Te Akoʼi ʼo Te Meʼa ʼAe ʼe Lelei Mo ʼAe ʼe Kovi

Neʼe tukugakoviʼi te ʼu tama tupulaga ʼi tanatou fakaʼalikiʼi te tahi tama ʼi tanatou folau neʼe fakatuʼutuʼu e te fale ako. Neʼe ako te kau tupulaga fuli ʼaia ʼi te fale ako ʼe iloa mo maʼoluga ʼi Kanata. Hili te tuʼutamaki ʼaia, neʼe tohi fenei e te tagata ko Leonard Stern ʼi te sulunale (Ottawa Citizen): “Logo pe la ʼe ʼatamai ʼihi kau tupulaga, pe neʼe akoʼi lelei natou peʼe natou maʼu paʼaga kae ʼe natou fai aipe te meʼa ʼae ʼe kovi.”

Neʼe toe hoko atu fenei e Stern: “ ʼE tonu ke akoʼi e te ʼu matuʼā ʼanatou fanau ke natou poto ʼi te fakakehekeheʼi te aga ʼae ʼe lelei mo ʼae ʼe kovi. Kae ʼe mole pe la maʼuhiga ia ki ʼihi matuʼā. ʼE loto natou ke fai e ʼanatou fanau he ako maʼoluga ke maʼu ai he ʼu gaue ʼe lelei pea mo he paʼaga ʼe lahi.”

ʼE moʼoni ʼe ʼaoga te ako. Kae tatau aipe pe ʼe lelei he ako, ʼe mole anai tokoni ki he tahi ke ina lava tauʼi ʼona holi kovi. Kofea koa ʼae ʼe feala ke tou ako ai te meʼa ʼae ʼe lelei mo ʼae ʼe kovi?

TE FAʼAHIGA AKO ʼAE ʼE LELEI TOKOTAHI

ʼE fakatatau te Tohi-Tapu ki he sioʼata. Ka tou fai sioʼata ai, pea ʼe tou tokagaʼi lelei ai ʼotatou tuʼakoi mo ʼotatou vaivaiʼaga. (Sakopo 1:23-25) Kae ʼe mole gata ai pe. ʼE toe tokoni mai ke tou fai ni fetogi mo tou gaueʼi te ʼu kalitate ʼae ʼe ʼaoga ki te tokalelei pea mo te logo tahi. ʼE kau ai te agalelei, te agaʼofa, te kataki fualoa, te lotololomi pea mo te ʼofa. Ko te ʼofa ʼe “ina fakatahiʼi te hahaʼi ʼi hona faʼahiga aluʼaga ʼe lelei tukupau.” (Kolose 3:14) He koʼe ʼe makehe ʼaupito te ʼofa? Tou vakaʼi pe kotea ʼae ʼe ui ʼi te Tohi-Tapu ʼo ʼuhiga mo te kalitate ʼaia.

• “Ko he tahi ʼe ʼofa, ʼe kataki fualoa ia pea mo agalelei. Pea ʼe mole maheka ia. ʼE mole laupisi, ʼe mole fiameʼalahi, ʼe mole ina fai he aga ʼe kovi, ʼe mole ina kumi te ʼu meʼa ʼae ʼe lelei kia ia, ʼe mole hoko ita. ʼE mole ina manatuʼi te kovi ʼae neʼe fai age kia ia. ʼE mole fakafiafia ia ʼi te heʼe faitotonu [agakovi] kaʼe ʼe fakafiafia ia ʼi te moʼoni. ʼE ina ʼutakiʼi ia meʼa fuli, . . . ʼe ina katakiʼi ia meʼa fuli. Ko te ʼofa ʼe mole puli anai ʼi he temi.”—1 Kolonito 13:4-8.

• “Ko ʼae ʼe ʼofa ʼe mole ina fai he meʼa ʼe kovi ki tona tatau.”—Loma 13:10.

• “Kaʼe tafito, ke kotou feʼofamamahiʼaki, koteʼuhi ʼe ʼuʼufi e te ʼofa he ʼu tuʼuga agahala.”—1 Petelo 4:8.

Ka ke fakatahi mo ni hahaʼi ʼe ʼoʼofa ia koe, kotea ʼae ʼe ke logoʼi? ʼE ke lotofimalie pea ʼe mole ke toe hoha ki he meʼa. ʼE ke iloʼi ʼe natou loto ke ke fiafia pea ʼe mole natou fia fai atu he meʼa ʼe fakatupu mamahi.

Ka ʼofa he tahi, ʼe lotolelei ke ina fai ni sakilifisio maʼa ʼihi, tatau aipe pe ʼe ko he ʼu toe fetogi ʼi tona maʼuli. Ohage la ko te tagata ʼaeni ko George. Neʼe fia nofo tuʼumaʼu pe mo tona kiʼi mokopuna. Kae ko tona melega he neʼe suluka lahi, pea neʼe mole loto e te ʼohoana ʼo tona ʼofafine ke suluka ia tafa ʼo te kiʼi tamasiʼi. Kotea la ʼae neʼe fai e George? Logo la neʼe kua taʼu 50 tana suluka, kae neʼe ina tuku ʼuhi ko tona ʼofa ki tona kiʼi mokopuna. ʼE ha mai ai pe te malohi ʼo te ʼofa.

Ko te ʼofa ʼe ko he kalitate ʼe tonu ke gaueʼi. Pea ʼe ko te ʼu matuʼā ʼae ʼe tonu ke natou akoʼi te kalitate ʼaia ki ʼanatou fanau. ʼE natou fafaga mo puipui mo tokaga lelei kia natou moka ʼe natou lavevea pea mo mahahaki. ʼE lelei te akoʼi ʼo te ʼu fanau moka ʼe tau faipalalau te ʼu matuʼā mo natou. ʼE natou toe fakatonutonuʼi foki mo akoʼi age te meʼa ʼae ʼe lelei mo ʼae ʼe kovi. Pea ʼe tonu ke liliu te ʼu matuʼā ko he ʼu faʼifaʼitaki lelei ki ʼanatou fanau.

Kae ʼe fakaʼofaʼofa he ʼe mole fakahoko e ʼihi matuʼā ʼonatou maʼua fakafamili. Ko tona ʼuhiga koa ʼe agakovi anai ʼanatou fanau ki ʼamuli? Kailoa ia. ʼE hahaʼi ia natou ʼae neʼe maliu kehe mai te ala ʼae ʼe kovi. ʼE kau ai mo natou ʼae neʼe faigataʼa ʼonatou maʼuli fakafamili kae kei natou liliki. Neʼe mole pe la natou ʼamanaki ʼe natou fetogi anai ʼi he temi kae kua natou agalelei nei mo tuha mo te falala. Koia ʼi te alatike ʼae ka hoa mai, ʼe tou vakaʼi anai ni faʼifaʼitaki.