Relijiaun hotu mak hanesan deʼit ka lae? Relijiaun hotu ajuda ita hakbesik ba Maromak ka lae?

Bíblia nia resposta

Lae, relijiaun hotu la hanesan. Bíblia fó ezemplu barak kona-ba relijiaun sira neʼebé la halo Maromak kontente. Relijiaun sira-neʼe sai parte ba kategoria rua.

Kategoria 1: Adora maromak falsu sira

Bíblia uza liafuan sira hanesan “folin-laek” no “la fó benefísiu” bainhira koʼalia kona-ba adorasaun ba maromak falsu sira. (Jeremias 10:3-5; 16:19, 20) Maromak Jeováa fó mandamentu ba nasaun Izraél antigu neʼebé hatete: “Imi labele adora maromak seluk, só adora haʼu mesak deʼit.” (Éxodo 20:3, 23; 23:24) Bainhira ema Izraél adora maromak seluk, “Jeová sai hirus tebes”.​—Números 25:3; Levítico 20:2; Juís 2:13, 14.

Maromak nia hanoin la troka, nia nafatin la kontente bainhira ema adora maromak seluk. (1 Korinto 8:5, 6; Galásia 4:8) Nia haruka ema sira neʼebé hakarak adora nia atu hakotu sira-nia ligasaun ho ema sira neʼebé mak parte ba relijiaun falsu. Nia hatete: “Sai husi sira-nia leet, no haketak imi-nia an.” (2 Korinto 6:14-17) Se relijiaun hotu mak hanesan deʼit no ajuda ita hakbesik ba Maromak, entaun tanbasá Maromak presiza fó mandamentu hanesan neʼe?

Kategoria 2: Adora Maromak loos iha dalan neʼebé nia la simu

Dala ruma, ema Izraél adora Maromak hodi halo tuir fiar no kostume sira husi adorasaun ba maromak falsu sira. Maibé Jeová la simu adorasaun loos neʼebé kahur ona ho adorasaun falsu. (Éxodo 32:8; Deuteronómio 12:2-4) Jesus la kontente ho ulun-naʼin relijiaun iha ninia tempu tanba dalan neʼebé sira adora Maromak. Sira finje hatudu katak sira iha fiar, maibé sira mak laran-makerek no sira “la halo tuir buat neʼebé importante iha Ukun-Fuan, hanesan justisa, laran-sadiʼa no laran-metin”.​—Mateus 23:23.

Nuneʼe mós ohin loron, só deʼit relijiaun neʼebé bazeia ba lia-loos mak bele ajuda ema hakbesik ba Maromak. No lia-loos neʼe mak hakerek iha Bíblia laran. (João 4:24; 17:17; 2 Timóteo 3:16, 17) Bainhira relijiaun sira-nia hanorin kontra Bíblia, ida-neʼe hadook ema husi Maromak. Iha hanorin barak neʼebé ema hanoin katak mai husi Bíblia, maibé tuir loloos hanorin sira-neʼe mai husi ema neʼebé adora maromak falsu. Porezemplu, hanorin kona-ba Trindade, mate-klamar no infernu. Adorasaun neʼebé habelar hanorin sira-neʼe mak “saugati deʼit” ka folin-laek tanba troka buat neʼebé Maromak hakarak ita atu halo ho relijiaun nia tradisaun sira.​—Marcos 7:7, 8.

Maromak hakribi hahalok laran-makerek neʼebé relijiaun sira hatudu. (Tito 1:16) Atu bele ajuda ema hakbesik liután ba Maromak, relijiaun ida presiza fó influénsia ba dalan neʼebé ema halaʼo sira-nia moris loroloron nian, no neʼe laʼós deʼit rituál ka serimónia. Porezemplu, Bíblia hatete: “Se ema ida hanoin katak nia adora Maromak, maibé la kontrola ninia nanál, nia bosok ninia laran rasik no ninia adorasaun saugati deʼit. Relijiaun neʼebé moos no la foʼer tuir ita-nia Aman Maromak nia hanoin mak neʼe: tau matan ba oan-kiak no feto-faluk sira iha sira-nia susar, no kontinua hadook an husi hahalok aat iha mundu neʼe.”​—Tiago 1:26, 27, nota-rodapé.