E Feafeaʼi Hatatou Gāueʼi Te ʼOfa Moʼoni
“Ko te ʼofa ʼe ko te faitoʼo ki te ʼu mamahi fuli; ko te ʼofa ʼe ko te maʼuli.”—Living to Purpose, neʼe tohi e Joseph Johnson, 1871.
ʼE AKOʼI feafeaʼi te ʼofa e te tagata? ʼAki hana ako ia te agaaga ʼo te tagata? ʼAki hana lau he ʼu tohi ʼe tokoni ai ki te hikihiki ʼo te maʼuli? ʼAki hana sioʼi ʼo he ʼu ata ʼe hā ai he ʼu hahaʼi ʼe fai feʼauʼaki? Kailoa ia. ʼE kamata akoʼi e te tagata ia te ʼofa ʼaki te faʼifaʼitaki pea mo te akonaki ʼo tana ʼu mātuʼa. ʼE akoʼi anai e te fānau ia te ʼofa mo kapau ʼe nātou sio ki te ʼofa ʼo tanatou ʼu mātuʼa ʼi tanatou fafaga ia nātou pea mo puipui nātou, ʼi tanatou felogoi mo nātou pea mo tokakaga kia nātou takitokotahi. ʼE nātou toe akoʼi foki te ʼofa, mokā akoʼi age e tanatou ʼu mātuʼa ia te ʼu pelesepeto maʼuhiga ʼo te meʼa ʼaē ʼe lelei pea mo te meʼa ʼaē ʼe kovi.
ʼE laka age te ʼofa moʼoni ʼi he faʼahiga ʼofa feiā pe. ʼE gāue tuʼumaʼu te ʼofa ʼaia ke fua lelei ki te maʼuli ʼo te hahaʼi, māʼiape la mo kapau ʼe mole nātou mahino katoa ʼi te temi ʼaia, pea ʼe tau ʼiloga te faʼahi ʼaia ʼi te fānau mokā akonakiʼi ʼaki te ʼofa. Ko te faʼifaʼitaki lelei ʼo te ʼofa katoa, ʼe ko te Tupuʼaga totonu. Neʼe tohi fēnei e te ʼapositolo ko Paulo: “Foha, ʼaua naʼa ke fehiʼa ki te akonaki ʼa Sehova, pea ʼaua naʼa ke lotovaivai mokā ʼe ina fakatonutonuʼi koe; koteʼuhi ʼe akonakiʼi e Sehova ia ia ʼaē ʼe ʼofa ki ai.”—Hepeleo 12:5, 6, MN.
ʼU mātuʼa, ʼe koutou lava faʼifaʼitakiʼi feafeaʼi ia Sehova ʼo ʼuhiga mo takotou ʼofa ʼaē ki tokotou famili? Pea ʼe maʼuhiga feafeaʼi te faʼifaʼitaki ʼaē ʼe koutou fakahā ʼi takotou ʼu felogoi, ʼi tokotou ʼuhiga tagata pea mo fafine ʼohoana?
Koutou Akoʼi Te ʼOfa ʼAki Te Faʼifaʼitaki
Kapau ko koutou ko te tagata, ʼe koutou faka maʼuhigaʼi koa tokotou ʼohoana pea mo fakahā age ki ai he fakaʼapaʼapa? Kapau ko koutou ko he fafine ʼohoana, ʼe koutou ʼofa koa pea mo lagolago ki tokotou ʼohoana? ʼE ʼui e te Tohi-Tapu ʼe tonu ki te tagata pea mo tona ʼohoana ke nā feʼofaʼaki pea mo fefakaʼapaʼapaʼaki. (Efeso 5:28; Tito 2:4) Ka nātou fai te faʼahi ʼaia, pea ʼe sio tanatou fānau ʼe maʼuli te ʼofa faka Kilisitiano. ʼE ko he ako ʼe ʼaoga pea mo malave ki tonatou loto!
ʼE toe ʼekenaki pe foki e te ʼu mātuʼa ia te ʼofa ʼi te loto fale, mo kapau ʼe nātou maʼuliʼi te ʼu pelesepeto māʼoluga ʼo ʼuhiga mo te famili, ʼi te ʼu fakafiafia, mo te aga ʼaē ʼe tonu ke fai, pea mo te ʼu meʼa ʼaē ʼe nātou fakatuʼutuʼu kiai pea mo te ʼu meʼa ʼaē ʼe nātou fakamuʼamuʼa. ʼI te malamanei katoa, neʼe fakatokagaʼi e te hahaʼi ko te Tohi-Tapu ʼe ko he tokoni maʼuhiga moʼo fai ʼo he ʼu pelesepeto feiā ʼi te famili, ʼo nātou fakamoʼoni ai ko te Tohi-Tapu “ ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.” (2 Timoteo 3:16, MN ) ʼIo, ʼi te ʼu pelesepeto fuli ʼaē ʼe ʼaoga moʼo takitaki totatou maʼuli, ʼe ʼui ʼe mole hona tatau mo te Akonaki ʼi te Moʼuga.—Mateo, kapite 5 ki te 7.
Kapau ʼe fakaʼaogaʼi e te famili katoa te takitaki ʼa te ʼAtua pea mo maʼuliʼi tana ʼu lekula, pea ʼe nātou maʼuli fīmālie fuli, pea ʼe toe lagi lahi mo te ʼofa pea mo te fakaʼapaʼapa ʼa te fānau ki tanatou ʼu mātuʼa. Kae kapau ʼe ʼi ai he ʼu faʼahiga ako e lua ʼi he loto fale, peʼe ko he ʼu lekula ʼe mole lelei, ʼe feala ki te fānau ke nātou ʼiʼita pea mo agatuʼu.—Loma 2:21; Kolose 3:21.
E feafeaʼi ki te ʼu famili ʼaē ʼe taupau tokotahi te fānau e te tāmai peʼe ko te faʼe? ʼE faigataʼa age koa hanatou akoʼi te ʼofa ki tanatou fānau? Kailoa ia. Logola ʼe lelei age ke taupau fakatahi e te faʼe pea mo te tāmai tanā fānau, kae ʼe fakahā e te ʼu sivi ʼe feala ke mole ʼiloga te puli ʼo he tāmai peʼe ko he faʼe mo kapau ʼe lelei te ʼu felogoi faka famili. Kae kapau ʼe koutou taupau tokotahi takotou fānau, koutou faigaʼi ke koutou maʼuliʼi te ʼu pelesepeto faka Tohi-Tapu ʼi tokotou loto fale. Ei, ʼe ʼui fēnei mai e te tāʼaga lea: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou”—ʼo kau ai te fakahoko ʼo te maʼua ʼo te ʼu mātuʼa.—Tāʼaga Lea 3:5, 6; Sakopo 1:5.
Tokolahi te kau tūpulaga agapoto neʼe pusiaki tokotahi nātou e he tāmai peʼe ko he faʼe, pea ʼi te temi nei ʼe nātou tauhi agatonu ki te ʼAtua ʼi te ʼu lauʼi afe kokelekasio faka Kilisitiano ʼa te kau Fakamoʼoni ʼa Sehova ʼo te malamanei. ʼE ko he fakamoʼoni ʼaia ʼe feala pe ki he tokotahi ʼi te taumatuʼa ke fua lelei tana akoʼi te ʼofa ki tana fānau.
ʼE Lava Feafeaʼi Kia Tatou Ke Tou Fakatuputupu Te ʼOfa
Neʼe fakakikite e te Tohi-Tapu, ʼe ʼiloga anai ʼi “te u aho fakamuli” ia te “heeʼofa,” ko tona faka ʼuhiga ʼe puli anai te ʼofa ʼi te famili. (2 Timoteo 3:1, 3) Kae tatau aipe mo nātou ʼaē lagi neʼe tutupu ake ʼi he famili ʼe mole maʼu ai te ʼofa, ʼe feala ke nātou fakatuputupu te ʼofa. ʼO feafeaʼi? ʼAki tanatou ako te ʼofa mai ia Sehova, ia ia ʼaē ko te Matapuna ʼo te ʼofa pea ʼe ʼofa kia nātou fuli ʼaē ʼe nātou haga age kia te ia mo tonatou loto katoa. (1 Soane 4:7, 8) Neʼe ʼui fēnei e te tagata fai pesalemo: “Kapau ʼe līaki ʼau e taku tāmai pea mo taku faʼe, pea ʼe tali anai ʼau e Sehova.”—Pesalemo 27:10.
ʼE fakahā mai e Sehova tona ʼofa ʼi te ʼu ʼaluʼaga kehekehe. ʼI te ʼu meʼa ʼaia ʼe kau ai te takitaki faka tāmai ʼaē ʼe fai ʼaki te Tohi-Tapu, ʼaki te tokoni ʼa te laumālie maʼoniʼoni, pea ʼaki te tokoni ʼofa ʼa te ʼu tēhina mo tuagaʼane ʼo te kokelekasio. (Pesalemo 119:97-105; Luka 11:13; Hepeleo 10:24, 25) Koutou fakatokagaʼi ko te ʼu fakatuʼutuʼu ʼaia e tolu ʼe feala ke tokoni atu ke koutou fakatuputupu tokotou ʼofa ʼaē ki te ʼAtua pea mo tokotou tatau.
Ko Te Tokoni Faka Tāmai Mai Te ʼAtua
Ka tou fia felogoi mo he tahi, ʼe tonu ke tou ʼiloʼi lelei ia ia. ʼI tana fakahā ʼo ia totonu ʼi te ʼu pasina ʼo te Tohi-Tapu, ko Sehova ʼe ina fakaafe tatou ke tou fakaōvi age kia te ia. Kae ʼe mole feʼauga pe tatatou lau te Tohi-Tapu. ʼE tonu ke tou maʼuliʼi tana ʼu akonaki pea ʼe tou ʼiloʼi ai leva tona ʼu fua lelei kia tatou. (Pesalemo 19:7-10) ʼE ʼui fēnei ia Isaia 48:17: “Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.” Ei, ko Sehova ʼe ina fakatātā totonu te ʼofa, ʼe ina akoʼi tatou ke fua lelei kia tatou—kae ʼe mole ina fia faka tuʼakoi tatatou ʼāteaina ʼaki ni ʼu lekula pea mo ni ʼu fakatotonu.
Ko he ʼatamai mālama totonu ʼo te Tohi-Tapu ʼe tokoni mai kia tatou ke tou tuputupu ʼi totatou ʼofa ki ʼotatou tatau. ʼE lava te faʼahi ʼaia, koteʼuhi ko te moʼoni ʼo te Tohi-Tapu ʼe ina akoʼi mai ia te manatu ʼa te ʼAtua ʼo ʼuhiga mo te tagata, pea mo ina fakahā mai te ʼu pelesepeto ʼaē ʼe tonu ke ina takitaki tatatou ʼu felogoi. ʼAki te manatu ʼaia, ʼe tou maʼu ai he fakatafitoʼaga mālohi moʼo fakatuputupu ia te ʼofa ki totatou tatau. Neʼe ʼui fēnei e te ʼapositolo ko Paulo: “ ʼE ʼau haga faikole ʼo ʼuhiga mo te potu ʼaenī ʼi ʼaku faikole: ke ʼāsili tuputupu aipe tokotou ʼofa ʼi he ʼatamai mālama totonu pea mo he fakasiosio totonu ʼe katoa.”—Filipo 1:9, MN.
Ke tou mahino peʼe takitaki lelei feafeaʼi te ʼofa e te “ ʼatamai mālama totonu,” tou lau te manatu moʼoni neʼe fakahā ia Gaue 10:34, 35 (MN ): “Ko te ʼAtua ʼe mole fakapalatahi, kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali leleiʼi ia ia.” Kapau ʼe sivisivi e te ʼAtua te hahaʼi ʼaki tanatou ʼu gāue faitotonu pea mo tanatou manavasiʼi faka lotu, ʼo mole ina sioʼi tonatou fenua peʼe ko tonatou lanu, ʼe mole tonu koa la mo tatou ke tou toe feiā?—Gaue 17:26, 27; 1 Soane 4:7-11, 20, 21.
Te ʼOfa—Ko He Fua ʼo Te Laumālie ʼo Te ʼAtua
Ohage pe ko he ʼua ʼe tō ʼi he gāueʼaga pea ʼe feala ai ke maʼu he taʼukai lelei, ko te laumālie ʼo te ʼAtua ʼe feala ke ina fakatupu ni ʼu kalitate ʼi te loto ʼo te hahaʼi fia logo, ʼaē ʼe fakahā e te Tohi-Tapu “ko te fua o te Laumalie.” (Kalate 5:22, 23) Ko te ʼuluaki kalitate ʼo te fua ʼaia ʼe ko te ʼofa. (1 Kolonito 13:13) Kae ʼe tou maʼu feafeaʼi te laumālie ʼo te ʼAtua? Ko te faʼahi maʼuhiga ʼe ko te faikole. Kapau ʼe tou kole te laumālie ʼo te ʼAtua, ʼe ina foaki mai anai kia tatou. (Luka 11:9-13, MN ) ʼE tou “haga” kole koa te laumālie maʼoniʼoni? Kapau ʼe tou fai feiā, pea ko tona fua maʼuhiga, ʼaē ʼe kau ai te ʼofa, ʼe ʼāsili tuputupu anai ʼi totatou maʼuli.
Kae ʼe ʼi ai te faʼahiga manatu ʼe fakafeagai ki te laumālie ʼo te ʼAtua. ʼE fakahigoaʼi e te Tohi-Tapu ko “te laumalie o te malama-nei.” (1 Kolonito 2:12; Efeso 2:2) ʼE fua kovi tana gāue, pea ʼe haʼu mai ia Satana te Tevolo, “te pule o te mālama-nei” ʼaē ʼe mamaʼo mai te ʼAtua. (Soane 12:31) Ohage ko he matagi ʼe ina faka viligia te efu mo te ʼotaʼota, ko “te laumalie o te malama-nei” ʼe ina fakatupu te ʼu holi kovi ʼaē ʼe nātou maumauʼi te ʼofa pea mo fakaneke te ʼu vaivaiʼaga ʼo te kakano.—Kalate 5:19-21.
Ko te laumālie kovi ʼe gāue ki te hahaʼi ʼi te temi ʼaē ʼe nātou holi ai ki te ʼu koloā fakamālama, mokā ʼe nātou manatu pe kia nātou totonu, mokā ʼe nātou agamālohi, pea mokā ʼe nātou tali te faʼahiga ʼofa heʼeʼaoga ʼaē ʼe maʼu ʼi te mālama ʼaenī. Kapau ʼe koutou fia tuputupu ʼi te ʼofa moʼoni, ʼe tonu ke koutou fakafeagai mālohi ki te manatu ʼo te mālama. (Sakopo 4:7) Kae ʼaua naʼa koutou falala ki tokotou mālohi fakatagata; koutou pāui kia Sehova ke tokoni atu. Ko tona laumālie—ʼaē ʼe mālohi ʼaupito ʼi te ʼatulaulau—ʼe feala ke ina fakamālohiʼi koutou pea mo tapuakina koutou.—Pesalemo 121:2.
Tou Ako Te ʼOfa Mai Te Fale Tautēhina Faka Kilisitiano
Ohage ko te fānau ʼaē ʼe nātou ako te ʼofa heʼe nātou sio kiai ʼi tonatou ʼu loto fale, ko tatou fuli—ʼu tūpulaga mo matuʼa—ʼe feala ke tou fakatuputupu te ʼofa mokā tou fakatahi mo ʼihi Kilisitiano. (Soane 13:34, 35) ʼIo, ko te ʼuluaki gāue ʼa te kokelekasio faka Kilisitiano ʼe ko te foaki ʼo he ʼaluʼaga ʼe feala ai ki te hahaʼi ke nātou “[feʼugaʼaki] ki te ʼofa pea mo te ʼu gāue matalelei.”—Hepeleo 10:24, MN.
Ko te taʼi ʼofa ʼaia ʼe leleiʼia tāfito e nātou ʼaē ʼe lagi nātou “fakaofaofa pea mo ogosia” ʼi te mālama heʼe ʼofa ʼaenī. (Mateo 9:36) ʼE lahi te ʼu faʼifaʼitaki ʼe nātou fakahā mai, ʼe feala ki te ʼu felogoi ʼofa ʼi te temi ʼaē kua tou lalahi ai, ke ina tekeʼi he ʼu tuʼuga meʼa kovi neʼe hoko kia tatou ʼi tatatou kei veliveli. Koia ʼe ko he meʼa maʼuhiga ki te kau Kilisitiano fuli ʼaē kua foaki tonatou maʼuli ki te ʼAtua, ke nātou tali fakafiafia te hahaʼi foʼou ʼaē ʼe ʼōmai ʼo kaugā gāue fakatahi mo nātou!
“Ko Te ʼOfa ʼe Molemo Puli Ia ʼi He Lakaga”
ʼE ʼui e te Tohi-Tapu “ko te ʼofa ʼe molemo puli ia ʼi he lakaga.” (1 Kolonito 13:8, MN ) ʼO feafeaʼi? ʼE ʼui mai e te ʼapositolo ko Paulo: “Ko te ʼofa ʼe kātaki fualoa pea mo agalelei. Ko te ʼofa ʼe mole maheka, ʼe mole laupisi, ʼe mole fialahi, ʼe mole ina fai he ʼu aga ʼe mole mata feʼauga, ʼe mole ina kumi pe te meʼa ʼaē ʼe ʼaoga kia te ia, ʼe mole ʼita ia. ʼE mole ina tokagaʼi te kovi ʼaē neʼe fai kia te ia.” (1 Kolonito 13:4, 5, MN ) ʼE mahino ia, ko te ʼofa ʼe ko he kalitate ʼe maʼuli moʼoni. Pea ko nātou ʼaē ʼe nātou maʼu te ʼofa ʼaia, ʼe nātou mahino lelei pea mo fakamoʼoni ki te ʼu mamahi pea mo te ʼu tuʼutāmaki ʼo te mālama, kae ʼe mole nātou tuku te ʼu meʼa ʼaia ke nātou maumauʼi tonatou ʼofa ki tonatou ʼu tatau. Ko te taʼi ʼofa ʼaia ʼe moʼoni pea ʼe “ko he noʼo haohaoa ia ki te logo tahi.”—Kolose 3:12-14, MN.
Tou fakatokagaʼi te faʼifaʼitaki ʼi Kolea, ʼa te kiʼi finemui ʼe taʼu 17. ʼI tana kamata tauhi kia Sehova ʼAtua, neʼe fakafeagai tona famili kia ia pea neʼe fakamavae ʼi tona ʼapi. Kae neʼe mole ʼita, neʼe faikole ʼo ʼuhiga te faʼahi ʼaia, ʼo ina tuku te Folafola ʼa te ʼAtua pea mo tona laumālie ke gāue ki tana fakakaukau. Tahi ʼaē meʼa, neʼe faitohi tuʼumaʼu ki tona famili, ʼo ina fakahā kia nātou tona ʼofa moʼoni ʼaē kia nātou. Pea ko tona fua, neʼe kamata te ako Tohi-Tapu ʼa tona ʼu tokolua lalahi e lua, pea ʼi te temi nei kua nā papitema. Ko tana faʼe mo tona tēhina veliveli neʼe nā tali foki mo te moʼoni ʼo te Tohi-Tapu. ʼOsi ʼaia, ko tana tāmai, ʼaē neʼe fakafeagai mālohi ki ai neʼe fetogi tona loto. ʼE tohi fēnei e te finemui Fakamoʼoni: “Kua mātou ʼohoana fuli mo te ʼu Kilisitiano, pea ʼi te temi nei ʼi tomatou famili kua mātou toko 23 ʼe mātou atolasio ʼi te logo tahi.” Neʼe mālo ia te ʼofa!
ʼE koutou fia fakatuputupu koa te ʼofa moʼoni pea mo tokoni ki niʼihi ke nātou fai feiā? Koia koutou haga kia Sehova, te Matapuna ʼo te kalitate maʼuhiga ʼaia. Ei, koutou faka maʼuhigaʼi tana Folafola, koutou kole tona laumālie maʼoniʼoni, pea ke koutou fakatahi tuʼumaʼu ki te ʼu tēhina mo tuagaʼane ʼo te kokelekasio. (Isaia 11:9; Mateo 5:5) ʼE ko he meʼa fakaloto fiafia hatatou ʼiloʼi kua vave pulihi te kau agakovi fuli, pea ʼe hāo pe anai te hahaʼi ʼaē neʼe nātou maʼuliʼi te ʼofa faka Kilisitiano moʼoni! ʼIo, ko te ʼofa ʼe ko te kalavi ʼo te fīmālie pea mo te maʼuli.—Pesalemo 37:10, 11; 1 Soane 3:14.
[Paki ʼo te pasina 6]
Ko te faikole pea mo te ako te Folafola ʼa te ʼAtua ʼe tokoni mai anai ke tou fakatuputupu te ʼofa moʼoni