“ʼE Iloʼi e Sehova Ia Natou ʼAe ʼAʼana”

1. Tuku mai he faʼifaʼitaki neʼe hala ai te manatu ʼa ʼihi hahaʼi ʼa te ʼAtua. (Vakaʼi te ʼuluaki pakī.)

ʼI TE tahi ʼaho, neʼe tuʼu ia te Pelepitelo Lahi ko Alone ʼi te muʼa tapenakulo pea ʼi te tahi faʼahi neʼe tutuʼu ai ia Kole pea mo te toko 250 ʼu tagata moʼo momoli te iseso kia Sehova. (Num. 16:16-18) Neʼe hage mai, neʼe natou agatonu fuli ki te ʼAtua. Kaʼe ko Kole pea mo natou ʼae neʼe lagolago ki ai, neʼe natou fialahi, mo agatuʼu mo manatu pe kia natou. Pea neʼe natou faiga ke natou faʼao te tuʼulaga pelepitelo ʼo Alone. (Num. 16:1-11, MN) Neʼe natou kakāʼi pe ia natou totonu, ʼo natou manatu ai ʼe tali anai e Sehova ia tanatou tauhi. Kaʼe ʼi tona fakahagatonu, neʼe natou moamoagaʼi ia Sehova, ʼae neʼe lava sio ki ʼonatou loto. Neʼe mahino ia te ʼAtua ki tanatou malualoi pea mo tanatou fia fakakololiaʼi pe ia natou totonu.—Sel. 17:10, MN.

2. Kotea ʼae neʼe ui e Moisese, pea neʼe hoko feafeaʼi ʼana palalau?

² Neʼe ui fenei e Moisese: “ʼI te ʼaho ake, ʼe fakaha anai e Sehova pe ko ai ʼae ʼaʼana.” (Num. 16:5, MN) Neʼe fakaha feafeaʼi e Sehova neʼe ina iloʼi ʼana kau atolasio moʼoni pea mo natou ʼae neʼe malualoi? Neʼe fakato ifo e Sehova ia he afi mai te lagi ʼo fakaʼauha ai ia Kole pea mo te toko 250 ʼu tagata. (Num. 16:35; 26:10) Kaʼe neʼe ko Alone pe ʼae neʼe hao. Neʼe fakaha lelei ai e Sehova neʼe ko Alone ia te pelepitelo pea mo tana kaugana moʼoni.—Lau ia 1 Kolinito 8:3.

3. (1) ʼI te temi ʼo Paulo, kotea ʼae neʼe hoko ʼi te kokelekasio Fakakilisitiano? (2) Kotea ʼae neʼe fai e Sehova ki te kau agatuʼu, pea kotea te ako ʼe tou lava taʼofi mai ai?

³ Neʼe hoko te aluʼaga feia ia teitei taʼu ʼe 1 500 ki muli age ʼi te kokelekasio Fakakilisitiano ʼi te temi ʼo Paulo. Neʼe fakamahino e Paulo ko ʼihi ʼae neʼe natou ui ko natou ko he kau Kilisitiano, neʼe natou kamata lagolago ki te ʼu akonaki loi. Kaʼe neʼe kei natou kau pe ʼi te kokelekasio. Neʼe lagi hage te kau aposeta ʼaia ko ni kau atolasio moʼoni ʼa Sehova. Kaʼe neʼe natou hage ko ni lupo fekai pea neʼe natou kamata fakahiga “te tui ʼa ʼihi.” (2 Tim. 2:16-18, MN) Neʼe sio koa ki ai ia Sehova? ʼEi. Neʼe iloʼi e Paulo te meʼa ʼae neʼe fai e te ʼAtua ki te kau agatuʼu, ia Kole pea mo natou ʼae neʼe lagolago ki ai. Koia neʼe falala ai ia Paulo neʼe mahino katoa ia Sehova ki te aluʼaga ʼaia. ʼE feala mo tatou ke tou toe maʼu te falala ʼaia kia Sehova. ʼO ʼuhiga mo te faʼahi ʼaia, tou vakaʼi ia te ʼu palalau maʼuhiga ʼae neʼe tohi e te apositolo ko Paulo kia Timoteo.

“KO AU [SEHOVA], E MOLE AU FETOGI”

4. Kotea ʼae neʼe tui papau ki ai ia Paulo? Kotea ʼae neʼe ui e Paulo kia Timoteo?

⁴ Neʼe tui papau ia Paulo, ʼe iloʼi anai e Sehova pe ko ai ia natou ʼae neʼe malualoi ʼi tanatou tauhi pea mo ʼAna kau atolasio moʼoni. Neʼe ha te falala ʼa Paulo ʼi ʼana palalau ʼae neʼe ina tohi kia Timoteo, ʼaki te takitaki ʼa te laumalie. Hili ia tana fakamatala te ʼu aluʼaga kovi ʼae neʼe hoko ki te tui ʼa ʼihi ʼuhi ko te kau aposeta, neʼe tohi fenei e Paulo: “Kae ko te fakatafitoʼaga malohi ʼa te ʼAtua ʼe kei tuʼu pe, ʼo ina maʼu te fakaʼiloga ʼaeni: ‘ ʼE iloʼi e Sehova ia natou ʼae ʼaʼana,’ pea ‘Ko te hahaʼi fuli pe ʼae ʼe natou fakaʼaogaʼi te huafa ʼo Sehova ʼe natou fakafisi ki te heʼe faitotonu.’ ”—2 Tim. 2:19, MN.

5, 6. He ko ʼe ʼe maʼuhiga ia te fakaʼaogaʼi e Paulo ia te kupusiga palalau “te fakatafitoʼaga malohi ʼa te ʼAtua”? Pea neʼe malave feafeaʼi kia Timoteo?

⁵ ʼE fakaʼaogaʼi ʼi te Tohi-Tapu te kupu “fakatafitoʼaga” moʼo fakata ni meʼa kehekehe. Ohage la, ʼi te Tohi-Tapu ko te ʼu lao ʼa te ʼAtua ʼae ʼe mole fetogi, ʼae ʼe natou puleʼi te takafoli tuʼumaʼu ʼo te kele, ʼe fakatatau ki he fakatafitoʼaga. (Pes. 104:5; 1 Ko. 3:11; 1 Pet. 2:6) Kaʼe ko te kupusiga palalau “te fakatafitoʼaga malohi ʼa te ʼAtua” ʼe fakaʼaogaʼi tuʼa tahi pe ʼi te Tohi-Tapu. Kotea te aluʼaga ʼae neʼe talanoa ki ai ia Paulo ʼi tana fakaʼaogaʼi te kupusiga palalau ʼaia?

⁶ Neʼe fakaʼaogaʼi e Paulo te ʼu palalau ʼa Moisese ʼo ʼuhiga mo Kole mo natou ʼae neʼe lagolago ki ai, pea neʼe ina hilifaki ki ai te kupusiga palalau ʼae ko “te fakatafitoʼaga malohi ʼa te ʼAtua.” (Vakaʼi ia Numelo 16:5, MN.) ʼAki tana fai te faʼahi ʼaia, neʼe fakamanatuʼi ai e Paulo kia Timoteo neʼe iloʼi e Sehova ia te aluʼaga ʼae neʼe lolotoga hoko ʼi te kokelekasio. ʼE fakagata anai e te ʼAtua ia te agatuʼu ʼa te kau aposeta. Neʼe mole fetogi e Kole te fakatuʼutuʼu ʼa Sehova, pea ʼe mole fetogi anai e te kau aposeta ʼo te kokelekasio ia te fakatuʼutuʼu ʼa te ʼAtua. Neʼe mole fakamahino katoa e Paulo te kupusiga palalau ʼae ko “te fakatafitoʼaga malohi ʼa te ʼAtua.” Kaʼe ko te ʼu palalau ʼa Paulo neʼe tokoni kia Timoteo ke falala kia Sehova.

7. He ko ʼe ʼe tou tui papau ʼe faitotonu pea mo agatonu tuʼumaʼu anai ia Sehova?

⁷ Ko te ʼu pelesepeto ʼa Sehova ʼe mole fetogi ʼi he temi. ʼE ui fenei ʼi te Pesalemo 33:11: “E tuu te fakatuutuu a [Sehova] o heegata, pea mo te u holi o tona loto i te taitupu mo te taitupu.” ʼE fakaha ʼi te Tohi-Tapu ʼe Hau ia Sehova, mo manavaʼofa, mo faitotonu pea mo agatonu ʼo heʼe gata. (Eke. 15:18; Pes. 106:1; 112:9; 117:2) ʼE ui fenei ia Malakia 3:6: “Ko au [Sehova], e mole au fetogi.” ʼO toe feia pe, ʼe ui ia Sakopo 1:17 ko Sehova “e mole toe fetogi pee mohu lakaga.”

KO HE “FAKAʼILOGA” ʼE INA LAGA TAKITA TUI ʼAE KIA SEHOVA

8, 9. Kotea te ako ʼe tou lava taʼofi mai te ʼu manatu ʼae neʼe tohi ʼi “te fakatafitoʼaga malohi ʼa te ʼAtua”?

⁸ ʼI te temi muʼa, neʼe ko he agamahani te tohi peʼe togi ʼo he manatu ki te fakatafito ʼo he ʼapi. Neʼe tau fai te faʼahi ʼaia moʼo fakaha pe ko ai neʼe ina laga peʼe ʼa ai te ʼapi. ʼI te Tohi-Tapu, ko Paulo ʼae neʼe ʼuluaki talanoa ki te aga ʼi fenua ʼaia ʼi he lea fakata.a Ko “te fakatafitoʼaga malohi ʼa te ʼAtua” ʼae neʼe fakamatalatala e Paulo ia 2 Timoteo 2:19, MN, ʼe ʼi ai manatu ʼe lua neʼe tohi ai: (1) “ʼE ʼiloʼi e Sehova ia natou ʼae ʼaʼana” pea (2) “Ko te hahaʼi fuli pe ʼae ʼe natou fakaʼaogaʼi te huafa ʼo Sehova ʼe natou fakafisi ki te heʼe faitotonu.” ʼE fakamanatuʼi mai te faʼahi ʼaeni kia tatou ia te vaega ʼo Numelo 16:5.b—Lau.

⁹ Kotea te ako ʼe lava taʼofi e te kau atolasio ʼa Sehova mai te ʼu manatu ʼae neʼe tohi ʼi “te fakatafitoʼaga malohi ʼa te ʼAtua”? Ko te ʼu lekula pea mo te ʼu pelesepeto ʼa Sehova ʼe fakatafito ki te ʼu moʼoni maʼuhiga ʼaeni ʼe lua: (1) ʼE ʼofa ia Sehova kia natou ʼae ʼe nonofo agatonu kia te ia, pea (2) ʼE fehiʼa ia Sehova ki te aga ʼae ʼe kovi. Kaʼe kotea tona pikipikiga mo te aposetasia ʼi te kokelekasio?

10. ʼI te temi ʼo Paulo, neʼe malave feafeaʼi te aga ʼa te kau aposeta ki te kau agatonu?

¹⁰ Ko Timoteo pea mo ʼihi kau agatonu, neʼe natou loto hoha ʼuhi ko te aga ʼa te kau aposeta. Neʼe lagi feʼekeʼaki ʼihi Kilisitiano pe ko ʼe neʼe fakagafua ki te kau aposeta ke natou nonofo ʼi te kokelekasio. Neʼe lagi toe feʼekeʼaki foki te kau agatonu pe feala kia Sehova ke ina fakakehekeheʼi tanatou nonofo agatonu kia te ia pea mo te tauhi fakamalualoi ʼa te kau aposeta.—Gaue 20:29, 30, MN.

11, 12. Neʼe malohi feafeaʼi te tui ʼa Timoteo ʼaki te ʼu tokoni ʼa Paulo ʼi tana tohi?

¹¹ ʼE mahino ia neʼe malohi te tui ʼa Timoteo ʼaki te ʼu tokoni ʼa Paulo ʼi tana tohi. Neʼe ina fakamanatuʼi kia Timoteo ia te fakaha lelei ʼae e Sehova ia te malualoi ʼa Kole pea mo natou ʼae neʼe lagolago kia ia. Ko Sehova neʼe ina liakī pea mo fakaʼauha natou kaʼe neʼe ina fakaha ia tona ʼofa ʼae kia Alone. Pea ʼo toe feia pe ʼi te temi ʼo Paulo, neʼe ʼi ai he hahaʼi neʼe natou ui ko natou ko ni Kilisitiano kae neʼe fakaha lelei e Sehova pe ko ai ʼae ʼaʼana.

¹² ʼE mole fetogi ia Sehova ʼi he temi, koia ʼae ʼe feala ai ke tou falala tuʼumaʼu kia te ia. ʼE fehiʼa ki te agakovi pea ʼe ina tauteaʼi anai natou ʼae ʼe mole fakahemala ki ʼanatou agahala. Neʼe fakamanatuʼi kia Timoteo neʼe tonu ke ina tekeʼi te fakahala mai ia natou ʼae neʼe natou ui ko natou ko ni Kilisitiano, koteʼuhi “ko te hahaʼi fuli pe ʼae ʼe natou fakaʼaogaʼi te huafa ʼo Sehova” ʼe tonu ke natou liakī te aga ʼae ʼe kovi.c

ʼE FAKAPALE TUʼUMAʼU TE TAUHI MOʼONI

13. Kotea ʼae ʼe feala ke tou tui papau ki ai?

¹³ Ko te ʼu palalau ʼae neʼe fai e Paulo kia Timoteo ʼe ina toe fakalotomalohiʼi mo tatou. ʼO feafeaʼi? ʼE iloʼi lelei e Sehova ia tatatou nonofo agatonu kia te ia. Kaʼe ʼe mole gata ai. Koteʼuhi ʼe tokaga moʼoni kia natou ʼae ʼaʼana. ʼE ui fenei ʼi te Tohi-Tapu: “E taka te u mata o [Sehova] i te kele katoa, o tupu ke tokoni kia natou ae e tuku katoa onatou loto kia ia.” (2 Klk. 16:9) ʼE feala hatatou tui papau, ʼe mole galoʼi anai e Sehova ʼi he temi ʼatatou faiga fakamalotoloto ʼae ke tou tauhi kia te ia.—1 Ko. 15:58; 1 Tim. 1:5.

14. Ko te faʼahiga tauhi fea ʼae ʼe liakī e Sehova?

¹⁴ Ko Sehova ʼe fehiʼa pea mo ina liakī te tauhi fakamalualoi. ʼE feala ia ke sio ki te loto ʼa te hahaʼi fuli pea mo natou ʼae ʼe mole “katoa onatou loto kia ia.” Pea ʼe fakalialia kia Sehova moka ui e he tahi ʼe fakalogo, kaʼe ʼe ina fai fakafufu hana agahala. (Taag. 3:32) Ko te tagata ʼaia ʼe feala ke ina kakāʼi te hahaʼi kaʼe ʼe mole feala ke ina kakāʼi ia Sehova. Koteʼuhi ʼe mafimafi pea ʼe ko te ʼAtua ʼo te faitotonu. ʼE ui fenei ʼi te Tohi-Tapu: “Ko ia ae e ina fufu ana agahala e mole manuia.”—Taag. 28:13; lau ia 1 Timoteo 5:24; Hepeleo 4:13.

15. Kotea ʼae ʼe tonu ke tou tekeʼi, pea kotea tona tupuʼaga?

¹⁵ Tokolahi ʼi te hahaʼi ʼa Sehova ʼe natou ʼoʼofa kia te ia ʼaki tonatou loto katoa. Pea ʼe tahitahiga ia te kakāʼi ʼo Sehova e he tahi ʼaki he tauhi fakamalualoi. Kaʼe kapau neʼe hoko te aluʼaga ʼaia ʼi te temi ʼo Moisese pea mo te kau ʼuluaki Kilisitiano, ʼe feala pe ke toe hoko ia ʼaho nei. (2 Tim. 3:1, 5) Ko tona fakaʼuhiga koa ʼe tonu ke tou mahalohalo ʼo ʼuhiga mo te nofo agatonu ʼo ʼotatou tehina mo tuagaʼane kia Sehova? Kailoa ia, ʼe kovi anai hatatou mahalohalo ki ʼotatou tehina mo tuagaʼane kaʼe ʼe mole hona fakamoʼoni ki ai. (Lau ia Loma 14:10-12; 1 Kolinito 13:7.) Pea ʼe fakatupu kovi anai ki ʼatatou felogoʼi ʼae mo Sehova.

16. (1) ʼE feafeaʼi hakita iloʼi pe ʼe mole malualoi ia tokita loto? (2) Kotea ʼae ʼe feala ke kita ako mai te fakamatala ʼae ʼi te ʼa takai “Fakasiosio Pea Mo ʼAhiʼahiʼi Ia Koe Totonu”?

¹⁶ ʼE tonu ki te kau Kilisitiano takitokotahi ke natou vakaʼi ʼanatou gaue totonu. (Kal. 6:4) ʼI totatou ʼuhiga agahala, ʼe feala ke tou maʼu ni manatu hala ʼi tatatou tauhi ʼae kia Sehova kaʼe ʼe mole tou iloʼi. (Hep. 3:12, 13) Pea ʼi te ʼu meʼa liliki ʼe feala ke liliu tatatou tauhi ʼae kia Sehova ʼo malualoi. Koia ʼae ʼe tonu ai ke tou fai te ʼu fehuʼi ʼaeni: ‘ ʼE au tauhi koa kia Sehova he ʼe au ʼofa ia te ia pea mo au loto ke liliu ko toku Pule? Peʼe au manatu tafitō koa au ki te ʼu lelei ʼae ʼe au fakaʼamu ke au maʼu ʼi te Palatiso?’ (Apk. 4:11) Kapau ʼe kita fai te ʼu fehuʼi ʼaia, pea ʼe feala ai hakita iloʼi pe ʼe mole malualoi ia tokita loto.

ʼE IKU TE NOFO AGATONU KI TE MAʼULI FIAFIA

17, 18. He ko ʼe ʼe tonu ke tou fakamalotoloto ʼi tatatou tauhi ʼae kia Sehova?

¹⁷ ʼE tapuakina anai tatou mo kapau ʼe tou faiga malohi ke tou pulihi ia te malualoi mai ʼotatou loto. ʼE ui fenei e te tagata faipesalemo: “Manuia te tagata ae e mole lau kia ia e [Sehova] tana agakovi, pea e mole mau he kaka i tona loto!” (Pes. 32:2) Kapau ʼe fakamalotoloto ia tatatou tauhi, pea ʼe tou fiafia anai ʼi te temi nei pea mo te ka haʼu.

¹⁸ Kua tau ovi mai pe te haga ʼa Sehova ʼo fakaha pe ko ai ia natou ʼae ʼe mole fia fakahemala ki ʼanatou agahala peʼe natou fai fakafufu te agahala. ʼE ina fakaha anai “te kehekehe o te tagata agatonu mo te tagata agakovi, o ae e tauhi ki te Atua pea mo ae e mole tauhi kia ia.” (Mala. 3:18) Kaʼe ʼi tatatou fakatalitali ki ai, ʼe ko he meʼa fakalotofimalie hatatou iloʼi “e tuku te u mata o [Sehova] ki te kau agatonu, pea e tokaga ona taliga ki tanatou kole.”—1 Pet. 3:12.