Abakaiso ba Yahwe Batunga Bata Sente Ezisagika Omulimo Gwabo?

Omulimo gwaitu ogw’ensi yoona gusagikwa Abakaiso ba Yahwe abahayo sente rundi ebintu begondiize.a Obusanduuko obw’okutamu sente busangwa omu biikaro nambere tusorrokanira, kandi emiringo endi ey’okuhayo n’esangwa ha mukura gwaitu. Haroho emiringo erukwahukana ey’etairweho nukwo omuntu acwemu obwaraaba n’agonza kuhayo kusagika omulimo ogw’ensi yoona, kusagika ekitebe ekyarumu rundi byona.

Abakaiso ba Yahwe tibahyo kimu kya ikumi rundi kuhayo omuhendo gwa sente nibasigikirra ha ntahya yabo. (2 Abakolinso 9:7) Titusorooza sente rundi kusasuza kwija omu nsorrokano zaitu, kandi titusaba abantu sente kubatiza, kuziika, kugaitwa, rundi emikoro endi yoona ey’ediini. Titusorooza sente kurabira omu kutunda ebintu omu nsorrokano zaitu, rundi kurabira omu mikoro endi. Omuntu obwaba ahaireyo sente titumuranga omu nsorrokano zaitu kandi n’omuhendo gwa sente ezaaba ahireyo tigurangwa. (Matayo 6:2-4) Ebitabu n’omukura gwaitu ogwa intaneeti tibibaho burango bw’okukora sente.

Buli kitebe eky’Abakaiso ba Yahwe kisomerwa embalirra buli kwezi erukwoleka omulingo sente ezirukuba zihairweyo zikozesiibwe, kandi ensorrokano zinu buli omu n’asobora kuzibamu. Buli hanyuma y’akasumi, buli kitebe kiba n’okubara ebitabu ebya sente kukigumya ngu sente ezahairweyo zikakozesebwa kurungi.—2 Abakolinso 8:20, 21.

Emiringo ey’Okuhayo

• Obusanduuko bw’okuteekamu sente: N’osobora kuteeka sente rundi ceki omu kasanduuko akali omu Kyombeko ky’Obukama, Ekyombeko eky’Ensorrokano enkooto rundi omu biikaro ebindi nambere haba ensorrokano.

• Kuhayo kurabira ha intaneeti: Omu mahanga maingi, n’osobora kukozesa ekicweka “Donate to Jehovah’s Witnesses” kusobora kuhayo n’okozesa credit card, debit card, kufurra sente omu bbanka, n’emiringo endi eya ha intaneeti.b Abakaiso ba Yahwe abamu bacwamu kwahura akasente ha rubaju buli kwezi nukwo basobole kuhayo nibakozesa gumu ha miringo enu.—1 Abakolinso 16:2.

  

• Kutekaniza kara: Emiringo emu ey’okuhayo n’eyetaaga kutekaniza kara, rundi n’okutunga obuhabuzi kuruga omu b’ebiragiro. Entekaniza enu n’esobora n’okukukonyera kumanya emisoro eibasobora kukukeehezaaho omu ihanga lyawe. Abantu baingi bagasiirwe habw’okweyongera kumanya hali ebyo ebibasobora kuhayo obu bakyali bomeezi rundi ebisobora kuhebwayo kakuba bafa. Obworaaba n’ogonza kuhayo n’okozesa emu ha miringo eyolekerwe hansi nitukusaba oyekaguzeeho ofiisi y’itaagi ey’Abakaiso ba Yahwe omu ihanga lyawe nukwo omanye ebirukukiraho:

  • akawunti za bbanka

  • insuwarence na pensoni

  • itaka n’ebyombeko

  • emigabo

  • ebiraamo n’obugwetwa

Kusobora kumanya ebirukukiraho ha miringo endi ey’okuhayo ey’ekozesebwa omu kicweka kyawe, rora ekicweka “Donate to Jehovah’s Witnesses.”