Ke Ke Kumi He Koga Meʼa Lelei Ki Te Fai ʼo Tau Ako

ʼE ke loto koa ke lahi age te ʼu lelei ʼe ke maʼu ʼi tau ako tokotahi? Kapau koia, ʼe feala ke tokoni atu te ʼu manatu ʼaeni ke ke maʼu he koga meʼa lelei ki tau ako:

• Filifili he koga meʼa ʼe lelei. Kapau ko he meʼa ʼe feala, ke ke kumi he koga meʼa ʼe mole gaohaʼa pea mo malama feʼauga. ʼE feala ke ʼi ai hou pilo peʼe ko hau laupapa peʼe ke filifili he koga ʼi tuʼa ʼe ke logo lelei ai.

• Kumi he koga meʼa ʼe feala ke ke nofo tokotahi ai. Neʼe filifili e Sesu ke faikole “kei hegihegi” ʼi “he koga meʼa lavaki.” (Mko. 1:​35) Kapau ʼe mole feala hau nofo tokotahi, ʼe feala pe hau fakaha age ki tou famili peʼe ko natou ʼae ʼe ʼapi tahi mo koe te ʼu hola ʼae ʼe ke fai ai tau ako pea mo kole age ke ʼaua naʼa natou fakalelu atu.

• ʼAua naʼa ke tuku he ʼu meʼa ke ina fakaleluʼi koe. Kapau ʼe ke fakaʼaogaʼi tau telefoni peʼe ko tau kiʼi masini toʼotoʼo ki tau ako, ke ke lomiʼi ki te faʼahi ʼae ke mole ke logoʼi ai ʼe faitohi peʼe pauʼi atu he tahi. Pea kapau ʼi te temi ʼaia ʼe ke manatu ki he meʼa ke ke fai, tohi ki he faʼahi ke hoki ke fai ki ʼamuli. Kapau ʼe ke sio mole tuku tau fakakaukau ki te faʼahi ʼe ke ako, ʼai muʼa hau kiʼi tuʼu, peʼe ke alu muʼa ʼo haʼele ʼo fakamafaofao ivi.