Ke Tou Fefakalotomalohiʼaki ʼo “Laka Age”
“Tou fetokagaʼaki . . . ke tou fefakalotomalohiʼaki, pea ke laka age tatatou fai te ʼu faʼahi ʼaia koteʼuhi kua ovi mai te ʼaho ʼo te ʼAtua.”—HEPELEO 10:24, 25.
1. He koʼe neʼe uga e Paulo te kau ʼuluaki Kilisitiano Hepeleo ke natou fefakalotomalohiʼaki ʼo “laka age”?
ʼI TE ʼuluaki sekulo, neʼe foaki e te apositolo ko Paulo te tokoni ʼaeni ki te kau Kilisitiano Hepeleo: “Tou fetokagaʼaki ke tou feugaʼaki ki te ʼofa pea mo te ʼu gaue lelei, ʼo mole tou liakī tatatou fakatahi, ohage ko te agamahani ʼa ʼihi, kaʼe ke tou fefakalotomalohiʼaki, pea ke laka age tatatou fai te ʼu faʼahi ʼaia koteʼuhi kua ovi mai te ʼaho ʼo te ʼAtua.” (Hepeleo 10:24, 25) Neʼe lagi feuiʼaki e te u tehina pe koʼe neʼe ui age e Paulo ke natou fefakalotomalohiʼaki ʼo laka age. Mole hili ki ai taʼu ʼe nima, neʼe hoki natou mahino ai ki tona tupuʼaga. ʼI te lakaga ʼaia, neʼe natou tokagaʼi ai neʼe kua ovi mai te ʼaho fakamau ʼo Sehova ki Selusalemi. ʼO natou mahino ai neʼe tonu ke natou feholaki mai te kolo ohage ko tona ui e Sesu. (Luka 21:20-22; Gaue 2:19, 20) Neʼe hoko te ʼaho ʼaia ʼo Sehova ʼi te taʼu 70 hili te temi ʼo Sesu, ʼi te maumauʼi ʼo Selusalemi e te kau Loma.
2. He koʼe ʼe tonu ke tou fefakalotomalohiʼaki ʼo laka age ia ʼaho nei?
2 Ia ʼaho nei, ʼe toe tatau pe mo tatou. Ko te ʼaho “lahi pea mo fakamataku ʼaupito” ʼo Sehova kua ovi mai. (Soele 2:11, MN) Ko te ʼu palalau ʼaeni ʼa te polofeta ko Sofoni ʼe toe fakaʼuhiga ki totatou temi: “Kua ovi te aho lahi o [Sehova], kua ovi mai ia ia, pea e hau fakavilivili.” (Sofoni 1:14) Ko te tupuʼaga la ʼaia ʼe tonu ai ke tou “fetokagaʼaki ke tou feugaʼaki ki te ʼofa pea mo te ʼu gaue lelei.” (Hepeleo 10:24) ʼE tonu ai ke tou tokakaga ki ʼotatou tehina mo tuagaʼane ʼo laka age, ke tou fakalotomalohiʼi natou ʼi te temi ʼae ʼe ʼaoga ai.
KO AI ʼAE ʼE ʼAOGA KE FAKALOTOMALOHIʼI?
3. Kotea neʼe ui e te apositolo ko Paulo ʼo ʼuhiga mo te ʼu fakalotomalohi? (Vakaʼi te ʼuluaki pāki.)
3 “Ko te loto tuʼania ʼo he tagata, ʼe fakamamahi ki ai, kae ko he palalau lelei, koʼena te meʼa ʼae ʼe fakafiafia kia ia” (Taaga Lea 12:25, MN) ʼI ʼihi temi ʼe ʼaoga kia tatou fuli he fakalotomalohi. Neʼe fakamahino lelei e Paulo, maʼia mo natou ʼae ko tonatou maʼua ko te fakalotomalohiʼi ʼo ʼihi, ʼe toe ʼaoga ke fakalotomalohiʼi mo natou. Neʼe ina tohi fenei ki ʼona tehina ʼae ʼi Loma: “ ʼE au fakaʼamu ke au sio kia koutou, ke feala haku vaevae mo koutou he ʼu meʼa ʼofa fakalaumalie ke kotou malolohi ai, pea ke feala ke tou fefakalotomalohiʼaki ʼaki takotou tui pea mo taku tui.” (Loma 1:11, 12) Ko te apositolo ko Paulo neʼe toe ʼaoga pe la ʼi ʼihi temi ke fakalotomalohiʼi.—Lau ia Loma 15:30-32.
4, 5. Ko ai ʼae ʼe feala ke tou fakalotomalohiʼi ia ʼaho nei, pea kotea tona tupuʼaga?
4 Ia ʼaho nei, ʼe feala ke tou fakalotomalohiʼi ia natou ʼae ʼe gaue temi katoa kia Sehova, ohage ko te kau pionie agatonu. Tokolahi ia natou ʼaia neʼe natou sakilifisioʼi he ʼu meʼa ʼe natou leleiʼia ʼi tonatou maʼuli ke feala ai hanatou pionie. ʼO toe feia pe mo te kau misionea, Petelite, taupau ʼo te siliko mo ʼonatou ʼohoana, pea mo natou ʼae ʼe gaue ʼi te ʼu pilo faifakaliliu ʼe mamaʼo mai te Petele. ʼE natou fai fuli he ʼu sakilifisio ke natou tauhi kia Sehova ʼo lahi age. Koia ʼe tonu ai ke tou fakalotomalohiʼi ia natou. ʼE toe kaugā malie foki mo natou ʼae ʼe fakaʼamu ke natou hoko atu tanatou gaue temi katoa kae ʼe mole kei feala. ʼE natou toe fiafia moka fakalotomalohiʼi natou.
5 Ko ai ʼihi ʼe tonu ke toe fakalotomalohiʼi? ʼE feala ke tou fakalotomalohiʼi ʼotatou tehina mo tuagaʼane ʼae ʼe natou filifili ke natou nofo selipatea ʼuhi ʼae ko tanatou fia fakalogo kia Sehova pea mo ʼohoana “ ʼi te ʼAliki pe.” (1 Kolonito 7:39) Ko te ʼu fafine ʼohoana ʼe fakalotomalohiʼi natou moka ui age e ʼonatou ʼohoana ʼe natou ʼoʼofa ai pea moka natou fakamalo age ki ʼanatou gaue fuli. (Taaga Lea 31:28, 31) ʼE toe ʼaoga foki ke fakalotomalohiʼi te kau Kilisitiano ʼae ʼe tau mo he ʼu fakataga peʼe ko he mahaki. (2 Tesalonika 1:3-5) ʼE toe fakalotomalohiʼi e Sehova mo Sesu ia te kau agatonu fuli ʼaia.—Lau ia 2 Tesalonika 2:16, 17.
ʼE FAIGAʼI E TE KAU TAGATA ʼAFEĀ KE NATOU FAKALOTOMALOHIʼI TATOU
6. Kotea ʼe tou ako ʼo ʼuhiga mo te gaue ʼa te kau tagata ʼafeā ʼae ʼe talanoa ki ai ia Esaia 32:1, 2?
6 Lau ia Esaia 32:1, 2. ʼE tou maʼuli nei ʼi he ʼu temi faigataʼa pea ʼe faigafua ai hatatou lotomamahi pea mo lotovaivai. ʼE fakaʼaogaʼi e Sesu Kilisito te ʼu “aliki,” ko te kau tagata ʼafeā ʼae ʼe kau ki ʼona tehina fakanofo pea mo ’ana ’ihi atu ovi moʼo fakalotomalohiʼi ʼo tatou. Ko te ʼu tagata ʼafeā ʼaia ʼo te kokelekasio ʼe mole natou “puleʼi” tatatou tui, kae ʼe tou “kaugā gaue” ki totatou fiafia. ʼE natou fia tokoni mai ke tou fiafia pea ke tou nofo agatonu.—2 Kolonito 1:24.
7, 8. ʼE feala ke fakalotomalohiʼi feafeaʼi e te kau tagata ʼafeā he tahi ʼaki ʼanatou palalau mo ʼanatou gaue?
7 ʼE feala ke faʼifaʼitakiʼi e te kau tagata ʼafeā te apositolo ko Paulo ʼi tana faiga tuʼumaʼu ʼae ke ina fakalotomalohiʼi ʼona tehina. Neʼe ina tohi fenei ki te kau Kilisitiano ʼo Tesalonika ʼae neʼe fakatagaʼi: “ ʼI tamatou ʼoʼofa lahi ia koutou, neʼe matou fakatotonu ai ke mole gata pe tamatou fakaha atu kia koutou te logo lelei ʼo ʼuhiga mo te ʼAtua, kaʼe ke matou toe foaki foki mo ʼomatou maʼuli moʼo tokoni atu, koteʼuhi neʼe matou ʼoʼofa mamahi ia koutou.”—1 Tesalonika 2:8.
8 ʼE feala ke fakalotomalohiʼi e te kau tagata ʼafeā he tahi ʼaki ʼanatou palalau. Kae ʼe gata ai pe koa? Neʼe ui fenei e Paulo ki te kau tagata ʼafeā ʼo Efeso: “ ʼE tonu ke kotou . . . tokoni kia natou ʼae ʼe vaivai. Pea ʼe tonu ke kotou manatuʼi te ʼu folafola ʼaeni ʼa te ʼAliki ko Sesu: ‘ ʼE lahi age te fiafia moka kita foaki, ʼi takita tali.’ ” (Gaue 20:35) Neʼe lotolelei ia Paulo ke ina ‘foaki te ʼu meʼa fuli ʼae ʼe ina maʼu pea mo momoli tona maʼuli katoa’ ki ʼona tehina. Neʼe ina fakaha ʼi ʼana gaue neʼe lotolelei ke ina fai ia meʼa fuli neʼe ina lavaʼi maʼa natou. (2 Kolonito 12:15) ʼO toe feia pe, ʼe tonu ki te kau tagata ʼafeā ke natou fakalotomalohiʼi mo fakafimalieʼi ʼihi, mole ʼaki pe ʼanatou palalau kae ʼaki he ʼu gaue. ʼI tanatou fai te faʼahi ʼaia ʼe ha ai ʼe natou fia tokaga moʼoni kia tatou.—1 Kolonito 14:3.
9. ʼE feala ke foaki feafeaʼi e te kau tagata ʼafeā he tokoni fakalotomalohi?
9 Ke fakalotomalohiʼi te ʼu tehina, ʼi ʼihi temi ʼe ʼaoga kia natou te tokoni ʼa te kau tagata ʼafeā. ʼE feala ki te kau tagata ʼafeā ke natou ako mai te Tohi-Tapu te faʼahiga foaki ʼo he tokoni fakalotomalohi. Neʼe tuku e Sesu he faʼifaʼitaki lelei ʼo ʼuhiga mo te faitokoni ʼi te ʼu logo ʼae neʼe ina ʼave ki te ʼu kokelekasio ʼo Asia veliveli hili tana mate mo tona fakatuʼuake. Neʼe ko he ʼu tokoni malohi ʼae neʼe ina foaki ki te ʼu kokelekasio ʼo Efeso, Pelekame, mo Tiatile. Kae ʼi muʼa ʼo tana tokoniʼi natou, neʼe fakamalo age ʼo ʼuhiga mo te ʼu gaue lelei fuli ʼae neʼe natou fai. (Fakaha 2:1-5, 12, 13, 18, 19) Neʼe ui fenei e Sesu ki te kokelekasio ʼo Laotise: “Ko natou ʼae ʼe au ʼofa ai, ʼe au fakatonutonuʼi pea mo akonakiʼi natou. Koia ke ke faʼafai pea mo ke fakahemala.” (Fakaha 3:19) ʼE tokaga te kau tagata ʼafeā ke natou faʼifaʼitakiʼi te faʼahiga faitokoni ʼa Kilisito.
ʼE MOLE GATA PE KI TE KAU TAGATA ʼAFEĀ KE NATOU FAKALOTOMALOHIʼI HE TAHI
ʼU matuʼā, ʼe kotou akoʼi koa ʼakotou fanau ke natou fakalotomalohiʼi ʼihi? (Vakaʼi te palakalafe 10)
10. ʼE feala kia tatou fuli ke tou fakalotomalohiʼi feafeaʼi he tahi?
10 ʼE mole ko te kau tagata ʼafeā pe ʼae ʼe tonu ke natou fakalotomalohiʼi he tahi. Neʼe uga e Paulo te kau Kilisitiano fuli ke natou maʼu he ʼu palalau fakalotomalohi mo ʼaoga, ke fua lelei ki ʼihi. (Efeso 4:29) ʼE tonu kia tatou fuli ke tou tahi mahino pe kotea ʼae ʼe ʼaoga ki he tahi ke feala hatatou tokoni ki ai. Neʼe tohi fenei e Paulo ki te kau Kilisitiano Hepeleo: “Kotou fakamalohiʼi te ʼu nima ʼae kua vaivai pea mo te ʼu tuli ʼae kua gaʼegaʼe, pea kotou haga haʼele ʼi te ʼala ʼae ʼe totonu, ke ʼaua naʼa kovi age ia ia ʼae ʼe ketu, kaʼe ke malolo ai.” (Hepeleo 12:12, 13) Koia ko tatou fuli ʼo toe feia ki te ʼu fanau, ʼe feala ke tou fakamalohiʼi pea mo fakalotomalohiʼi he tahi ʼaki ʼatatou palalau.
11. Kotea ʼae neʼe tokoni kia Marthe ʼi te temi ʼae neʼe lotomamahi ʼaupito ai?
11 Ko te tuagaʼane ʼe higoa ko Marthe neʼe lotomamahi ʼaupito ʼi he kiʼi temi.a (Vakaʼi te kiʼi nota.) Neʼe ina tohi fenei: “ ʼI te tahi ʼaho, neʼe au faikole ai ke au maʼu he fakalotomalohi, neʼe au felaveʼi ai mo te kiʼi tehina kua fotufotuʼa neʼe ina fakaha mai tona ʼofa mo te manavaʼofa, te meʼa ʼae neʼe ʼaoga tafito mai kia au ʼi te temi ʼaia. Pea neʼe ina toe fakamatala mai te aluʼaga neʼe hoko ʼi tona maʼuli ʼe hage ko te ʼahiʼahi ʼae neʼe au lolotoga tau mo ia, ʼo au logoʼi ai ʼe mole ko au tokotahi pe.” Ko te tuagaʼane ʼaia ʼe lagi mole ina iloʼi ko ʼana palalau neʼe tokoni kia Marthe.
12, 13. ʼE feala ke tou maʼuliʼi feafeaʼi te tokoni ʼae ia Filipe 2:1-4?
12 Neʼe tohi fenei e Paulo ki te kau Kilisitiano ʼo Filipe: “Koia koteʼuhi ʼe kotou fakatahi mo Kilisito, mo kotou fakalotomalohiʼi pea mo fakafimalieʼi ʼihi ʼi te ʼofa, mo kotou tokakaga kia natou, pea mo kotou ʼoʼofa mamahi mo manavaʼofa kia natou, kotou fakakatoa toku fiafia ʼi takotou maʼu he manatu ʼe tahi, mo kotou feʼofaʼaki, ʼo kotou logo tahi pea mo fakakaukau tahi. ʼAua naʼa kotou fai he meʼa ʼaki he manatu fakataupiepie peʼe ʼaki he fiaha, kaʼe ʼaki he agavaivai kotou fakaʼuhiga te hahaʼi fuli ʼe maʼoluga age ia koutou. Pea ʼaua naʼa kotou kumi pe te ʼu meʼa ʼae ʼe lelei kia koutou totonu, kaʼe ke kotou toe kumi foki mo te ʼu meʼa ʼae ʼe lelei ki ʼihi.”—Filipe 2:1-4.
13 ʼE tonu ke tou tahi kumi he ʼu puleʼaki ke tou fetokoniʼaki ai. Ke tou fakalotomalohiʼi ʼotatou tehina mo tuagaʼane, ʼe feala ke tou fakafimalieʼi ʼaki te ʼofa, mo tokakaga pea mo ʼofa mamahi mo manavaʼofa kia natou.
HE ʼU FAʼAHIGA FAKALOTOMALOHI
14. Kotea te faʼahiga fakalotomalohi ʼe feala ke tou foaki?
14 ʼE tou fiafia moka tou logo kia natou ʼae neʼe tou tokoni ki ai ʼi muʼa atu, ʼe kei natou nonofo agatonu pe. Neʼe tohi fenei e te apositolo ko Soane: “E lahi ʼaupito toku fiafia moka au logo ʼe haga mulimuli ʼaku fanau ki te ala ʼo te moʼoni.” (3 Soane 4) Tokolahi te kau pionie ʼe natou fiafia moka natou logo ʼo ʼuhiga mo he tahi neʼe natou akoʼi ki ai te moʼoni kua fualoa atu, ʼe kei tauhi agatonu pe kia Sehova, peʼe kua pionie pe la. Koia kapau ʼe lotovaivai te kau pionie, ʼe feala ke tou fakamanatuʼi age te ʼu gaue lelei fuli ʼae neʼe natou fai moʼo tokoni ki he tahi.
15. Kotea ʼae ʼe feala ke tou fai ke tou fakalotomalohiʼi ai natou ʼae ʼe tauhi agatonu kia Sehova?
15 Tokolahi te kau taupau ʼo te siliko ʼe natou ui ko natou mo ʼonatou ʼohoana ʼe natou lotomalohi moka fai age he kiʼi tohi ʼo fakamalo age ki tanatou ʼaʼahi te kokelekasio. ʼE toe moʼoni te faʼahi ʼaia ki te kau tagata ʼafeā, misionea, pionie, mo te kau Petelite, ʼae ʼe tauhi agatonu kia Sehova. Moka tou fakamalo age, ʼe lagi mole tou iloʼi kae ko he toe fakalotomalohi lahi ʼaia kia natou.
ʼE FEALA KE TOU FOAKI FULI HE FAKALOTOMALOHI
16. Kotea la he ʼu faʼahi ʼe feala ke fakalotomalohiʼi ai he tahi?
16 ʼE feafeaʼi mo kapau ʼe faigataʼa tau fakaha ki he tahi tau manatu ʼo ʼuhiga mo ia? ʼI tona fakahagatonu, ʼe mole faigataʼa fau hau fakalotomalohiʼi he tahi. Ohage la, ʼe feala pe tau malimali ki ai. Kae moka mole malimali mai, lagi ʼe ʼi ai pe hona kiʼi faigataʼaʼia pea ʼe lagi ʼaoga ke palalau mo he tahi. Pea ʼe feala tau fakafimalieʼi ʼaki pe tau fagono ki ai.—Sakopo 1:19.
17. Kotea ʼae neʼe ina fakalotomalohiʼi he tehina tupulaga?
17 Ko te tehina tupulaga ʼe higoa ko Henri, neʼe lotomamahi ʼaupito ʼi te temi ʼae neʼe mole kei tauhi ai ʼihi ʼi tona famili kia Sehova. Neʼe kau ai tana tamai, ʼae neʼe ko te tagata ʼafeā. Pea neʼe fakatokagaʼi leva e te taupau ʼo te siliko te lotomamahi ʼa Henri, ʼo ina fakaafe ke nā olo ʼo inu kafe. Neʼe fagono lelei te taupau kia Henri ʼi tana fakaha age te ʼu meʼa ʼae ʼe ina logoʼi. Hili tanā faipalalau, neʼe mahino ai leva Henri, ʼe feala ke tokoni ki tona famili ke natou toe liliu mai ki te moʼoni ʼaki pe tana nofo agatonu. Neʼe ina toe maʼu he fakalotofimalie ʼi tana lau te kapite 46 ʼo Pesalemo, mo Sofoni 3:17, pea mo Maleko 10:29, 30.
ʼE feala kia tatou fuli ke tou fefakalotomalohiʼaki (Vakaʼi te palakalafe 18)
18. (1) Kotea ʼae neʼe tohi e te Hau ko Salomone ʼo ʼuhiga mo te ʼu fakalotomalohi? (2) Kotea te tokoni ʼae neʼe foaki mai e Paulo?
18 Kotea te ako ʼe feala ke tou taʼofi mai te ʼu faʼifaʼitaki ʼo Marthe mo Henri? ʼE feala kia tatou fuli ke tou fakalotofimalieʼi mo fakalotomalohiʼi he tehina peʼe ko he tuagaʼane ʼi te temi ʼae ʼe ʼaoga ai. Neʼe tohi fenei e te Hau ko Salomone: “E feafeai age anai moka fai he tali lelei i tona lakaga totonu. Ko te mea ae e lelei ki te u mata e ina fakafiafiai te loto; ko he logo lelei e ina fakamalohii te sino.” (Taaga Lea 15:23, 30) ʼE ke iloʼi koa he tahi ʼe lotovaivai peʼe lotomamahi? He koʼe ʼe mole ke lau age he alatike ʼo Te Tule Leʼo peʼe mai tatatou tuʼasila ʼi te Neti? Pea tahi, neʼe fakaha e te apositolo ko Paulo kapau ʼe tou hiva te ʼu katiko ʼe feala ke tou maʼu ai hotatou fimalie. Neʼe ina tohi fenei: “Ke kotou haga akoʼi pea mo kotou haga fakalotomalohiʼi ʼihi ʼaki ni pesalemo, mo ni fakavikiviki ki te ʼAtua, mo ni katiko ʼe kotou hiva ʼaki he lotofakafetaʼi, pea mo kotou hiva kia Sehova ʼaki ʼokotou loto katoa.”—Kolose 3:16; Gaue 16:25.
19. He koʼe ʼe maʼuhiga ke tou fefakalotomalohiʼaki ʼo laka age, pea kotea ʼae ʼe tonu ke tou fai?
19 Kua ovi mai te ʼaho ʼo Sehova. Koia ʼae ʼe maʼuhiga ai ke tou fefakalotomalohiʼaki ʼo laka age. (Hepeleo 10:25) Pea ʼe tou fiafia anai mo kapau ʼe tou mulimuli ki te tokoni ʼaeni ʼa Paulo: “Kotou haga fefakalotomalohiʼaki pea mo fetokoniʼaki, ohage pe ko takotou fai.”—1 Tesalonika 5:11.
a Neʼe fetogi te ʼu higoa.