Kotou Tokoni Ki Te Hahaʼi Ke Natou “Alaala . . . Mai Te Moe”
“Kua kotou iloi . . . te temi kua tou nonofo ai: ko te hola aeni ke kotou alaala ai mai te moe.”—LOMA 13:11.
▪ Kotou manatuʼi te maʼuhiga ʼo takotou minisitelio
ʼE FEALA KOA HAKOTOU FAKAMAHINO?
․․․․․
He koʼē ʼe maʼuhiga ke nofo ʼalaʼala te kau Kilisitiano ʼi te faʼahi fakalaumālie?
․․․․․
He koʼē ʼe tonu ki te kau minisi ʼaē ʼe nonofo ʼalaʼala ke fakalogo mo tokaga lelei ki te hahaʼi ʼo te telituale?
․․․․․
He koʼē ʼe maʼuhiga te agalelei ʼi tatatou minisitelio?
1, 2. Ko te faʼahi fea ʼaē ʼe ʼaoga ai ki te tokolahi ke natou ʼaʼala ake mai ai?
ʼI TE taʼu fuli, ʼe mamate te toko lauʼi afe hahaʼi ʼuhi ko tanatou tūlemomoe peʼe ko tanatou māʼumoea ʼi te taki motokā. Ko ʼihi ia neʼe fakamavae ʼi tanatou gāue he neʼe ʼaʼala tauhala pe neʼe tūlemomoe ʼi te gāue. Kae ko te māʼumoea fakalaumālie ʼe kovi age ia. Koia ʼaē ʼe ʼui fēnei ai ʼi te Tohi-Tapu: “Manuia ae e alaala.”—Apk. 16:14-16.
2 ʼAki te fakaovi mai ʼo te ʼaho lahi ʼa Sehova, ko te tokolahi ʼe natou lolotoga momoe ʼi te faʼahi fakalaumālie. Māʼiapē lā mo ʼihi takitaki lotu ʼe natou fakatatau tanatou kau tauhi lotu ki he kau ‘tagata lalahi ʼaupitō ʼe natou lolotoga momoe.’ Koteā koa ia te moe fakalaumālie? He koʼē ʼe maʼuhiga ke nofo ʼalaʼala te kau Kilisitiano moʼoni? ʼE feafeaʼi hatatou lava tokoni ki te hahaʼi ke natou ʼaʼala mai te moe fakalaumālie ʼaia?
TE MOE FAKALAUMĀLIE—KOTEĀ IA TONA FAKAʼUHIGA?
3. ʼE feafeaʼi anai hakotou fakamatalatala ia he tahi ʼe mole nofo ʼalaʼala ʼi te faʼahi fakalaumālie?
3 ʼI te agamāhani ko te hahaʼi ʼaē ʼe momoe, ʼe mole fai hanatou gāue. Kae ko nātou ʼaē ʼe momoe ʼi te faʼahi fakalaumālie ʼe feala ke natou maʼumaʼua ʼaupitō—kae mole ko he ʼu gāue fakalaumālie. ʼE lagi natou maʼumaʼua pē ki te ʼu hoha ʼo te maʼuli ʼi te ʼaho fuli peʼe ko te kumi ʼo he ʼu fakafiafia, ʼo he tuʼulaga, peʼe ko te maʼu koloa. ʼAki te ʼu gāue ʼaia, ʼe mole lahi ai anai hanatou tokaga ki te ʼu meʼa ʼaē ʼe ʼaoga kiā nātou ʼi te faʼahi fakalaumālie. Kae ʼe mahino ki te hahaʼi ʼaē ʼe nonofo ʼalaʼala ʼi te faʼahi fakalaumālie, ʼe tou lolotoga māʼuʼuli “i te u aho fakamuli,” koia ʼaē ʼe tonu ai ke natou faiga mālohi ʼi te fakahoko ʼo te finegalo ʼo te ʼAtua.—2 Pet. 3:3, 4; Luka 21:34-36.
4. Koteā te fakaʼuhiga ʼo te tokoni ʼaenī: “Aua naa tou momoe o hage ko natou ake ae”?
4 Lau ia 1 Tesalonika 5:4-8. Neʼe uga ʼi henī e te ʼapositolo ko Paulo te kau Kilisitiano ke ʼaua naʼa natou “momoe o hage ko natou ake ae.” Neʼe koteā te fakaʼuhiga ʼo tana palalau? ʼE feala ke tou “momoe” mo kapau ʼe tou meʼa noaʼi ia te ʼu lao ʼa Sehova ʼo ʼuhiga mo te aga ʼaē ʼe tonu ke tou fai. Pea ʼe toe feala pē foki ke tou “momoe” mo kapau ʼe tou meʼa noaʼi ia te kua ovi mai ʼo te ʼaho ʼaē kā fakaʼauha anai e Sehova ia te kau agakovi. Koia, ʼe tonu ke tou tokaga fakalelei naʼa tou maʼu ia te faʼahiga manatu mo te aga ʼa te hahaʼi ʼaia.
5. Koteā te ʼu faʼahiga manatu ʼe maʼu e nātou ʼaē ʼe momoe ʼi te faʼahi fakalaumālie?
5 Ko ʼihi, ʼi tanatou moemisi, ʼe natou ʼui ʼe mole ʼi ai he ʼAtua ke natou huʼi maʼua ki ai. (Pes. 53:2 [Pes. 53:1, MN]) Kae ko ʼihi ʼe natou ʼui ko te ʼAtua ʼe mole tokaga ki te mālamanei, koia ʼaē ʼe mole tou fia fakaovi ai kiā te ia. Pea ko ʼihi leva ia, ʼe natou ʼui ʼe natou tui ki te ʼAtua pea kua feʼauga ai pē ia. Ko te hahaʼi fuli ʼaia ʼe natou momoe ʼi te faʼahi fakalaumālie pea ʼe tonu ke fakaʼala nātou. ʼO feafeaʼi hatatou lava tokoni kiā nātou?
ʼE TONU KE TOU HAGA NONOFO ʼALAʼALA
6. He koʼē ʼe tonu ki te kau Kilisitiano ke natou faiga ke natou nonofo ʼalaʼala ʼi te faʼahi fakalaumālie?
6 Ke feala hatatou fakaʼala te hahaʼi, ʼe tonu foki mo tātou ke tou nofo ʼalaʼala. Koteā ʼaē ʼe fakamaʼua kiai? ʼE fakapipiki tahi ʼi te Folafola ʼa te ʼAtua ia te moe fakalaumālie mo te “u gaue o te pouli”—te ʼu fakafiafia fakavale, te konahia, te ʼu felāveʼi fakasino heʼeʼaoga, te aga heʼeʼaoga, te fekēʼaki pea mo te maheka. (Lau ia Loma 13:11-14.) ʼE feala ke faigataʼa te tekeʼi ʼo te ʼu aga ʼaia. Koia ko te nofo ʼalaʼala ʼe maʼuhiga ʼaupitō. Kapau ʼe meʼa noaʼi e he tagata taki motokā ia tana tulemoe ʼi te fakaʼuli ʼe feala pē ke tuʼutāmaki ai tona maʼuli. Koia ʼaē ʼe maʼuhiga ʼaupitō ai ki he Kilisitiano ke mahino ko te māʼumoea fakalaumālie ʼe feala ke fakatupu mate!
7. ʼE feala ke malave feafeaʼi kiā tātou ia he manatu hala ʼo ʼuhiga mo te hahaʼi?
7 Ohagē lā, ʼe feala ki he Kilisitiano ke manatu ko te hahaʼi fuli ʼo tona telituale ʼe natou fakafisi tuʼumaʼu pē ki te logo lelei. (Taag. 6:10, 11) ʼE lagi feala ke manatu fēnei: ‘kapau koia, pea koteā te ʼuhiga ʼo taku faiga mālohi ke au tokoni kiā nātou?’ ʼE moʼoni, tokolahi ʼe lagi natou lolotoga momoe nei ʼi te faʼahi fakalaumālie, kae ʼe feala pē ke fetogi ʼonatou ʼaluʼaga pea mo tanatou aga. Ko ʼihi ʼe ʼaʼala ake mai tanatou moe fakalaumālie pea natou tali te logo lelei. Pea ʼe feala ai leva hatatou tokoni kiā nātou mo kapau ʼe tou nofo ʼalaʼala, ʼo tou ʼahiʼahi te ʼu faʼahiga fakahoko foʼou ʼaē ʼo ʼuhiga mo te tala ʼo te logo ʼo te Puleʼaga ke tupu ai hanatou fia logo. Ke tou nofo ʼalaʼala ʼe tonu ke tou manatuʼi ia te maʼuhiga ʼo tatatou minisitelio.
KOTEĀ ʼAĒ ʼE MAʼUHIGA ʼAUPITŌ AI TATATOU MINISITELIO?
8. He koʼē ʼe maʼuhiga ʼaupitō tatatou minisitelio Fakakilisitiano?
8 Tatau aipē peʼe mole loto kiai te hahaʼi kae tou manatuʼi, ko tatatou gāue fai fakamafola ʼe ina fakakolōliaʼi ia Sehova pea mo lagolago ki te fakahoko ʼo tona finegalo. Kua vave hoko pē te tauteaʼi ʼe te ʼAtua ia nātou ʼaē ʼe mole natou fia logo ki te logo lelei. ʼE fakamāuʼi anai ia te hahaʼi ʼo mulimuli pē ki tanatou faʼahiga tali ia tatatou gāue fai fakamafola. (2 Tes. 1:8, 9) Pea tahi ʼaē, ʼe faihala anai he Kilisitiano mo kapau ʼe ina ʼui ʼe mole ʼaoga hana faiga mālohi ʼi te fai fakamafola koteʼuhi “e i ai anai he toe tuuake o te kau agatonu mo te kau agahala.” (Gaue 24:15) Kua mahino kiā tātou ʼaki te Folafola ʼa te ʼAtua ko nātou ʼaē ʼe fakamāuʼi ko ni “tao” ʼe ‘tauteaʼi anai nātou ʼo heʼegata.’ Ko tatatou fai fakamafola ʼe ko te fakahā ʼaia ʼo te manavaʼofa ʼa te ʼAtua, heʼe ina foaki ai ki te hahaʼi ia te faigamālie ʼaē ke natou fetogi pea mo maʼu te “mauli heegata.” (Mat. 25:32, 41, 46; Loma 10:13-15) Kae kapau ʼe mole tou fai fakamafola, ʼe feafeaʼi anai ki te hahaʼi hanatou maʼu te faigamālie ʼaē ke natou logo ki te logo lelei ʼaē ʼe feala ke natou maʼu ai te maʼuli?
9. Neʼe fua lelei feafeaʼi kiā koutou pea mo ʼihi atu ia te fakamafola ʼo te logo lelei?
9 Ko te fakamafola ʼo te logo lelei ʼe toe fua lelei foki kiā tātou. (Lau ia 1 Timoteo 4:16.) ʼE mole koa lā kotou fakatokagaʼi, mokā kotou palalau ʼo ʼuhiga mo Sehova pea mo te ʼamanaki ki te Puleʼaga, ʼe ina fakalotomālohiʼi ai takotou tui mo tokotou ʼofa ʼaē ki te ʼAtua? ʼE mole koa lā tokoni atu ke kotou maʼuliʼi ia te ʼu kalitātē Fakakilisitiano? ʼE mole koa lā kotou fakahā takotou pipiki ki te ʼAtua ʼaki takotou kau ki te minisitelio ʼaē ʼe kotou maʼu ai ia te fiafia? Tokolahi ia nātou ʼaē neʼe natou akoʼi te moʼoni ki ʼihi, neʼe natou fiafia ʼi te sio ki te tokoni ʼa te laumālie ʼo te ʼAtua ki te hahaʼi ʼaia ke natou fetogi ia tonatou maʼuli ke lelei age.
TOU TOKAGAʼI TE AGAAGA ʼO TE HAHAʼI
10, 11. (a) Neʼe feafeaʼi te nofo ʼalaʼala ʼa Sesu pea mo Paulo ʼo ʼuhiga mo te ʼu meʼa ʼaē ʼe ʼaoga ki te hahaʼi? (b) Kotou fakamahino peʼe tokoni feafeaʼi te nofo ʼalaʼala pea mo te tokagaʼi ʼo te agaaga ʼo te hahaʼi ki te hikihiki ʼo tatatou minisitelio.
10 ʼE lahi te ʼu puleʼaki ke tupu ai te fia logo ʼa te hahaʼi ki te logo lelei. Koia ʼaē ʼe tonu ai ke tou nofo tokaga ʼi tatatou minisitelio. Pea ko Sesu ʼe ko he faʼifaʼitaki maʼa tātou. ʼI tona ʼuhiga haohaoa, neʼe feala ke ina ʼiloʼi te ʼita ʼa te Faliseo ʼaē neʼe mole ʼasi mai ki tuʼa, te fakahemala moʼoni ʼa te fafine agahala pea mo te maʼuli fakasākilifisio ʼa te fafine vītua. (Luka 7:37-50; 21:1-4) Neʼe feala ke foaki e Sesu te meʼa ʼaē neʼe ʼaoga kiā nātou takitokotahi ʼi te faʼahi fakalaumālie. Kae ʼe mole fakamaʼua ki he kaugana ʼa te ʼAtua ke haohaoa ke feala hana tokagaʼi te ʼu meʼa ʼaē ʼe ʼaoga ki te hahaʼi. ʼE fakamoʼoni kiai te faʼifaʼitaki ʼa te ʼapositolo ko Paulo. Neʼe ina fakaʼalutahi tana fai fakamafola mo te ʼaluʼaga ʼa te hahaʼi ke tupu ai hanatou fia logo ki te logo lelei.—Gaue 17:22, 23, 34; 1 Ko. 9:19-23.
11 Kapau ʼe tou nofo ʼalaʼala pea mo tou tokagaʼi te ʼu meʼa ʼaē ʼe ʼaoga ki te hahaʼi ohagē pē ko Sesu mo Paulo, pea ʼe feala anai ke tou ʼiloʼi peʼe koteā ʼaē ʼe tou lava fai ke tupu ai hanatou fia logo ki te logo lelei. Ohagē lā, kā kotou fakaovi ki te hahaʼi, kotou tokagaʼi peʼe ʼi ai he ʼu faʼahi ʼe feala ai hakotou ʼiloʼi tanatou agaʼi fenua, te ʼu meʼa ʼaē ʼe natou fakaʼamu kiai peʼe ko tonatou ʼaluʼaga fakafāmili. ʼE lagi feala hakotou tokagaʼi te meʼa ʼaē ʼe natou lolotoga fai ʼi te lakaga ʼaia pea mo kotou foaki he palalau fakaʼapaʼapa ki te faʼahi ʼaia ʼo kotou kamata ai he fai palalau.
12. Kā tou ʼolo ʼo fai fakamafola, he koʼē ʼe tonu ke tou tōkakaga ki tatatou fai palalau?
12 Ko he tahi ʼe nofo ʼalaʼala ʼe faiga ke ina tekeʼi te ʼu faʼahi ʼaē ʼe feala ke natou fakaleluʼi ia ia. Logolā ko te fai palalau ʼaē mo tokita kaugā fai fakamafola lolotoga te minisitelio ʼe feala ke fakalotomālohi, kae ʼe tonu ke tou manatuʼi te tupuʼaga ʼo tatatou kau ki te minisitelio ʼaē ko te fakamafola te logo ki te hahaʼi. (Ekl. 3:1, 7) Koia ʼe tonu ke tou tōkakaga ki tatatou fai palalau ʼi te vaha ʼo te ʼu ʼapi naʼa fakalelu ki te fakahoko ʼo tatatou minisitelio. Ko te fai palalau ki te ʼu manatu ʼaē ʼe tou fia fakahā ki te hahaʼi ʼaē ʼe fia logo ʼe ko he puleʼaki lelei ke tou haga tōkakaga tāfito ki te gāue fai fakamafola. Pea tahi ʼaē, logolā ʼe ʼaoga te kiʼi telefoni feʼaveʼaki ki tatatou minisitelio, kae ʼe tonu ke tou tōkakaga naʼa ina fakaleluʼi tātou lolotoga tatatou fai palalau mo he tahi.
TOU FAKAHĀ ʼE TOU TOKAGA KI TE HAHAʼI
13, 14. (a) ʼE lava feafeaʼi hatatou ʼiloʼi te ʼu meʼa ʼaē ʼe leleiʼia e he tahi? (b) Koteā te ʼu faʼahi ʼe feala ke leleiʼia ai e te hahaʼi te ʼu meʼa fakalaumālie?
13 Ko te ʼu minisi ʼaē ʼe nofo ʼalaʼala mo tokaga, ʼe natou fakalogo lelei ki te hahaʼi ʼaē ʼe natou felāveʼi mo ia. Ko te ʼu fehuʼi fea ʼaē ʼe feala ke kotou fai ke tupu ai te fakahā atu e he tahi ʼi te minisitelio ʼana manatu? ʼE tuʼania koa ʼo ʼuhiga mo te lahi ʼo te ʼu lotu, te fai fakapō ʼi te fenua, peʼe ko te mole lavaʼi e te atu puleʼaga te ʼu faigataʼaʼia fakamālamanei? ʼE feala koa hakotou tokoni ki ʼihi ke natou ako ʼo ʼuhiga mo te ʼAtua ʼaki takotou talanoa ki te ʼu meʼa fakaofoofo ʼaē neʼe fakatupu, peʼe ki te ʼaoga ʼaē ʼo he tokoni Fakatohi-tapu? ʼE teitei pē ki te hahaʼi ʼo te atu agaʼi fenua fuli ʼe natou fia palalau ki te faikole, māʼia mo nātou ʼaē ʼe mole tui ki te ʼAtua. Tokolahi ʼe natou feʼuiʼaki peʼe fakalogo koa he tahi ki te ʼu faikole. Pea ko ʼihi ʼe lagi natou fia mahino ki te ʼu fehuʼi ʼaenī: ʼE fakalogo koa te ʼAtua ki te ʼu faikole fuli? Kapau ʼe mole koia, pea koteā ʼaē ʼe tonu ke tou fai ke fakalogo te ʼAtua ki ʼatatou faikole?
14 ʼE feala hatatou ako te faʼahiga kamata ʼo he fai palalau, mai iā nātou ʼaē kua faiva ʼi te fai fakamafola. Kotou fakatokagaʼi ia tanatou faʼahiga fai fehuʼi ke mole fakatupu ʼaki ai he ufiufi ʼa he tahi ʼe tou fai fakamafola ki ai. ʼE ʼiloga feafeaʼi ʼi tonatou leʼo mo te agaaga ʼo tonatou fofoga ia tanatou fia mahino lelei ki te manatu ʼo ia ʼaē ʼe natou fai palalau mo ia?—Taag. 15:13.
KOTOU AGALELEI PEA MO FAIVA
15. He koʼē ʼe tonu ke tou agalelei mokā tou fai fakamafola?
15 ʼE kotou leleiʼia koa mokā fafagu koutou kae ʼe kotou lolotoga mate moe? Tokolahi ʼe ʼitaʼita mokā fafagu fakapunamaʼuli ia nātou. ʼI te agamāhani ʼe lelei age honatou fafagu māmālie. Pea ʼe toe fēia mo ʼatatou faiga ʼaē moʼo fafagu te hahaʼi mai te moe fakalaumālie. Ohagē lā kapau ʼe tali koviʼi koutou e he tahi, koteā ʼaē ʼe lelei age ke kotou fai? ʼE tonu anai ke kotou lotomahino, mo fakamālo kiai ki tana palalau fakahagatonu atu, pea ʼaki he loto fakatokatoka kotou mavae mai ai. (Taag. 15:1; 17:14; 2 Tim. 2:24) Ko takotou agalelei ʼe feala ke ina uga he tahi ke ina fetogi tana aga mokā ʼe toe ʼaʼahi ia ia e he tahi age Fakamoʼoni.
16, 17. ʼE feafeaʼi hatatou lava fakahā te fakasiosio poto ʼi tatatou minisitelio?
16 ʼI ʼihi lakaga, ʼe feala pē ke hoko atu te fai palalau mo he tahi ʼe mole fia logo. ʼE feala pē ke ʼui atu e he tahi, “Kailoa mālo. Kua ʼi ai taku lotu” peʼe, “ ʼE mole au loto au kiai” ʼuhi pē, ko tana fia fakagata te fai palalau. Kae, ʼaki te poto mo te agalelei, ʼe feala ke kotou lagaʼi he fehuʼi ke tupu ʼaki ai hana leleiʼia te ʼu meʼa fakalaumālie.—Lau ia Kolose 4:6.
17 ʼI ʼihi temi, mokā tou felāveʼi mo te hahaʼi ʼaē ʼe mole maʼu honatou temi ke fai palalau, ʼe lelei age hatatou mahino ki te ʼaluʼaga pea mo tou mavae mai ai. Kae ʼi ʼihi temi, ʼe feala ke kotou fai ni palalau ʼe nounou mo maʼuhiga. Ko ʼihi tehina ʼe natou lava kamata he fai palalau ʼe nounou ʼe fakatafito ki he vaega tohi-tapu pea mo te lagaʼi ʼo he fehuʼi ʼi muʼa o tanatou mavae. ʼI ʼihi temi ko tanatou fakahā fakanounou ia te logo lelei neʼe tupu ai te fia logo ʼa he tahi neʼe maʼumaʼua fau ke fai palalau. ʼE lagi lelei hakotou faiga ke kotou fai te faʼahiga fai ʼaia mokā ʼe hoko atu he ʼaluʼaga fēia.
18. Koteā ʼaē ʼe feala ke tou fai ke tou faiva ʼi te fai fagonogono faigamālie?
18 Kā tou felāveʼi mo te hahaʼi ʼi tatatou gāue ʼi te ʼaho fuli, ʼi te agamāhani ʼe feala ke tou fakatupu tanatou fia logo mo kapau neʼe tou teuteu ki te fai fagonogono faigamālie. Tokolahi te ʼu tehina mo tuagaʼane ʼe natou ʼave ʼi ʼonatou tagaʼi kofu peʼe ko ʼanatou kato he ʼu tohi. ʼE toe feala foki ke natou tāʼofi fakaʼatamai he vaega Tohi-Tapu ke natou fakahā ki te hahaʼi mo kapau ʼe hoko he ʼu faigamālie kiai. ʼE feala hakotou fakaovi ki te tehina taupau gāue peʼe ko te kau pioniē ʼo takotou kōkelekāsio ke natou fakamahino atu te faʼahiga fai ʼaē ʼo te fagonogono faigamālie.
TOU FAFAGU MĀMĀLIE TOTATOU FĀMILI
19. He koʼē ʼe mole tonu ke tuku ʼatatou faiga ʼaē ke tou tokoni ki totatou fāmili?
19 ʼE mahino ia, ʼe tou fia tokoni ki totatou fāmili ke natou tali te logo lelei. (Sos. 2:13; Gaue 10:24, 48; 16:31, 32) Kapau neʼe natou fakafisi ki te logo lelei ʼi te kamata, pea ʼe feala pē ke mole tou toe fia hoko atu ʼatatou faiga. ʼE lagi tou manatu ʼe mole tou lava fai he meʼa ke fetogi ai tanatou aga. Kae ʼe feala pē foki ke hoko he ʼu ʼaluʼaga ʼe ina fetogi anai te maʼuli pea mo te faʼahiga manatu ʼaē ʼo tokotou fāmili. Peʼe lagi ko te lelei ʼaē ʼo takotou faʼahiga fakamahino ia te moʼoni, ʼaē kua kotou lava maʼu ai he ʼu fua lelei.
20. He koʼē ʼe maʼuhiga ke tou palalau fakaʼeteʼete mo totatou fāmili?
20 ʼE tonu ke tou tokagaʼi te loto ʼo totatou fāmili. (Loma 2:4) ʼE mole tonu koa lā ke tou palalau ʼaki he agalelei kiā nātou ohagē pē ko tatatou fai ki te hahaʼi ʼaē ʼe tou felāveʼi mo nātou ʼi te gāue fai fakamafola? Kotou palalau ʼaki he agamalū mo he fakaʼapaʼapa. ʼO mole kotou fai tokoni, kotou fakahā pe neʼe malave feafeaʼi te moʼoni kiā koutou pea mo fua lelei kiā koutou. (Efe. 4:23, 24) Kotou fakahā lelei te kua lelei age ʼo tokotou maʼuli ʼuhi ko Sehova ʼaē ʼe ina ‘akoʼi ia koutou ke kotou manuʼia.’ (Esa. 48:17) Kotou fakahā ki tokotou fāmili ia te maʼuli Fakakilisitiano ʼaki takotou faʼifaʼitaki.
21, 22. Kotou fakamatala he ʼaluʼaga ʼe hā ai te maʼuhiga ʼo te faʼa kātaki ʼi te ʼu faiga ʼaē ʼe tou fai moʼo tokoni ki totatou fāmili ʼi te faʼahi fakalaumālie?
21 Mole faʼa fualoa kiai, neʼe faitohi fēnei te tuagaʼane: “Neʼe au faiga ʼi te ʼaho fuli ke au tuku he faʼifaʼitaki lelei ʼi te aga mo te palalau ki ʼoku tehina mo tokolua e toko 13. ʼI te taʼu fuli neʼe au faitohi kiā nātou takitahi. Kae lolotoga taʼu e 30, neʼe ko au tokotahi pē te Fakamoʼoni ʼa Sehova ʼi te fāmili.”
22 ʼE toe hoko atu fēnei te tuagaʼane: “ ʼI te tahi ʼaho, neʼe au telefoni ki toku tahi tehina ʼe nofo mamaʼo iā kilometa e teau tupu. Neʼe ina ʼui mai neʼe ina kole ki te pātele ke fai hana ako Tohi-Tapu kae mole pē lā heʼeki fai. Pea ʼi taku ʼui age ʼe au fiafia anai ʼi te tokoni kiā ia, neʼe ina ʼui mai: ‘Iō, kae ʼe au ʼui atu nei: ʼe mole au liliu anai ʼi he temi ko he Fakamoʼoni ʼa Sehova.’ Hili kiai ni ʼaho ʼo taku momoli te tohi Koteā ʼAē ʼe Akoʼi Moʼoni Mai ʼi Te Tohi-Tapu?, neʼe au telefoni leva ki ai. Kae neʼe heʼeki ina ʼavahi pē lā te tohi. Pea neʼe au kole age ke ina toʼo tana tohi, pea neʼe mā lau mo palalau ki te ʼu vaega ʼaē neʼe tuʼu ʼi ai lolotoga iā minuta e 15 ʼi te telefoni. Hili pē tamā tahi ʼu fai telefoni, neʼe kua loto leva ia ke fuafualoa age tana kiʼi laulau tohi. Pea kamata mai ai leva tana fai telefoni mai kiā au, ʼi te ʼuhu kae ʼe kei au takoto ke fai tana ako pea ʼi ihi temi ʼe pāui mai tuʼa lua. ʼI te taʼu ʼaē neʼe hoa mai kiai, neʼe papitema pea ʼosi te taʼu kātoa neʼe liliu leva ʼo pioniē.”
23. He koʼē ʼe mole tonu ke tou fiu ʼi te fafagu ʼo te hahaʼi mai te moe fakalaumālie?
23 Ko te fafagu ʼo te hahaʼi mai te moe fakalaumālie ʼe mole ko he gāue faigafua pea ʼe fakamaʼua kiai ke tou faʼa kātaki. Kae ko te hahaʼi agamalū ʼe natou tali lelei tuʼumaʼu pē ʼatatou faiga. ʼE fakafuafua ʼi te māhina fuli, ʼe papitema te toko 20 000 tupu hahaʼi ko he kau Fakamoʼoni ʼa Sehova. Tou taupau te tokoni ʼaē neʼe fai e Paulo ki totatou tehina ʼo te ʼuluaki sēkulō ko Alikipe: “Tokaga ki te gaue nee ke tali mai te Aliki, ke ke fai fakamalotoloto ia.” (Kol. 4:17) Ko te ʼalatike ʼaē kā hoa mai ʼe tokoni mai anai ke tou mahino fuli ki te fakaʼuhiga ʼo te fai fakamafola ʼaki te manatu ʼaē ko te temi kua nounou.
[Talanoa ʼo te pāsina 13]
KE KOTOU HAGA NONOFO ʼALAʼALA
▪ Kotou maʼumaʼua ʼi te fakahoko ʼo te finegalo ʼa te ʼAtua
▪ Kotou tekeʼi te ʼu gāue ʼo te fakapōʼuli
▪ Kotou manatuʼi te fakatupu tuʼutāmaki ʼo te māʼumoea fakalaumālie
▪ Kotou taupau he manatu lelei ʼo ʼuhiga mo te hahaʼi ʼo tokotou telituale
▪ Kotou ʼahiʼahi te ʼu faʼahiga fakahoko foʼou ʼo te fai fakamafola