KAPITE 13
ʼE Fakalainoaʼi e Te Lotu Hala Ia Te ʼAtua
Kapau ʼe ʼofa te ʼAtua, he koʼe ʼe fai e te ʼu lotu ni aga ʼe kovi kae natou ui ʼe natou fakafofoga te ʼAtua? He ʼe ko te ʼu lotu ʼaia ʼe hala pea ʼe natou fakalainoaʼi te ʼAtua. ʼO feafeaʼi? Kotea te manatu ʼa te ʼAtua? Pea kotea ka ina fai?
1. He koʼe ʼe fakalainoaʼi te ʼAtua ʼuhi ko ʼanatou akonaki?
Neʼe ‘fetogi e te lotu hala te moʼoni ʼo ʼuhiga mo te ʼAtua ʼaki te loi.’ (Loma 1:25) Ohage la, ʼe lahi te ʼu lotu ʼe mole natou fakaha ki te hahaʼi te huafa ʼo te ʼAtua. Kae ʼe ui ʼi te Tohi-Tapu ʼe tonu ke fakaʼaogaʼi te huafa ʼo te ʼAtua. (Loma 10:13, 14) ʼE ui e ʼihi kau takitaki lotu ka hoko he malaʼia pea ko te finegalo ia ʼo te ʼAtua. Kae ko te loi ia. ʼE mole fai e te ʼAtua he meʼa ʼe kovi. (Lau ia Sakopo 1:13.) Kae ʼaki te ʼu loi ʼaia neʼe fakamamaʼo ai te hahaʼi mai te ʼAtua.
2. He koʼe ʼe fakalainoaʼi te ʼAtua ʼuhi ko ʼanatou aga?
ʼE mole hage te tokaga ʼa te lotu hala ki te hahaʼi ko Sehova. ʼE ui ʼi te Tohi-Tapu ‘kua lahi te ʼu agahala ʼa te lotu hala ʼo kaku ki te lagi.’ (Apokalipesi 18:5) Talu mai fualoa ʼe kau te lotu ki te politike, mo lagolago ki te ʼu tau pea mo fakatupu te mate ʼa te toko lauʼi miliona hahaʼi. ʼE koloaʼia ʼihi kau takitaki lotu he ʼe natou kole falā ki te hahaʼi. Koia ʼe ha mai ʼi ʼanatou aga ʼaia ʼe mole iloʼi lelei e te ʼu lotu ʼaia te ʼAtua pea ʼe mole natou fakafofoga moʼoni ia ia.—Lau ia 1 Soane 4:8.
3. Kotea ʼe logoʼi e te ʼAtua ʼo ʼuhiga mo te lotu hala?
Kapau la ʼe ke ita ʼi te ʼu meʼa ʼae ʼe fai e te lotu hala, ʼe feafeaʼi age la Sehova ia? ʼE ʼofa ki te hahaʼi kae ʼe ita ki te kau takitaki lotu ʼae ʼe natou fakalainoaʼi ia ia pea mo gaohi koviʼi te hahaʼi. ʼE ina fakapapau mai ʼe pulihi anai te lotu hala pea “ʼe mole toe maʼu anai ia ia.” (Apokalipesi 18:21) ʼEi, kua vave pulihi pe e te ʼAtua ia te ʼu lotu hala fuli.—Apokalipesi 18:8.
TA FAKALOLOTO
Ta vakaʼi ʼihi faʼahi ʼe logoʼi e te ʼAtua ʼo ʼuhiga mo te lotu hala, mo he tahi ʼu manatu ʼo ʼuhiga mo te ʼu aluʼaga neʼe natou fai pea he koʼe ʼe mole taʼofi ai anai tata ako ke ta iloʼi ia Sehova.
4. ʼE mole tali e te ʼAtua te ʼu lotu fuli
Tokolahi ʼe natou manatu ko te ʼu lotu ʼe hage ko ni ala kehekehe ʼe taki fuli ki te ʼAtua. Kae ʼe moʼoni koa? Lau ia Mateo 7:13, 14 pea fai te fehuʼi ʼaeni:
Kotea ʼae ʼe ui ʼi te Tohi-Tapu ʼo ʼuhiga mo te ala ʼae ʼe ina taki ki te maʼuli?
Vakaʼi te ʼATA VITEO, pea fai te fehuʼi ʼae ʼe hoa mai.
ʼE ui koa ʼi te Tohi-Tapu ʼe lahi te ʼu lotu ʼe tali e te ʼAtua?
5. ʼE mole fakaha e te lotu hala te ʼofa ʼo te ʼAtua
ʼE lahi te ʼu aluʼaga ʼe fakalainoaʼi ai e te ʼu lotu ia te ʼAtua. Ohage la, ʼe natou kau mo lagolago ki te ʼu tau. Vakaʼi te ʼATA VITEO. Pea fai te ʼu fehuʼi ʼae ʼe hoa mai.
Kotea te ʼu faʼahi neʼe fai e te ʼu ʼekelesia lolotoga te Lua Tau Fakamalamanei?
Kotea la tau manatu ki te faʼahi ʼaia?
Lau ia Soane 13:34, 35 mo te 17:16. Pea fai te ʼu fehuʼi ʼaeni:
Kia koe la, kotea ʼe logoʼi e Sehova moka kau te ʼu lotu ki he tau?
ʼE lahi te ʼu meʼa ʼe kovi ʼe fai e te ʼu lotu hala. ʼE ke iloʼi la he ʼu faʼahi ʼe mole natou faʼifaʼitakiʼi ai te ʼofa ʼo te ʼAtua?
ʼE mole faʼifaʼitakiʼi e te ʼu lotu hala te ʼofa ʼo te ʼAtua
6. ʼE fia fakaʼateaina e te ʼAtua te hahaʼi mai te lotu hala
Lau ia Apokalipesi 18:4a pea fai te fehuʼi ʼaeni:
Kotea ʼe ke logoʼi ʼi tau iloʼi ʼae ʼe fia tokoni te ʼAtua ki te hahaʼi ʼae ʼe kakaʼi e te lotu hala?
7. Haga ako ke ke iloʼi te ʼAtua moʼoni
Kapau ʼe fai e te ʼu lotu hala ni palalau mo ni aga ʼe mole lelei, ʼe tonu koa ke ke fetogi tau manatu ʼo ʼuhiga mo te ʼAtua? Fakafuafua age muʼa koe ʼe mole fakalogo he foha ki te ʼu tokoni lelei ʼo tana tamai. ʼE faitokoni ki ai he ʼe mole ina leleiʼia te meʼa ʼe fai e tona foha. ʼE mavae tona foha ʼi fale pea ʼe mole maʼuli fiafia. Koia, ʼe tonu koa ke tukugakoviʼi te tamai ʼi te aluʼaga ʼaia?
ʼE tonu koa ke tou iita kia Sehova pea mo liʼaki tatatou ako ke tou iloʼi ia ia ʼuhi pe ko te ʼu aga ʼe fai e te ʼu lotu hala?
ʼE UI E ʼIHI: “ʼE mole kei au fia logo au ki he tahi ʼe palalau ʼAtua he ʼe kua lahi te ʼu aga kovi ʼe fai e te ʼu lotu.”
ʼE feafeaʼi kia koe?
He koʼe ʼe mole tonu ke fetogi tau manatu ʼo ʼuhiga mo Sehova ʼuhi ko te ʼu aga ʼe fai e te ʼu lotu hala?
MANATU TAFITO
ʼE fakalainoaʼi e te ʼu lotu hala ia te ʼAtua he ʼe natou akoʼi ni manatu hala pea mo fai ni aga fakalialia. ʼE pulihi anai e te ʼAtua te ʼu lotu hala.
Fehuʼi Fakamanatu
Kotea tau manatu ki te ʼu akonaki ʼa te ʼu lotu hala pea mo te ʼu aga ʼe natou fai?
Kotea ʼe logoʼi e Sehova ʼo ʼuhiga mo te ʼu lotu hala?
Kotea ka fai e te ʼAtua ki te ʼu lotu hala?
TE TAHI ʼU MANATU
Te ʼu faʼahi tafito ʼe lua ʼe fai e te ʼu lotu kae ʼe mole leleiʼia e te ʼAtua.
“ʼE Lelei Koa Te ʼu Lotu Fuli? ʼE Taki Fuli Koa Ki Te ʼAtua?” (Alatike ʼi te jw.org)
He koʼe ʼe loto e Sehova ke tou fakatahitahi mo ʼihi ʼo tauhi age kia te ia?
“ʼE ʼAoga Ke Tou Kau Ki He Lotu ʼe Fakatuʼutuʼu Lelei?” (Alatike ʼi te jw.org)
Neʼe lotolotolua he patele ʼo ʼuhiga mo tana lotu, kae neʼe mole ina tuku tana fia iloʼi te moʼoni ʼo ʼuhiga mo te ʼAtua.
“Pourquoi un prêtre a quitté son Église” (Réveillez-vous !, février 2015)
Talu mai fualoa, ʼe akoʼi e te ʼu lotu ni loi ʼo ʼuhiga mo te ʼAtua. ʼE natou ui mole feala ke fakaovi kia te ia pea ʼe ʼagakovi. Kae kotea ʼe akoʼi moʼoni mai ʼi te Tohi-Tapu?
a Kapau ʼe ke fia iloʼi pe koʼe ʼe fakaha ʼi te tohi ʼo Apokalipesi ʼe hage te lotu hala ko he fafine ʼe fakahigoaʼi ko Papiloni Lahi, vakaʼi te Fakamahino 1.