Te ʼu Tali Ki Te ʼu Fehuʼi Fakatohi-Tapu

ʼE feala koa ke fakamolemole ʼatatou agahala?

Ohage ko tona ui ʼi te Tohi-Tapu, ʼe agahala te tagata fuli pe. Neʼe tou maʼu totatou ʼuhiga agahala mai te ʼuluaki tagata, ia Atama. Koia la ʼae, ʼi ʼihi temi ʼe tou agahala ai pea mo fakahemala ki muli age. Neʼe mate ia Sesu Kilisito, te ʼAlo ʼo te ʼAtua, moʼo totogi ʼatatou agahala. Neʼe fakafealagia e te sakilifisio faitotogi ʼaia ia te fakamolemole. ʼE ko he meʼa ʼofa mai te ʼAtua.—Lau ia Loma 3:23, 24.

Ko ʼihi ia natou ʼae neʼe agahala mamafa ʼe natou feʼekeʼaki pe ʼe fakamolemole anai te ʼAtua kia natou. Meʼa lelei foki, heʼe ui fenei mai ʼi te Folafola ʼa te ʼAtua: “E fakamaa tatou e te toto o Sesu tona Alo i te u agahala fuli.” (1 Soane 1:7) ʼE lotolelei te ʼAtua ke fakamolemole mai, maʼia pe la mo te ʼu agahala mamafa, mo kapau ʼe tou fakahemala moʼoni.—Lau ia Esaia 1:18.

Kotea ʼae ʼe tonu ke tou fai ke tou maʼu te fakamolemole?

Kapau ʼe tou loto ke fakamolemole mai ia Sehova ʼAtua, pea ʼe tonu ke tou mahino ki tona ʼuhiga, mo ʼana ʼala, mo ʼana tokoni pea mo ʼana fakamaʼua kia tatou. (Soane 17:3) ʼE fakamolemole gafua ia Sehova kia natou ʼae ʼe natou fakahemala mo tafoki mai ʼanatou agahala.—Lau ia Gaue 3:19.

Ko te maʼu ʼo te ʼofa ʼo te ʼAtua ʼe mole faigataʼa fau kia tatou. ʼE mahino ia Sehova ki ʼotatou vaivaiʼaga. ʼE manavaʼofa pea mo agaʼofa ia. Ko tona ʼofa, ʼe mole ina ʼekenaki koa koutou ke kotou mahino ki te ʼu gaue ʼae ʼe fiafia ai tona loto?—Lau ia Pesalemo 103:13, 14.