Te Fiafia ʼAe ʼe Maʼu ʼi Te Maʼuli Fakafeʼauga
KO DANIEL MO MIRIAM neʼe nā ʼohoana ʼi Sepetepeli, ʼi te taʼu 2000. Pea neʼe nā maʼuʼuli fimalie ʼi Barcelone, ʼi Sepania. ʼE fakamahino fenei e Daniel: “ ʼAki ʼama gaue neʼe feala ai ke ma kakai ʼi te ʼu fale kai, mo faifolau pea mo tui te ʼu mutuʼi meʼa ʼae ʼe totogi kovi. Neʼe ma kau tuʼumaʼu pe foki ʼi te faifakamafola.” Kaʼe neʼe hoko leva te aluʼaga ʼaeni.
ʼI te fakatahi lahi ʼi te taʼu 2006, neʼe logo ai ia Daniel ki te fehuʼi ʼaeni: “ ʼE tou fai koa ia meʼa fuli ʼe tou lavaʼi moʼo tokoni kia natou ʼae ʼe ‘ ʼave ke matehi,’ ke natou toʼo te ala ʼae ʼe taki ki te maʼuli heʼe gata?” (Taaga Lea 24:11) Neʼe fakamahino ʼi te akonaki ʼaia, ko totatou maʼua ko te fakamafola ʼo te ʼu logo lelei ʼo te Tohi-Tapu. Koteʼuhi ʼe fakalogo ki ai te maʼuli ʼo te hahaʼi. (Gaue 20:26, 27) ʼE manatuʼi e Daniel, “neʼe hage pe ia ko Sehova ʼae neʼe lolotoga palalau mai kia au.” Neʼe toe talanoa foki ʼi te akonaki ki te fiafia ʼae ʼe tou maʼu moka tou faʼafai ʼi te tauhi ʼae kia Sehova. Pea neʼe kua iloʼi pe e Daniel ia te faʼahi ʼaia, koteʼuhi neʼe ina logoʼi te fiafia ʼo Miriam ʼi tana kua pionie katoa.
Neʼe malave ʼaupito te akonaki ʼaia kia Daniel. Koia ʼae neʼe ina toʼo ai leva te tonu ʼae ke ina fai he fetogi lahi ʼi tona maʼuli. ʼI te kamata, neʼe ina fakasiʼisiʼi ʼona hola gaue pea mo ina toʼo te selevisi pionie katoa. Pea neʼe ina fakakaukauʼi te fiafia ʼae ka nā maʼu anai mo Miriam mo kapau ʼe nā olo ʼo gaue ʼi te koga meʼa ʼae ʼaoga lahi ai he kau faifakamafola ʼo te Puleʼaga.
TE ʼU FAIGATAʼAʼIA PEA MO TE LOGO FAKAFIAFIA
ʼI Maio ʼi te taʼu 2007, neʼe mavae ai ia Daniel mo Miriam ʼi ʼanā gaue pea nā olo ki Panama. Ko he fenua neʼe nā faifolau ki ai ʼi muʼa atu. Neʼe nā faifakamafola ʼi te ʼu motu kehekehe ʼo Bocas del Toro ʼi te Tai ʼo Caraïbes. Ko te tokolahi ʼae ʼe maʼuʼuli ʼi ai, ʼe ko te kau Guaymi. Pea ʼi te manatu ʼa Daniel pea mo Miriam, neʼe feala hanā nonofo ʼi Panama lolotoga mahina ʼe valu ʼaki pe tanā kiʼi foʼi falā ʼae neʼe nā tanaki.
Neʼe nā feoloʼaki ʼi te ʼu motu ʼaki he ʼu kiʼi vaka peʼe ʼaki he ʼu lelue. Pea ʼe kei nā manatuʼi pe tanā ʼuluaki hake ʼaki te ʼu lelue ia kilometa ʼe 30 ʼi te ʼu mata moʼuga ʼi te temi vevela. ʼI te kua kovi ʼo te gaʼegaʼe ʼo Daniel neʼe mehiʼi pe ke pogia. Kaʼe ko te kiʼi famili Guaymi ʼae neʼe natou felaveʼi, neʼe natou tali kaiga lelei, tafito la ʼi tanā kua ako ʼihi kupu ʼi te lea ʼo te fenua. Mole faʼa fualoa ki ai, pea neʼe nā fai te ʼu ako Tohi-Tapu ʼe 23.
Kaʼe kotea ʼae neʼe hoko ʼi tanā fakaʼaogaʼi fuli te foʼi falā ʼae neʼe nā tanaki? ʼE ui fenei e Daniel: “Neʼe ma fetagihi, ʼo ma kamata ui ai ke ma toe liliu ki Sepania. Neʼe ma lotomamahi, koteʼuhi neʼe mole ma fia tuku ia natou ʼae neʼe ma fai ʼanatou ako Tohi-Tapu.” Kaʼe, hili ki ai te mahina, neʼe ma maʼu leva he logo fakafiafia. ʼE ui fenei e Miriam: “Neʼe fakaafe maua ki te selevisi pionie makehe. Pea ʼi toe fiafia foki neʼe ma logoʼi he ʼe mole ma mavae anai ʼi toma telituale.”
TONĀ FIAFIAʼAGA
ʼUhi ko te ʼu fetogi ʼae neʼe fai ʼi te kautahi, neʼe tonu ai leva ke tuku e Daniel mo Miriam ia tanā pionie makehe ʼi te taʼu 2015. Kaʼe kotea anai ʼae ka nā fai? Neʼe nā falala ki te fakapapau ʼaeni ia Pesalemo 37:5: “Tuku tou mauli [kia Sehova], tuku tau falala kia ia, pea e gaue anai ia ia.” Neʼe nā liliu ʼo pionie katoa. Pea neʼe maʼu leva ʼanā gaue ʼo feala ai hanā totogi te ʼu meʼa ʼae neʼe ʼaoga kia naua. Pea ia ʼaho nei, ʼe nā tauhi ʼi te kokelekasio ʼi Veraguas, ʼi Panama.
ʼE ui fenei e Daniel: “ ʼI muʼa ʼo tama mavae mai Sepania, neʼe mole ma iloʼi papau pe ʼe ma lavaʼi anai te maʼuli fakafeʼauga. Kaʼe neʼe ma fealagia te faʼahi ʼaia, pea neʼe ma maʼu pe te ʼu meʼa ʼae neʼe ʼaoga ki toma maʼuli.” Kotea tonā fiafiaʼaga lahi? ʼE nā ui fenei: “Ko te fiafia ʼae neʼe ma maʼu ko tama tokoni ki te hahaʼi ʼae ʼe agavaivai ke natou iloʼi ia Sehova, pea ʼe mole hona ia fakatatau.”