Ghen’è pròpio el Diaol?
La risposta dela Bìblia
Si, ghen’è pròpio el Diaol. Lu l’è el “governante del mondo”, una creatura spiritual che la ze deventada rugna e la se ga rebelà contra Dio. (Gioani 14:30; Efesi 6:11, 12) La Bìblia la dopera tìtoli par mostrar come che la ze la personalità del Diaol. Vedi arquanti qua soto:
Sàtana, che vol dir “Opositor”. — Giò 1:6.
Diaol, che vol dir “Caluniador”. — Apocalisse 12:9.
Serpente, che nela Bìblia l’è un sìmbolo par “Imbroion”. — 2 Corinti 11:3.
Tentador. — Mateo 4:3.
Busier. — Gioani 8:44.
El Diaol no l’è la qualità del mal
Par arquanti, Sàtana, el Diaol, l’è sol la qualità del mal che ghen’è rento de noantri. Ma la Bìblia la conta de una volta che Dio el ga parlà con Sàtana. Come Dio l’è perfeto, saria impossìbile de lu parlar con una parte rugna de si stesso. (Deuteronómio 32:4; Giò 2:1-6) Anca, Sàtana el ga tentà Gesù, che no’l gavea pecati. (Mateo 4:8-10; 1 Gioani 3:5) Cossita, la Bìblia la mostra che el Diaol no l’è sol una forsa che la motiva le persone a far el mal, ma lu l’è pròpio una persona de verità.
Sarà che ghemo de restar amiradi parché tanti no i crede che ghen’è pròpio el Diaol? Nò, parché la Bìblia la dise che Sàtana el dopera tuti i tipi de robe par imbroiar le persone. (2 Tessalonissensi 2:9, 10) Una dele prinsipai arme che el Diaol el dopera par far orba la mente de tante persone la ze farghe creder che lu no’l esiste mia. — 2 Corinti 4:4.
Altre idee sbaliade sora el Diaol
Idea sbaliada: Lùssifer l’è nantro nome par el Diaol.
Verità: La parola ebraica che la ze tradusida in arquante Bìblie come “Lùssifer” la vol dir “quel che slusa”. (Isaia 14:12) El relato ndove catemo questa spression el parla dei rè de Babilónia, che i saria umiliadi par Dio parché i era tanto aroganti. (Isaia 14:4, 13-20) La spression “quel che slusa” la ze stata doperada par riderghe drio de questi rè de Babilónia dopo che i ga perso el so poder.
Idea sbaliada: Sàtana el laora par Dio, come un “advogado de acusassion”.
Verità: El Diaol no l’è servo de Dio, ma si el so nemigo. Sàtana, el Diaol, el se mete contra quei che i serve a Dio e el dopera busie par acusarli. — 1 Piero 5:8; Apocalisse 12:10.