Koteā Te Seole Pea Mo Te Hatesi?

ʼI TE lea faka Hepeleo pea mo te lea faka Keleka, ʼe fakaʼaogaʼi tuʼa 70 tupu ʼi te Tohi-Tapu, ia te kupu faka Hepeleo she’ôl pea mo te kupu haïdês ʼi tona fakaliliu faka Keleka. Ko te ʼu kupu ʼaia e lua ʼe faka ʼuhiga ki te mate. Ko ʼihi Tohi-Tapu ʼe nātou fakaliliu ʼaki te ʼu kupu “faitoka,” “ifeli,” peʼe ko te “luo.” Kae ʼe lahi te ʼu lea ʼe mole feala hanatou fakaliliu fakalelei te ʼu kupu faka Hepeleo pea mo faka Keleka ʼaia. Koia, ʼi te Tohi-Tapu Traduction du monde nouveau ʼe ina fakaʼaogaʼi te ʼu kupu “Seole” pea mo “Hatesi.” Koteā te faka ʼuhiga ʼo te ʼu kupu ʼaia? Tou vakaʼi age muʼa tonā ʼu fakaʼaogaʼi ʼi te ʼu vaega kehekehe ʼo te Tohi-Tapu.

Iā Tagata Tānaki 9:10 ʼe ʼui fēnei ai: “[ʼE] mole he gāue, he fakatuʼutuʼu, he ʼatamai mālama, he poto ʼi te Seole, te potu ʼaē ʼe ke ʼalu kiai.” ʼE faka ʼuhiga koa te Seole ki he tānuma peʼe ki he faitoka ʼe tou tanu kiai he tahi ʼe tou ʼofa mamahi ai? Kailoa. Ka talanoa ʼi te Tohi-Tapu ki te tānuma, peʼe ki te faitoka, ʼe ina fakaʼaogaʼi te tahi kupu faka Hepeleo pea mo faka Keleka, kae mole ko te ʼu kupu seole pea mo hatesi. (Senesi 23:​7-9; Mateo 28:1) Pea ʼe mole fakaʼaogaʼi ʼi te Tohi-Tapu ia te kupu “Seole” moʼo faka ʼuhiga ki he falemaka faka famili peʼe ko he luo ʼe tanu fakatahi ai he tokolahi.​—Senesi 49:​30, 31.

Kae koteā ʼaē ʼe faka ʼuhiga kiai te “Seole”? ʼE ʼui ʼi te Folafola ʼa te ʼAtua ko te “Seole,” peʼe ko te “Hatesi,” ʼe mole faka ʼuhiga ki he luo ʼe tanu fakatahi kiai he tokolahi. Ohage la iā Isaia 5:​14, ʼe ʼui ai ko te Seole ʼe “faka laulahi pea neʼe ina avahi lahi tona gutu.” Logola ko te Seole kua lahi tana kau mate, kae ʼe hage ʼe mole heʼeki ina feʼaugaʼia. (Tāʼaga Lea 30:​15, 16) ʼE faka tuʼakoi te kaugamālie ʼo te kau mate ʼaē ʼe tanu ki he tānuma, kae ʼe ʼui ʼi te Tohi-Tapu ‘ ʼe mole makona te Seole.’ (Tāʼaga Lea 27:20) Ko tona faka ʼuhiga, ʼe mole fonu ʼi he temi ia te Seole, pea ʼe mole hona tuʼakoi. Koia ko te Seole peʼe ko te Hatesi, ʼi tona fakahagatonu, ʼe mole tuʼu ʼi he koga meʼa neʼe hinoʼi tukupau kiai. Kae ʼe ina fakatātā te mālōlōʼaga ʼo te kau mate fuli.

Ko te akonaki faka Tohi-Tapu ʼo ʼuhiga mo te fakatuʼuake ʼe tokoni mai kiā tatou ke tou mahino lahi age ki te ʼuhiga ʼo te kupu “Seole” pea mo te “Hatesi.” Ko te Folafola ʼa te ʼAtua ʼe ina fakaʼaogaʼi ia te ʼu kupu Seole pea mo Hatesi moʼo faka ʼuhiga ki te faʼahiga mate ʼaē ka hoko anai kiai he fakatuʼuake.a (Sopo 14:13; Gaue 2:31; Apokalipesi 20:13) ʼE toe fakahā ʼi te Folafola ʼa te ʼAtua ko nātou ʼaē ʼi te Seole, peʼe ko te Hatesi, ʼe ko nātou ʼaē neʼe tauhi kiā Sehova pea mo nātou ʼaē neʼe mole tauhi kiā te ia. (Senesi 37:35; Pesalemo 55:15) Koia, ʼe fakahā ʼi te Tohi-Tapu ʼe ʼi ai anai te “fakatuʼuake ʼo te kau faitotonu pea mo te kau heʼe faitotonu.”​—Gaue 24:​15, MN.