Ko Ai Te ʼu Kaumeʼa ʼo Te ʼAtua?

Ko Sesu Kilisito ʼe ko te ʼAlo ʼo Sehova, pea mo tona kaumeʼa lelei pea mo ʼofaina ʼaupito. ʼI muʼa ʼo tana tupu tagata ʼi te kele, ko Sesu neʼe ko he laumālie mālohi ʼi selo. (Soane 17:5) Pea neʼe haʼu ki te kele moʼo akoʼi ki te hahaʼi te moʼoni ʼo ʼuhiga mo te ʼAtua. (Soane 18:37) Tahi ʼaē meʼa, neʼe ina foaki tona maʼuli fakatagata moʼo hāofaki te hahaʼi fakalogo, mai te agahala pea mo te mate. (Loma 6:23) ʼI te temi nei, ʼe Hau Sesu ʼi te Puleʼaga ʼo te ʼAtua, te puleʼaga ʼo selo ʼaē ka ina fakatuʼu anai te Palatiso ʼi te kele.—Apokalipesi 19:16.

ʼE toe kaumeʼa foki te kau ʼaselo mo te ʼAtua. Ko te kau ʼaselo neʼe mole nātou kamata tonatou maʼuli ʼi te kele. Neʼe fakatupu nātou ʼi selo ʼi muʼa ʼo te faʼu e te ʼAtua te kele. (Sopo 38:4-7) ʼE lauʼi miliona te kau ʼaselo. (Taniela 7:10) Ko te ʼu kaumeʼa ʼaia ʼo te ʼAtua ʼaē ʼi selo, ʼe nātou loto ke ako e te hahaʼi te moʼoni ʼo ʼuhiga mo Sehova.—Apokalipesi 14:6, 7.

ʼE ʼi ai mo te ʼu kaumeʼa ʼo te ʼAtua ʼi te kele; ʼe ina fakahigoaʼi nātou ko tana kau fakamoʼoni. ʼI he telepinale, ko he fakamoʼoni ʼe ina fakamatala te ʼu meʼa ʼaē ʼe ina ʼiloʼi ʼo ʼuhiga mo he tahi peʼe ʼo ʼuhiga mo he meʼa neʼe hoko. Ko te kau Fakamoʼoni ʼa Sehova ʼe nātou fakamatala ki te hahaʼi te ʼu meʼa ʼaē ʼe nātou ʼiloʼi ʼo ʼuhiga mo Sehova pea mo tana fakatuʼutuʼu. (Isaia 43:10) Ohage ko te kau ʼaselo, ko te kau Fakamoʼoni ʼa Sehova ʼe nātou fia tokoni atu kia koutou ke koutou ako te moʼoni ʼo ʼuhiga mo Sehova, pea ʼe nātou loto ke koutou kaumeʼa mo te ʼAtua.