Romanu

ꞌRe idanomro mono zép té wasuꞌu, Cristuhu siré

6 ꞌRe ihâimana uꞌâsi mono hã, simizawi pese uptabi di. Te waꞌãma ꞌre pẽꞌẽzé uꞌâsi. Tahawa, wawasédé hã wa te ꞌre ꞌmanharĩ zaꞌra mono nherẽ, tinhimizawizé hã te te wawi ꞌre azawi mono õ di. Wawasédé, wa te ꞌre iꞌmanharĩ zaꞌra mono zé hã, te duré te te wama ꞌre apari. E tawamhã, wawasédé, wa te ꞌre iꞌmanharĩ zaꞌra mono zé hã te te wama ꞌre apari mono nherẽ, wa za bété wawasédé hã duré apâ wa te ꞌre ꞌmanharĩ uꞌâsi zaꞌra, apâ te te duré wama ꞌre apari zahu mono da. E taha da, wa za wawasété uꞌâsi ꞌre wahâimana zaꞌra. 2 Mare di. ꞌRe dadâꞌâ zaꞌra mono wa, marĩ zô, da te oto ꞌre irobꞌruiwapari zaꞌra mono õ ne, wa norĩ hã wawasété zô, wa te oto ꞌre robꞌruiwapari zaꞌra mono õ di za. Tahawa, wawasédé hã wa te duré ꞌre ꞌmanharĩ zahu zaꞌra mono õ di za oto. 3 Wa norĩ hã â dawabzuri, wa te ꞌre ꞌmanharĩ zaꞌra mono wamhã, Cristu Zezusihi siré, ꞌrâwi oto ꞌre iwanomro mono zé, te wasuꞌu. Isiré oto ꞌre iwanomro mono ne, wa tô duré isiré ꞌre wadâꞌâ zaꞌra, ihâiba zu. Ãne hã aima waihuꞌu pese zaꞌra waꞌaba di. 4 Tawamhã â dawabzuri hã oto wa te ꞌre ꞌmanharĩ zaꞌra mono wamhã, â da te ꞌre iwanhamra mono zé, Cristuhu siré ꞌre iwadâꞌâ zaꞌra mono zé, te waꞌãma simiréꞌé zaꞌra. Abꞌre ꞌre, isiré da te ꞌre iwanheme mono zéb zama, te waꞌãma wasuꞌu zaꞌra. E marĩ da, wa tô bété Zezusihi siré ꞌre wadâꞌâ zaꞌra. Cristu hã dâꞌâ nherẽ, Imama hã tiwaihuꞌu pese na te te ihâiwaꞌutu ne, ꞌre iwanomro mono zép tém na si, oto ꞌre wahâimana zaꞌra mono da hã, wa tô isiré ꞌre wadâꞌâ zaꞌra, wa norĩ hã. Ãne waꞌãma isimiréꞌé zaꞌra zé hã te wasuꞌu.

5 Wa norĩ hã Cristuhu siré, wa tô ꞌre wadâꞌâ zaꞌra, wawasété zô, wa te oto ꞌre robꞌruiwapari zaꞌra mono õ wa, ꞌre dadâꞌâ zaꞌra mono wa, marĩ zô, da te oto ꞌre irobꞌruiwapari zaꞌra mono õ ne. Ãne hã simisutu ma tô ꞌRe ihâimana uꞌâsi mono hã wahâiba na atob zaꞌra, Cristuhu hâiba tẽme. Duré Cristu hã dâꞌâ uptabi nherẽ, Imama te te ihâiwaꞌutu ne, te za duré wa norĩ hã te te ꞌre waꞌahâiwaꞌutu. Taha na te za duré Cristuhu hâiba tẽme wahâiba na hã atob zaꞌra, ꞌRe ihâimana uꞌâsi mono hã. 6 Wawasété na ꞌre iwanomro ꞌrata mono zé hã, tâibâ oto. Cristu hã wedepoꞌo nhonhiꞌrãmi na idâꞌâ siré, ma tô ꞌRe ihâimana uꞌâsi mono hã te te wama ꞌre aꞌuprosi, ꞌre iwanomro ꞌrata mono zé hã. Marĩ iwasétére si, wa te wasima ꞌre iꞌruiwapari uꞌâsi zaꞌra mono zém hawi, te te ꞌre waꞌanhoꞌreptui mono da, ma tô te te wama ꞌre aꞌuprosi, ꞌre iwanomro ꞌrata mono zé hã. Wawasédé hã wa te ꞌre sahâri waihuꞌu zaꞌra mono ãna, ꞌre wanomro mono tõ da, ma tô te te wawi ꞌre aꞌuprosi. Ãne hã wama waihuꞌu pese zaꞌra di. 7 ꞌRe dadâꞌâ zaꞌra mono wamhã, dawasédé hã da te ꞌre ꞌmanharĩ waihuꞌu zaꞌra mono õ di oto. Tane, ꞌre idâꞌâ zaꞌra mono norĩ ne, Cristuhu siré ꞌre wadâꞌâ zaꞌra mono wa, wawasédé hã wa te ꞌre ꞌmanharĩ uꞌâsi zaꞌra mono õ di za oto. 8 Tahawa, Cristuhu siré ꞌre wadâꞌâ zaꞌra mono wa, wa za wa te wasina ꞌre umnhasi zaꞌra tô sena na, za isine ꞌre iwahâiwaꞌutu zaꞌra mono zéb da hã, duré isiré za ꞌre iwahâimana uꞌâsi zaꞌra mono zém na hã. 9 Ãne na, wa tô duré wasina waihuꞌu pese zaꞌra ni. Cristu hã dâꞌâ uptabi nherẽ, ꞌRe ihâimana uꞌâsi mono te te hâiwaꞌutu wa, tahawa, niwamhã tidâꞌâ na te te sahu õ di za, idâꞌâzé hã tãma siptete õ wa oto. 10 Dâꞌâ wamhã, misi haré ma tô dawasété nhiptetezé hã uprosi. Tahawa, oto dâꞌâ parimhã, Timama ma, te oto ꞌre hâimana uꞌâsi, Cristu hã. 11 Tahawa, te za ãne na asiꞌãma ꞌre irosaꞌrata zaꞌra waꞌaba mo: “ꞌRe dadâꞌâ zaꞌra mono wa, marĩ zô, da te oto ꞌre irobꞌruiwapari zaꞌra mono õ ne, wawasété zô, wa te oto ꞌre robꞌruiwapari zaꞌra mono õ di za, wa norĩ hã. ꞌRe ihâimana uꞌâsi mono ma, wa te oto ꞌre iromhuri zaꞌra mono da si, wa za oto ꞌre wahâimana zaꞌra. Cristu Zezusihi ãma si, wa za oto ꞌre wahâimana zaꞌra.” Ãne si te za asima ãma ꞌre irosaꞌrata zaꞌra waꞌaba mo.

12 ꞌRâwi marĩ na asima ꞌre irosaꞌrata wasété zaꞌra waꞌaba mono zé hã ꞌre ꞌmadâꞌâ zaꞌra waꞌaba mono tõ da, te za aiwasété wi asina ꞌre asiptete zaꞌra waꞌaba mo, aipẽꞌẽ na. 13 Duré marĩ iwasédé hã ꞌre ꞌmanharĩ zaꞌra waꞌaba mono tõ da, te za aihâiba hã ꞌre iꞌmadâꞌâ pese zaꞌra waꞌaba mo, aihâiba hawim na marĩ ꞌre ꞌmanharĩ zaꞌra waꞌaba mono tõ da. ꞌRe atâꞌâ zaꞌra waꞌaba mono wa, ꞌRe ihâimana uꞌâsi mono te te ꞌre iꞌaihâiwaꞌutu zaꞌra waꞌaba mono ne, te ꞌre aihâimana zaꞌra waꞌaba mo, ꞌre anomro aba mono zép tém na hã. Tahawa, te za ꞌRe ihâimana uꞌâsi mono ma si, ꞌre asisõmri uꞌâsi zaꞌra waꞌaba mo, misi haré. Taha ma si, te za aihâiba hã duré ꞌre isõmri uꞌâsi zaꞌra waꞌaba mo õne haré, marĩ iwẽ si ãma ꞌre iꞌmanharĩ zaꞌra waꞌaba mono zéb da hã. 14 ꞌRe ihâimana uꞌâsi mono nhimiroti ꞌrata na robꞌuiꞌéré hã asina tãma ãma ꞌre iꞌuwaimrami zaꞌra waꞌaba mono zéb zarina, aiwasédé hã te te oto aiꞌãma ꞌre aꞌmadâꞌâ aba mono tõ da, ꞌre asiꞌmadâꞌâ zaꞌra waꞌaba mono õ di za. Tinhimizawi pese zém na si, ma tô ꞌRe ihâimana uꞌâsi mono hã aiꞌãma ꞌre pẽꞌẽzé zaꞌra waꞌwa, aiwasété na ꞌre aihâimana zaꞌra waꞌaba mono nherẽ. Taha zarina si, ma tô te te ꞌre aiwẽsãmri zaꞌra waꞌwa. Tahawa, te za aiwasété wi asina ꞌre asiptete uꞌâsi zaꞌra waꞌaba mo oto.

ꞌRe ihâimana uꞌâsi mono ma, ꞌre idasisõmri zaꞌra mono zé wasuꞌu

15 Tawamhã ãté ãne te za asima ꞌre inharĩ zaꞌra waꞌaba mo: “ꞌRe ihâimana uꞌâsi mono nhimiroti na Mozési te te irobꞌuiꞌérézé hã wa te ꞌre iꞌmadâꞌâ pese zaꞌra mono zéb zarina, te te sima waꞌãma ꞌre aroti mono õ di, taha zarina wawasédé hã te te oto waꞌãma ꞌre aꞌmadâꞌâ tõ mono da, taha zarina te te ꞌre waꞌawẽsãmri mono da. Tinhimizawi pese zéb zarina si, ma tô te te ꞌre waꞌawẽsãmri, wawasété na ꞌre wahâimana zaꞌra mono nherẽ, waꞌãma ꞌre pẽꞌẽzé zaꞌra mono wa. Tahawa, wa za wawasédé hã duré apâ wa te ꞌre ꞌmanharĩ uꞌâsi zaꞌra õne uꞌâ, ꞌRe ihâimana uꞌâsi mono hã dawasété nherẽ, simizawi pese wa.” Ãne na asima ꞌre rosaꞌrata zaꞌra waꞌaba mono õ di za. Tôꞌã. 16 A norĩ waꞌwa hã dama ꞌre romhuri zaꞌra waꞌaba mono da, aihâiba hã dama ꞌre sõmri zaꞌra waꞌaba mono wamhã, taha nhimiwadaꞌuri na si, te za tô ꞌre aihâimana zaꞌra waꞌaba mo. Ãne hã aima waihuꞌu pese zaꞌra waꞌaba di. Tane, aihâiba hã aiwasété ma, ꞌre sõmri zaꞌra waꞌaba mono wamhã, te za tô ãma ꞌre asiwasété zaꞌra waꞌaba mo. Taha zarina te za atâꞌâ uꞌâsi ne, ꞌre aihâimana zaꞌra waꞌaba mo, aipẽꞌẽ ꞌre, ꞌRe ihâimana uꞌâsi mono nhiti. Tane nherẽ, ꞌRe ihâimana uꞌâsi mono ma, aihâiba hã ꞌre sõmri zaꞌra waꞌaba mono wamhã, taha nhimiwadaꞌuri na si te za ꞌre aihâimana zaꞌra waꞌaba mo. Tawapsi te za oto te te ꞌre aiwẽsãmri zaꞌra waꞌwa. 17 Aiwasété na si, ma tô aré ꞌre aihâimana uꞌâsi zaꞌra waꞌaba mo, ꞌre sahâri waihuꞌu zaꞌra waꞌaba mono ãna. Tane nherẽ, ãne ꞌre aihâimana zaꞌra waꞌaba mono õ di oto. ꞌRe ihâimana uꞌâsi mono te te aima ꞌre iroti zaꞌra waꞌaba mono zép si, te oto ꞌre iꞌmadâꞌâ pese zaꞌra waꞌaba mo. Tahawa, ꞌRe ihâimana uꞌâsi mono ãma si, wa za ꞌre wawata zaꞌra. 18 ꞌRe ihâimana uꞌâsi mono hã tinhiptetezé hã ma tô te te aima ꞌre sõmri zaꞌra waꞌwa, aiwasété ãna oto ãma ꞌre anomro aba mono da. Ma tô duré aima siꞌapito zaꞌra waꞌwa, aiwẽ na si oto tãma ꞌre aihâimana zaꞌra waꞌaba mono da. 19 ꞌRe idahâimana zaꞌra mono zém na, wa tô aima ãma romnhimiréꞌé zaꞌra waꞌwa, ĩnhimirowasuꞌu na hã asiꞌuihâ na sada asimirosaꞌrata nhiptete waihuꞌu zaꞌra waꞌaba õ wa. Aihâiba hã aiwasété ma, ma tô ꞌre isõmri zaꞌra waꞌaba mo aré, taha na si ꞌre aihâimana zaꞌra waꞌaba mono da, aihâiba na asina ꞌre aiwasété zaꞌra waꞌaba mono da. Tane nherẽ, aihâiba hã ꞌRe ihâimana uꞌâsi mono ma si, te za oto ꞌre isõmri zaꞌra waꞌaba mo, taha nhimiroti na si oto ꞌre aihâimana zaꞌra waꞌaba mono da, aihâimana wẽ uptabi na.

20 Aiwasédé hã ꞌre sahâri waihuꞌu zaꞌra waꞌaba mono ãna, ꞌre aihâimana zaꞌra waꞌaba mono ré, ꞌRe ihâimana uꞌâsi mono te te aima ꞌre iroti zaꞌra waꞌaba mono zéb zarina ꞌre aihâimana zaꞌra waꞌaba mono õ di aré. 21 Aiwasété na si ꞌre aihâimana zaꞌra waꞌaba mono ré, e marĩ ma tô aima ꞌre hâimana zaꞌra waꞌwa, ꞌre iꞌmanharĩ zaꞌra waꞌaba mono zé waꞌrãmimhã, ãma aima ꞌre irowẽ zaꞌra waꞌaba mono zéb da hã. Robaba di. Taha na asimiꞌmanharĩ wasété zaꞌra waꞌaba zém na ãma ꞌre aséb zaꞌra waꞌaba mono di oto. Ãne si, da te ꞌre ꞌmanharĩ uꞌâsi zaꞌra mono wamhã, dapẽꞌẽ ꞌre, dadâꞌâ uꞌâsi ne, te za tô ꞌre dahâimana zaꞌra. 22 Tane nherẽ, ꞌRe ihâimana uꞌâsi mono hã tinhiptetezé hã ma tô te te aima ꞌre sõmri zaꞌra waꞌwa oto, aiwasété ãna ãma ꞌre anomro aba mono da oto. Ma tô duré aima siꞌapito zaꞌra waꞌwa, taha ma si oto ꞌre romhuri zaꞌra waꞌaba mono da. Tahawa, ma tô, tiwi ꞌre asisawi zaꞌra waꞌaba mono ãna, aihâiba hã tãma ꞌre isõmri zaꞌra waꞌaba mo. Taha waꞌrãmi te za rowẽ uptabi na iꞌrata ꞌre aihâimana uꞌâsi zaꞌra waꞌaba mono zé hã te te aima ꞌre apisutu ꞌwa oto. 23 Dawasété na si ꞌre idanomro mono zé waꞌrãmi, te za dadâꞌâ uꞌâsi ne ꞌre dahâimana zaꞌra dapẽꞌẽ ꞌre, ꞌRe ihâimana uꞌâsi mono nhiti. Wanhibꞌapito Cristu Zezusihi ãma si ꞌre danomro mono wapsi, te za ꞌRe ihâimana uꞌâsi mono hã sõpru wa, te te dama ꞌre apisutu, iꞌrata ꞌre idahâimana uꞌâsi zaꞌra mono zéb da hã, asa tãma ꞌre idasiwaꞌâbâ zaꞌra mono zéb zô, sina ꞌre simnhasi mono ãna.