Ka Rhwanashenga Abatagatifu?

Ishuzo ly’Ebibliya

Nanga. Ebibliya eyerekine oku rhukwanine rhukashenga Nnâmahanga yene, kugerera izino lya Yezu. Yezu abwira abaganda bage ntya: “Yumvagi oku mugwasirwe okukashenga: Larha wirhu oli omu mpingu, izino lyawe limana likuzibwe.” (Mateyo 6:9, Mashi Bible) Nta lusiku Yezu ayigirizize abanafunzi bage mpu bakashenga abatagatifu, erhi ba malaika, erhi muntu yeshi-yeshi aha nyuma na Nnâmahanga.

Kandi Yezu abwira abaganda bage ntya: ‘Nie Njira, nie n’Okuli, nie na Buzine. Ntaye wankaja emwa Larha arhanangeziriho.’ (Yowane 14:6, Verbum Bible) Yezu yene ye wahabirwe omukolo gw’okurhuderhera emwa Nnâmahanga.—Abahabraniya 7:25.

Ka kuli kubi erhi nakashenga Nnâmahanga n’abatagatifu?

Omu marhegeko ikumi ga Nnâmahanga, muba liguma liba lidesire ntya: “Niene Nyakasane, Nyamuzinda, ndi wa mutula.” (Olubungo 20:5, Verbum Bible) Omu njira nci Nnâmahanga aba “wa mutula”? Amahugûlo gali omu New American Bible gayerekine oku Nnâmahanga “ahunyire abantu bacihâne emwage yenene.” Bwenene Nnâmahanga asima enterekêro—kuhiramo isala—bakamuhabyo yene.—Izaya 48:11.

Rhunagokeze Nnâmahanga bwenene erhi rhuba rhuli rhwashenga owundi muntu, abatagatifu erhi bamalahika batagatifu. Erhi entumwa Yowane elonza okushenga malahika, oyo malahika amuhanza okujira ntyo, amubwira erhi: “Omanye irhondo orhacihîraga wajira ntyo! Ndi mukozi akawe, kandi nnandi aka bene winyu balya bagwerhe okuli Yezu afulûlaga; obe Nnâmahanga yene oharamya.”—Amafulûlo 19:10, Mashi Bible.