Kotou Hikihiki Te Lelei ʼo Takotou ʼu Faikole ʼAki Takotou Ako Ia Te Tohi-Tapu
“Ê fakalelei age, Sehova, ke fagono mai tou taliga ki te faikole ʼo tau kaugana.”—NEH. 1:11.
1, 2. He koʼē ʼe fua lelei anai hatatou vakaʼi he ʼu faikole kua tohi ʼi te Tohi-Tapu?
KO TE faikole pea mo te ako ʼo te Tohi-Tapu ʼe ko he ʼu faʼahi maʼuhiga ʼo te tauhi moʼoni. (1 Tes. 5:17; 2 Tim. 3:16, 17) ʼE mahino papau ia, ko te Tohi-Tapu ʼe mole ko he tohi faikole. Kae ʼe maʼu ai ia te ʼu tuʼuga faikole, pea ʼe lahi ia te ʼu faikole ʼe tuʼu ʼi te tohi ʼo te ʼu Pesalemo.
2 ʼI takotou lau pea mo ako ia te Tohi-Tapu, ʼe mahino ia ʼe kotou maʼu ai anai he ʼu faikole ʼe ʼalutahi mo tokotou maʼuli. ʼI tona fakahagatonu, kā kotou faikole pea ʼe kotou fakaʼaogaʼi ia he ʼu manatu ʼo te ʼu faikole ʼaia ʼi te Tohi-Tapu, pea ʼe hikihiki ai anai ia te lelei ʼo takotou ʼu faikole. Koteā te ako ʼe kotou lava tāʼofi mai iā nātou ʼaē neʼe tali tanatou ʼu kole tokoni e Sehova pea mo te ʼu palalau ʼaē neʼe natou fai ʼi tanatou ʼu faikole ʼaia?
Tou Kumi Pea Mo Tou Muliʼi Ia Te Takitaki ʼa Te ʼAtua
3, 4. Neʼe koteā te gāue ʼaē neʼe tonu ke fakahoko e te tagata kaugana ʼa Apalahamo, pea koteā te ako ʼe tou lava tāʼofi mai te tali ʼaē neʼe fai e Sehova ki tana kole?
3 ʼAki takotou ako ia te Tohi-Tapu, ʼe kotou ʼiloʼi ai ʼe tonu ke kotou kole tuʼumaʼu ia te takitaki ʼa te ʼAtua. Kotou tokagaʼi te meʼa ʼaē neʼe hoko ʼi te temi ʼaē neʼe fekauʼi ai e te pāteliaka ko Apalahamo ia tana tagata kaugana ʼaē kua matuʼa, ia Eleasale, ke ʼalu ki Mesopotamia ʼo kumi mai ia he ʼohoana maʼa Isaake, he fafine ʼe manavasiʼi ki te ʼAtua. ʼI te temi ʼaē neʼe ʼohu vai ai ia te hahaʼi fafine ʼi te vai keli ʼo te kolo, neʼe faikole fēnei ia te tagata kaugana: “Sehova, . . . ko te meʼa ʼaē ʼe tonu ke hoko, ko te taʼahine ʼaē kā au ʼui anai ki ai, ‘Fakahifo mai tau hina ʼutu vai, ke au ʼinu,’ pea kā ina ʼui mai anai: ‘ ʼInu, pea ʼe au toe fakaʼinu anai mo tau ʼu kamelo,’ ʼe ko ia ʼaia ʼaē ʼe tonu ke ke fili ki tau kaugana, kiā Isaake, pea ʼaki te faʼahi ʼaia, fakahā mai kiā te au neʼe ke fai he ʼofa agatonu ki toku pule.”—Sen. 24:12-14.
4 Neʼe tali ia te faikole ʼa te tagata kaugana ʼa Apalahamo ʼi te temi ʼaē neʼe fakaʼinu ai e Lepeka ia tana ʼu kamelo. Mole tuai, pea neʼe kaugā ʼolo ia Lepeka mo te tagata kaugana ki Kanaane pea liliu ko te ʼohoana ʼofaina ʼo Isaake. ʼE mahino ia, ʼi totatou temi ʼe mole feala ke tou ʼamanaki ʼe fakahā mai anai e te ʼAtua he fakaʼiloga makehe. Kae ʼe ina takitaki anai koutou ʼi tokotou maʼuli mo kapau ʼe kotou faikole pea mo kotou fakatotonu ke taki koutou e tona laumālie.—Kal. 5:18.
Ko Te Faikole ʼe Tokoni Mai Ke Fakasiʼisiʼi Ia Te Loto Hoha
5, 6. Koteā ʼaē ʼe lelei ke tou tokagaʼi ʼo ʼuhiga mo te faikole ʼa Sakopo ʼi te temi ʼaē neʼe ʼamanaki felāveʼi ai mo Esau?
5 Ko te faikole ʼe feala ke ina fakasiʼisiʼi ia totatou loto hoha. ʼI tana mataku ʼaē ki tona tehina ko Esau, neʼe faikole fēnei ia Sakopo: “Ê Sehova, . . . ʼe mole tāu mo au te ʼu loto manavaʼofa fuli pea mo te agatonu kātoa ʼaē neʼe ke fai ki tau kaugana . . . ʼE au kole atu, ke ke fakahao au mai te nima ʼo toku tehina, mai te nima ʼo Esau, heʼe au mataku iā ia, naʼa haʼu heʼe mahino papau ia ʼe ina ʼohofi anai au, mo te faʼē pea mo te fānau. Pea ko koe, neʼe ke ʼui fēnei, ‘ ʼE moʼoni, ʼe au gaohi fakalelei anai koe pea ʼe au fai anai ke liliu tou hako ohagē ko te ʼu fisiʼi ʼone ʼo te tai, ʼaē ʼe mole feala tona lau heʼe lahi ʼaupitō.’ ”—Sen. 32:9-12.
6 Logolā neʼe fai fakatomuʼa e Sakopo ia he ʼu fakatuʼutuʼu, kae neʼe tali ia tana faikole ʼi te temi ʼaē neʼe nā fefaifakaleleiʼaki ai mo Esau. (Sen. 33:1-4) Kā kotou lau fakalelei ia te kole ʼaia, pea ʼe kotou tokagaʼi anai neʼe mole kole tokoni pē ia Sakopo, kae neʼe ina fakahā ia tana tui ʼaē ki te Hako neʼe fakapapauʼi mai pea neʼe loto fakafetaʼi ki te loto manavaʼofa ʼo te ʼAtua. ʼE ʼi ai koa hokotou “ ʼu tuʼania ʼi [tokotou] loto”? (2 Ko. 7:5) Kapau koia, ko te kolekole ʼaē neʼe fai e Sakopo ʼe lagi ina fakamanatuʼi atu ko te ʼu faikole ʼe feala ke natou fakasiʼisiʼi ia te loto hoha. Kae ʼi tatatou ʼu faikole ʼe mole tonu pē ke tou kole ni ʼu meʼa kae ʼe toe maʼua foki ke tou fai ʼaki te tui.
Tou Faikole Ke Foaki Mai Ia Te Poto
7. He koʼē neʼe faikole Moisese ke ina ʼiloʼi ia te ʼu ala ʼo Sehova?
7 Ko takotou fia fakafiafia ia Sehova ʼaē kā ina uga ai koutou ke kotou faikole ke ina foaki atu te poto. Neʼe faikole Moisese ke ina ʼiloʼi ia te ʼu ala ʼo te ʼAtua. Neʼe faikole fēnei: “Koʼenī [Sehova] neʼe ke ʼui mai kiā te au, ‘Fakahake te hahaʼi ʼaenī,’ [mai Esipito]. . . . Fakalelei siʼi ʼou loto, kapau ʼe ke ʼofa kiā au, fakahā mai tou ʼu ala, . . . koteʼuhi ke ke ʼofa kiā au.” (Eke. 33:12, 13) Moʼo tali ki ai, neʼe foaki e te ʼAtua kiā Moisese ia he toe ʼatamai mālama ʼo ʼuhiga mo Tona ʼu ala, ʼaē neʼe ʼaoga kiā ia moʼo takitaki ia te hahaʼi ʼa Sehova.
8. ʼE lava fua lelei feafeaʼi kiā koutou ia takotou metitāsioʼi te manatu ʼaē iā 1 Hau 3:7-14?
8 Neʼe toe faikole fēnei ia Tavite: “Fakahā mai kiā te au tou ʼu ala, Ê Sehova!” (Pes. 25:4) Ko te foha ʼo Tavite, ia Salomone, neʼe ina kolekole ki te ʼAtua ia te poto ʼaē neʼe ʼaoga ki he hau ʼi Iselaele moʼo fakahoko ia tona ʼu maʼua. Neʼe fiafia Sehova ʼi te faikole ʼa Salomone, ʼo mole ina foaki age pē te meʼa ʼaē neʼe ina kole age kae neʼe ina toe foaki age ki ai ia te ʼu koloa pea mo te kolōlia. (Lau ia 1 Hau 3:7-14.) Kapau ʼe foaki atu he ʼu pilivilēsio ʼi te kōkelekāsio pea mo hagē ʼe faigataʼa kiā koutou, kotou faikole ke foaki atu e Sehova ia te poto pea ke kotou agavaivai. Pea ʼe tokoni atu anai ia te ʼAtua ke kotou maʼu ia te ʼatamai mālama, pea ke kotou gāue ʼaki te poto ʼaē ʼe ʼaoga moʼo fai fakalelei tokotou ʼu maʼua pea mo fai ʼaki te ʼofa.
Ko Tatatou Faikole ʼe Tonu Ke Fai ʼAki Totatou Loto Kātoa
9, 10. Koteā ʼaē ʼe maʼuhiga kiā koutou ʼi te palalau tuʼa lahi ʼaē ʼa Salomone ʼo ʼuhiga mo te loto, ʼi tana faikole ʼaē ʼi te ʼavahi ʼo te fale lotu?
9 Ke fagono mai ia te ʼAtua ki tatatou faikole, ʼe tonu ki tatatou faikole ke fai ʼaki totatou loto kātoa. Iā 1 Hau kāpite 8, ko te faikole ʼa Salomone ʼaki tona loto kātoa neʼe ina fai iā muʼa ʼo te hahaʼi tokolahi ʼaē neʼe māʼopoʼopo ʼi Selusalemi ki te ʼavahi ʼo te fale lotu ʼo Sehova ʼi te taʼu 1026 ʼi muʼa ʼo totatou temi. ʼI te kua ʼosi tuku te ʼaleka ʼo te fuakava ki te Potu Taputapu ʼAupitō pea mo fakafonu e Sehova te fale lotu ʼaki te ʼao, neʼe fakavikiviki e Salomone ia te ʼAtua.
10 Kotou ako ia te faikole ʼa Salomone, pea mo kotou fakatokagaʼi ia tana palalau tuʼa lahi ʼaē ʼo ʼuhiga mo te loto. Neʼe mahino kiā Salomone ʼe ko Sehova pē tokotahi ʼaē ʼe ina ʼiloʼi ia te loto ʼo he tahi. (1 Hau 8:38, 39) ʼE toe fakahā ʼi te faikole ʼaia, ʼe ʼi ai te ʼamanaki ki te tagata agahala ʼaē ʼe ‘toe liliu ki te ʼAtua ʼaki tona loto kātoa.’ Kapau neʼe puke e te ʼu fili ia te hahaʼi ʼa te ʼAtua, pea ʼe logo anai ia te ʼAtua ki tanatou ʼu tagi mo kapau neʼe kātoa ʼonatou loto kiā Sehova. (1 Hau 8:48, 58, 61) Koia, ʼe mahino mai ko tatatou ʼu faikole ʼe tonu ke fai ʼaki totatou loto kātoa.
ʼE Lava Hikihiki Feafeaʼi e Te ʼu Pesalemo Te Lelei ʼo Tatatou ʼu Faikole?
11, 12. Koteā ʼaē neʼe kotou ako mai te ʼu palalau ʼa te faikole ʼa te tagata Levite, ʼaē neʼe mole lava ʼalu ʼi te tahi temi ki te sagatualio?
11 Ko tatatou ako ia te ʼu Pesalemo ʼe feala ke hikihiki ai ia te lelei ʼo tatatou ʼu faikole pea mo tokoni mai ke tou fakatalitali ki te ʼAtua ke ina tali kiai. Kotou tokagaʼi ia te faʼa kātaki ʼa te tagata Levite ʼaē neʼe ʼaunofo ʼi Papiloni. Logolā ʼi te tahi temi neʼe mole feala hana ʼalu ki te sagatualio ʼo Sehova, kae neʼe ina hivaʼi fēnei: “He koʼē ʼe ke lotomamahi, Ê toku nefesi, pea he koʼē ʼe ke hoha iā te au? Ke ke fakatalitali ki te ʼAtua, heʼe au toe vikiʼi anai ia ia: ʼe ko ia toku haofaki lahi pea mo toku ʼAtua.”—Pes. 42:5, 11; 43:5.
12 Koteā ʼaē ʼe feala ke kotou ako mai te tagata Levite ʼaia? Kapau ʼe pilisoniʼi koutou ʼuhi ko te faitotonu, ʼo mole kei feala ai hakotou fakatahi mo te ʼu tehina mo tuagaʼane ʼi te fale tauhi lolotoga he temi, kotou atali ki te ʼAtua ke ina haofaki koutou. (Pes. 37:5) Kotou metitāsioʼi ia te ʼu temi fakafiafia ʼaē neʼe kotou gāue ai ki te ʼAtua, pea kotou kole ke kotou maʼu ia te faʼa kātaki ʼi takotou ‘lolotoga fakaʼatalitali ki te ʼAtua’ ʼaē kā ina toe haofaki koutou ke kotou toe kaugā gāue fakatahi mo tana hahaʼi.
Kotou Faikole ʼAki Te Tui
13. ʼO mulimuli ki te manatu ʼaē iā Sake 1:5-8, he koʼē ʼe tonu ke kotou faikole ʼaki te tui?
13 Tatau aipē peʼe feafeaʼi tokotou ʼaluʼaga, kae kotou faikole tuʼumaʼu ʼaki te tui. Kapau ʼe ʼahiʼahiʼi takotou agatonu, kotou muliʼi ia te tokoni ʼa te tisipulo ko Sake. Kotou faikole kiā Sehova, pea kotou tui papau ʼe ina foaki atu anai ia te poto ʼaē ʼe ʼaoga kiā koutou moʼo kātakiʼi tokotou ʼahiʼahiʼi. (Lau ia Sake 1:5-8.) ʼE ʼiloʼi e te ʼAtua mokā ʼe kotou hoha ki he meʼa, pea ʼaki tona laumālie ʼe feala ke ina takitaki koutou pea mo fakalotofīmālieʼi koutou. Kotou ʼavahi tokotou loto kiā te ia ʼaki he tui ʼe kātoa, ‘ ʼo mole kotou lotolotolua,’ pea kotou tali te takitaki ʼo tona laumālie pea mo te tokoni ʼo tana Folafola.
14, 15. He koʼē ʼe feala ke tou ʼui ko Ana neʼe faikole ʼaki te tui?
14 Ko Ana, ko te tahi fafine ʼohoana ʼo te tagata Levite ko Elekana, neʼe faikole ʼaki te tui. Ko Ana, ʼaē neʼe mole fānaunau, neʼe fakalainoaʼi e te lua fafine ʼohoana ʼo Elekana ko Penina, ʼaē neʼe fānaunau. ʼI te tapenakulo, neʼe fai ai e Ana ia tana fakapapau, kapau ʼe ina maʼu hana tama, ʼe ina foaki anai kiā Sehova. ʼI te tetetete ʼaē ʼo tona ʼu laugutu ʼi tana lolotoga faikole, neʼe manatu ai ia te Pelepitelō Lahi ko Elia, neʼe konahia ia Ana. Pea ʼi tana ʼiloʼi leva ʼaē neʼe mole konahia ia, neʼe ʼui fēnei e Elia: “Ke tali e te ʼAtua ʼo Iselaele te meʼa ʼaē neʼe ke kole age ki ai.” Logolā neʼe mole ʼiloʼi totonu e Ana pe koteā anai ʼaē kā hoko, kae neʼe tui ia ʼe tali anai ia tana faikole. Koia “neʼe mole kei mata tuʼania tona fofoga.” Neʼe mole kei lotomamahi peʼe lotovaivai.—1 Sam. 1:9-18.
15 ʼI te ʼosi tupu ake ʼa Samuele pea mo tona kua ʼosi fakavavae, neʼe foaki e Ana tana tama kiā Sehova ki te tauhi taputapu ʼi te tapenakulo. (1 Sam. 1:19-28) Kapau ʼe kotou toʼo hokotou temi moʼo metitāsioʼi ia tana faikole ʼaē neʼe ina fai ʼi te temi ʼaia, ʼe hikihiki ai anai ia te lelei ʼo takotou ʼu faikole pea mo tokoni atu ke kotou mahino, tatau aipē peʼe kotou lotomamahi ʼi he fihifihia, kae ʼe kotou lava tauʼi mo kapau ʼe kotou faikole ʼaki te tui ʼaē ʼe tali anai e Sehova ia takotou faikole.—1 Sam. 2:1-10.
16, 17. Koteā ʼaē neʼe hoko he neʼe faikole Nehemia ʼaki te tui?
16 Ko te tagata faitotonu ko Nehemia ʼo te nima sēkulō ʼi muʼa ʼo totatou temi, neʼe faikole ʼaki te tui. Neʼe faikole fēnei: “Ê fakalelei age, Sehova, ke fagono mai tou taliga ki te faikole ʼo tau kaugana pea mo te faikole ʼo tau ʼu kaugana ʼaē ʼe natou tali lelei ke natou manavasiʼi ki tou huafa, pea fakalelei age, ke ke fai ke iku lelei ki tau kaugana ʼi te ʼaho nei pea ke liliu tau kaugana ko he meʼa ʼe manavaʼofa ʼi muʼa ʼo te tagata nei.” Neʼe ko ai ‘te tagata ʼaia’? Neʼe ko te Hau Pelesia ko Atasease, pea neʼe ko Nehemia ʼaē neʼe tokaga ki tana meʼa ʼinu.—Neh. 1:11.
17 Neʼe faikole Nehemia ʼaki te tui lolotoga ni ʼu ʼaho ʼi tana logo ʼaē ko te kau Sutea ʼaē neʼe fakaʼāteaina mai tanatou ʼaunofo ʼi Papiloni, neʼe “nātou [nonofo] ʼi he ʼaluʼaga [neʼe] kovi ʼaupitō pea mo malaʼia; pea ko te kaupā ʼo Selusalemi [neʼe] maumau.” (Neh. 1:3, 4) Neʼe tali ki te ʼu faikole ʼa Nehemia, ʼo lahi age ia tona tapuakinaʼi ʼi te meʼa ʼaē neʼe ʼamanaki kiai, he neʼe fakagafua age e te Hau ko Atasease ke ʼalu ki Selusalemi moʼo toe laga ia tona kaupā. (Neh. 2:1-8) Mole tuai kiai pea neʼe toe laga ia te ʼu kaupā. Neʼe tali ia te ʼu faikole ʼa Nehemia he neʼe faikole tāfito ʼo ʼuhiga mo te tauhi maʼa pea neʼe ina fai ʼaki te tui. ʼE toe fēia koa mo takotou ʼu faikole?
Kotou Manatuʼi Ke Kotou Fakavikiviki Pea Mo Fakafetaʼi Kiā Sehova
18, 19. Koteā te ʼu tupuʼaga ʼaē ʼe tonu ai ki he kaugana ʼa Sehova ke ina fakavikiviki pea mo fakamālo kiā te ia?
18 Kā kotou faikole, kotou manatuʼi ke kotou fakavikiviki pea mo fakafetaʼi kiā Sehova. ʼE lahi ʼaupitō te ʼu faʼahi ʼaē ʼe feala ke tupu ai ia tatatou fakavikiviki pea mo tatatou loto fakafetaʼi! Ohagē lā, neʼe loto ʼaupitō ia Tavite ke ina vikiʼi ia te ʼuhiga Hau ʼo Sehova. (Lau ia Pesalemo 145:10-13.) ʼE hā koa ʼi takotou ʼu faikole takotou leleiʼia ia te pilivilēsio ʼaē ke kotou tala ia te Puleʼaga ʼo Sehova? Ko te ʼu kupu ʼaē neʼe fakaʼaogaʼi e te tagata fai pesalemo, ʼe feala ke toe tokoni atu ke kotou fakahā ki te ʼAtua ʼi hakotou faikole fakamālotoloto, ia takotou fakafetaʼi ʼaē ki te ʼu fono Fakakilisitiano pea mo te ʼu fakatahi lalahi.—Pes. 27:4; 122:1.
19 Ko takotou fakafetaʼi ki takotou ʼu felōgoi maʼuhiga ʼaē mo te ʼAtua, ʼe feala ke uga koutou ke kotou fai he kole ʼe haʼu mai tokotou loto, ʼaki he ʼu manatu ʼe tatau mo ʼaenī: “ ʼE au vikiʼi anai koe ʼi te lotolotoiga ʼo te hahaʼi, Ê Sehova! Maʼa koe ʼe au hiva anai he ʼu hiva ʼi te ʼu kūtuga fakapuleʼaga. Heʼe ko tou lotoʼofa ʼe lahi ʼo aʼu ki te ʼu lagi, pea mo tau agatonu ʼo aʼu ki te ʼu lagi ʼaoʼia. Ke ke mahiki ake ia koe ʼi te fuga ʼo te ʼu lagi, Ê ʼAtua! Ko tou kolōlia ke nofo ʼi te fuga ʼo te kele kātoa.” (Pes. 57:9-11) ʼE ko he ʼu manatu fakalotomālohi ʼaia. ʼE mole kotou manatu koa ko he ʼu kupu malave loto fēia mai te ʼu Pesalemo ʼe feala ke hikihiki ia te lelei ʼo takotou ʼu faikole?
Tou Kolekole Mamahi Ki Te ʼAtua ʼAki He Fakaʼapaʼapa Lahi
20. Neʼe fakahā feafeaʼi e Malia ia tana fia tauhi ʼaē ki te ʼAtua?
20 ʼE tonu ke hā lelei ʼi tatatou ʼu faikole tatatou fakaʼapaʼapa lahi ʼaē ki te ʼAtua. Ko te ʼu palalau fakaʼapaʼapa lahi ʼaē neʼe fai e Malia ʼi tana kua ʼiloʼi ʼaē ko ia kā liliu anai ko te faʼē ʼa te Mēsia, neʼe tatau mo te ʼu palalau ʼa Ana ʼi tana foaki tana kiʼi tama ko Samuele ki te tauhi ʼi te tapenakulo. ʼE hā lelei ia te fakaʼapaʼapa lahi ʼa Malia ki te ʼAtua ʼi tana ʼui fēnei: “ ʼE fakavikiviki e toku nefesi ia Sehova, pea ʼe fiafia toku laumālie ʼo ʼuhiga mo te ʼAtua toku Fakamaʼuli.” (Luka 1:46, 47) ʼE feala koa ke hikihiki age te lelei ʼo takotou ʼu faikole ʼaki hakotou fakahā ia he ʼu manatu fēia? ʼE mole tou punamaʼuli ai ki te filifili ʼo Malia, ʼaē neʼe pipiki ki te ʼAtua, ke liliu ko te faʼē ʼa Sesu te Mēsia.
21. Neʼe hā feafeaʼi ʼi te ʼu faikole ʼa Sesu ia tana fakaʼapaʼapa lahi pea mo tana tui?
21 Neʼe faikole Sesu ʼaki he fakaʼapaʼapa lahi mo he tui kātoa. Ohagē lā, ʼi muʼa ʼo tana fakatuʼuake ia Lasalo, “neʼe hiki ake e Sesu ʼona mata ki te lagi pea ʼui māʼana: ‘Tamai, ʼe au fakafetaʼi kiā te koe ʼi tau kua fagono mai kiā te au. ʼE moʼoni, neʼe au ʼiloʼi pē ʼe ke fagono tuʼumaʼu mai kiā te au.’ ” (Soa. 11:41, 42) ʼE hā koa ʼi takotou ʼu faikole ʼe kotou maʼu te fakaʼapaʼapa lahi ʼaia pea mo te tui? Kā kotou ako ia te faikole faʼifaʼitaki ʼa Sesu ʼaē ʼe maʼu ai ia te fakaʼapaʼapa lahi, pea ʼe kotou tokagaʼi anai ko tona ʼu puani maʼuhiga ʼe ko te fakatapuhā ʼo te huafa ʼo Sehova, ʼe ko te hoko mai ʼo tona Puleʼaga, pea mo te fakahoko ʼo tona finegalo. (Mat. 6:9, 10) Kotou fakakaukauʼi ia takotou ʼu faikole. ʼE hā ai koa takotou tokaga tāfito ki te Puleʼaga ʼo Sehova, ki te fakahoko ʼo tona finegalo, pea mo te fakatapuhā ʼo tona huafa māʼoniʼoni? ʼE tonu ke kotou talanoa ki te ʼu faʼahi ʼaia.
22. He koʼē ʼe feala ke kotou tui papau ko Sehova ʼe ina foaki atu anai ia te lototoʼa moʼo tala ia te logo lelei?
22 ʼE feala ke tou kole ʼi tatatou ʼu faikole ke tokoni mai ia Sehova, ke tou tauhi kiā te ia ʼaki he lototoʼa, ʼuhi ko te fakataga peʼe ko ʼihi age faigataʼaʼia. ʼI te fakatotonu ʼaē e te Sanetualio kiā Petelo pea mo Soane ke nā tuku ia tanā ‘faiako ʼaki te huafa ʼo Sesu,’ ko te ʼu ʼapositolo ʼaia neʼe nā fakafisi ʼaki he lototoʼa ki te fakatotonu ʼaia. (Gāue 4:18-20) Hili ki tonā fakaʼāteaina, neʼe nā fakamatala ki tonā ʼu kaumeʼa Kilisitiano ia te ʼu meʼa ʼaē neʼe hoko kiā nāua. Pea ko nātou fuli ʼaia neʼe natou kole ki te ʼAtua ke tokoni mai kiā nātou, ke natou palalau ki tana folafola ʼaki he lototoʼa. ʼI meʼa fakafiafia lahi ʼi te temi ʼaē neʼe tali ai ia tanatou faikole ʼaia, he neʼe natou “fonu . . . ʼi te laumālie māʼoniʼoni pea neʼe natou talanoa ai ki te folafola ʼa te ʼAtua ʼaki he lototoʼa”! (Lau ia Gāue 4:24-31.) Ko te meʼa ʼaē neʼe hoko, ko te toe hahaʼi tokolahi neʼe natou liliu ʼo ʼatolasio kiā Sehova. ʼAki te faikole, ʼe kotou toe lava maʼu ia te mālohi ʼaē ke kotou tala ia te logo lelei ʼaki he lototoʼa.
Kotou Haga Hikihiki Aipē Ia Te Lelei ʼo Takotou ʼu Faikole
23, 24. (a) Kotou fakahā he tahi ʼu faʼifaʼitaki ʼe fakahā ai peʼe hikihiki feafeaʼi te lelei ʼo takotou ʼu faikole ʼaki takotou ako ia te Tohi-Tapu. (b) Koteā ʼaē kā kotou fai anai moʼo hikihiki ia te lelei ʼo takotou ʼu faikole?
23 ʼE kei lahi age ʼihi faʼifaʼitaki ʼe feala ke tou talanoa kiai, moʼo fakahā ko te lau pea mo te ako ʼo te Tohi-Tapu ʼe feala ke hikihiki ai ia te lelei ʼo takotou ʼu faikole. Ohagē pē ko Sonasi, kā kotou faikole ʼe feala ke kotou fakamoʼoni ko “te fakamaʼuli ʼe haʼu mai iā Sehova.” (Son. 2:1-10) Kapau ʼe kotou hoha ʼuhi ko he agahala mamafa neʼe kotou fai pea mo kotou kumi tokoni ki te kau tagata ʼāfea, ko te ʼu manatu ʼaē neʼe maʼu e Tavite ʼi tana faikole, ʼe lagi tokoni atu anai ke kotou fakahā ia takotou loto fakahemala mokā kotou faikole tokotahi. (Pes. 51:1-12) Ko ʼihi faikole, ʼe feala ke kotou fakavikiviki ia Sehova ohagē ko tona fai e Selemia. (Sel. 32:16-19) Kapau ʼe kotou kumi hokotou ʼohoana, ko takotou ako ia te faikole ʼaē ʼe kotou maʼu iā Esitalasi kāpite 9, pea mo takotou kolekole, ʼe feala ai ke kotou lotomālohi ʼo ʼuhiga mo takotou fakatotonu ʼaē ke kotou fakalogo ki te ʼAtua, ʼo kotou ‘ ʼohoana ʼi te ʼAliki pē.’—1 Ko. 7:39; Esita. 9:6, 10-15.
24 Kotou haga lau, mo ako pea mo fai he ʼu kumi ʼi te Tohi-Tapu. Kotou kumi he ʼu manatu ʼe feala ke kotou talanoa kiai ʼi takotou ʼu faikole. ʼE feala ai hakotou fakaʼaogaʼi he ʼu manatu Fakatohi-tapu ʼi takotou ʼu kole mamahi pea mo takotou ʼu faikole moʼo fakamālo pea mo fakavikiviki ki te ʼAtua. ʼE kotou ʼiloʼi papau ai ʼe kotou fakaovi lahi kiā Sehova ʼAtua mokā kotou hikihiki ia te lelei ʼaē ʼo takotou ʼu faikole ʼaki takotou ako ia te Tohi-Tapu.
ʼE Kotou Tali Feafeaʼi Anai?
• He koʼē ʼe tonu ke tou kumi pea mo mulimuli ki te takitaki ʼa te ʼAtua?
• Koteā ʼaē ʼe tonu ke ina uga tātou ke tou faikole ke foaki mai te poto?
• ʼE lava hikihiki feafeaʼi e te tohi ʼo te ʼu Pesalemo ia te lelei ʼo tatatou ʼu faikole?
• He koʼē ʼe tonu ke tou faikole ʼaki te tui pea mo he fakaʼapaʼapa lahi?
[Paki ʼo te pasina 16]
Ko te Tauhi Fakafāmili ʼe ina lava hikihiki ia te lelei ʼaē ʼo takotou ʼu faikole