Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
© 2022 Christian Congregation of Jehovah’s Witnesses
VAHAʼA ʼO TE ʼAHO 2-8 ʼO SANUALIO
TE ʼU KOLOA ʼO TE TOHI-TAPU | 2 HAU 22-23
“He Koʼe ʼe Tonu Ke Tou Agavaivai?”
Neʼe ʼOfa Ia Sehova Ki Te Tagata Agavaivai Ko Sosiasi
ʼI te kei hegihegi, neʼe gaue fakapotopoto te hahaʼi ʼae neʼe natou toe gaohi te fale lotu. ʼE mahino papau ia neʼe fakafetaʼi ia Sosiasi kia Sehova, ʼi te toe gaohi e te kau gaue te ʼu naunau ʼo te fale ʼo te ʼAtua ʼae neʼe maumauʼi e ʼihi ʼi ʼana ʼu kui agakovi. Neʼe haʼele lelei te gaue, pea neʼe haʼu ia Safani mo te ʼu logo. Pea kotea ʼae neʼe ina puke ʼi tona nima? Neʼe ko te takaiga tohi! Neʼe ina fakamahino age ko te Pelepitelo Lahi ko Ilikia neʼe ina maʼu “te tohi ʼo te lao ʼa Sehova ʼae neʼe fakatoʼo ki te nima ʼo Moisese.” (2 Koloniko 34:12-18) ʼI toe meʼa maʼuhiga ʼae neʼe maʼu ʼe mahino papau ia neʼe ko te ʼuluaki hiki ʼaia ʼo te Lao!
Neʼe kua fia logo ia Sosiasi ki te ʼu folafola fuli ʼo te tohi. ʼI te lolotoga lau e Safani ia te tohi, neʼe fia iloʼi e te hau pe ʼe feafeaʼi anai hana maʼuliʼi pea mo te hahaʼi te ʼu folafola. Neʼe malave tafito kia te ia te fakamaʼuhigaʼi e te tohi ʼaia ia te tauhi maʼa, pea mo tana fakakikite te ʼu malaʼia pea mo te fakaʼaunofo ʼae ka hoko ki te hahaʼi mo kapau ʼe natou lagolago ki te lotu hala. ʼI te kua mahino ʼa Sosiasi neʼe mole natou fakahoko te ʼu folafola fuli ʼa te ʼAtua, neʼe ina haeʼi ai tona kofu pea neʼe ina fakatotonu fenei kia Ilikia mo Safani, pea mo ʼihi: ‘Olo ʼo fakafehuʼi ia Sehova ʼo ʼuhiga mo te ʼu folafola ʼo te tohi ʼaia, he ʼe lahi te hauhau ʼo Sehova kia tatou, koteʼuhi ko ʼatatou ʼu kui tagata neʼe mole natou fakalogo ki te ʼu folafola ʼo te tohi ʼaeni.’—2 Hau 22:11-13; 2 Koloniko 34:19-21.
Neʼe ʼOfa Ia Sehova Ki Te Tagata Agavaivai Ko Sosiasi
Neʼe olo te ʼu tagata ʼave logo ʼa Sosiasi ki te fafine polofeta ko Ulita ʼi Selusalemi, pea neʼe natou toe liliu mai mo te ʼu logo. Neʼe fakaha e Ulita te folafola ʼa Sehova, ʼo ina ui ko te ʼu malaʼia ʼae ʼe tuʼu ʼi te tohi ʼaia, ʼe hoko anai ki te puleʼaga aposita. Kae ʼe mole sio anai ia Sosiasi ki te malaʼia ʼuhi ko tana agavaivai ʼae ia muʼa ʼo Sehova ʼAtua. ʼE tuku fakatahi anai ia mo tana ʼu kui tagata, pea ʼe takoto anai ʼi tona faitoka ʼi te tokalelei.—2 Hau 22:14-20; 2 Koloniko 34:22-28.
Te ʼu Koloa Fakalaumalie
ʼE Feala Hakotou Malo Logo pe Hakotou Faʼahiga Ako
Logo pe te ʼu aluʼaga kovi ʼo te temi ʼae neʼe kei tamasiʼi ai, neʼe fakatuʼutuʼu e Sosiasi ke ina fai te meʼa ʼae ʼe lelei kia mata ʼo Sehova. Neʼe lelei tona temi hau koia ʼae ʼe ui fenei ai e te Tohi-Tapu: “ ʼI muʼa atu ʼo ia, neʼe mole ʼi ai he hau ohage ko ia, neʼe liliu mai kia Sehova ʼi tona loto katoa, mo tona nefesi katoa pea mo tona malohi katoa, ʼo mulimuli ki te lao katoa ʼa Moisese; pea ʼi tana ʼosi mate, neʼe mole ʼi ai he tahi neʼe tatau mo ia.”—2 Hau 23:19-25.
Ko he faʼifaʼitaki lelei ʼae neʼe tuku e Sosiasi kia natou ʼae neʼe natou maʼuli mamahi ʼi te temi ʼae neʼe kei natou liliki ai! Kotea ʼae ʼe tou ako mai tana faʼifaʼitaki? Kotea ʼae neʼe tokoni kia Sosiasi ke ina filifili te meʼa ʼae ʼe totonu pea mo haga fai te meʼa ʼaia?
VAHAʼA ʼO TE ʼAHO 9-15 ʼO SANUALIO
TE ʼU KOLOA ʼO TE TOHI-TAPU | 2 HAU 24-25
“Kotou Nofo Tokaga”
Kua Ovi Mai Te ʼAho ʼo Te Fakamau ʼa Sehova!
2 ʼE mahino ia, ʼaki te faifakakikite ʼa Sofonia neʼe iloʼi ai e te tupulaga ko Sosiasi, ʼe maʼua ke pulihi te tauhi heʼe maʼa ʼi Suta. Kae ko te ʼu meʼa ʼae neʼe fai e te hau moʼo pulihi ʼi te fenua ia te lotu hala, neʼe mole ina pulihi katoa te agakovi ʼa te hahaʼi peʼe fakamolemole ia te ʼu agahala ʼo tana kui, te Hau ko Manase, ʼae neʼe ina “fakafonu ai ia Selusalemi ʼaki te toto heʼe hala.” (2 Hau 24:3, 4; 2 Koloniko 34:3) Koia neʼe tonu ke hoko moʼoni te ʼaho ʼo te fakamau ʼa Sehova.
Ko He ʼu Puani ʼAoga ʼo Te Tohi ʼa Selemia
Ko te taʼu 607 ʼi muʼa ʼo totatou temi. ʼE ko te 11 taʼu ʼo te nofo hau ʼa Setesiasi. Kua hili ki ai mahina ʼe 18 ʼo te fakaʼauha ʼo Selusalemi e te Hau ʼo Papiloni ko Nepukanesa. ʼI te fitu ʼaho ʼo te nima mahina ʼo te 19 taʼu ʼo te nofo hau ʼa Nepukanesa, ko Nepusalatane te pule ʼo te kau tagata leʼo, neʼe tau ki Selusalemi. (2 Hau 25:8) Lagi mai te tuʼa kaupa ʼo te kolo, neʼe vakavakaʼi e Nepusalatane ia te aluʼaga ʼo te nofo pea mo ina fai he fakatuʼutuʼu moʼo tauʼi te kolo. Hili ʼaho e tolu ki muli age, ʼi te hogofulu mahina, neʼe ‘haʼu,’ pe neʼe hu ki Selusalemi. Pea neʼe tutu ai te kolo.—Selemia 52:12, 13.
Te ʼu Koloa Fakalaumalie
Ko He ʼu Puani Maʼuhiga ʼi Te Tohi ʼo Lua Hau
24:3, 4. ʼUhi ko te ʼu ligi toto ʼa Manase, ko Sehova “neʼe mole ina tali ke ina fakamolemole” kia Suta. ʼE fakaʼapaʼapa ia Sehova ki te toto ʼo natou ʼae ʼe heʼe hala. ʼE feala ke tou falala ʼe fai anai e Sehova he lagavaka ʼo ina fakaʼauha ia natou ʼae neʼe natou liligi te toto heʼe hala.—Pesalemo 37:9-11; 145:20.
VAHAʼA ʼO TE ʼAHO 16-22 ʼO SANUALIO
TE ʼU KOLOA ʼO TE TOHI-TAPU | 1 KOLONIKO 1-3
“Ko Te Tohi-Tapu ʼe Mole Ko He Tohi Fagana”
Neʼe Maʼuʼuli Moʼoni Koa Ia Atama Mo Eva?
Tou vaka’i age mu’a ia te tohi hako ʼo te kau Sutea ʼae ʼe tu’u ia 1 Koloniko kapite 1 ki te 9, pea ʼi te Evaselio ʼo Luka te kapite 3. Ko te ’u hologa ʼaia, neʼe fakaofoofo tona tohi ke katoa, ʼe fakamoʼoni kia taʼiake ʼe 48 mo taʼiake ʼe 75. ʼE fakatuʼu tohi e Luka ia te hologa ʼo Sesu Kilisito, ʼo feia ki te hologa hau ʼo te kau pelepitelo ʼo te pule’aga ʼo Iselaele. ʼE ha ʼi te ’u hologa ʼaia, ia ni haha’i iloa ohage ko Salomone, ko Tavite, Sakopo, Isaake, Apalahamo, Noe pea mo Atama. ʼI te ʼu fakaau ʼaia, ʼe fakamoʼoni e te ’u higoa fuli, ia ni hahaʼi neʼe maʼuʼuli moʼoni, ko te ’u fakaau takitahi ʼe ina fakamoʼoni ia Atama ko he tahi neʼe maʼuli moʼoni, pea ko te ʼuluaki ʼulu matuʼa ʼaia.
Ko Noe Pea Mo Te Tulivio: ʼE Ko He Fakamatala Moʼoni, Kae Mole Ko He Fagana
Ko koga tohi ʼe lua ʼo te Tohi-Tapu ʼo ʼuhiga mo te ʼu hologa ʼe nā fakamoʼoni ko Noe neʼe ko he tahi neʼe maʼuli moʼoni. (1 Koloniko 1:4; Luka 3:36) Neʼe fai e Esetalasi pea mo Luka, ia te lisi ʼo te ʼu hologa ʼaia, ʼo nā fai he ʼu kumi loloto. Neʼe tohi e Luka ia te hologa ʼo Sesu Kilisito ʼo aʼu kia Noe.
Neʼe Maʼuʼuli Moʼoni Koa Ia Atama Mo Eva?
Tou talanoa muʼa ki te akonaki Fakatohi-Tapu ʼe iloʼi lelei e natou fuli ʼe tauhi lotu: Te totogi. ʼO mulimuli ki te akonaki ʼaia, neʼe foaki e Sesu Kilisito ia tona maʼuli haohaoa ko he sakilifisio faitotogi ke fakaʼateainaʼi te tagata fuli mai ʼanatou agahala. (Mateo 20:28; Soane 3:16) ʼE tou iloʼi ko te totogi, ko he totogi ʼe tau pea ʼaoga, ʼe foaki mo’o totogi ʼo te faʼahi neʼe pulihi peʼe taʼofi. Ko te tupuʼaga ʼaia ʼo te fakahigoa e te Tohi-Tapu ia Sesu “ko te totogi ʼae neʼe ʼaoga.” (1 Timoteo 2:6) Kae neʼe ʼaoga kitea? ʼE fakamahino fenei e te Tohi-Tapu: “Koteʼuhi ohage pe ko te mamate ʼa te hahaʼi fuli ʼuhi ko Atama, ʼo toe feia aipe ʼe toe maʼuʼuli ake anai te hahaʼi fuli ʼaki ia Kilisito.” (1 Kolonito 15:22) Ko te maʼuli haohaoa ʼae neʼe sakilifisioʼi e Sesu moʼo totogi ʼaki te hahaʼi fakalogo, ʼe hage pe ko te maʼuli haohaoa ʼae neʼe pulihi e Atama ʼuhi ko te agahala ʼae neʼe hoko ʼi Eteni. (Loma 5:12) ʼE mahino ia, kapau la neʼe mole maʼuli moʼoni ia Atama, ʼe mole leva he ʼuhiga ʼo te sakilifisio faitotogi ʼa Sesu.
Te ʼu Koloa Fakalaumalie
it-1 977 ¶2-3
Hologa
Te ʼu Higoa ʼo Te Hahaʼi Fafine. ʼI te ʼu tohi hako, neʼe tahitahiga te tohi ʼo te higoa ʼo he fafine, gata pe mo kapau neʼe ʼi ai hona ʼuhiga ʼi te hisitolia. Ia Senesi 29:11, 30, neʼe tohi te higoa ʼo Salai (Sala), koteʼuhi neʼe tonu ke haʼu te hologa mai ia ia, kae mole mai he tahi age ʼohoana ʼo Apalahamo. Neʼe lagi tohi te higoa ko Milika ʼi te vaega ʼaia, ʼuhi ko ia ko te kui ʼa Lepeka, te ʼohoana ʼo Isaake, ko te faʼahiga fakaha ʼaia ʼo te ʼu haʼuʼaga ʼo Lepeka, ʼe kaiga mo Apalahamo, koteʼuhi neʼe mole tonu ke ʼohoana ia Isaake ki te ʼu hahaʼi ʼo te ʼu puleʼaga. (Sen 22:20-23; 24:2-4) Ia Senesi 25:1 ʼe tohi te higoa ʼo Ketula, te ʼohoana ʼo Apalahamo ki ʼamuli age ʼi tona maʼuli. ʼE ha ʼaki mai, neʼe toe ʼohoana ia Apalahamo hili te mate ʼa Sala, pea neʼe kei feala pe ke fanaunau Apalahamo hili taʼu ʼe 40 ki te toe fakamaʼuli fakamilakulo e Sehova ʼona fealagia. (Lom 4:19; Sen 24:67; 25:20) ʼE mahino mai, ko Matiane mo te ʼu telepi Alape ʼe kaiga mo Iselaele.
Ko Lea, mo Lasele, pea mo te ʼu fafine ʼo Sakopo mo ʼana tama ʼae neʼe tupu ai, ʼe tuʼu tohi fuli. (Sen 35:21-26) ʼE tokoni mai ke tou mahino ki te faʼahiga aga ʼa Sehova ki ʼanatou ʼu tama ʼaia, ki ʼamuli age. Ko te tupuʼaga ʼaia, ʼo te tohi ʼo te ʼu higoa ʼo te tahi ʼu fafine ʼi te ʼu tohi hako. Ka foaki he tofiʼa ʼaki he fafine, neʼe tohi tona higoa ʼi te ʼu tohi hako. (Num 26:33) Kae neʼe makehe leva ia Tamale, mo Laape pea mo Lute. Neʼe kau te ʼu fafine ʼaia ki te hologa ʼo te Mesia, ia Sesu Kilisito ʼuhi he ʼe neʼe makehe te ʼu aluʼaga neʼe fakahoko ʼaki ia natou. (Sen 38, Lut 1:3-5; 4:13-15; Mat 1:1-5) Neʼe tohi leva ʼihi age hahaʼi fafine ʼi te ʼu tohi hako ohage ko 1 Koloniko 2:35, 48, 49; 3:1-3, 5.
VAHAʼA ʼO TE ʼAHO 23-29 ʼO SANUALIO
TE ʼU KOLOA ʼO TE TOHI-TAPU | 1 KOLONIKO 4-6
“Kotea ʼAe ʼe Ha ʼi ʼAku Faikole ʼo ʼUhiga Mo Au?”
Ia Ia “ ʼAe ʼe Fagono Ki Te Faikole”
Ko Saepete neʼe ko he tagata faikole. ʼE ina kamata ʼana kole ʼaki ia tana kole ia te tapuakina ʼa te ʼAtua. Hili ia pea ina fai kole ʼe tolu ʼe ha ai te malohi ʼo tana tui.
ʼUluaki, ʼe ui fenei e Saepete: “Fakalahi toku fenua.” (Vaega10) Ko te tagata fakapotopoto ʼaeni ʼe mole lotomanumanū ki te ʼu kele ʼo ʼona tatau. ʼE mahino ia, ʼe fakaʼuhiga tana faikole ki te hahaʼi kae mole ki te ʼu kele. ʼE ina kole ke lahi tona fenua ʼaki te tokalelei, ko tona fakaʼuhiga ke lahi age te kau atolasio ʼo te ʼAtua moʼoni.
Lua, ʼe kole e Saepete ki te ʼAtua ke maʼu e ia Tona “nima”. ʼE fakata te nima ʼo te ʼAtua, ia tona malohi gaue, ʼae ʼe ina fakaʼaogaʼi ke tokoni ki te hahaʼi ʼae ʼe atolasio age ki ai. (1 Koloniko 29:12) Ke ina tali te meʼa ʼae lotomamahi ki ai, ʼe haga ia Saepete ki te ʼAtua ʼae ʼe mole nounou tona nima ki ʼae ʼe tui ki ai.—Esaia 59:1.
Tolu, ʼe kole fenei e Saepete: “Puipui au mai te malaʼia, ke mole hoko mai kia au he meʼa ʼe kovi!” ʼI heni, ʼe mole kole e Saepete ke hao mai te malaʼia, kae ke ʼaua naʼa ina logoʼi te mamahi.
ʼE ha ʼi te faikole ʼa Saepete, ʼe lototokaga ki te tauhi moʼoni, pea ʼe falala katoa kia Ia ʼae ʼe fagono ki te ʼu faikole. Neʼe feafeaʼi te tali ʼa Sehova ki ai? ʼE ui ʼi te fakamatala: “Pea neʼe tali ai e te ʼAtua tana kole.”
Te ʼu Koloa Fakalaumalie
Ko He ʼu Puani Maʼuhiga ʼi Te Tohi ʼo ʼUluaki Koloniko
5:10, 18-22. ʼI te temi ʼo te Hau ko Saulo, neʼe malo te ʼu telepi ʼo te potu esite ʼo Solotane ʼi te kau Akelite, logo la neʼe natou kaugamalie age. Neʼe tupu he ko te ʼu tagata malolohi ʼo te ʼu telepi ʼaia neʼe natou falala kia Sehova pea mo natou kole ke lagolago age kia natou. Tou falala katoa kia Sehova ʼi te tau fakalaumalie ʼae ʼe tou fakafeagai ai ki te ʼu fili ʼae ʼe fakaofoofo.—Efeso 6:10-17.
VAHAʼA ʼO TE ʼAHO 30 ʼO SANUALIO–5 ʼO FEPUALIO
TE ʼU KOLOA ʼO TE TOHI-TAPU | 1 KOLONIKO 7-9
“’E Feala Ke Kotou Fakahoko He ʼu Gaue Faigataʼa ʼAki Te Tokoni ʼa Sehova”
Ko He ʼu Puani Maʼuhiga ʼi Te Tohi ʼo ʼUluaki Koloniko
9:26, 27. Ko te kau Levite ʼae neʼe natou leʼoleʼo te ʼu matapa neʼe foaki age kia natou te gaue maʼuhiga. Neʼe foaki age kia natou te kalavi ʼo te huʼaga ki te ʼu potu tapu ʼo te fale lotu. Neʼe ko he ʼu hahaʼi neʼe feala ke natou falala ki ai moʼo avahi ʼo te ʼu matapa ʼi te ʼaho fuli pe. Neʼe foaki mai te maʼua ʼae ke tou palalau ki te hahaʼi fuli pe ʼi totatou telituale pea mo tokoni kia natou ke natou atolasio kia Sehova. ʼE mole tonu koa ke tou agatonu pea ke tau mo tatou ia te falala, ohage ko te kau Levite ʼae neʼe natou leʼoleʼo te ʼu matapa?
w11 15/9 32 ¶7
Ko Fineasi ʼe Ko He Faʼifaʼitaki Lelei Ke Muliʼi ʼi Te Temi ʼo Te Fihifihia?
Neʼe fua e Fineasi ia ni kavega mamafa ʼi te kokelekasio ʼo Iselaele, pea ʼuhi ko tona lototoʼa, tona poto mo tana falala ki te ʼAtua, neʼe malo ai ʼi ʼona fihifihia. Neʼe fua lelei tana fakalogo, he neʼe tapuakiʼi e Sehova. Hili teitei taʼu ʼe afe, neʼe tohi e Esetalasi ʼaki te takitaki ʼo te laumalie maʼoniʼoni: “Neʼe ko Fineasi, te foha ʼo Eleasale ʼae neʼe ina takitaki ia natou ʼi te temi muʼa, pea neʼe nofo ia Sehova mo ia.” (1 Klk 9:20) Ke nofo Sehova mo natou fuli ʼae ʼe fua kavega ʼi te kokelekasio Fakakilisitiano pea mo ʼana kaugana fuli ʼae ʼe agatonu.
Te ʼu Koloa Fakalaumalie
Tou Hiva Kia Sehova!
6 ʼEi, ʼaki tana ʼu polofeta, neʼe fakatotonu e Sehova ki tana kau atolasio ke natou fakavikiviki age kia te ia ʼaki he ʼu hiva. Neʼe fakaʼateaina te kau hiva mai te ʼu maʼua fakapelepitelo ʼae neʼe fakamaʼua ki te kau Levite ʼae, ke feala ai hanatou maʼu honatou temi feʼauga moʼo fai he ʼu hiva pea mo he ʼu musika, pea tafito ke natou akoako.—1 Klk. 9:33.
VAHAʼA ʼO TE ʼAHO 6-12 ʼO FEPUALIO
TE ʼU KOLOA ʼO TE TOHI-TAPU | 1 KOLONIKO 10-12
“Faiga Malohi Ke Ke Fai Te Finegalo ʼo Te ʼAtua”
“Ako Mai Kia Au Te Fai o Tou Finegalo”
12 ʼE ʼi ai te tahi ako ʼe feala ke tou taʼofi mai te ʼu faʼahiga fai ʼa Tavite. Neʼe poto ia Tavite ʼi te fakaʼaogaʼi ʼo te ʼu pelesepeto pea neʼe ina fia maʼuliʼi. Ko te pelesepeto ʼe ko he moʼoni ʼe tokoni mai ke tou fai he ʼu tonu ʼe lelei pea mo tou mahino ki te faʼahiga manatu ʼa Sehova. Ohage pe ko tona fai e Tavite, ʼe feala ke tou mahino ki he pelesepeto moka tou vakavakaʼi te ʼu lao ʼa Sehova. Ohage la, neʼe ui e Tavite ʼe ina fia inu “he vai mai te foi tane ae e tuu i te matapa o Petelehemi.” Kae neʼe puleʼi e te kau Filisitini ia Petelehemi. Kae logo la tona fakatupu tuʼutamaki, neʼe olo ia te ʼu tagata solia ʼe toko tolu ʼa Tavite ki te kolo ʼaia ʼo ʼohu mai te moʼi vai. Kae neʼe mole fia inu e Tavite ia te moʼi vai ʼaia. “Nee ina huai leva ia ia mua o [Sehova].” Kotea tona tupuʼaga? Neʼe ʼui fenei e Tavite: “Ke taupau au e toku Atua, ke aua naa au fai te mea aena! Pe e au inu anai te toto o te kau tagata aeni, ae nee olo o tetehii ai onatou mauli? Koteuhi nee natou aumai te vai aeni o totogi aki onatou mauli.”—1 Klk. 11:15-19.
13 Neʼe iloʼi e Tavite, ʼe fakatotonu ʼi te Lao, ke liligi ia te toto ia muʼa ʼo Sehova kae ʼe mole tonu ke kai. Neʼe toe mahino ia Tavite ki te fakaʼuhiga totonu ʼo te Lao ʼaia. Neʼe iloʼi e Tavite “ko te mauli o te sino e nofo i te toto.” Kae ʼi te aluʼaga ʼaia, neʼe mole ko te toto, neʼe ko te moʼi vai. He koʼe neʼe mole fia inu e Tavite ia te moʼi vai ʼaia? Neʼe ina fai ia te faʼahi ʼaia, he neʼe mahino ki te pelesepeto ʼae neʼe fakatafito ki ai ia te lao ʼo ʼuhiga mo te toto. Neʼe ha mai ai ia te maʼuhiga ʼo te toto kia mata ʼo Sehova. Koia, mai tona aluʼaga ʼae neʼe feala pe ke natou mamate ʼi tanatou olo ʼo ohu mai te moʼi vai, neʼe mahino ai kia Tavite kapau ʼe ina inu ia te moʼi vai, ʼe ina fakaha ai ia tana mole fakaʼapaʼapa ki te maʼuhiga ʼo tonatou toto. ʼO mole ui ke ina inu ia te moʼi vai, neʼe ina haga ʼo huaʼi ki te kele.—Lev. 17:11; Tet. 12:23, 24.
Ke Akoʼi ʼOkotou Leʼo ʼo Loto ʼAki Te ʼu Lao Pea Mo Te ʼu Pelesepeto ʼa Te ʼAtua
5 Kapau ʼe tou loto ke ʼaoga mai te ʼu lao ʼa ʼAtua, ʼe mole gata ʼaki pe tatatou lau peʼe ko tatatou iloʼi te ʼu lao ʼaia. ʼE tonu ke tou leleiʼia pea mo fakaʼapaʼapa ki ai. ʼE ui fenei ʼi te Tohi-Tapu: “Koutou fehia ki te kovi pea koutou oofa ki te lelei.” (Amosi 5:15) ʼE tou fai feafeaʼi te faʼahi ʼaia? ʼE tonu ke tou maʼu te faʼahiga sio mo te faʼahiga manatu ʼa Sehova. Tou fakakaukauʼi te aluʼaga ʼaeni. Ohage la ʼe mole kotou moe lelei, pea ʼe ui atu e te toketa ke kotou tokaga ki takotou faʼahiga kai, ke kotou fai gaoʼi, pea mo fetogi tokotou faʼahiga maʼuli. ʼE kotou muliʼi lelei ʼana tokoni pea ʼe fua lelei kia koutou. Kotea takotou manatu ʼo ʼuhiga mo te ʼu tokoni ʼa te toketa ʼaia?.
6 ʼE toe feia pe, neʼe tuku mai e totatou Tupuʼaga te ʼu lao moʼo puipui ʼaki ʼo tatou mai te ʼu nunuʼa ʼo te agahala pea ke hikihiki ai totatou faʼahiga maʼuli. Ohage la, ʼe akoʼi mai ʼi te Tohi-Tapu ʼe mole tonu ke tou loi, ke tou faikaka, ke tou kaihaʼa, ke tou fai he ʼu aga heʼe ʼaoga, ke tou aga malohi, peʼe ke tou fai he ʼu meʼa fakamanamana. (Lau ia Taaga Lea 6:16-19; Fakaha 21:8) Ka tou fakalogo kia Sehova pea tou sio ki ʼona fua lelei, ʼe hikihiki anai totatou ʼofa ʼae kia te ia pea mo ʼana lao.
Te ʼu Koloa Fakalaumalie
it-1 492 ¶2-3
Loto
ʼE Feafeaʼi Te Tauhi ʼAki “He Loto Katoa?” Ko te mafu ʼe tonu ke katoa ke haʼele lelei, kae ko te mafu ʼae ʼe ina fakata te loto, ʼe feala ke vaelua. Neʼe ui fenei e Tavite ʼi tana faikole: “Fakaliliu toku loto ke katoa ke au manavasiʼi ki tou huafa,” ko tona fakaʼuhiga, ʼe feala ke vaelua tokita loto, moka hoha peʼe tuʼania. (Ps 86:11) ʼE feala ke vaelua te loto ʼo he tahi, ko tona fakaʼuhiga ke tauhi mafana. (Ps 119:113; Apk 3:16) ʼE toe feala ke maʼu e he tahi ni ‘loto ʼe lua,’ ʼi tana faiga ke ina tauhi kia pule ʼe lua, ʼaki tana fakaha koviʼi he aluʼaga, kae manatu ia ki he tahi age aluʼaga. (1Kk 12:33; Ps 12:2, nota) Neʼe fakatokaga malohi e Sesu ia natou ʼae ʼe malualoi, ʼae ʼe natou maʼu ni loto ʼe lua.—Mat 15:7, 8.
Ko ʼae ʼe loto ke leleiʼia e te ʼAtua, ʼe mole tonu ke vaelua tona loto peʼe ina maʼu ni loto ʼe lua, kae ke tauhi ʼaki he loto katoa. (1Kk 28:9) ʼE ʼaoga he ʼu faiga fakamalotoloto, koteʼuhi ʼe kaka lahi te mafu pea ʼe falele tuʼumaʼu ki te kovi. (Sel 17:9, 10; Sen 8:21) ʼE ʼaoga te faikole fakamalotoloto ke tauhi te loto ke katoa (Ps 119:145; Tgl 3:41), te ako tuʼumaʼu ʼo te Folafola ʼa te ʼAtua (Est 7:10; Taa 15:28), te kau tuʼumaʼu ki te faifakamafola ʼo te logo lelei (vaka’i mo Sel 20:9), pea mo te fakakauga kia natou ʼae ʼe katoa ʼonatou loto kia Sehova.—Vakaʼi mo 2Ha 10:15, 16.
VAHAʼA ʼO TE ʼAHO 13-19 ʼO FEPUALIO
TE ʼU KOLOA ʼO TE TOHI-TAPU | 1 KOLONIKO 13-16
“’E Lelei’ia e Sehova ʼAtatou Gaue Mo Kapau ʼe Tou Mulimuli Ki ’Ana Fakatuʼutuʼu”
ʼE Kotou Kumi Koa, “ ʼE ʼIfea Ia Sehova?”
12 ʼI te ʼosi fakaliliu ʼo te aleka ʼo te fuakava ki Iselaele, pea mo fualoa tona tuku ʼi Kiliate-Sealime, neʼe loto e te Hau ko Tavite ke hiki te aleka ki Selusalemi. Neʼe felogoi mo te ʼu pule ʼo te hahaʼi pea neʼe ina ui age kia natou ko te Aleka ʼe ʼave anai ‘mo kapau ʼe natou lotolelei ki ai pea mo tali e Sehova.’ Kae ki te faʼahi ʼaia neʼe mole muliʼi fakalelei e Tavite ia te finegalo ʼo Sehova. Ka na pau la neʼe fakalogo lelei, neʼe mole ʼave te Aleka ʼi he saliote. Neʼe tonu ke ʼamo e te kau Levite Koatite, ohage ko tona kua fakatotonu e te ʼAtua. Logo la ko Tavite neʼe ina kumi tuʼumaʼu ia Sehova, kae ʼi te lakaga ʼaia neʼe mole ina muliʼi fakalelei te ʼu fakatotonu, pea neʼe fua kovi. Ki muli age, neʼe fakamoʼoni fenei e Tavite: “Ko Sehova totatou ʼAtua neʼe ina taʼi tatou, he neʼe mole tou kumi ia ia ʼo mulimuli ki te lao.”—1 Koloniko 13:1-3; 15:11-13; Numelo 4:4-6, 15; 7:1-9.
ʼE Kotou Kumi Koa, “ ʼE ʼIfea Ia Sehova?”
13 ʼI te hiki mai leva ʼo te Aleka e te kau Levite, mai te ʼapi ʼo Opete-Etome ki Selusalemi, neʼe hivaʼi te hiva neʼe fai e Tavite. ʼI te hiva ʼaia ʼe talanoa ai ki te fakamanatu fakamalotoloto: “Kotou kumi ia Sehova pea mo tona malohi, kotou kumi tuʼumaʼu ia ia. Kotou manatuʼi tana ʼu gaue fakaofoofo ʼae neʼe ina fai, tana ʼu milakulo pea mo tana ʼu fakamau ʼae ʼe haʼu mai tona gutu.”—1 Koloniko 16:11, 12.
Te ʼu Koloa Fakalaumalie
Tou Tauhi Kia Sehova, Te Hau ʼo Te Heʼe Gata
14 Neʼe ʼave leva e Tavite ia te aleka ʼo te fuakava ki Selusalemi. Pea ʼi te ʼaho fakafiafia ʼaia, neʼe hiva fakavikiviki te kau Levite kia Sehova pea mo natou fai ai te ʼu palalau maʼuhiga ʼaeni ia 1 Koloniko 16:31, MN: “Kotou ui fenei ʼi te lotolotoiga ʼo te ʼatu puleʼaga: ‘Ko Sehova kua liliu ʼo Hau!’” Kae mai tona aluʼaga ʼae ko Sehova ko te Hau ʼo te heʼe gata, he koʼe ʼe ui ai neʼe liliu ia ʼo Hau ʼi te temi ʼaia? ʼE liliu ia Sehova ʼo Hau moka ina fakaʼaogaʼi ia tona ʼuhiga pule peʼe ina hinoʼi he tahi moʼona fakafofoga. Ko tatatou mahino ʼae pe liliu feafeaʼi ia Sehova ʼo Hau, ʼe maʼuhiga ʼaupito. ʼI muʼa ʼo te mate ʼa Tavite, neʼe fakapapau age e Sehova ki ai ko tana pule ʼe tuʼu anai ʼo talu ai, ʼo ina ui fenei: “ ʼE au fakatupu moʼoni anai hou hakoga ke hoa atu kia koe, pea ʼe haʼu anai mai ia koe; pea ʼe au fakatuʼu anai tona puleʼaga ke tuʼu malohi.” (2 Sam. 7:12, 13, MN) Neʼe hoko moʼoni te fakapapau ʼaia ʼi te temi ʼae neʼe ha ai te “hakoga” peʼe foha ʼo Tavite ʼi te ʼu taʼu ʼe 1 000 tupu ki muli age. Neʼe ko ai te hakoga ʼaia pea neʼe liliu ʼo Hau ʼi te temi fea?
VAHAʼA ʼO TE ʼAHO 20-26 ʼO FEPUALIO
TE ʼU KOLOA ʼO TE TOHI-TAPU | 1 KOLONIKO 17-19
“Tou Taupau Totatou Fiafia Logo La Te ʼu Aluʼaga Fakatupu Lotomamahi”
Tou Tokagaʼi Te Lelei ʼo Te Kautahi ʼa Sehova
KO TAVITE ʼe kau ʼi te hahaʼi Iselaele makehe ʼo te temi muʼa ʼae ʼe talanoa ki ai te ʼu Koga Tohi-Tapu Fakahepeleo. Ko te tagata tauhi ovi ʼaia, mo faimaholo, mo polofeta, pea mo hau neʼe falala katoa kia Sehova ʼAtua. Ko te felogoi lelei ʼaupito ʼa Tavite mo Sehova neʼe tupu ai tana fia laga he ʼapi maʼa te ʼAtua. Ko te ʼapi ʼaia, peʼe ko te fale lotu, ʼe liliu anai ko te potu tafito ʼo te tauhi moʼoni ʼi Iselaele. Neʼe iloʼi e Tavite ʼe fiafia pea mo tapuakina anai te hahaʼi ʼa te ʼAtua ʼaki te ʼu fakatuʼutuʼu ʼae ka fai ʼo ʼuhiga mo te fale lotu. Koia neʼe hiva fenei ia Tavite: “Fiafia ia ia ʼae ʼe ke filifili [e koe Sehova] pea mo fakaovi mai, ke nofo ʼi tou ʼu malaʼe. ʼE mahino papau ia ʼe matou fiafia anai ʼi te lelei ʼo tou ʼapi, te potu taputapu ʼo te fale lotu.”—Pesalemo 65:4.
Kotou Fiafia ʼi Te ʼu Gaue ʼe Kotou Fakahoko
11 ʼE toe feia pe, ʼe feala ke tuputupu totatou fiafia mo kapau ʼe tou fakahoko lelei te ʼu gaue ʼae neʼe tuku mai ke tou fai. Ohage la, “tokaga tafito” ki te gaue faifakamafola pea mo gaue fakamalotoloto ʼi te kokelekasio. (Gaue 18:5; Hep. 10:24, 25) Teuteu lelei te ʼu fono ke kotou foaki he ʼu tali fakalotomalohi. Fakahoko lelei te ʼu kiʼi akonaki peʼe faipalalau ʼae ʼe tuku atu ke ke fai ʼi te ʼu fono ʼo te vahaʼa. Kapau ʼe kole atu he tahi gaue ʼi te kokelekasio, kotou agatonu ki ai. ʼAua naʼa kotou meʼa noaʼi ʼo ui ko he puli temi te ʼu gaue ʼae neʼe foaki atu. (Taag. 22:29) Ka lahi age takotou manako ki takotou ʼu gaue fakalaumalie, ʼe kotou tuputupu ai mo toe lahi ai tokotou fiafia. (Kal. 6:4) ʼE faigafua anai takotou fakafiafia fakatahi mo he ʼu tehina neʼe foaki age he gaue neʼe kotou fakaʼamu ki ai.—Loma 12:15; Kal. 5:26.
Te ʼu Koloa Fakalaumalie
w20.02 12, te ʼa takai
ʼE Tou ʼOʼofa Mamahi Ia Sehova, Tatatou Tamai
ʼE Tokagaʼi Koa Au e Sehova?
Lagi kua ke fai te fehuʼi ʼaeni: ‘Ko te toko lauʼi miliale hahaʼi ʼi te kele kae he koʼe ʼe tokagaʼi anai au e Sehova?’ Kapau koia, pea ʼe mole ko koe tokotahi. Neʼe tohi fenei e te Hau ko Tavite: “[Sehova], kotea te tagata, ke ke iloi ia ia? Te foha o te tagata, ke ke tokaga ai kia ia?” (Pes. 144:3) Neʼe tui papau ia Tavite ʼe iloʼi lelei e Sehova ia ia. (1 Klk. 17:16-18) ʼO toe feia pe, ʼaki tana Folafola pea mo tana kautahi, ʼe fakamahino atu e Sehova ʼe ina tokagaʼi tou ʼofa ʼae kia te ia. Koʼeni te ʼu tokoni Fakatohi-tapu ʼe feala ke ke tui papau ai ki te faʼahi ʼaia:
• Neʼe kua tokagaʼi koe e Sehova ʼi muʼa ʼo tau tupu.—Pes. 139:16.
• ʼE iloʼi e Sehova ʼau manatu pea mo te ʼu meʼa ʼae ʼe ke logoʼi.—1 Klk. 28:9.
• ʼE fakalogo e Sehova totonu ʼau faikole fuli.—Pes. 65:2.
• ʼE fakafiafiaʼi e ʼau gaue lelei ia Sehova.—Taag. 27:11.
• Neʼe taki mai koe e Sehova totonu.—Soa. 6:44.
• Kapau ʼe ke mate, ʼe feala anai ke fakatuʼuake koe e Sehova he ʼe ina iloʼi lelei ia koe. ʼE ina foaki atu anai he sino mo he ʼatamai foʼou ʼe tatau pe anai mo tou agaaga ʼae ʼi te temi nei.—Soa. 11:21-26, 39-44; Gaue 24:15.
VAHAʼA ʼO TE ʼAHO 27 ʼO FEPUALIO–5 ʼO MALESIO
TE ʼU KOLOA ʼO TE TOHI-TAPU | 1 KOLONIKO 20-22
“Kotou Tokoni Ki Te Kau Tupulaga”
“Ke Akoʼi Te ʼu Meʼa ʼAia Ki He ʼu Tagata Agatonu”
8 Lau ia 1 Koloniko 22:5. Neʼe lagi manatu ia Tavite neʼe heʼeki tokalelei ia Salomone ke ina takitaki ia he toe gaue maʼuhiga feia. Pea tahi, neʼe tonu ke “lelei tukupau” ia te fale lotu, kae ko Salomone neʼe kei tamasiʼi pea neʼe heʼeki ina maʼu he poto feʼauga. Kae neʼe iloʼi e Tavite ʼe tokoni anai ia Sehova kia Salomone ke ina fakahoko te gaue makehe ʼaia. Koia, neʼe faiga malohi aipe ia Tavite ke tokoni ki tona foha ki te tokonaki ʼo te toe gaue maʼuhiga ʼaia.
“Ke Akoʼi Te ʼu Meʼa ʼAia Ki He ʼu Tagata Agatonu”
7 Neʼe lagi lotomamahi ʼaupito ia Tavite he neʼe loto moʼoni ke ina laga he fale lotu moʼo Sehova. Kae neʼe lagolago tuʼumaʼu ki te gaue ʼae ka takitaki e tona foha ko Salomone. Neʼe tokoni ai ia Tavite ki te fakatuʼutuʼu ʼo te kau gaue pea mo te tanaki ʼo te ukamea, mo te kapa, mo te siliva, mo te aulo pea mo te papa. Neʼe mole ina tuʼania ia pe ʼe ko ai ʼae ka vikiʼi ʼo ʼuhiga mo te laga ʼo te fale lotu ʼae ka fakahigoaʼi anai ko te fale lotu ʼo Salomone. Kae neʼe ina fakalotomalohiʼi ia Salomone ʼo ina ui fenei: “I te lakaga nei, sioku foha, ke nofo [Sehova] mo koe, o tupu ke manuia au gaue pea ke ke fakatuu te fale o [Sehova], tou Atua, o hage ko te mea ae nee ina fakaha o uhiga mo koe!”—1 Klk. 22:11, 14-16.
ʼU Matuʼā, ʼe Kotou Tokoni Koa Ki ʼAkotou Fanau Ke Natou Tokalelei Ki Te Papitema?
14 ʼE feala ke tokoni te kau tagata ʼafeā ki te ’u matuʼā, ʼaki tanatou palalau ʼo ʼuhiga mo te ʼu fakatuʼutuʼu fakalaumalie ʼe feala ke fai e ʼanatou fanau maʼa Sehova. Neʼe manatuʼi e te tuagaʼane, neʼe palalau age te tehina ko Russel ʼi tana kei taʼu ono. ʼE ina ui fenei: “Neʼe ina toʼo minuta ʼe 15 ke ma faipalalau ʼo ʼuhiga mo ʼaku fakatuʼutuʼu fakalaumalie.” Kotea ʼae neʼe hoko ki muli age? Neʼe liliu leva te tuagaʼane ʼaia ko he pionie, pea neʼe pionie lolotoga taʼu ʼe 70 tupu. ʼE mahino ia, ka tou fai he ʼu palalau fakalotomalohi ʼe feala ke malave ki te loto ʼo he tahi pea ke fetogi ai tona maʼuli katoa. (Taag. 25:11) ʼE feala ke kole e te kau tagata ʼafeā ki te ʼu matuʼā pea mo ʼanatou fanau ke natou tokoni ki te ʼu gaue ʼo te Fale Fono. ʼE feala ke natou foaki ki te ʼu fanau he ʼu kiʼi gaue ʼo mulimuli pe ki ʼonatou taʼu mo ʼonatou fealagia.
15 ʼE toe feala ke tokoni feafeaʼi ʼihi ʼi te kokelekasio? ʼAki tanatou tokakaga ki te kau tupulaga. Ohage la, ʼe feala ke natou tokagaʼi pe ʼe natou ʼoʼofa moʼoni ia Sehova. ʼE fai koa e te fanau he ʼu tali lelei ʼi te ʼu fono? Neʼe kua ina fai koa hana ʼu kiʼi lautohi Fakatohi-tapu, peʼe ko hana ʼu kiʼi faʼifaʼitaki ʼi te fono ʼo te vahaʼa? ʼE faifakamafola koa ʼi te fale ako? ʼE ina fai koa te meʼa ʼae ʼe lelei moka fakaneke ke ina fai te meʼa ʼae ʼe kovi? Kapau ko ia, ʼe tonu ke vikiʼi ia ia. ʼE tonu ke tou fai he fakatuʼutuʼu ke tou fai palalau mo ia ʼi te kamata pea mo te ʼosi ʼo te fono. Kapau ʼe tou fai te faʼahi ʼaia, pea ʼe logoʼi anai e te kau tupulaga ʼe tokagaʼi natou “i te fakatahi lahi.”—Pes. 35:18.
Te ʼu Koloa Fakalaumalie
Ko He ʼu Puani Maʼuhiga ʼi Te Tohi ʼo ʼUluaki Koloniko
21:13-15. Neʼe fakatotonu e Sehova ki te ʼaselo ke ina fakagata te malaʼia he neʼe manavaʼofa ki te ʼu mamahi ʼae neʼe hoko ki Tana hahaʼi. ʼEi “ ʼe lahi ʼaupito tona ʼu manavaʼofa.”