He Ko ʼe ʼe Ke Tui Papau ʼe Ke Maʼu Ia Te Moʼoni?

1. ʼI te ʼu temi tau, kotea ʼae neʼe fai e te kau Katolika pea mo te kau Polotesita?

ʼE LOTO koa e te ʼAtua ke olo ia te kau Kilisitiano moʼoni ʼo tau pea mo matehi te hahaʼi ʼo te tahi atu ʼu fenua? I te ʼu taʼu ʼaeni ʼe 100 kua hili, ko te tokolahi ʼae neʼe natou lau ko natou ko he kau Kilisitiano, neʼe natou fematematehiʼaki ʼi te tau. Neʼe haga pe te kau Katolika ʼo matehi te tahi kau Katolika, pea neʼe haga pe te kau Polotesita ʼo matehi te tahi kau Polotesita. Pea neʼe toe tapuakiʼi e te kau takitaki lotu Katolika pea mo Polotesita ia te ʼu foʼi kautau mo ʼanatou mahafu tau. Lolotoga te Lua Tau Fakamalamanei, neʼe toe hoko aipe ia te agakovi ʼaia ʼi te lotolotoiga ʼo natou ʼae neʼe natou lau ko natou ko he ʼu Kilisitiano.

2, 3. Kotea ʼae neʼe fai e te kau Fakamoʼoni ʼa Sehova, lolotoga te lua tau fakamalamanei pea mo te ʼu tau ʼae neʼe hoa mai ki ai? Pea kotea tona tupuʼaga?

² Kaʼe kotea ʼae neʼe fai e te kau Fakamoʼoni ʼa Sehova lolotoga te Lua Tau Fakamalamanei? Neʼe natou taupau aipe ia tanatou nofo agatonu. Neʼe mole natou kau tuʼa tahi ki te tau ʼaia ʼae neʼe fetauʼaki ai te ʼu fenua. Kotea tona tupuʼaga? Koteʼuhi neʼe natou fia fakalogo ki te ʼu akonaki ʼa Sesu, pea mo faʼifaʼitakiʼi ia tana ʼofa ʼae ki te hahaʼi. Neʼe ui fenei e Sesu: “I te mea aia e iloi anai e te tagata fuli, ko koutou ko aku tisipulo, mo kapau e koutou mau te feofaaki ia koutou.” (Soane 13:35) Neʼe toe maʼuhiga ki te kau Fakamoʼoni ke natou mulimuli ki te ʼu manatu ʼae neʼe fakaha e Paulo, ʼi ʼana palalau ʼae neʼe ina fai ki te kau Kolinito.—Lau ia 2 Kolinito 10:3, 4.

³ ʼE fakaʼaogaʼi e te kau Kilisitiano moʼoni ia te Tohi-Tapu ko honatou takitaki ʼo ʼuhiga mo te meʼa ʼae ʼe lelei pea mo ʼae ʼe kovi. Koia ʼae ʼe mole fakagafua ai e tonatou leʼo ʼo loto ke natou ako peʼe ke natou kau ki he tau. Pea ko te toko lau ʼi afe kau Fakamoʼoni ʼa Sehova, ʼe fakatagaʼi ʼuhi ko tanatou faiga ʼae ke natou maʼuʼuli ohage ko he kau Kilisitiano moʼoni. Ko te kau tupulaga pea mo te kau matutuʼa, tagata mo fafine, neʼe fakamamahiʼi ʼi te ʼu fale pilisoni pea mo te ʼu lotoʼa fakamamahi. ʼI te lua tau fakamalamanei, ʼae neʼe puleʼi ai e te kau Nasi ia Siamani, neʼe toe matehi ai foki ʼihi. Pea lolotoga tonatou fakatagaʼi ʼi Eulopa, neʼe mole galo ki te kau Fakamoʼoni ʼa Sehova, ia tonatou maʼua ʼae ke natou fakamafola ia te logo lelei ʼo te Puleʼaga ʼa Sehova. Neʼe natou faifakamafola aipe moka neʼe natou fealagia, maʼia mo tanatou nonofo ʼi te ʼu pilisoni, mo te ʼu lotoʼa fakamamahi pea mo tonatou ʼaunofo. ʼI ni lau ʼi taʼu ki muli age, ʼi te taʼu 1994, neʼe mole kau ia te kau Fakamoʼoni ki te matehi ʼo te hahaʼi kaugā malie ʼae neʼe hoko ʼi Rwanda. Pea neʼe mole natou kau foki ki te tau ʼae neʼe mavetevete ai ia te fenua ko ex-Yougoslavie.

4. Kotea ʼae ʼe tau ui e te hahaʼi ʼi tanatou sisio ki te mole kau ʼa te kau Fakamoʼoni ʼa Sehova ki he tau?

⁴ Lolotoga te ʼu temi tau, neʼe mole kau ia te kau Fakamoʼoni ʼa Sehova ki he tau. Koia ʼae ʼe ui ai e te tokolahi ʼi te malamanei katoa, ko te kau Fakamoʼoni ʼe natou ʼoʼofa moʼoni ki te ʼAtua mo ʼonatou tatau, pea ko natou ko te kau Kilisitiano moʼoni. Kaʼe kotea ʼihi tupuʼaga ʼae ʼe tui ai te hahaʼi ko te kau Fakamoʼoni ʼa Sehova, ʼe ko te kau Kilisitiano moʼoni?

TE AKO ʼAE ʼE LAHI TOKOTAHI ʼI TE HISITOLIA

5. Kotea ia te aluʼaga foʼou ʼae neʼe tau mo te kau ʼuluaki tisipulo ʼa Sesu?

⁵ ʼI te kamata ʼo tana minisitelio, neʼe fakaha lelei e Sesu, ko te fakamafola ʼo te logo lelei ʼo te Puleʼaga ʼo te ʼAtua ʼe maʼuhiga ʼaupito. Mole faʼa fualoa ki ai, neʼe ina filifili leva ia tisipulo ʼe toko 12, moʼo kamata ʼo te faifakamafola ʼaia ʼae ka fakahoko anai ki muli age ʼi te kele katoa. ʼOsi ʼaia, neʼe toe akoʼi e Sesu ʼihi kau tisipulo ʼe toko 70. (Luka 6:13; 10:1) Neʼe akoʼi e Sesu ʼana tisipulo ke natou liliu ko ni kau faiako. Kaʼe neʼe tonu muʼa ke natou liliu ko ni kau faiako ki ʼihi atu kau Sutea. Pea ki muli age, neʼe ina fakatotonu leva kia natou ke natou fakamafola ia te logo lelei ki te hahaʼi ʼo te tahi ʼu puleʼaga ʼae neʼe mole Sutea. Neʼe ko he aluʼaga foʼou ia ki te kau tisipulo Sutea.—Gaue 1:8.

6. Kotea ʼae neʼe tokoni kia Petelo ke mahino ki te mole fakapalatahi ʼa te ʼAtua?

⁶ Ko Kolenelio neʼe mole ko he tagata Sutea pea neʼe heʼeki silikosisio, kaʼe neʼe liliu ia ko he Kilisitiano. Neʼe fekauʼi e Sehova ia Petelo ke alu ʼo faifakamafola kia Kolenelio ʼi tona loto fale. Pea neʼe mahino ai leva ia Petelo ki te mole fakapalatahi ʼae ʼa te ʼAtua. Neʼe ko te finegalo ʼaia ʼo Sehova ke logo pea mo tali e te hahaʼi fuli ia te moʼoni. Koia neʼe fakatotonu ai e Petelo ke papitemaʼi ia Kolenelio pea mo tona famili. (Gaue 10:9-48) ʼO kamata mai te ʼaho ʼaia, neʼe faifakamafola ia Petelo pea mo te tahi ʼu tisipulo ʼa Sesu ki te hahaʼi ʼo te ʼu puleʼaga fuli.

7, 8. Kotea ʼae neʼe fai e te kau Fakamoʼoni ʼa Sehova moʼo tokoni ki te hahaʼi ke natou logo ki te logo lelei? (Vakaʼi te ʼuluaki pakī.)

⁷ Ia ʼaho nei, ko natou ʼae ʼe takitaki ʼi te kautahi ʼa Sehova, ʼe natou lagolago malohi pea mo natou fakatuʼutuʼu ia te faifakamafola mo te akoʼi ʼo te logo lelei ki te malamanei katoa. Pea ʼi te kele katoa ko te teitei toko valu miliona kau Fakamoʼoni ʼa Sehova. ʼE natou faifakamafola ia lea ʼe 600 tupu ʼaki he faʼafai pea ʼe haga tuputupu aipe ia te ʼu lea. ʼE natou faifakamafola ʼi te ʼu ʼapi pea mo te ala. ʼI ʼihi temi, ʼe natou fakaʼaogaʼi ni laupapa ʼe maʼu ai ni tohi neʼe ta ʼi te ʼu lea kehekehe. Pea ʼe iloʼi e te hahaʼi ia te kau Fakamoʼoni ʼa Sehova, koteʼuhi ʼe ko natou pe ʼae ʼe natou fakahoko ia te ʼu faʼahiga faifakamafola kehekehe ʼaia.

⁸ Neʼe akoako e te kautahi ʼa Sehova ia te ʼu tehina mo tuagaʼane ʼe toko 2 900 tupu ki te fakaliliu ʼo te Tohi-Tapu pea mo te ʼu tohi Fakatohi-tapu. ʼE toe fakaliliu foki ia te ʼu tohi ʼaia ki te ʼu lea ʼe iloʼi pe e te tokosiʼi. Ohage la, ʼi Sepania ʼe fakaliliu nei e te kau Fakamoʼoni ʼa Sehova ia te ʼu tohi Fakatohi-tapu ki te lea Catalan. Pea ʼe mole faʼa fualoa ki ai, neʼe kamata palalau leva ia te tokolahi ki te lea Catalan ʼi te ʼu kolo ko Valence, mo Alicante, mo te ʼu Motu Baléares pea mo te fenua ko Andorre. Ia ʼaho nei, ko te toko lau ʼi miliona hahaʼi ʼae ʼe palalau ki te lea Catalan. Pea ʼuhi ko te gaue faifakaliliu ʼae ʼe fakahoko e te kau Fakamoʼoni ʼa Sehova, ʼe maʼu ai e te hahaʼi Catalan ni tohi ʼi tanatou lea pea mo kau ki te ʼu fono ʼi te lea ʼaia ʼae ʼe malave ki tonatou loto.

9, 10. Kotea te ʼu faʼifaʼitaki ʼae ʼe ha ai ʼe loto e te kautahi ʼa Sehova ke ako e te hahaʼi fuli ia te moʼoni?

⁹ ʼE fakahoko ia te gaue faifakaliliu ʼaia ʼo te ʼu tohi Fakatohi-tapu, pea mo te akoʼi ʼo te hahaʼi ʼi tanatou lea ʼi te malamanei katoa. Ohage la, ʼi Mekesike tokolahi ʼe natou palalau ʼi te lea Fakasepania, kaʼe ʼe toe tokolahi foki ia natou ʼae ʼe natou palalau ki he tahi age lea ʼi tonatou loto fale. Pea ʼi te ʼu lea ʼaia ʼe kau ai ia te lea Maya. Ko te kau faifakaliliu ʼo te lea ʼaia, neʼe fekauʼi natou ke natou olo ʼo maʼuʼuli ʼi te tahi potu ʼo te fenua ʼae ʼe palalauʼi ai te lea Maya. Pea ʼuhi ko tanatou logo pea mo palalau ʼi te ʼaho fuli ʼi te lea ʼaia, ʼe feala ai ke mahino gafua age ia te hahaʼi Maya ki tanatou faʼahiga fakaliliu ia te ʼu tohi. ʼO toe feia mo te fenua ko Népal. ʼE ko lea ʼe 120 ʼape ʼae ʼe palalauʼi ʼi te fenua ʼaia. Pea ʼe maʼuʼuli ai te toko 29 miliona tupu hahaʼi. Ko te lea Népalais, ʼe ko te ʼuluaki lea ʼaia ʼae ʼe palalauʼi e te toko 10 miliona tupu hahaʼi, kaʼe ki te tokolahi, ʼe mole ko tanatou ʼuluaki lea ʼaia. ʼI te temi nei ʼe toe fakaliliu e ʼotatou tehina ia te ʼu tohi Fakatohi-tapu ki te lea Népalais.

¹⁰ ʼE ha lelei ʼi te gaue faifakaliliu, ʼe maʼuhiga ki te kautahi ʼa Sehova ia tonatou maʼua ʼae ke natou fakamafola ia te logo lelei ʼi te kele katoa. Neʼe tufa e te kau Fakamoʼoni ʼa Sehova ni pepa lotu, mo ni kaupepa lalahi pea mo ni nusipepa ʼe lau ʼi miliona, kaʼe neʼe mole natou fakamaʼua ke totogi. Koteʼuhi ʼe lagolago ia te kau Fakamoʼoni ki te gaue ʼaia ʼaki ʼanatou meʼa ʼofa. Pea ʼe natou mulimuli ki te fakatotonu ʼaeni ʼa Sesu: “Nee kotou mau hala totogi, pea kotou foaki hala totogi.”—Mateo 10:8.

11, 12. ʼUhi ko tatatou faifakamafola pea mo faiako ʼi te malamanei katoa, kotea ʼae ʼe ui e te tokolahi?

¹¹ Ko te kau Fakamoʼoni ʼa Sehova ʼe natou tui papau ʼe natou maʼu ia te moʼoni. Koia ʼae ʼe natou fai ai ni toe sakilifisio moʼo faifakamafola ki te hahaʼi ʼo te ʼu puleʼaga pea mo te ʼu aga ʼi fenua kehekehe. Tokolahi te kau Fakamoʼoni neʼe natou fakafaigafua ia tonatou maʼuli, mo natou ako ia he tahi lea pea mo fakamamahani ki he tahi aga ʼi fenua. Koia ʼae ʼe ui ai e te tokolahi ko te kau Fakamoʼoni ʼa Sehova ʼe ko te kau tisipulo moʼoni ʼa Sesu Kilisito, ʼuhi he ʼe tou faifakamafola pea mo fakahoko ni ako ʼi te malamanei katoa.

¹² ʼE fai e te kau Fakamoʼoni ʼa Sehova ia te ʼu faʼahi fuli ʼaia, koteʼuhi ʼe natou tui papau kua natou maʼu ia te moʼoni. Kaʼe kotea te ʼu faʼahi tafitō ʼae ʼe tui ai ʼotatou tehina mo tuagaʼane ʼe natou maʼu ia te moʼoni?—Lau ia Loma 14:17, 18.

TE TUPUʼAGA ʼO TANATOU TUI

13. ʼE taupau feafeaʼi e te kau Fakamoʼoni ke maʼa ia tanatou kautahi ʼi te faʼahi fakalaumalie?

¹³ ʼE lahi te ʼu tupuʼaga ʼe tuku mai e ʼotatou tehina mo tuagaʼane, ʼo ʼuhiga mo tanatou tui papau ʼae ʼe natou maʼu ia te moʼoni. Ko te tehina kua fualoa ia tana tauhi ʼae kia Sehova, neʼe ina ui fenei: “ ʼE tou faiga fuli ke tou taupau ke heʼe mele pea mo maʼa aipe ia te kautahi ʼa Sehova ʼi te aga ʼae ʼe tonu ke fai, tatau aipe pe ko ai ʼae ʼe tonu ke akonakiʼi peʼe fakatonutonuʼi.” Kaʼe ʼe taupau feafeaʼi e te hahaʼi ʼa Sehova, ia tana lekula maʼoluga ʼo ʼuhiga mo te aga ʼae ʼe tonu ke fai? ʼE natou tahi faiga malohi ke natou mulimuli ki te ʼu lekula ʼa te ʼAtua ʼi tana Folafola pea mo faʼifaʼitakiʼi ia Sesu mo ʼana kau tisipulo. ʼE ko te tokosiʼi pe ʼae neʼe mole natou mulimuli ki te ʼu lekula ʼa te ʼAtua, pea neʼe tonu ke fakamavae natou ʼi te kokelekasio. Tokolahi te kau Fakamoʼoni ʼa Sehova, ʼe maʼa ia tonatou faʼahiga maʼuli kia mata ʼo Sehova. Ko natou ʼae neʼe natou fai ia te ʼu meʼa ʼae neʼe mole leleiʼia e Sehova ʼi muʼa atu, kua natou fetogi pea kua natou mulimuli ki te ʼu lekula ʼa te ʼAtua.—Lau ia 1 Kolinito 6:9-11.

14. Kotea ia te ʼu fetogi ʼae neʼe fai e te tokolahi hili tonatou fakamavae ʼi te kokelekasio? Pea kotea ia tona ʼu fua?

¹⁴ ʼI te Tohi-Tapu ʼe maʼu ai e te kau Kilisitiano, ia he takitaki ke natou fakamavae ʼi te kokelekasio ia natou ʼae ʼe mole fia fakalogo ki te ʼAtua. Kaʼe meʼa fakafiafia, he ʼe ki muli age neʼe fakahemala ia te toko lau ʼi afe kau Kilisitiano ki ʼanatou agahala pea mo toe liliu mai. (Lau ia 2 Kolinito 2:6-8.) ʼE fakaʼaogaʼi tuʼumaʼu e te kau Fakamoʼoni ia te Tohi-Tapu ko honatou takitaki ʼo ʼuhiga mo tanatou aga, koia ʼae ʼe natou taupau ke maʼa ia te kokelekasio. Pea ʼe ko he fakamoʼoni ʼaia, ko tanatou kautahi pe ʼae ʼe tali e te ʼAtua. Logo la ʼe fakagafua e ʼihi lotu ke faʼifaʼitaliha ʼanatou hahaʼi, kaʼe ʼe mulimuli te kau Fakamoʼoni ki te ʼu lao ʼa Sehova. Koia ʼae ʼe tui ai te tokolahi, ʼe maʼu e te kau Fakamoʼoni ʼa Sehova ia te moʼoni.

15. Kotea ʼae ʼe tui papau ai ia te tehina ʼe ina maʼu ia te moʼoni?

¹⁵ He ko ʼe ʼe tui ʼihi kau Fakamoʼoni ʼe natou maʼu ia te moʼoni? Ko te tehina ʼe taʼu 54 ʼe tauhi kia Sehova talu mai tana kei tupulaga. ʼE ina ui ʼe fakatafito ia tana tui ki te ʼu akonaki tafitō ʼaeni ʼe tolu: (1) ko te ʼAtua ʼe maʼuli moʼoni, (2) ko te Tohi-Tapu ʼe haʼu mai te ʼAtua pea (3) ko te kau Fakamoʼoni ʼa Sehova pe ʼae ʼe natou fakahoko ia te finegalo ʼo te ʼAtua. ʼE ina ui fenei: “ ʼI te ʼu taʼu ʼae neʼe au ako ai te Tohi-Tapu, neʼe au faiga tuʼumaʼu ke au vakaʼi pe neʼe ʼi ai he fakatafitoʼaga malohi ʼo te ʼu akonaki tafitō ʼaia. Pea ʼi te taʼu fuli, neʼe lahi ia te ʼu fakamoʼoni ki te faʼahi ʼaia ʼo ʼuhiga mo te ʼu akonaki takitahi. Neʼe toe malohi age ai ia taku tui papau ʼae ʼe tou maʼu ia te moʼoni.”

16. He ko ʼe ʼe tui papau ia te tuagaʼane ʼe ina maʼu ia te moʼoni?

¹⁶ Ko te tuagaʼane kua ʼohoana pea ʼe gaue ʼi te ʼu pilo lalahi ʼo te kau Fakamoʼoni ʼa Sehova ʼi New York, ʼe ina fakamatala pe ko ʼe ʼe tui papau ʼe ina maʼu ia te moʼoni. ʼE ina ui ʼe ko te kautahi pe ʼa Sehova ʼae ʼe ina fakaha ki te hahaʼi ia te huafa ʼo Sehova, ʼae ʼe ha tuʼa 7 000 ʼape ʼi te Tohi-Tapu. Pea neʼe toe fakalotomalohiʼi ia ia ʼaki te vaega ʼo 2 Koloniko 16:9, MN, ʼae ʼe ui fenei ai: “Ko te ʼu mata ʼo Sehova ʼe taka ʼi te kele katoa, ke ina fakaha tona malohi kia natou ʼae ʼe katoa tonatou loto kia te ia.” ʼE ina fakamatala fenei: “ ʼAki ia te moʼoni, neʼe au iloʼi pe ʼe feafeaʼi ia te maʼu ʼo he loto ʼe katoa ke feala ai kia Sehova ke ina fakaha mai ia tona malohi. Pea ʼe maʼuhiga age kia au ʼaku felogoʼi ʼae mo Sehova. ʼE toe tokoni mai kia au ia te ʼatamai malama ʼae ʼe foaki mai e Sesu ʼo ʼuhiga mo te ʼAtua. Pea ʼe au lotofakafetaʼi ki ai.”

17. Kotea ʼae ʼe tui papau ki ai ia te tehina ʼae neʼe mole tui ki te ʼAtua? Pea kotea ia tona tupuʼaga?

¹⁷ Neʼe ui fenei e te tehina neʼe mole tui ki te ʼAtua ʼi muʼa atu: “ʼAki ia te fakatupu, ʼe au tui papau ai ʼe loto e te ʼAtua ke leleiʼia e te tagata ia te maʼuli, koia ʼe mole ina tuku anai ke tou maʼuli mamahi ʼo talu ai. Pea tahi, ʼi te kua ʼaʼasili age ia te aga heʼe lotu ʼi te malamanei, ʼe malohi aipe ia te tui, mo te faʼafai pea mo te ʼofa ʼa te ʼu kaugana ʼa Sehova. ʼE ko he milakulo ia ʼe feala pe ke fakahoko e te ʼAtua ia ʼaho nei, ʼaki ia tona laumalie maʼoniʼoni.”—Lau ia 1 Petelo 4:1-4.

18. He ko ʼe ʼe tui ia te ʼu tehina ʼe toko lua ʼe nā maʼu ia te moʼoni? Kotea tau manatu ʼo ʼuhiga mo te faʼahi ʼaia?

¹⁸ Ko te tahi tehina kua fualoa ʼi te moʼoni, ʼe ina ui fenei: “Lolotoga te ʼu taʼu ʼae neʼe au ako ai te Tohi-Tapu, neʼe au tui papau ai neʼe faiga malohi ia te kau Fakamoʼoni ʼa Sehova ke natou faʼifaʼitakiʼi te kau ʼuluaki Kilisitiano. Neʼe au sio mata ki te logotahi ʼa te kau Fakamoʼoni ʼa Sehova ʼi taku faifolau ʼi te malamanei katoa. Pea ʼaki ia te ʼu moʼoni Fakatohi-tapu, neʼe au maʼu ai ia te fiafia.” ʼE toe ui e te tehina kua taʼu 60 tupu, ko te kau Fakamoʼoni ʼa Sehova ʼe natou tui kia Sesu. Neʼe ina fakamahino fenei: “Neʼe matou ako fakalelei ia te maʼuli ʼo Sesu mo tana minisitelio pea neʼe matou leleiʼia ia tana faʼifaʼitaki. Neʼe matou fai ni fetogi ʼi tomatou maʼuli ke matou fakaovi ai ki te ʼAtua ʼaki ia Kilisito Sesu. Neʼe matou fakamoʼoni ki te sakilifisio faitotogi ʼa Kilisito ʼae ko te fakatafitoʼaga ʼo te haofaki. Pea ʼe matou iloʼi neʼe fakatuʼuake ia Kilisito mai te mate. Koteʼuhi ʼe matou maʼu he ʼu fakamoʼoni mai ia natou ʼae neʼe sisio mata ki te faʼahi ʼaia.”—Lau ia 1 Kolinito 15:3-7.

FAKAHA TE MOʼONI KI ʼIHI

19, 20. (1) Kotea ia te maʼua ʼae neʼe talanoa ki ai ia Paulo ʼi tana tohi ki te kokelekasio ʼo Loma? (2) Kotea ʼae ʼe ʼaoga ke fai e te ʼu kaugana fuli ʼa Sehova?

¹⁹ ʼE ʼoʼofa ia te kau Kilisitiano moʼoni ki te hahaʼi. Koia ʼae ʼe tonu ai ke tou fakaha ia te ʼu moʼoni ʼae ʼe tou ako ki te hahaʼi. Neʼe ui e te apositolo ko Paulo ki te kokelekasio ʼo Loma, ko te ʼu tisipulo moʼoni ʼa Sesu ʼe maʼua ke natou faifakamafola. Neʼe ina tohi fenei: “Kapau ʼe ke ui ia muʼa ʼo te hahaʼi ‘te folafola ʼaeni mai tou gutu,’ ko Sesu te ʼAliki, pea mo ke haga tui ʼi tou loto neʼe fakatuʼuake e te ʼAtua ia ia mai te mate, ʼe haofaki anai koe. He ʼe ʼaki te loto ʼe kita tui ki te faitotonu, kaʼe ʼaki te gutu ʼe kita tala ia muʼa ʼo te kaugā malie ʼo ʼuhiga mo te fakamaʼuli.”—Loma 10:9, 10, MN.

²⁰ ʼE tui papau ia te kau Fakamoʼoni ʼa Sehova ʼe natou maʼu ia te moʼoni. Pea ʼe natou iloʼi ʼe ko he pilivilesio ia te akoʼi ia te logo lelei ʼo te Puleʼaga ʼo te ʼAtua ki te hahaʼi. Koia, fai ia te fakatuʼutuʼu ʼae ke ke akoʼi ki te hahaʼi ia te Tohi-Tapu. Kaʼe ʼe mole gata ai, ʼe tonu foki ke ke fakaha ʼi tou faʼahiga maʼuli ia tau tui papau ʼae ʼe ke maʼu ia te moʼoni.