Te Faʼahiga Manatu ʼa Te Hahaʼi ʼo ʼUhiga Mo Te Faikole
“Ka au faikole, ʼe au logoʼi ʼe nofo ovi te ʼAtua mo au, pea ʼe ina puke toku nima mo taki au moka ʼe au hehe.”—MARÍA.
“Neʼe taʼu 13 te tau ʼo toku ʼohoana mo te kosea pea neʼe mate leva. Neʼe au faikole tuʼumaʼu ki te ʼAtua pea neʼe au iloʼi, ʼe fagono moʼoni ki ʼaku tagi. Neʼe au logoʼi ai he fimalie.”—RAÚL.
“Ko te faikole ʼe ko he meʼa ʼofa taulekaleka neʼe foaki e te ʼAtua maʼa te tagata.”—ARNE.
ʼE maʼuhiga kia María, mo Raúl, mo Arne pea mo ʼihi atu, ia te meʼa ʼofa ʼaia ko te faikole. ʼE natou tui papau ʼe feala hanatou palalau ki te ʼAtua mo fakamalo kia te ia pea mo kumi tana tokoni ʼaki te faikole. Pea ʼe natou fakamoʼoni ki te ʼu palalau ʼaeni ʼa te Tohi-Tapu ʼo ʼuhiga mo te faikole: “ ʼE tou falala, ko he meʼa pe ʼe tou kole ki te ʼAtua ʼo mulimuli ki tona finegalo, ʼe fagono mai kia tatou.”—1 Soane 5:14.
Kae ʼe faigataʼa ki te tokolahi hanatou tui ki te meʼa ʼae ʼe ui ʼi te Tohi-Tapu ʼo ʼuhiga mo te faikole. Neʼe fakamatala e Steve te meʼa ʼae neʼe ina logoʼi ʼo ʼuhiga mo te fahaʼi ʼaia. Neʼe ina ui fenei: “ ʼI toku taʼu 17, neʼe mamate ʼoku kaumeʼa ʼe toko tolu. Ko te tahi neʼe mate fakaʼi pea ko te foʼi toko lua ʼae neʼe malelemo.” Kotea neʼe fai e Steve? ʼE ina hoko atu fenei: “Neʼe au faikole ki te ʼAtua ke ina fakaha mai pe koʼe ʼe hoko te ʼu aluʼaga ʼaia? Kae neʼe mole au maʼu hona tali. Koia, neʼe au feuiʼaki leva: ‘Kotea te ʼuhiga ʼo te faikole?’ ” Tokolahi ʼe natou manatu mole tali e he tahi ʼanatou faikole. Pea ʼe natou feuiʼaki ai pe kotea te ʼuhiga ke natou faikole.
ʼE ʼi ai ʼihi tupuʼaga, ʼe manatu ai ʼihi ʼe mole tokoni age kia natou te ʼu faikole. ʼE ui e ʼihi kua iloʼi te ʼAtua te ʼu meʼa ʼe ʼaoga kia tatou mo ʼotatou fihifihia, he ʼe ina iloʼi ia meʼa fuli. Koia ʼae, ʼe mole ʼaoga ai hatatou fakaha kia te ia.
Ko ʼihi ʼe natou ui ʼe mole fia fagono te ʼAtua ki ʼanatou faikole ʼuhi ko ʼanatou hala neʼe natou fai ʼi muʼa atu. ʼE ui fenei e Jenny: “Ko au, ʼe au manatu tuʼumaʼu, mole hoku ʼaoga. Neʼe au fai he ʼu meʼa pea neʼe au fakahemala. Koia neʼe au ui ai, ʼe mole tuha mo au ke fagono mai te ʼAtua.”
Kae kotea tau manatu ʼo ʼuhiga mo te faikole? Kapau ʼe ke lotolotolua feia ʼo ʼuhiga mo te faikole, ʼe ke maʼu anai ʼi te Tohi-Tapu he fakalotofimalie pea mo te ʼu tali ki ʼau fehuʼi. ʼE feala ke tou falala ki te meʼa ʼae ʼe ui ʼi te Tohi-Tapu ʼo ʼuhiga mo te faikole.a Pea ʼe feala ke tokoni atu ke kotou maʼu te ʼu tali ki te ʼu fehuʼi ʼaeni:
ʼE fagono moʼoni koa te ʼAtua ki ʼatatou faikole?
He koʼe ʼe mole tali ʼihi faikole?
ʼE tonu ke feafeaʼi ʼau faikole?
ʼE tokoni feafeaʼi atu te faikole?
a Tokolahi te ʼu kaugana ʼa te ʼAtua neʼe natou faikole. Pea ʼe maʼu ʼanatou faikole ʼi te Tohi-Tapu, ʼo toe feia mo te ʼu faikole ʼa Sesu Kilisito. ʼE maʼu ʼi te Koga Tohi-Tapu Fakahepeleo ʼae ʼe toe higoa ko te Tauhi ʼAfea, ia faikole ʼe 150 tupu.