Lelo Leza Udi’ko?
Bilondolola Bible
En-en, Bible uleta bubinga bukulupilwa bulombola’mba Leza udi’ko. Witukankamikanga twikale na lwitabijo mudi Leza, ke na kwitabijapo bya bupofu byobya binena bipwilo, ino i na kwingidija ‘bukomo bwetu bwa kulanguluka’ ne “bukomo bwa kulanga.” (Bene Loma 12:1; 1 Yoano 5:20, kunshi kwa dyani) Tala ino miswelo ya mwa kulangulukila pa Bible:
Kwikala’ko kwa diulu ne ntanda mwine mudi ndudi ne būmi bilombola’mba Umpangi udi’ko. Bible unena’mba: “Na bubine, njibo yonso i myūbakwe na muntu, ino mwine wāubakile bintu byonso i Leza.” (Bahebelu 3:4) Nansha uno mulangulukilo byoupēla, bantu bafunde bininge beumonanga’mba udi na bukomo.a
Batwe bantu tudi na mutyima wa kipangila wa kukimba kuyuka buluji ne kitungo kya būmi, kyumwa kyotwikalanga nakyo nyeke nansha shi bisakibwa byetu bya ku ngitu i bivuijibwe. Kino kyo kitelwa na Bible bu ‘byotusakilwa ku mushipiditu,’ mwine mubadilwa mutyima wa kuyuka Leza ne kumutōta. (Mateo 5:3; Kusokwelwa 4:11) Bino bisakibwa bya ku mushipiditu bileta bukamoni bwa amba Leza udi’ko, ne kulombola’mba i Umpangi wa buswe usaka tuvuije bino bisakibwa.—Mateo 4:4.
Bupolofeto palapala bwa mu Bible bwālembelwe myaka tutwa na tutwa kumeso kadi bwāfikidile enka mobwālailwe. Bubine ne myanda idi mu buno bupolofeto bilombola’mba i butambe kudi muntu upityile bantu bonso.—2 Petelo 1:21.
Balembi ba Bible bādi na buyuki mu myanda ya sianse kutabuka bantu ba mu abo mafuku. Kimfwa, mu bitatyi bya kala bantu bavule bādi bakulupile amba ntanda iselelwe na nyema, pamo bwa polo, mpenge, nansha ñombe mulume. Ino aye Bible unena’mba Leza uyeyekele “ntanda patuputupu.” (Yoba 26:7) Kadi Bible ulombola patōkelela mwine mwikadile ntanda’mba i “kijokoloja.” (Isaya 40:22, kunshi kwa dyani) Bantu bavule bamwene amba kuno kwivwanija kwivwanije balembi ba Bible kulombola’mba i Leza wēbalombwele bya kulemba.
Bible ulondololanga bipangujo bivule bikomo, bipangujo bibwanya kutwala muntu ku kutuna Leza shi kebilondolwelwepo senene. Kimfwa: Shi Leza i wa buswe kadi wa bukomo bonso, mwanda waka kudi masusu ne bibi pano pa ntanda? Mwanda waka divule dine bipwilo bitononanga bantu balonge bibi pa kyaba kya kulonga biyampe?—Tetusa 1:16.
a Kimfwa, Allan Sandage mwifundi wa imbuo wafwile panopano, wanenene pa mwanda wa diulu ne ntanda’mba: “Mona’mba i bikomo kwitabija’mba ino ndudi yāikele’ko mu kavutakanya. Kufwaninwe kwikala muntu kampanda wiitūdile. Kondi ami, Leza i kikata kifyame, inoko i aye kete ubwanya kushintulula kingelengele kya kwikala’ko kwa bintu, ne kikadile’ko bintu pa kyaba kya kuleka kwikala’byo’ko.”