படிப்பு 6

வசனங்களைத் தெளிவாகப் பொருத்திக் காட்டுவது

யோவான் 10:33-36

சுருக்கம்: ஒரு வசனத்தை வெறுமனே வாசித்துவிட்டு அடுத்த குறிப்புக்குப் போய்விடாதீர்கள். நீங்கள் வாசிக்கும் வசனத்துக்கும் நீங்கள் சொல்லும் குறிப்புக்கும் என்ன சம்பந்தம் என்பதைத் தெளிவாக விளக்குங்கள்.

எப்படிச் செய்வது?

முக்கிய வார்த்தைகளை எடுத்துக் காட்டுங்கள். ஒரு வசனத்தை வாசித்த பிறகு, முக்கியக் குறிப்போடு நேரடியாகச் சம்பந்தப்பட்டுள்ள வார்த்தைகளைத் திரும்ப வாசியுங்கள் அல்லது ஒரு கேள்வியைக் கேட்டு அந்த வார்த்தைகளைக் கண்டுபிடிக்கச் சொல்லுங்கள்.

வசனத்திலுள்ள கருத்தைச் சொல்வதற்கு நீங்கள் வித்தியாசமான வார்த்தைகளை ஒருவேளை பயன்படுத்தலாம்; இருந்தாலும், வசனத்திலுள்ள வார்த்தைகள் எப்படி முக்கியக் குறிப்போடு சம்பந்தப்பட்டிருக்கின்றன என்பதைத் தெளிவாகக் காட்ட மறந்துவிடாதீர்கள்.
குறிப்பை வலியுறுத்துங்கள். வசனத்தை எதற்காக வாசிக்கப்போகிறீர்கள் என்பதை நீங்கள் சொல்லியிருந்தால், அதற்கும் அந்த வசனத்தில் இருக்கிற முக்கிய வார்த்தைகளுக்கும் உள்ள சம்பந்தத்தை விளக்குங்கள்.

வசனத்தை விளக்கும்போது உங்கள் பைபிளைத் திறந்து வைத்திருங்கள். அப்போதுதான், கேட்பவர்களும் தங்கள் பைபிளைத் திறந்து வைத்திருப்பார்கள்; நீங்கள் சொல்லும் வார்த்தைகளை அந்த வசனத்திலுள்ள வார்த்தைகளோடு சம்பந்தப்படுத்திப் பார்ப்பார்கள்.
எளிமையாகப் பொருத்திக் காட்டுங்கள். முக்கியக் குறிப்போடு சம்பந்தப்படாத விவரங்களைச் சொல்லாதீர்கள். கேட்பவர்களுக்கு நீங்கள் சொல்லும் விஷயத்தைப் பற்றி ஏற்கெனவே என்ன தெரியும் என்று முதலில் யோசித்துப் பாருங்கள்; பிறகு, எவ்வளவு விவரங்களைச் சொன்னால் அவர்கள் தெளிவாகவும் சுலபமாகவும் புரிந்துகொள்வார்கள் என்பதை முடிவு செய்யுங்கள்.