaʼi mai te tahi ʼu fenua, neʼe mole tonu ke lahi age ʼi tonatou ʼofa kiā Sehova pea mo tona ʼu lēkula. Koia neʼe akoʼi ki te kau Iselaele ke ʼaua naʼa nātou mulimuli ki te ʼu ala ʼo te ʼu puleʼaga ʼi ʼonatou tafaʼaki, ke ʼaua naʼa nātou fai tanatou ʼu toʼotoʼoga faka lotu pea mo tanatou faʼahiga maʼuli heʼeʼaoga. (Ekesote 34:11-16; Teutalonome 7:1-4) ʼE toe ʼaoga te ʼu faʼahi ʼaia kiā tatou ia ʼaho nei. ʼE tonu ke tou maʼoniʼoni, ohage ko te maʼoniʼoni ʼo Sehova, totatou ʼAtua.—1 Petelo 1:15, 16.
19. ʼE lava tokoni feafeaʼi ki te hahaʼi ʼa Sehova tanatou mahino ki te manatu ʼa Sehova ʼo ʼuhiga mo te agahala?
19 Moʼo fakamahino kiā Moisese Tona ʼu ala, neʼe fakahā lelei age e Sehova, logola tana mole tali te agahala, kae ʼe tuai ʼi te ʼita. ʼE ina tuku he temi ki te hahaʼi ke nātou ʼiloʼi tana ʼu fakatotonu pea mo mulimuli kiai. Ka fakahemala he tahi, pea ʼe fakamolemole e Sehova tana agahala, kae ʼe mole ina molehi te fakatūʼā ʼaē ʼe tonu ke fai ki he tahi ʼe ina fai hana ʼu agahala mamafa. Neʼe ina fakatokagaʼi kiā Moisese ko te ʼu meʼa ʼaē neʼe fai e te kau Iselaele neʼe feala ke fua lelei peʼe fua kovi ki te ʼu taʼiake ki muli mai. Kapau ʼe leleiʼia e te hahaʼi ʼa te ʼAtua te ʼu ala ʼa Sehova, pea ʼe feala anai ke mole nātou meo ki te ʼAtua ʼo ʼuhiga mo ni ʼu ʼaluʼaga neʼe tupu ʼuhi pe ko nātou totonu peʼe ke ʼaua naʼa nātou manatu ʼe tuai fau Sehova.
20. Koteā ʼaē ka tokoni mai kiā tatou ke tou felogoi lelei mo totatou ʼu tēhina mo tuagaʼane pea mo te hahaʼi ʼaē ʼe tou felāveʼi mo nātou ʼi totatou minisitelio? (Pesalemo 86:11)
20 Kapau ʼe koutou loto ke loloto age takotou ʼiloʼi ia Sehova pea mo tona ʼu ala, koutou haga fai he ʼu kumi pea mo metitāsio mokā koutou lau te Tohi-Tapu. Koutou vakaʼi fakalelei te ʼu agaaga fakaofoofo kehekehe ʼo te ʼulugaaga ʼo Sehova. ʼI te faikole, koutou vakaʼi peʼe koutou lava faʼifaʼitaki feafeaʼi te ʼAtua pea mo faka ʼalutahi tokotou maʼuli mo tana fakatuʼutuʼu. ʼE tokoni atu anai te faʼahi ʼaia ke ʼaua naʼa koutou tō ki he ʼu hele, ke koutou felogoi lelei mo te ʼu tēhina mo tuagaʼane, pea mo koutou tokoni ki te hahaʼi ke nātou ako ke nātou ʼiloʼi pea mo ʼoʼofa ki totatou ʼAtua māfimāfi.
Koteā ʼAē Neʼe Koutou Ako?
• He koʼe neʼe maʼuhiga kiā Moisese ke agavaivai, pea he koʼe ʼe maʼuhiga kiā tatou?
• He koʼe neʼe lelei te fakahā putuputu kiā Falaone te fakatotonu ʼa Sehova?
• Koteā ʼihi ʼu pelesepeto maʼuhiga neʼe akoʼi kiā Moisese pea ʼe toe ʼaoga kiā tatou?
• ʼE tou lava fakaloloto feafeaʼi tatatou mahino ki te ʼu kalitātē ʼo Sehova?
[Paki ʼo te pasina 21]
Neʼe agatonu Moisese ʼo ina fakahā kiā Falaone te ʼu fakatotonu ʼa Sehova
[Paki ʼo te pasina 23]
Neʼe fakahā e Sehova tana ʼu fakamaʼua kiā Moisese
[Paki ʼo te pasina 24]
Koutou metitāsio ki te ʼu kalitātē ʼo Sehova