Yombi Wapwile wa Kulongwa

KUMA munu asa kutwalelelaho kupwa wa kulongwa kuli Njambi nga aliwana na byeseko byakama, co lalo kesi na kuwana bukwasi bwa ku mubila ndi? Satana ikeye wehwile eci cihula, co Yombi wakumbulwile eci cihula mwatwaleleleho kupwa wa kulongwa.

Baisalele mubakele mu Ingito, Yombi uje wapwile kabushoko ka Abilahama wakele mu lifuti libatumbula ano matangwa ngwabo Arabia. Simbu imo tungelo mubalikungulwile halutwe lwa Njambi, Satana nendi hakele. Yehova washangazalele ngamba yendi wa kulongwa Yombi oku na tungelo bali na kulizibila. Yehova wendekele ngwendi ha simbu ije kukwakele munu wapwile wa kulongwa ngwe Yombi. Oloni Satana wabangeyeye Yombi ngwendi wakele na kupangela Njambi mwafwa wamubezikisile na kumunyungilila. Satana wendekele ngwendi nga Yombi bamutambula byoshe byakele nabyo, co katwalelelaho kupwa wa kulongwa kuli Njambi.

Njambi watabesele Satana anyongese bufuko bwa Yombi na kutsiya bana bendi na kumubinjisa. Yombi kazibukile ngwendi Satana ikeye wakele na kumunenela obu bukalu, co kazibisisile byalingisile Njambi amwecelele. Nameme ngoco, Yombi kanene Njambi mulonga.

Babusamba ba Yombi ba makuli batatu bamwendelele. Majwi amangi ali mu mukanda wa Yombi anapu a baje banalume balekele Yombi ngwabo Njambi wamwanene kashitiko mwafwa ya bubi bwalingile mu kushwekesa. Bendekele ngwabo Njambi kazemene bangamba bendi, co lalo kabakulahelele. Yombi wabyanene biyongola byabo bya makuli. Yombi wendekele mu kusimpa ngwendi atwalelelaho kupwa wa kulongwa kweta noho hakatsila.

Oloni Yombi wakele na kuyayabala manene mwafwa washakele ngwendi Njambi amanese bukalu bwendi oho bene. Elihu wakandele Yombi na babusamba bendi ba makuli. Elihu wakwasele Yombi amone ngwendi kujelesa lizina lya Yehova Njambi kukekwo kwapwa kwa seho manene kutubakana kujelesa lizina lya munu. Kutundaho, wapayele baje babusamba ba Yombi ba makuli.

Yehova nendi wakwasele Yombi atengulule bisinganyeka byendi. Yehova walekele Yombi ngwendi asinganyekesese ha byuma byanatanga mangana azibuke ngwendi nzili ya Njambi yapwa yakama manene kutubakana munu. Yombi walikehesele, co Njambi mwamunangwile watolililile. Yehova wapwa “muka-kutetela na mema ku mbunge,” ngeci wakangwisile Yombi, wamwilwisilile bufuko bwendi lubali, co lalo wamubezikisile ha kumwana bana bakupwa 10. (Yakomba 5:11) Yombi mwatwaleleleho kupwa wakulongwa kuli Yehova omwo waliwanene na byeseko, wamwesele ngwendi Satana wapwa muka-makuli mwafwa wabangeyeye banu ngwendi kubasa kupwa bakulongwa kuli Njambi nga baliwana na byeseko.

—Biñanda bili mu mukanda wa Yombi.