Ekihongwa kya Yesu Kiri Kita ‘Kicunguro Habwa Baingi’?
Eky’okugarukamu kuruga omu Baibuli
Ekihongwa kya Yesu nugwo omulingo Ruhanga ajunamu abantu kuruga omu kibi n’okufa. Baibuli ebazaaho esagama ya Yesu eyaseeserwe nk’ekicunguro. (Abefeso 1:7; 1 Petero 1:18, 19) Egi niyo ensonga habwaki Yesu yagambire ngu akaija ‘okuhayo obwomeezi okucungura baingi.’—Matayo 20:28.
Habwaki kyali nikyetaagisa ‘okucungura baingi’?
Omusaija ow’okubanza Adamu, akaba ahangirwe ahikiriire rundi ataine kibi. Akaba ahangirwe n’omugisa gw’okwomeera ebiro n’ebiro baitu yagufeerwa obuyacwiremu kujeemera Ruhanga. (Okubanza 3:17-19) Obuyazaire abaana, nabo akabagwetera ekibi eki. (Abarumi 5:12) Habw’ensonga enu, Baibuli n’eyoleka ngu Adamu ‘akeetunda’ otwaliremu n’abaana be omu bwiru bw’ekibi n’okufa. (Abarumi 7:14) Habwokuba abaijukuru ba Adamu tibahikiriire, busaho n’omu akaba n’asobora kusasurra Adamu ekiyaferiirwe.—Zabuli 49:7, 8.
Ruhanga akasalirirwa abaijukuru ba Adamu abaali bataine okunihira. (Yohana 3:16) Baitu nabwo, habw’okuba Ruhanga w’obwinganiza, akaba atasobora kwitira ebibi byabo eriiso ataine nsonga ey’egumire eyarukusigikirraho. (Zabuli 89:14; Abarumi 3:23-26) Habwokuba Ruhanga agonza abantu, akabateraho entekaniza ey’etongoziibwe ey’etaakugarukiire ha kubasobozesa kuganyirwa ebibi byabo kyonka, baitu n’okubiihiraho kimu. (Abarumi 5:6-8) Kandi enteekaniza egi eyetongoziibwe nikyo ekicunguro.
Ekicunguro kikora kita?
Omu Baibuli, ekigambo “ekicunguro” nikitwarramu ebintu binu bisatu:
1. Guli muhendo oguheebwayo.—Okubara 3:46, 47.
2. Kireetaho Okulekerwa rundi kucungurwa.—Okuruga 21:30.
3. Kinganaingana n’omuhendo gw’ekintu ekirukusasurrwa.a
Wetegereze omulingo ebintu binu birukukwata ha kicunguro kya Yesu Kristo.
1. Omuhendo oguhebwayo. Baibuli egamba ngu Abakristaayo ‘bakagurwa n’omuhendo.’ (1 Abakolinso 6:20; 7:23) Omuhendo ogu niyo esagama Yesu Kristo eiyakozeseze ‘kugurra Ruhanga abantu kuruga omu ruganda rwona, orulimi, n’abantu, nihanga.’—Okusuku’rwa 5:8, 9.
2. Okulekerwa. Ekihongwa kya Yesu kireetaho ‘okucungurwa’ kuruga omu kibi.—1 Abakolinso 1:30; Abakolosai 1:14; Abaheburaniya 9:15.
3. Kwinganaingana n’omuhendo. Ekihongwa kya Yesu kinganainganira kimu n’ekintu Adamu yafeeriirwe kandi eki nikyo obwomeezi obuhikiriire. (1 Abakolinso 15:21, 22, 45, 46) Baibuli egamba eti: “Baitu nka baingi okubafokere abasisi obwokutahurra okwomuntu omu [Adamu] nukwo obwokuhurra okwomu [Yesu Kristo] abaingi balifoka bati abahikiriire.” (Abarumi 5:19) Kinu nikyoleka omulingo okufa kw’omuntu omu kusobora kusasurra ebibi by’abasiisi baingi. Amananu gali, ekihongwa kya Yesu kiri ‘kicunguro ekirukwinganaingana habwa boona’ abakora ebintu ebirukwetaagisa kusobora kukigasirwamu.—1 Timoseo 2:5, 6.
[OBUGAMBO OBULI HANSI]
a Omu Baibuli, ebigambo eby’okubanza ebihindurwa kumanyisa “ekicunguro” biba nibitwarramu omuhendo, rundi ekintu eky’omuhendo ekisaswirwe. Ekyokurorraho, ekigambo eky’Oruheburaniya ka·pharʹ kimanyisa “kuswekerra.” (Okubanza 6:14) Kikira kumanyisa kuswekerra ekibi. (Zabuli 65:3) Ekigambo ekindi ekirukukisisana koʹpher kimanyisa omuhendo oguheebwayo kusasurra okuswekerra kunu, rundi kukucungura. (Okuruga 21:30) Omu mulingo nugwo gumu, ekigambo eky’Oruyonaani lyʹtron, ekikira kuhindurwa “ekicunguro,” nikisobora n’okumanyisa “omuhendo oguheebwayo kucungura.” (Matayo 20:28; The New Testament in Modern Speech, by R. F. Weymouth) Abahandiiki b’Oruyonaani bakakozesa ekigambo kinu kumanyisa omuhendo ogusasurwa kulekera omuntu ow’akwatiirwe omu bulemu rundi kulekera omwiru.