Kua Kotou Iloʼi Koa?

Neʼe tafu feafeaʼi e te hahaʼi ʼo te temi muʼa ia he afi moka natou faifagona?

ʼI TE Tohi-Tapu, ʼi te kapite 22 ʼo te tohi ʼo Senesi ʼe ui ai neʼe fakatotonu e te ʼAtua kia Apalahamo ke faifagona ki he koga meʼa ʼe vaha mamaʼo mo tona ʼapi pea ke ina momoli ʼi ai he sakilifisio. ʼE ui fenei ʼi te Tohi-Tapu: “Nee too leva e Apalahamo te fafie o te failaulau, o fakaamo ki tona foha ko Isaake, kae nee ina too leva i tona nima te afi mo te hele. Pea nee na haele fakatahi leva toko lua.”—Ko matou ʼae neʼe matou fakailoga keheʼi; Senesi 22:6.

ʼE mole fakamahino ʼi te Tohi-Tapu pe neʼe tafu feafeaʼi e te hahaʼi ʼo te temi muʼa ʼanatou afi. Kaʼe neʼe fai koa e Apalahamo mo Isaake ia he afi pea nā ʼave mo naua? Neʼe ui e te tagata fai fakamatala Tohi-Tapu, neʼe mole feala ke ulo tuʼumaʼu he afi “lolotoga he faifagona ʼe loaloaga.” Koia ʼae neʼe lagi ʼave ai e Apalahamo mo Isaake ia meʼa fuli ʼe ʼaoga moʼo tafu ʼaki he afi.

Kaʼe ʼe ui e ʼihi neʼe mole faigafua te tafu ʼo he afi ʼi te ʼu temi ʼaia. Koia ʼe mahalo pe neʼe fekoleʼaki e te ʼu vahaʼa fale he ʼu moʼi mamala kakaha moʼo tutu ʼo ʼanatou afi. ʼI te manatu ʼa ʼihi tagata sivi Tohi-Tapu, neʼe lagi ʼave e Apalahamo he ʼu moʼi mamala kakaha ʼi tana faifagona. Neʼe lagi ʼai te ʼu moʼi mamala kakaha ʼaia ʼi he foʼi ipu kele neʼe taki ʼaki he seini. (Esaia 30:14) Pea neʼe ina fakaʼaogaʼi te ʼu moʼi mamala kakaha mo he ʼu moʼi fafie ʼi te ʼu temi ʼae neʼe ʼaoga ai ke tafu he afi.