ʼE Lava Feafeaʼi Ke Koutou Faka Koloaʼia Takotou ʼu Faikole?
KO TE faikole ʼe makehe tokotahi pe ia ʼi te ʼu meʼa ʼofa fuli ʼaē ʼa Sehova ʼAtua. Ko te ʼu fili ʼe feala ke nātou toʼo takotou Tohi-Tapu peʼe nātou fakagata takotou ʼolo ʼo fono mo tokotou ʼu kaugā fagona, kae ʼe mole feala ki he tahi ke ina toʼo ia koutou te faikole. Ko te faikole ʼe maʼuhiga ʼaupito ia. Koia, ʼe maʼuhiga kia tatou takitokotahi ke tou taupau fakalelei pea mo fakaʼaoga lahi te pilivilesio ʼaia. Koteā te meʼa ʼe feala ke tokoni kia koutou ke koutou faka koloaʼia takotou ʼu faikole?
Ko te Tohi-Tapu ʼe mole ko he tohi ʼe tuʼu ai pe ni ʼu faikole. Kae, ʼe feala ke ʼui, ko te tohi lahi ʼaia e tahi ʼo ʼuhiga mo te faikole. Ko te ʼu tohi faka Hepeleo ʼo te Tohi-Tapu ʼe maʼu ai te ʼu faikole e 150 tupu. Ko ʼihi ʼe nounou; ko ʼihi ʼe loloa. Neʼe fai te ʼu faikole ʼaia ʼi muʼa ʼo te kaugamālie peʼe neʼe fai ʼāteaina pe, neʼe fai e te ʼu hau peʼe ko te kau pilisoni, ʼi te temi ʼaē ʼe nātou mālo ai peʼe ʼi te temi ʼaē ʼe nātou mamahi ai. Ohage ko te hiva ʼa Tavite ʼi te Pesalemo 65:2, “ko te hahaʼi kehekehe pe” ʼe nātou haga kia Sehova, “ia Ia ʼaē ʼe fagono ki te faikole.” He koʼe koa neʼe tokoni te ʼAtua ki te ʼu tagata faitohi ʼo te Tohi-tapu ke lahi tanatou hiki te ʼu taʼi faikole ʼaia?
Moʼo tali ki te fehuʼi ʼaia, koutou vakaʼi ia 2 Timoteo 3:16. ʼE ʼui fēnei: “Ko te Tohi-Tapu katoa ʼe haʼu ia mai te ʼAtua pea ʼe ʼaoga.” Koia, ko te ʼu faikole faka Tohi-Tapu neʼe tohi ʼi te Tohi-Tapu moʼo taki tatou, ohage ko te ʼu lea faka polofeta, ko te ʼu pelesepeto, pea mo te ʼu hisitolia. ʼE lava feafeaʼi ke fua manuʼia te ʼu faikole ʼaia kia tatou?
ʼAki he vakaʼi fakalelei ʼo te ʼu faikole ʼaē ʼi te Tohi-Tapu, ʼe feala ke tou ʼiloʼi te ʼu faikole ʼaē neʼe fai ʼi te ʼu ʼaluʼaga ʼe tatau mo ʼaē ʼa tatou. ʼE feala ki ʼatatou ʼu faikole ke kehekehe ʼuhi ko te meʼa ʼaē ʼe tou kole peʼe ko te ʼaluʼaga ʼaē ʼe tau mo tatou. Tahi ʼaē, ʼe tou maʼu anai he ʼu kupusiga palalau fakavikiviki foʼou pea mo he ʼu fakafetaʼi pea ʼe tou maʼu anai ni ʼu palalau maʼuhiga ʼo ʼuhiga mo ʼatatou ʼu faikole pea mo ʼatatou ʼu kolekole. Ko tona fakanounou pe, ko te ʼu faikole ʼaē ʼi te Tohi-Tapu ʼe feala ke nātou faka koloaʼia tatatou ʼu faikole.
Ia Malia, ʼaē neʼe liliu ko te faʼe ʼa Sesu, neʼe ko te fafine ia ʼe ʼiloga mai, neʼe ina fakaʼaogaʼi lelei te ʼu kupusiga palalau ʼaē ʼo te ʼu faikole neʼe tohi ʼi te Tohi-Tapu. Neʼe ʼaʼahi ki tona kāiga ko Elisapeta pea ki muli age neʼe nā fānauʼi toko lua tanā ʼu tama ʼaki te tokoni fakaʼatua. Neʼe fai e Malia te ʼu fakavikiviki pea mo te ʼu fakafetaʼi ki te ʼAtua, pea ko ʼihi ʼana ʼu palalau ʼe tatau ʼosi mo te ʼu palalau ʼe maʼu ʼi te faikole ʼi te ʼu Tohi Faka Hepeleo ʼo te Tohi-Tapu. ʼE ʼiloga ia neʼe māhani ia Malia ki te faikole ʼaē neʼe fai e Ana, te faʼe ʼa Samuele te polofeta. Neʼe fānauʼi pe foki e Ana tana tama ʼaki te tokoni ʼa te ʼAtua, kua hili kiai taʼu e 1 000. E lagi neʼe feala pe ke metitasioʼi e Malia te faikole ʼaia ʼuhi ʼe ina fakatātā lelei te ʼu meʼa ʼaē neʼe ʼi tona loto.—1 Samuele 2:1-10; Luka 1:46-55.
Kae feafeaʼi koutou? ʼE feala koa ke koutou manatuʼi he faikole ʼi te Tohi-Tapu neʼe fai ʼi ni ʼu ʼaluʼaga ʼe tatau mo te ʼu meʼa ʼaē ʼe felāveʼi mo koutou? Ko te maʼu, pea mo te lau, pea mo te metitasioʼi ʼo te ʼu taʼi faikole ʼaia ʼe tokoni anai kia koutou ke koutou faka koloaʼia takotou ʼu felogoi mo te ʼAtua. ʼI te alatike ka hoa mai, ʼe mātou fakaafe koutou ke koutou vakaʼi te ʼu faikole e tolu ʼi te Tohi-Tapu. Ko te ʼu faikole neʼe fai ʼi te ʼu ʼaluʼaga kehekehe, e lagi ʼe tatau pe mo te ʼu ʼaluʼaga ʼaē ʼe tau mo koutou.