ʼE Maʼuhiga Koa Totatou ʼu ʼAho Kia Sehova?
“Neʼe puli ia ʼanāfi, ʼi te vaha ʼo te hopo ʼo te laʼā mo te tō ʼo te laʼā, neʼe ko te ʼu hola aulo e lua, ʼe nā takitahi minuta maʼuhiga e onogofulu. ʼE mole feala ke toe totogi mai, koteʼuhi kua pulinoa ia.”—Lydia H. Sigourney, ko he fafine faitohi Amelika (1791-1865).
ʼE HAGE te ʼu ʼaho ʼo totatou maʼuli ʼe siʼisiʼi pea mo vaʼiganoa. Neʼe fakakaukauʼi e te tagata fai pesalemo ia te nounou ʼo te maʼuli pea koia neʼe faikole fēnei ai: “Fakaʼilo mai toku gataʼaga, Ê Sehova, pea mo te fakafuafua ʼo toku ʼu ʼaho, ke ʼau mahino ki toku vaʼiganoa. Koʼeni, ko toku ʼu ʼaho neʼe ke fai ke siʼisiʼi ʼaupito; pea ko te loaloaga ʼo toku maʼuli ʼe hage ia ʼe noa ʼi ʼou muʼa.” Neʼe hoha ia Tavite ʼo faigaʼi ke fiafia te ʼAtua ʼi tona faʼahiga maʼuli, ʼi tana ʼu palalau mo tana aga. ʼI tana fakahā ki te ʼAtua ia tana fakalogo ki ai, neʼe ina ʼui fēnei: “ ʼE ʼau fakatalitali mo haga atu kia te koe.” (Pesalemo 39:4, 5, 7) Neʼe fagono e Sehova. Neʼe ina fakafuafua te ʼu gāue ʼa Tavite pea neʼe ina fakapale ʼo fakafuafua tatau kiai.
ʼE faigafua te maʼumaʼua ʼi te minuta fuli pe ʼo te ʼaho pea mo tatatou tau mo he maʼuli ʼe lahi ʼaupito te ʼu gāue. ʼE feala ke tupu ai he toe tuʼania, tāfito la ʼi te lahi ʼaupito ʼo te meʼa ʼe tonu ke fai mo te ʼu meʼa ʼe tonu ke hoko ʼi te maʼuli ʼi he kiʼi temi siʼisiʼi. ʼE tou hoha koa ohage ko Tavite—ke tou fakahoko totatou maʼuli ke tali e te ʼAtua? Ko te faʼahi ʼe tou ʼiloʼi papau, ko Sehova ʼe sio mai kia tatou pea mo ina sivisivi fakalelei ia tatou takitokotahi. Ko Sopo, ko he tagata neʼe manavasiʼi ki te ʼAtua, neʼe ina ʼiloʼi kua hili kiai taʼu e 3 600, ko Sehova ʼe sio ki tona ʼu ala pea mo ina lau fuli tana ʼu gāue. Neʼe fehuʼi fēnei e Sopo: “Ka fakaʼui maʼua mai anai, ʼe ʼau tali feafeaʼi age anai ki ai?” (Sopo 31:4-6, 14) ʼE feala hatatou fai he puleʼaki ke maʼuhiga totatou ʼu ʼaho kia mata ʼo te ʼAtua ʼo tou fakamuʼamuʼa te ʼu meʼa fakalaumālie, ʼo tou fakalogo ki tana ʼu fakatotonu, pea mo tou fakaʼaogaʼi fakapotopoto totatou temi. Tou vakaʼi fakaleleiʼi age muʼa te ʼu faʼahi ʼaia e tolu.
Tou Hoha Tāfito Ki Te ʼu Meʼa Fakalaumālie
ʼE uga mālohi tatou e te Tohi-Tapu ke tou fakamuʼamuʼa te ʼu meʼa fakalaumālie ʼi tana ʼui fēnei: “Ke koutou ʼiloʼi papau te ʼu meʼa ʼaē ʼe maʼuhiga tāfito.” Koteā te ʼu meʼa tāfito ʼaia? ʼE kau ai “te ʼatamai mālama totonu mo te fakasiosio totonu.” (Filipe 1:9, 10, MN ) Ke tou maʼu te ʼatamai mālama ʼo ʼuhiga mo Sehova ʼe fakamaʼua ai kia tatou ke tou fakaʼaogaʼi fakapotopoto totatou temi. Kae ko te hoha tāfito ki te ʼu meʼa fakalaumālie ʼe ina ʼaumai anai kia tatou he maʼuli ʼe maʼu ai te fakapale pea mo ʼaoga.
ʼE fakamanatu mai e te ʼapositolo ko Paulo ke tou “vakaʼi te meʼa ʼaē ʼe lelei ki te ʼAliki.” Ko tatatou vakaʼi ʼaia ʼe tonu ke ʼalutahi ai mo te vakavakaʼi ʼo te ʼu meʼa ʼaē ʼe ina uga tatou mo te ʼu holi ʼo totatou loto. ʼE hoko atu fēnei e te ʼapositolo: “Koutou haga mahino pe koteā te finegalo ʼo Sehova.” (Efeso 5:10, 17, MN ) Kae koteā koa ʼe tali e Sehova? ʼE ʼui fēnei e te tāʼaga lea faka Tohi-Tapu: “Ko te poto ʼe ko te meʼa ʼaē ʼe maʼuhiga tāfito. Maʼu te poto; pea ʼaki te ʼu meʼa fuli ʼaē ʼe ke maʼu, maʼu mo te ʼatamai. Faka maʼuhiga ia ia, pea ʼe ina hikihiki anai koe.” (Tāʼaga Lea 4:7, 8) ʼE fiafia ia Sehova ʼi he tahi ʼe ina maʼu te poto fakaʼatua pea mo ina maʼuliʼi. (Tāʼaga Lea 23:15) Ko te matalelei ʼo te taʼi poto ʼaia ʼe mole feala ia ke pulihi peʼe ke fakaʼauha. ʼI tona fakahagatonu, ʼe ina hāofaki pea mo puipui tatou ‘mai te ala ʼaē ʼe kovi pea mai ia nātou ʼaē ʼe talanoa ki te ʼu meʼa kovi.’—Tāʼaga Lea 2:10-15.
Koia ʼe fakapotopoto ke ʼaua naʼa maʼu te agamāhani ʼaē ko te mole kei tokakaga ki te ʼu meʼa fakalaumālie! ʼE tonu ke tou fakatuputupu he aga fakafetaʼi ki te ʼu meʼa ʼe ʼui e Sehova pea ke tou manavasiʼi kia te ia. (Tāʼaga Lea 23:17, 18) Logope ʼe feala ia ki he temi pe ke tou maʼu ai te taʼi fakatuʼutuʼu ʼaia, kae ʼe lelei age ke tou foimo fakatuʼu te faʼifaʼitaki ʼaia pea mo tou fakaulu te ʼu pelesepeto faka Tohi-Tapu ki totatou agaaga lolotoga totatou temi tūpulaga. ʼE ʼui fēnei e te Hau poto ko Salomone: “Ke ke manatuʼi foki tou Tupuʼaga lahi ʼi te ʼu ʼaho ʼo tou temi tūpulaga.”—Tagata Tānaki 12:1.
Ko te puleʼaki lelei ke tou fakatuputupu he fakafetaʼi kia Sehova ʼe ko te faikole kia te ia ʼi te ʼaho fuli. Neʼe fakamoʼoni e Tavite ia te maʼuhiga ʼo te falala kia Sehova, koia neʼe tagi fēnei ai ki ai: “Ke ke fagono ki taku faikole, Ê Sehova, pea ke tokaga tou taliga ki taku pāui ke ke tokoni mai. ʼAua naʼa ke nofo fakalogologo ki ʼoku ʼu loʼimata.” (Pesalemo 39:12) ʼE mālohi ʼaupito koa tatatou ʼu felogoi mo te ʼAtua ʼo tupu ai hatatou fetāgihi ʼi ʼihi lakaga? ʼI tona fakahagatonu, kapau ʼe lahi tatatou felogoi mo Sehova ʼo ʼuhiga mo te ʼu meʼa loloto ʼo totatou loto pea mo tou metitasio ki tana Folafola, pea ʼe ōvi mai kia tatou.—Sakopo 4:8.
Tou Ako Te Fakalogo
Ko Moisese neʼe ko te tahi tagata tui neʼe ina fakamoʼoni ki tana fakalogo ki te ʼAtua. Ohage ko Tavite, neʼe lava fakatokagaʼi e Moisese ko te maʼuli ʼe fonu ʼaupito ʼi te fihifihia. Neʼe ina kole ai ki te ʼAtua ke fakahā age ki ai ‘peʼe feafeaʼi he lau ʼo tona ʼu ʼaho ke feala ai hana maʼu he loto fakapotopoto.’ (Pesalemo 90:10-12) ʼE hoki maʼu he loto fakapotopoto ʼaki pe te ako pea mo te maʼuliʼi ʼo te ʼu lao mo te ʼu pelesepeto ʼa Sehova. Neʼe mahino ia Moisese ki te faʼahi ʼaia pea koia neʼe ina faigaʼi ai ke ina fakaulu te moʼoni tāfito ʼaia ki te puleʼaga ʼo Iselaele ʼaki tana tala liuliuga age kia nātou ia te ʼu lao mo te ʼu pelesepeto ʼa te ʼAtua ʼi muʼa ʼo tanatou maʼu te Kele ʼo te Fakapapau. Neʼe tonu ki te hau fakatagata ʼaē ka filifili e Sehova ke pule ki Iselaele, ke ina tohi maʼa ia ia te Lao pea ke ina lau ʼi te ʼaho fuli ʼo tona maʼuli. Koteā tona tupuʼaga? Koteʼuhi ke ina akoʼi te manavasiʼi ki te ʼAtua. Neʼe ko he ʼahiʼahi ʼo te fakalogo ʼa te hau. Ko te meʼa ʼaia neʼe ina tāʼofi ia ia mai te fia māʼoluga age ʼo tona loto ʼi tona ʼu tēhina pea neʼe ina fakaloaloaga ai tona temi hau. (Teutalonome 17:18-20) Neʼe toe lau te fakapapau ʼaia ʼi te ʼui fēnei e Sehova ki te foha ʼo Tavite ʼaē ko Salomone: “Kapau ʼe ke haʼele ʼi toku ʼu ala, ʼo ke taupau taku ʼu lao mo taku ʼu fakatotonu, ohage ko Tavite tau tāmai, pea ʼe ʼau fakatologa anai tou ʼu ʼaho.”—1 Hau 3:10-14.
Ko te fakalogo ʼe ko he faʼahi maʼuhiga ki te ʼAtua. Kapau ʼe tou faka vaʼiganoaʼi he ʼu koga ʼo te ʼu fakamaʼua pea mo te ʼu fakatotonu ʼa Sehova, ʼe ina tokagaʼi te taʼi aga ʼaia. (Tāʼaga Lea 15:3) Ko tatatou ʼiloʼi te faʼahi ʼaia ʼe tonu ke ina uga tatou ke tou faka maʼuhigaʼi te ʼu fakatotonu fuli ʼa Sehova, tatau aipe peʼe faigataʼa tona muliʼi. ʼE fai e Satana ia te ʼu meʼa fuli moʼo ‘tāʼofi tatou’ ʼi tatatou faigaʼi ʼaē ke tou fakalogo ki te ʼu lao mo te ʼu fakatotonu ʼa te ʼAtua.—1 Tesalonika 2:18.
ʼE maʼuhiga tāfito ke tou mulimuli ki te tokoni faka Tohi-Tapu ʼaē ke tou kau ki te ʼu fono ʼuhi ko te tauhi pea mo te fakatahi mo te ʼu tēhina ʼi te tui. (Teutalonome 31:12, 13; Hepeleo 10:24, 25) Koia ʼe lelei ai ke tou fai te fehuʼi ʼaenī: ‘ ʼE ʼau faiga moʼoni koa pea mo ʼau lotomālohi ke ʼau fai te meʼa ʼaē ʼe ʼaoga moʼoni?’ Ko te mole tokaga ʼo kau ki te ʼu fono pea mo maʼu mai ai he ako kae kita faiga ke maʼu he fīmālie faka koloā, ʼe feala pe ke ina fakavaivaiʼi tatatou ʼu felogoi mo Sehova. Neʼe tohi fēnei e te ʼapositolo ko Paulo: “Ke puli ʼi tokotou faʼahiga maʼuli te manako ʼaē ki te paʼaga, koutou fakafeauga pe ki te meʼa ʼaē ʼe maʼu, heʼe neʼe ʼui [e Sehova]: ‘Kailoa ʼe mole ʼau tuku anai koe, kailoa ʼe mole ʼau līaki anai koe!’ ” (Hepeleo 13:5, MN ) Ko te fakalogo ki te ʼu fakatotonu ʼa Sehova ʼaki he lotolelei ʼe fakahā ai tatatou falala katoa ʼaē ʼe tokaga kia tatou.
Neʼe akoʼi e Sesu ia te fakalogo pea neʼe fua lelei kia ia. ʼE toe feiā mo tatou. (Hepeleo 5:8) Kapau ʼe lahi tatatou fakatuputupu ia te fakalogo, pea ʼe faigafua anai te koga ʼaia ʼo hoko aipe mo te ʼu meʼa liliki. ʼE moʼoni ia, ʼuhi ko tatatou agatonu, ʼe lagi tonu kia tatou ke tou kātakiʼi totatou ʼu fakamamahiʼi mai niʼihi. ʼE lagi hoko tāfito te meʼa ʼaia ʼi te fale gāue, ʼi te faleako, peʼe ko he loto fale ʼe mole ʼalu fuli ʼi he lotu e tahi. Kae, ʼe feala ke tou maʼu he fakaloto fīmālie ʼi te talanoa ʼaē neʼe fai ki te kau Iselaele, kapau ʼe nātou ‘ ʼoʼofa kia Sehova ʼo nātou fakalogo ki tona leʼo pea mo pipiki maʼu ki ai, ʼe feala ia ke liliu ʼo nātou maʼuliʼi māhani te ʼu meʼa ʼaia pea ʼe fakaloaloaga ai tonatou ʼu ʼaho maʼuli.’ (Teutalonome 30:20) Ko te fakapapau ʼaia ʼe toe fai mai kia tatou.
Tou Fakaʼaogaʼi Fakapotopoto Totatou Temi
Ko te fakaʼaogaʼi fakapotopoto ʼo totatou temi ʼe toe tokoni aipe foki kia tatou ke fakaliliu totatou ʼu ʼaho ke maʼuhiga kia mata ʼo Sehova. ʼO mole hage ko te paʼaga ʼaē ʼe feala hona tāʼofi, ko te temi ʼe tonu ke fakaʼaogaʼi peʼe pulinoa anai ia. Ko te ʼu hola fuli pe ʼaē ʼe fakalaka kua pulinoa ia. Mai te ʼaluʼaga ʼaē ʼe lahi tuʼumaʼu pe te meʼa ʼe tonu ke fai, ʼe tou fakaʼaogaʼi koa totatou temi ke tupu ai hatatou fakakaku ki te meʼa ʼaē ʼe tou faiga kiai? Ko te fakatuʼutuʼu tāfito ʼe tonu ke faiga kiai te kau Kilisitiano fuli ʼe ko tanatou kau tuʼumaʼu ki te gāue fai faka mafola pea mo te fai ʼo ni ʼu tisipulo.—Mateo 24:14; 28:19, 20.
ʼE hoki tou fakaʼaogaʼi fakapotopoto totatou temi mokā ʼe hoki tou mahino ki tona maʼuhiga. Koia, ʼe tokoniʼi tatou e Efeso 5:16 ke tou ‘totogi maʼa tatou ia te temi faigamālie,’ pea ʼe faka ʼuhiga ke tou līaki te ʼu meʼa ʼaē ʼe mole faʼa maʼuhiga. Ko tona fakaliliu, ke tou fakasiʼisiʼi ki te ʼu faiga ʼaē ʼe pulinoa ai te temi. Ko te lahi faʼu ʼo te sio televisio peʼe ko te fakaʼaogaʼi ʼo te Internet, peʼe ko te lau ʼo he ʼu tohi faka mālama, peʼe ko te lahi fau ʼo te faigaoʼi peʼe ko te ʼu fakafiafia ʼe feala ke tou gaʼegaʼe ai. Pea tahi ʼaē meʼa, ko te lahi fau ʼo te ʼu koloā ʼe feala pe ke ina faʼao te temi ʼe fakamaʼua ki te maʼu ʼo he loto ʼe fakapotopoto.
Maʼa nātou ʼaē ʼe nātou ʼui ʼe tonu ke fakaʼaluʼalu lelei te temi, ʼe nātou ʼui fēnei: “ ʼE mole feala ia ke fakaʼaogaʼi lelei te temi mo kapau ʼe mole ʼi ai he ʼu fakatuʼutuʼu ʼe fai fakalelei.” Koʼeni te ʼu puani e nima ʼe nātou ʼui ʼe ʼaoga ki te fai ʼo he ʼu fakatuʼutuʼu: ko he fakatuʼutuʼu kua ʼiloʼi papau, ʼe feala hona fakaʼau, ʼe feala he fakakaku kiai, ʼe fakafuafua lelei, pea ʼe ʼi ai tona temi tuʼakoi.
Ko he fakatuʼutuʼu maʼuhiga ʼe ko tatatou hikihiki tatatou faʼahiga lau ʼo te Tohi-Tapu. Ko te ʼuluaki koga ʼe ko te fai ʼo he ʼu fakatuʼutuʼu ʼe totonu—ke tou lau katoa ia te Tohi-Tapu. Lua, ke tou fakafuafua lelei tatatou ʼu fakatuʼutuʼu. ʼAki tatatou fai feiā, ʼe tou lava sio ai ki tatatou tuputupu. ʼE tonu ke uga tatou e te ʼu fakatuʼutuʼu ke tou faiga pea ke tou tuputupu. ʼE tonu foki ke tou lava fakahoko te ʼu fakatuʼutuʼu pea mo tou fakafuafua faka feʼauga. ʼE tonu ke tou tokagaʼi te ʼu faiva takitokotahi, te ʼu fealagia, pea mo te temi. Ki ʼihi, ʼe lagi fakamaʼua age anai ke lahi age tonatou temi ke nātou kaku ki tona gataʼaga. Pea, ʼe tonu leva ke ʼi ai he temi tuʼakoi ʼo tatatou ʼu faiga. Ko te fakatuʼu ʼo he ʼaho ʼe feala ke lēsili ai tatatou fakatuʼutuʼu ke tou fakahoko te faʼahi ʼaia.
Ko nātou fuli ʼe kau ki te famili ʼo te Petele, peʼe nātou gāue ʼi te ʼu nofoʼaga faka malamanei ʼa te kau Fakamoʼoni ʼa Sehova peʼe ko he filiale pe, ʼe nātou faigaʼi ke nātou lau katoa te Tohi-Tapu ʼi tanatou ʼuluaki taʼu gāue ʼi te Petele. ʼE nātou mahino ai ki te tokoni ʼo te lau ʼo te Tohi-Tapu ki tanatou tuputupu fakalaumālie pea mo tanatou maʼu he ʼu felogoi ʼe lelei age mo Sehova, ʼaē ʼe ina akoʼi nātou ke fua lelei kia nātou. (Isaia 48:17) ʼE tou lava fakatuʼutuʼu koa mo tatou ke tou lau tuʼumaʼu ia te Tohi-Tapu?
Te ʼu Lelei ʼe Tou Maʼu ʼi Te Kua ʼi Ai ʼo Te ʼAoga ʼo Totatou ʼu ʼAho
Ko te tokaga tāfito ki te ʼu meʼa fakalaumālie ʼe ina fakatupu ai te ʼu tapuakina ʼe lahi ʼaupito. Pea tahi ʼaē meʼa, ʼe fakatupu ai he ʼuhiga lahi ki te maʼuli. Ko te felogoi tuʼumaʼu mo Sehova ʼi te faikole fakamalotoloto ʼe ina fakaōvi ai tatou kia te ia. Ko te faikole ʼe ina fakahā tatatou falala ʼaē kia te ia. Ko te lau ʼo te Tohi-Tapu ʼi te ʼaho fuli ʼo feiā mo te ʼu tohi faka Tohi-Tapu ʼaē ʼe foaki mai e “te tagata kaugana agatonu mo poto,” ʼe ina fakamoʼoni ai ki totatou lotolelei ʼaē ke tou fakalogo ki te ʼAtua mokā palalau mai kia tatou. (Mateo 24:45-47, MN ) Ko te faʼahi ʼaia ʼe tokoni mai kia tatou ke tou maʼu he loto fakapotopoto mokā ʼe tou fai he ʼu tonu pea mo tou filifili te ʼu meʼa ʼaē ʼe totonu.—Pesalemo 1:1-3.
ʼE tou fiafia ʼi te fakalogo ki te ʼu fakatotonu ʼa Sehova, koteʼuhi ʼe mole mamafa ia. (1 Soane 5:3) ʼI tatatou faka maʼuhigaʼi ia Sehova ʼi te ʼaho fuli, ʼe tou fakamālohiʼi ai tatatou ʼu felogoi mo ia. ʼE tou toe liliu ai foki ko he lagolago fakalaumālie moʼoni ki totatou ʼu tēhina Kilisitiano. Ko te ʼu taʼi aga ʼaia ʼe ina fakafiafia ia Sehova ʼAtua. (Tāʼaga Lea 27:11) Pea ʼe mole ʼi ai he fakapale ʼe lahi age ʼi te tali leleiʼi ʼo tatou e Sehova ʼi te temi nei pea mo talu ai!
[Paki ʼo te pasina 21]
ʼE faka maʼuhigaʼi e te kau Kilisitiano ia te ʼu meʼa fakalaumālie
[Paki ʼo te pasina 22]
ʼE koutou fakaʼaogaʼi fakapotopoto koa tokotou temi?
[Paki ʼo te pasina 23]
ʼE tou fakamālohiʼi tatatou ʼu felogoi mo Sehova ʼaki tatatou faka maʼuhigaʼi ia ia ʼi te ʼaho fuli